Ambeki anɛi wayanga monga amundji w’anto

L’ɔkɔngɔ w’ase Nazarɛtɛ nyanga dia ndjaka Yeso, nde akatshu l’osomba wa Kapɛrnauma suke la Ndjale ka Ngalileya, kelamɛ nto “oduwa wa Ngɛnɛzarɛta.” (Luka 5:1) Dui sɔ diakakotsha prɔfɛsiya ka lo dibuku d’Isaya kata dia ase Ngalileya wodjashi l’omamu wa ndjale wayɛna osase wa woke.​—Isaya 9:1, 2.

Eelo, lanɛ la Ngalileya, Yeso ambotetemala mbewoya dia “Diolelo dia l’olongo diaya suke.” (Mateo 4:17) Yeso ambotana ambeki ande anɛi. Vɔ wakɛngɔla la nde ntondo, koko lam’akawakalola la Yeso oma la Judeya, vɔ wakatokalolaka nto l’olimu awɔ wa munda nse. (Joani 1:35-42) Koko, kakianɛ etena kambokoka ka vɔ mongaka wonya tshɛ la Yeso dia nde mbowalowanya woho wa vɔ ntetemala la olimu w’esambishelo l’ɔkɔngɔ w’otshuelo ande.

Lam’akatetaka Yeso l’omamu w’ashi, nde akɛnyi Simɔna Petero, Andɛlɛ w’ɔnango ndo asekawɔ amɔtshi walɔngɔsɔla ɛtɛyi awɔ. Yeso akatshu otsha le wɔ, akadɛ lo waato waki Petero ndo akɔlɔmbɛ dia nde sɛmɛ yema otsha l’atei. Lam’akawasɛmɛ yema, Yeso akadjasɛ ndo akatatɛ mbetsha elui w’anto wakasangana l’omamu akambo wa mɛtɛ wendana la Diolelo.

L’ɔkɔngɔ diko, Yeso akatɛ Petero ate: “Nyomɔtɔla waato otsha lo dingunda kele nyoke ɛtɛyi anyu l’ashi.” Petero akate ate: “Ombetsha, takadiɛnɛ otsho w’otondo ko hatondji ndooko ɛngɔ, koko lam’ele wɛ kambota, layanga mboka ɛtɛyi l’ashi.”​—Luka 5:4, 5.

Vɔ wakatambiya ɛtɛyi ndo wakande nse efula ka mamba polo ndo ɛtɛyi wakatatɛ mbatɛ! La shamanya tshɛ, vɔ wakelɛ asekawɔ waki lo waato waki suke la wɔ dia ndjaakimanyiya. Esadi eto waato akɔ ehende wakalole la lokema la nse, ko vɔ wakatatɛ ninda la wotsho. Lam’akandɛnyi dui sɔ, Petero akakusama la ntondo ka Yeso ndo akate ate: “Nkumadiɔndjɔ, mɔ oma lalemi, nɛ dia dimi lekɔ otshi wa pɛkato.” Yeso akawotɛ ate: “Takoka wɔma. Oma ko kakianɛ, wɛ ayondaka anto wasɛna.”​—Luka 5:8, 10.

Yeso akatɛ Petero la Andɛlɛ ate: “Nyondjele, ko dimi layonyokonya amundji w’anto.” (Mateo 4:19) Nde akelɛ ndo amundji akina wa nse ahende, Jakɔba la Joani, ana wa Zebede. Vɔ lawɔ nto wakoyele aha la mengenga. Ɔnkɔnɛ ambeki anɛi asɔ wakatshike olimu awɔ wa munda nse ndo wakakome ambeki waki Yeso wa ntondo wa lo tena tshɛ.