Tshapita 23

Ahindo akina la Kapɛrɛnauma

YESO akete ambeki ande anɛi wa ntondo dia vɔ mboyela—Petero, Andɛlɛ, Jakɔba la Joani—ko lo Sabato kakayelana, vɔ tshɛ wambotshɔ lo ɛtɛmwɛlɔ ka la Kapɛrɛnauma. Lɛkɔ, Yeso ambotatɛ mbetsha anto ko vɔ wambamba efula nɛ dia nde ekɔ lo mbaetsha wate kana onto lele la lowandji koko aha oko afundji.

Lushi l’ɛlɔ la Sabato, onto ɔmɔtshi lele l’ɔdiɛngɛ ekɔ lâwɔ. Oheta tshanda, nde ambotatɛ pangɔhangɔ ate: “We Jesu y’usi Nazareta dikambu diakona diasasu la ye? Dimi keyaka, [Okilami wa Nzambi, NW] keye.”

Mɛtɛ, ɔdiɛngɛ wâhemɛ onto ɔsɔ ekɔ ondjelo waki Satana. Yeso mbôhangwɛnde ate: “Lembohala, tumba uma le ndi!”

Ko ɔdiɛngɛ mbahahanyande pami kakɔ, ahangɔhangɔ la wolo tshɛ. Koko nde ambotomba oma le nde aha la mbôkadia wâle. Anto tshɛ wambotshikala la diambo! Vɔ tshɛ wombwanaka vate: “Na ne na?  . . . Ndi eko la wulu wa nsengola ndu edienge, ku vo nkitanyia diui diandi!” Lokumu la dikambo sɔ lambodiangana lo bɛtshi dia nkɛtɛ tshɛ dia l’emamu.

Yeso nde l’ambeki ande wambotomba oma l’ɛtɛmwɛlɔ ko wambotshɔ laka Simɔna, ɔnɛ lelɛwɔ nto ɔnɛ: Petero. Nyango wadi a Petero ekɔ la demba dja dia wolo. Ɔnɛ awɔsɛngasɛngawɔ vate: ‘Kimanyiyande lam’alangayɛ.’ Ɔnkɔnɛ, Yeso mbasukanande otsha le nde, mbôkimɛnde lo lonya, ko mbêtola. Ko wonya akɔ, nde ambɔkɔlɔngana ko ambotatɛ la mbakatɛ mbo ya ndɛ!

L’ɔkɔngɔ diko, la tosho ta shimba, anto w’oma l’ahole tshɛ wambotatɛ ndja oya lo luudu laki Petero kâmɛ l’ɛkɔnyi awɔ. Kem’edja, osomba w’otondo wambotshumana la soko dia luudu! Ko Yeso ambɔkɔnɔla ɛkɔnyi awɔ tshɛ, oyadi hemɔ yakɔna tshɛ yatatawɔ. Nde ambotondja kânga ɛdiɛngɛ oma le anto wele lawɔ! Etena kâtondjande, ɛdiɛngɛ akɔ wekɔ lo pangɔhangɔ vate: “On’a [Nzambi, NW] keye!” Ko Yeso ambâhangwɛ, ambâshimba dia vɔ ntɛkɛta nɛ dia vɔ mbeyaka ɔnɛ nde kele Kristo. Mako 1:21-34; Luka 4:31-41; Mateu 8:14-17.

▪ Dikambo diakɔna diambotomba lushi la Sabato la l’ɔkɔngɔ wa Yeso mbelɛ ambeki ande anɛi dia vɔ mboyela?

▪ Lende atatshu Yeso l’ɔkɔngɔ wa nde mumɔ oma l’ɛtɛmwɛlɔ, ndo dihindo diakɔna diambondotosala lɛkɔ na?

▪ Kakɔna kambosalema la dikɔlɔ dia lushi lakɔ lâmɛ?