Tshapita 8

Wambolawɔ kanga hiadi

YƆSƐFU ambemula Mariya oma lo djɔ dia nde mbotɛ dikambo diahombawɔ ntsha esadi esadi. Ondjelo wa Jehowa oma la mɛnama le nde, awotɛ ate: “Unela, osa ona la nyangu, ulawo utsha l’Edjibitu. Utudjase leko edja ndu lam’ayumukutela, ne dia Herode ayuyanga ona dia mbudiaka.”

Aha la tshimbatshimba, vɔ akɔ asato wambolawɔ. Hawohombe mbetsha wenya, nɛ dia Hɛrɔdɛ ambeya ɔnɛ ase tomba wambokesa ndo wambotomba oma lo wodja. Ohɔ dia, vɔ wakatalaki ɔnɛ: tayokalola dia ndjotɛ Hɛrɔdɛ dihole diayotototana Yeso. Hɛrɔdɛ ekɔ la kɛlɛ ka mamba. Ɔnkɔnɛ, dia nde pemba woho wa ndjaka Yeso, nde ambotoma dui dia vɔ ndjaka ana w’akɛnda w’apami tshɛ wele l’ɛnɔnyi tatɛ oma l’ehende oya l’ɛse waki la Bɛtɛlɛhɛma ndo lo bɛtshi dia nkɛtɛ dia l’osomba akɔ. Nde amboshikikɛ ɛnɔnyi ɛsɔ oma l’awui wakatawote ase tomba lam’akawaye oma lo lɛkɛ l’Ehotwelo ka wonya.

Woho wambodiakema ana w’akɛnda w’apami tshɛ ekɔ ndo wɔma menda! Asɔlayi waki Hɛrɔdɛ wekɔ lo tɔ̂tɔ lo luudu la luudu. Lam’atanawɔ ɔna pami l’ashashi, ko vɔ mbɔhɔtɔla oma l’anya wa nyango. Sho hateye lofulo l’ana wambowodiaka, koko alelo w’efula ndo akumu wa mamba w’ambutshi wa amato wambokotsha pɔlɔfɛsi ka lo Bible kakatama oma le Jeremiya, omvutshi wa Nzambi.

L’etena kasalema akambo asɔ, Yɔsɛfu nde la nkumbo kande wambotashilaka koma l’Edjibito aha ndoko la wâle, lekɔ mbodjashiwɔ l’etena kɛnɛ. Koko lushi lɔmɔtshi, l’otsho, ondjelo wa Jehowa amboyɛnama nto le Yɔsɛfu lo dɔ. Nde ambowotɛ ate: “Unela, osa ona la nyangu, utshu lu kete ya Isariyele, ne dia waku wakayangi ndjaka ona wambuvo.” Diɔ diakɔ diambokalola Yɔsɛfu nde la nkumbo kande lo wodja awɔ, ndo dikambo sɔ diambokotsha pɔlɔfɛsi kata ɔnɛ Nzambi ayeta Ɔnande oma l’Edjibito.

Aha la tamu, ondo Yɔsɛfu ekɔ la lokanyi la ndjodjasɛ la Judeya, lɛnɛ akawadjasɛka l’osomba wa Bɛtɛlɛhɛma la ntondo ka vɔ ndawɔ otsha l’Edjibito. Koko, nde ambôka ɔnɛ Arakɛlao, ɔn’aki nkumekanga la kɔlɔ, aya nkumekanga ka Judeya, ko lo dɔ dikina, Jehowa amboyowewola oma lo wâle akɔ. Ɔnkɔnɛ, Yɔsɛfu nde la nkumbo kande wambotshɔ otsha lo Ngɛl’a Nkushi ko wambotodjasɛ l’osomba wa Nazarɛta ka la Ngalileya. L’osomba ɔsɔ wanganyi la tɛmpɛlɔ k’Ase Juda, mbakole Yeso. Mateu 2:13-23; Jeremiya 31:15; Hosea 11:1.

▪ Lam’akakalola ase tomba, dikambo diakɔna dia wɔma efula diakasale Nkumekanga Hɛrɔdɛ, ko woho akɔna wakalamema Yeso na?

▪ Lam’okaludiwɔ oma l’Edjibito, lande na kahalangi Yɔsɛfu mbidjasɛ nto la Bɛtɛlɛhɛma na?

▪ Pɔlɔfɛsi yakɔna ya lo Bible yambokotshama l’etena kɛnɛ na?