Tshapita 7
Yeso nde la ase tomba
APAMI efula wamboya oma lo lɛkɛ l’Ehotwelo ka wonya. Vɔ mbaelɛka ɔnɛ ase tomba—kɛdikɛdi anto wata ɔnɛ vɔ kokaka nembetshiya akambo lo menda kiongamu ya tɔɔtɔ. Lam’akiwɔ lakawɔ lo lɛkɛ l’Ehotwelo ka wonya, vɔ wakɛnyi yɔɔtɔ mɔtshi y’oyoyo, ko vɔ wakayiyedi lo nkama mɔtshi ya kilɔmɛtɛlɛ polo ndo la Jerusalɛma.
Lam’okomi ase tomba asɔ la Jerusalɛma, vɔ wambombola vate: “Khum’ekanga k’asi Juda lutwi, lend’endi na? Ne dia shu takenyi yoto yandi lu leke l’Ehutwelu, mbambutuya dia ndjôtemola.”
Lam’oki Nkumekanga Hɛrɔdɛ dikambo sɔ, l’etena kɛnɛ ko nde ele la Jerusalɛma, nde ambotshimba yimba efula. Ɔnɛ êlɛnde ɛlɔmbɛdi a weke dia ndjowambola dihole diahomba Kristo mbotɔ. Vɔ wambôkadimola, lo ndjela kɛnɛ kakate Afundelo, vate: “La Betelehema.” Kam’okinde ɔsɔku, Hɛrɔdɛ ɔnɛ êlɛnde ase tomba ko nde mbatɛ ate: “Nyutshu, nyutushihudia dikambu dia ona shikaa. Lam’ayunyutuwena, kanyuyumvuteli, ndu dimi nkandjutshu la ntôtemola.” Tete mɛtɛ Hɛrɔdɛ ekɔ lo nanga mbeya dihole diele ɔna ate kele tôdiake!
Ase tomba wâkatshu nganɛ ko dikambo dimɔtshi dia diambo diambosalema. Yɔɔtɔ yakawɛnyi lam’akiwɔ lo lɛkɛ l’Ehotwelo ka wonya yôtatshu nto la ntondo kawɔ. Ɔsɔ mɛtɛ kema yɔɔtɔ ko yɔɔtɔ, nɛ dia yɔ yambɛnama paka dia mbalɔmbɔla. Ase tomba wambɔkɔlamɛ ndjiyela polo ndo lam’ambotemala yɔɔtɔ yakɔ lâdiko dia luudu lodjashi Yɔsɛfu nde la Mariya.
He ase tomba anɛ wɔ̂tɔ lo luudu, watane ko Mariya l’ɔnande lêke tshitshɛ lelɛwɔ ɔnɛ Yeso. Ko wonya akɔ, vɔ wambɔkɔlama la ntondo kande. Vɔ wambotondja paunyi, malashi, la mura oma l’atapa awɔ. L’ɔkɔngɔ diko, vɔ woyanga kalola dia totɛ Hɛrɔdɛ dihole diele ɔna, koko Nzambi ambowaewola lo dɔ ɔnɛ tanyosalake dikambo sɔ. Diɔ diakɔ diakawadjɛ lo mboka kekina dia vɔ kalola otsha lo wodja awɔ.
Lo ndjela kanyi yayɛ, akɔna akatome yɔɔtɔ shɔ yakalɔhɔ oma l’olongo dia ndjɔlɔmbɔla ase tomba na? Ohɔ dia, yɔɔtɔ yakɔ kosembɔ la wɔ tɔɔ otsha le Yeso la Bɛtɛlɛhɛma. Koko, vɔ wakalɔmbwama otsha la Jerusalɛma, lɛnɛ akawatohomanaka vɔ la Nkumekanga Hɛrɔdɛ, ɔnɛ lakalangaka ndjaka Yeso. Hɛrɔdɛ otodiaka ɔna otondoyala Nzambi kombekɛ lonya lande lam’akandewola ase tomba ɔnɛ tanyotshɔke dia towotɛ dihole diele Yeso. Satana Diabolo, otunyi wa Nzambi, mbakalangaka Yeso ndjakema, ɔnkɔnɛ nde akakambe la yɔɔtɔ shɔ dia nde pemba woho wa kotsha sangwelo diande. Mateu 2:1-12; Mika 5:2.
▪ Kakɔna kɛnya ɔnɛ yɔɔtɔ yakɛnyi ase tomba komonga yɔɔtɔ ko yɔɔtɔ na?
▪ Lende ele Yeso lam’awotani ase tomba na?
▪ Lande na keyaso ɔnɛ Satana mbakatome yɔɔtɔ shɔ dia nɔmbɔla ase tomba na?