Tshapita 5

Eotwelo ka Yeso—Lende ndo etena kakɔna?

KAYISA ANGUSTA, nkumekanga ka woke ka Rɔmɔ, akadje didjango di’ɔnɛ onto tshɛ pombaka kalola l’osomba wakandotɔ dia tofundja lokombo lande lo dibuku. Diɔ diakɔ diatatshu Yɔsɛfu otsha l’osomba wa Bɛtɛlɛhɛma, lɛnɛ akandotɔ.

Anto efula wamboya la Bɛtɛlɛhɛma dia ndjofundja nkombo yawɔ lo dibuku, ɔnkɔnɛ paka l’okoto wa dongalonga oto mbambotana Yɔsɛfu nde la Mariya dihole dia vɔ mbidjasɛ. Lo dihole nɛ dialamawɔ ponda la nyama kina mbambotɔ Yeso. Mariya ambowɔmba l’ahɔndɔ ko ambowetamia lo elelo ka dongalonga, mbuta ate lo dihole diadjɛwɔ nyama diangɔ dia ndɛ.

Mɛtɛ, Nzambi mbakatshutshuya Kayisa Angusta dia nde mbidja ɔlɛmbɛ wa fundja nkombo y’anto lo abuku. Oma lo dikambo sɔ mbamboyotɔ Yeso la Bɛtɛlɛhɛma, osomba wakalakema edja la ntondo l’Afundelo oko dihole di’eotwelo k’owandji wakalakema.

Ande otsho w’ohomba lee! L’andja, lo dikambɔ, osase wambɔhɛtɛ olui ɔmɔtshi w’elami w’ɛkɔkɔ. Ɔsɔ ekɔ lotombo la Jehowa! Ko ondjelo wa Jehowa ambowatɛ ate: “Tanyukaki woma. Nyulungi, lambunyela lukumu l’ololo l’ongenongeno a wuki wayuyala le antu tshe, ne dia wambunyutela Ushimbedi lu ngelu ka Davidi elo. Ndi eli Kristu Khumadiondjo. One eli djimbitelu ya nyu mbeya. Nyayena ona udingami ahondo, etami l’elelu ka dungalunga.” Ko wonya akɔ, lemba lokina l’andjelo wamboya ko wambomɛ memba vate: “Lutumbu layali le [Nzambi, NW] l’ulungu. Ki kayali la kete l’atei w’antu [w’etema ɛlɔlɔ, NW].”

Lam’akatshu andjelo, elami w’ɛkɔkɔ wakatanɛ lam’asawɔ vate: “Tutshu kakiane utsha la Betelehema, tutenyi dikambu ne diambuya, diambutewuya [Jehowa].” Vɔ wambosamanya esadi esadi otsha lɛkɔ ko wambototana Yeso lo dihole diakawatɛ ondjelo. Etena kasanya elami w’ɛkɔkɔ kɛnɛ kakawatɛ ondjelo, onto tshɛ lôka dikambo diakɔ mambaka woho w’anyanya. Mariya ekɔ lo nama ɛtɛkɛta ɛsɔ tshɛ ndo ekɔ lo mbaomba l’atei w’otema ande.

Ɛlɔ kɛnɛ, anto efula fɔnyaka ɔnɛ Yeso akotɔ lo ngɔndɔ ka Diɛla Woke 25. Koko, Diɛla Woke ekɔ eleko k’avula, eleko ka tshitshi efula la Bɛtɛlɛhɛma. Elami w’ɛkɔkɔ kokokaka ndala l’otsho l’andja la dongalonga diawɔ l’eleko ka ngasɔ ka l’ɔnɔnyi. Ndo nto, Kayisa, nkumekanga ka Rɔmɔ, totondokoka mbidja didjango di’anto wambotayalaka la saki ka mbɔtɔmbɔkwɛ sala lɔkɛndɔ l’eleko ka tshitshi efula dia tofundja nkombo yawɔ lo abuku. Lo menda mɛtɛ, Yeso akotɔ ondo oya l’etatelo k’eleko kɔ̂lɔ akatshi ka l’ɔnɔnyi ɔsɔ. Luka 2:1-20; Mika 5:2.

▪ Lande na katatshu Yɔsɛfu nde la Mariya otsha la Bɛtɛlɛhɛma?

▪ Dikambo diakɔna dia diambo diakatombe l’otsho wakotɔ Yeso?

▪ Woho akɔna weyaso ɔnɛ Yeso kombotɔ lo Diɛla Woke 25?