Tshapita 9

Yeso lo nshi ya dikɛnda

NAZARƐTA ekɔ osomba wa tshitshɛ ndo wele bu ohomba l’etena kayole Yeso lɛkɔ. Osomba ɔsɔ wekɔ la Ngalileya, lo lɛtshi la nkɛtɛ l’akona, ndo hawanganyi etale l’Okidi wa dimɛna wa Jizerɛlɛ.

Lam’ele Yeso l’ɛnɔnyi ehende, ambutshi ande, Yɔfɛsu la Mariya, wambonɛ la nde oma l’Edjibitɔ, polo ndo kakianɛ, nde mɛtɛ mbele tshɔi y’ɔna yaki Mariya. Koko hatonga edja efula. Kem’edja, Jakɔba, Yɔsɛfu, Simɔna la Judasɛ wayoyotɔ, Mariya la Yɔsɛfu wayoyota ndo ana wa amato. L’ɔkɔngɔ diko, Yeso ayoyoyala l’akose w’apami olekanyi asamalo ndo wa amato.

Yeso ekɔ ndo l’ewotɔ ekina. Tamboshilaka mbeya dikambo diaki enondo ande, mbuta ate: Joani, ɔn’aki enondo a nyango, lodjashi la Judeya mangana la dihole sɔ kilɔmɛtɛlɛ mɔtshi. Koko, Salɔme mbidjasɛ la Ngalileya, suke la dihole diakɔ, nde mɛtɛ ekɔ kosh’aki Mariya. Salɔme akatshukama le Zebede, ɔnkɔnɛ, anawɔ ahende wakawelɛka Jakɔba la Joani waketanaka vɔ la Yeso ana l’ana. Sho hateye kana lam’akandayolaka, Yeso aketsha tena efula kâmɛ l’ana w’apami anɛ, koko l’ɔkɔngɔ diko, vɔ waya angɛnyi ande wa mamba.

Yɔsɛfu pombaka kamba efula dia ndesha nkumbo kande katafulanɛ. Nde ekɔ otshudi w’abaya. Yɔsɛfu ekɔ lo mbodia Yeso oko ɔnande hita, diɔ diakɔ dielɛwɔ Yeso ɔnɛ: “on’a utshudi w’abaya.” Yɔsɛfu ekɔ lo mbetsha Yeso dia nde ndjâla otshudi w’abaya ndo nde lawɔ, ko Yeso ekɔ lo mbeka olimu akɔ l’ɔlɔlɔ tshɛ. Diɔ diakɔ diowowelɛ ɔnɛ: “Utshudi mbendi.”

Lɔsɛnɔ la nkumbo ka Yɔsɛfu mpika etshina kalɔ lo ɔtɛmwɛlɔ wa Jehowa Nzambi. Lo ndjela Ɛlɛmbɛ wa Nzambi, Yɔsɛfu nde la Mariya mbishaka anawɔ wetshelo wa lo nyuma ‘lam’odjashiwɔ, lam’etamiwɔ, lam’atawakɛndakɛnda lo mboka ndo lam’etɔwɔ.’ Luudu lɔmɔtshi l’ɔtɛmwɛlɔ lekɔ la Nazarɛta, ndo sho kokaka shikikɛ ɔnɛ Yɔsɛfu ntshɔka la nkumbo kande mbala tshɛ dia tɔtɛmɔla Nzambi lɛkɔ. Aha la tamu, vɔ ngɛnangɛnaka efula l’etena kasalawɔ nkɛndɔ yawɔ ya mbala la mbala otsha lo tɛmpɛlɔ ka Jehowa ka la Jerusalɛma. Mateu 13:55, 56; 27:56; Mako 15:40; 6:3; Euhwelu k’Elembe 6:6-9.

▪ Olekanyi akose angana w’apami la wa amato wele la Yeso ndo naa nkombo y’amɔtshi wa l’atei awɔ?

▪ Anto akɔna asato woleki mbeyama wetana la Yeso ana l’ana na?

▪ Olimu akɔna wa l’emunyi wêka Yeso ndo lande na?

▪ Wetshelo akɔna w’ohomba efula wakasha Yɔsɛfu nkumbo kande?