Yeso Kristo​—Ngande wahombaso mboohɔka?

Lo Ngɔndɔ ka dikumi l’ahende, anto efula wa l’andja w’otondo mendaka esato ndo waa filmɛ yɛnyawɔ Yeso oko ɔna ashashi. Vɔ mbɛɛnyaka ele lo elelo ka dongalonga kana dihole diadjɛwɔ waa nyama mbo ya ndɛ. Onde sho pombaka mbohɔka Yeso paka oko ɔna ashashi?—a Ɛsɔ tɔsɛdingole woho woleki dimɛna wahombaso mbohɔka. Sho koka nkodja wetshelo oma lɔkɔ lo menda kɛnɛ kakakomɛ olui w’alami w’ɛkɔkɔ waki l’oswe waki suke la Bɛtɛlɛhɛma l’otsho ɔmɔtshi.

Ondjelo ɔmɔtshi akɛnama la shashimoya le alami w’ɛkɔkɔ. Nde akawatɛ ate: “Kristo Nkumadiɔndjɔ, Oshimbedi anyu ambotɔ ɛlɔ.” Ondjelo akawatɛ nto dia vɔ wayotana Yeso “ɔmbami ahɔndɔ ndo oshami lo dihole diatɔlɛka nyama.” L’ɔkɔngɔ wa laasɔ, andjelo akina efula wakɛnama ndo wakatatɛ ‘ntombola Nzambi.’

Otondonga wɛ mbakoke woho wakatombolaka andjelo Nzambi ngande wotoyaoka?— Alami w’ɛkɔkɔ wakangɛnangɛna efula. Vɔ wakate ɔnɛ: “Nyɛsɔ totshu la Bɛtɛlɛhɛma kele totende dikambo diambotomba sɔ.” Etena kakawakome lɛkɔ, vɔ wakatotana “Mariya la Yɔsɛfu ndo ɔna oshami lo dihole diakalɛka nyama.”

Kombeta edja, anto akina wakakome la Bɛtɛlɛhɛma lɛnɛ aki Mariya nde la Yɔsɛfu. Etena kakawatɛ alami w’ɛkɔkɔ kɛnɛ kakatombe, vɔ tshɛ wakambe efula. Onde wɛ ambɔngɛnangɛna dia mbeya akambo wa diambo asɔ?— Anto tshɛ woka Nzambi ngandji ngɛnangɛnaka vɔ lawɔ. Kakianɛ tendake lande na kele eotwelo ka Yeso kekɔ kiɔkɔ y’ɔngɛnɔngɛnɔ w’efula. Dia sho mbeya dui sɔ, tokalole l’ɔkɔndɔ wa Mariya la ntondo ka nde tshukama.

Lushi lɔmɔtshi, ondjelo ɔmɔtshi welɛwɔ Ngabriyɛlɛ akɛnama le Mariya. Ondjelo akɔ akolake dia ɔna lakandahombe ndjoota ayonga “woke, wayowelɛ vate: Ɔna Nkum’Olongo. Nde ayonga Nkumekanga ndo Diolelo diande hadiotonga l’ekomelo.”

Mariya akalange mbeya woho wakahombe awui asɔ kotshama, nɛ dia l’etena kɛsɔ ko nde ateyanaka la pami. Ɔnkɔnɛ, ondjelo Ngabriyɛlɛ akolembetshiya ate: “Nyuma k’ekila kayoya le yɛ ndo wolo wa Nkum’Olongo wayokokomba” ndo “Ɔna layotɔ ayelamɛ ɔnɛ ekila, Ɔna Nzambi.” Nzambi akɔshi lomu l’Ɔnande oma l’olongo ko akalidje l’otema wa Mariya ko nde akahame polo ndo ndjotɔ oko ɔna ashashi. Shi ɔsɔ mɛtɛ aki dihindo dia woke?

Onde wɛ atɛnaka asango kana filmɛ yɛnyawɔ “akanga a tomba” asato watatshu kaamɛ l’alami w’ɛkɔkɔ dia tenda ɔna ashashi Yeso?— Ase Lokristokristo mɛnyaka filmɛ shɔ mbala la mbala. Koko, filmɛ shɔ yekɔ ya kashi. Lo mɛtɛ, “akanga a tomba” asɔ waki waa astrɔlɔgɛ wakasalaka ditshelo diahalange Nzambi. Tende kɛnɛ kakatombe etena kakawakome. Bible mbutaka ɔnɛ: “Lam’akawɔtɔ lo luudu, vɔ wakatane ɔna la Mariya wa nyango.” Ɔnkɔnɛ, l’etena kɛsɔ ko Yeso aya bu ɔna ashashi lo dihole diakalɛka nyama, laasɔ ko nde aya mangase ele kaamɛ la Yɔsɛfu ndo Mariya lo luudu.

Ngande wakatane waa astrɔlɔgɛ Yeso?— Vɔ wakayalɔmbwamaka la “yɔɔtɔ,” yɔ kombalɔmbɔla mbala kakɔ ɔtɔi otsha la Bɛtɛlɛhɛma, koko yɔ yakatɔlɛ ntondo le nkumekanga Hɛrɔdɛ la Jɛrusalɛma. Bible mbutaka dia nkumekanga Hɛrɔdɛ akalangaka mbeya lɛnɛ aki Yeso dia nde mboodiaka. Laasɔ, ohokana yimba la dui nɛ. Oko le yɛ onto akɔna lakatome ɛngɔ kele oko yɔɔtɔ yakalɔmbɔla waa astrɔlɔgɛ otsha le Hɛrɔdɛ?— Aha Jehowa Nzambi mbakayitome, koko otunyi ande kana Satana Diabolo.

Ɛlɔ kɛnɛ, Satana ekɔ lo mpemba dia nkonya anto dia vɔ mfɔnya ɔnɛ Yeso eke paka oko ɔna ashashi lahomba kokamɛ. Koko, ondjelo Ngabriyɛlɛ akatɛ Mariya ɔnɛ: “Nde ayonga Nkumekanga . . . , ndo Diolelo diande hadiotonga l’ekomelo.” Kakianɛ, Yeso ekɔ lo mbolɛ oko Nkumekanga l’olongo ndo keema edja nde ayanga ndanya atunyi tshɛ waki Nzambi. Ngasɔ mbahombaso mboohɔka Yeso ndo sho pombaka mbutɛka anto akina dui sɔ.