Ambeyi w’akambo wa tɔɔtɔ wamboya ndjenda Yeso

Apami amɔtshi wakaye oma lo Ɛstɛ. Vɔ wekɔ ambeyi w’akambo wa tɔɔtɔ, mbuta ate anto weka woho wele tɔɔtɔ, lo mbuta dia lo nsala ngasɔ, vɔ wekɔ l’akoka wa mbisha tokitshimudi ta awui wa lo nsɛnɔ y’anto. (Isaya 47:13) Etena kakiwɔ lakawɔ lo Ɛstɛ, vɔ wakɛnyi “yɔɔtɔ” ndo wakayele “yɔɔtɔ” yakɔ nkama ya kilɔmɛtɛlɛ aha otsha la Bɛtɛlɛhɛma koko otsha la Jɛrusalɛma.

Lam’akakome ambeyi w’akambo wa tɔɔtɔ, vɔ wakambola vate: “Lende ele nkumekanga k’ase Juda kotwe? Nɛ dia takɛnyi yɔɔtɔ yande etena kakiso lo Ɛstɛ ndo tamboya ndjɔɔlɛmiya.”​—Mateo 2:1, 2.

Nkumekanga Hɛrɔdɛ ka la Jɛrusalɛma akoke losango lɔsɔ ko akomala efula. Ko nde akelɛ owandji w’ɛlɔmbɛdi la ewandji ekina w’ɔtɛmwɛlɔ w’ase Juda ndo akawambola lɛnɛ akahombe Kristo mbotɔ. Lo nkadimola lo yoho yɔtɔnɛ l’Afundelo, vɔ wakate ɔnɛ: “La Bɛtɛlɛhɛma.” (Mateo 2:5; Mika 5:2) Oma laasɔ, Hɛrɔdɛ akelɛ ambeyi w’akambo wa tɔɔtɔ lo woshɛshɛ ndo akawatɛ ate: “Nyotoyange ɔnakɔ dimɛna ndo naka nyambotowɛna, kanyoyombute kele dimi lawɔ kandjotshu dia tɔɔlɛmiya.” (Mateo 2:8) Koko, Hɛrɔdɛ akalange dia mɛna ɔna ndo mbodiaka!

L’ɔkɔngɔ wa ambeyi w’akambo wa tɔɔtɔ ntshɔ, dui dia diambo diakatombe. “Yɔɔtɔ” yakawɛnyi etena kakiwɔ lo Ɛstɛ yakatatshɔka la ntondo kawɔ. Mbokɛmaka hwe dia ɔsɔ komonga yɔɔtɔ ko yɔɔtɔ, koko yɔ yakatomama lo yoho ya laande dia mbalɔmbɔla. Ambeyi w’akambo wa tɔɔtɔ wakayele yɔɔtɔ yakɔ polo etena kakayatemala laadiko dia luudu lɛnɛ akadjasɛ Yɔsɛfu la Mariya la ɔnawɔ.

Etena kakɔtɔ ambeyi w’akambo wa tɔɔtɔ lo luudu, vɔ wakatane Mariya la ɔna, mbuta ate Yeso. Ko, ambeyi w’akambo wa tɔɔtɔ wakokusamɛ. Ndo vɔ wakawosha weshasha wa paonyi, tshɔ ya wɛma la mirɛ. Oma laasɔ, etena kakawalange nkalola otsha le Hɛrɔdɛ, Nzambi akawaewola lo dɔ diaha vɔ nsala dui sɔ. Ɔnkɔnɛ, vɔ wakakalola lo wodja awɔ lo mbeta lo mboka kekina.

Onto akɔna afɔnyayɛ akatondja “yɔɔtɔ” yakalɔmbɔla ambeyi w’akambo wa tɔɔtɔ? Ohɔ dia yɔ kombalɔmbɔla mbala kakɔ ɔtɔi le Yeso la Bɛtɛlɛhɛma. Koko, yɔ yakawalɔmbɔla otsha la Jɛrusalɛma, lɛnɛ akawatohomana la nkumekanga Hɛrɔdɛ, lakalange ndjaka Yeso. Ndo nde otosala dikambo sɔ otondonga Nzambi hekami l’atei ndo hewodi ambeyi w’akambo wa tɔɔtɔ diaha vɔ mbutɛ Hɛrɔdɛ lɛnɛ aki Yeso. Mbokɛmaka hwe dia, otunyi waki Nzambi Satana mbakalange dia ndjaka Yeso ndo nde akakambe la “yɔɔtɔ” dia nyanga dia nkotsha oyango ande.