Tshapita 22

Ambeki anɛi wambelamɛ

L’ƆKƆNGƆ wa nde pandɔ oma lo nyɔi koniwɔ mbodiaka l’osomba awɔ wa Nazarɛta, Yeso ambotshɔ l’osomba wa Kapɛrɛnauma, suke la Ndjale ka Ngalileya. Dikambo sɔ diambokotsha pɔlɔfɛsi kekina k’Isaya. Pɔlɔfɛsi kata ɔnɛ anto wa la Ngalileya, wodjashi l’omamu wa ndjale wayɛna osase a woke.

Wonya watandatetemala mpɛtsha osase ande lo sambisha Diolelo lo dihole nɛ, Yeso ambɛna ambeki ande anɛi. Ambeki akɔ asɔ wakatshɔkaka la nde lo nkɛndɔ yande, koko wakayokalola l’olimu awɔ w’amundji a nse tatɛ oma lam’akawakalola vɔ la Yeso oma la Judeya. Ondo mɛtɛ Yeso ekɔ lo mbayanga l’etena kɛnɛ, nɛ dia etena kambokoka dia nde ndjâla l’akimanyedi wa pondjo, wanɛ wakokande ndowanya dia vɔ ndjotetemala l’olimu ande layondotshɔ.

Ɔnkɔnɛ, wonya watandalɔndɛ omamu wa ndjale, Yeso ambɛna Simɔna Petero kâmɛ l’anyande wasola ɛtɛi awɔ, ko nde ambosembɔ otsha le wɔ. Nde ambɔtɔ lo wâto waki Petero ko ambɔ̂lɔmba dia nde nsɛmiya wâto oma l’ɔkɛngɛ. Wambɔsɛmɛ yema oma l’ɔkɛngɛ, Yeso ambodjasɛ lɔkɔ ko ambotatɛ mbetsha olui w’anto wele l’omamu wa ndjale.

L’ɔkɔngɔ diko, Yeso ambotɛ Petero ate: “Mosemiya watu utsha lu dingunda, nyukitshakitsha tei yanyu, keli nyokoke nsi.”

Ko Petero ate: “[Ombetsha, NW], shu takatshi ulimu utshu tshe, hatundji nduku engo. Keli layukitshakitsha tei ne dia diui diaye.”

V’anɛ wadja ɛtɛi l’ashi, ko wambonda nse efula ndo ɛtɛi wambotatɛ mbatɛ. Aha la tshimbatshimba, vɔ wambeta anyawɔ wele lo wâto okina wele suke dia ndjâkimanyiya. Nse yamboleka efula lo yɛdikɔ yele wâto akɔ ehende wambolola ko wambotatɛ la ndjita. Kam’ɛnyinde ɔsɔku, Petero ambɔkɔ l’ekolo wa Yeso ko nde lande ate: “Khumadiondjo, umo uma le mi, ne dia untu a kolo kemi.”

Yeso nde lande ate: “Tukaki woma. Uma ka kakiane, we ayundaka antu [wasɛna, NW].”

Yeso ambeta ndo Andɛlɛ, ɔnango Petero. Nde ambâtshutshuya ate: “Nyundjeli, ku layunyuhiluya amundji w’antu.” Yeso ambeta ndo anyawɔ w’amundji a nse, Jakɔba la Joani, ana wa Zebede, ko vɔ wambetawɔ leeta lakɔ aha la kandakanda. Ɔnkɔnɛ, anto asɔ anɛi wambotshika olimu awɔ w’amundji a nse ko wamboyala ambeki anɛi wa ntondo wambotatɛ ndjela Yeso pondjo pondjo. Luka 5:1-11; Mateu 4:13-22; Mako 1:16-20; Isaya 9:1, 2.

▪ Lande na kêlɛ Yeso ambeki ande dia vɔ mboyela, ndo wa na wele ambeki akɔ asɔ?

▪ Dihindo diakɔna diambokiya Petero wɔma?

▪ Woho akɔna wa nse wambêlɛ Yeso ambeki ande dia vɔ ndjonda?