Tshapita 15

Dihindo dia Yeso dia ntondo

AMBETA oko lushi ɔtɔi kana nshi hiende tsho l’ɔkɔngɔ wa Andɛlɛ, Petero, Joani, Filipɔ, Natanyɛlɛ, ondo ndo Jakɔba, monga ambeki wa ntondo waki Yeso. L’etena kɛnɛ, vɔ wotakalola otsha la Ngalileya, lo lɛtshi la nkɛtɛ lakawôtɔ. Vɔ wekɔ lo tatshu otsha la Kana, lɛnɛ akôtɔ Natanyɛlɛ, osomba akɔ ɔsɔ tanemaka lo nkɛtɛ y’akona ndo vɔ hawanganyi etale la Nazarɛta, lɛnɛ akôle Yeso. Wakawaele lo difɛstɔ dimɔtshi dia diwala la Kana.

Ndo nyango Yeso mbele lo difɛstɔ diakɔ sɔ dia diwala. Mɛtɛ, oko wênde ɔngɛnyi wa nkumbo ka wanɛ watshukana, Mariya akelame dia ndjokahanyɛka ase dambo diangɔ dia ndɛ la wanu la mɛsa. Diɔ diakɔ diambondɛna esadi eto ate: ɛngɔ kɛmɔtshi kaya bu, ko nde mbutɛ Yeso ate: “Vo kema la wanu.”

Mɛtɛ, lam’atɛnde Yeso dikambo sɔ, Mariya ekɔ lo mbɔlɔmba dia nde ntsha dikambo dimɔtshi ɔnɛ kele wanu watohombamake, koko Yeso hetawɔ mbala kakɔ ɔtɔi. Mbawombolande ate: “Dikambu diakona diasami la ye?” Oko wende Nkumekanga kakasɔnama oma le Nzambi, angɛnyi ande kana nkumbo kande hawokoke mbotomɛ awui dia nde sala dikambo dimɔtshi. Ɔnkɔnɛ, oma lo lomba lele lande, Mariya ambotshika akambo tshɛ l’anya w’ɔnande, atɛ paka ekambi wa lo dambo dia tshuki ate: “Nyutshi kene tshe kayundunyutela.”

Mbaka shamalo y’ave yekɔ, mbaka la mbaka kokaka mbɔtɔ litɛlɛ 40. Yeso mbatɛnde ekambi wa lo dambo ate: “Nyuludia mbaka l’ashi.” Ko ekambi ɛsɔ ndjilodja polo ndo l’ɛlɔmɔ. Ko Yeso ambowatɛ ate: “Nyotekole kakiane; nyotole le olombodi wa dambu.”

Ɔlɔmbɔdi wa dambo ambamba heyama lam’olonginde wanu, ko amɛna wa mamba, koko nde heye ɔnɛ oma lo dihindo mbotombiwɔ. Ɔnɛ êlɛnde otshuki a wadi, ko nde mbotɛ ate: “Untu tshe atukimoka wanu w’ololo ntundu. Lam’ayuwono efula, vo wayukimo wane waha ololo efula. Keli we akalami wanu w’ololo edja ndu kakiane.”

Ɔsɔ mbele dihindo dia Yeso dia ntondo, ndo lam’odiɛnyiwɔ, mbetawɔ k’ambeki ande w’eyoyo kambokeketshama. L’ɔkɔngɔ w’akambo asɔ, Yeso ambotshɔ l’ambeki ande kâmɛ la nyango ndo l’akosɛnde otsha l’osomba wa Kapɛrɛnauma, suke la Ndjale ka Ngalileya. Joani 2:1-12.

▪ L’etena kakɔna ka l’olimu wa Yeso kasalema dambo dia diwala dia la Kana?

▪ Lande na kambotona Yeso ntondo dia sala kɛnɛ kawotɛ nyango?

▪ Dihindo diakɔna diambosala Yeso, ndo etombelo akɔna wele la diɔ le anto akina na?