Tshapita 32

Kakɔna kakoka salema lushi la Sabato?

LUSHI lokina la Sabato, Yeso ambɔtɔ lo ɛtɛmwɛlɔ kɛmɔtshi kosukanyi la Ndjale ka Ngalileya. Pami kɛmɔtshi kele la lonya l’omi lamboma ekɔ lɛkɔ. Afundji l’Afarisɛ wekɔ lo mɔnga Yeso dia menda kana nde ayowɔkɔnɔla. L’ɔkɔngɔ diko, mbayowowombola vate: “Eko ekila nkonoya antu lushi [la sabato, NW]?”

Ewandji w’ɛtɛmwɛlɔ w’Ase Juda fɔnyaka ɔnɛ ndoko onto lele la dikimɔ dia nkɔnɔya onto lushi la Sabato paka naka lɔsɛnɔ lande laya lo wâle. Oko ɛnyɛlɔ, vɔ mbetshaka ɔnɛ: kema ɔlɔlɔ nkaloya weka w’onto kana mɔmba diɔmbɔ lo edada kele l’onto lushi la Sabato. Ɔnkɔnɛ, afundji l’Afarisɛ wakuki Yeso dimbola sɔ paka dia mbonda l’ɛkɔmɔ.

Koko Yeso mbeyaka tokanyi tawɔ. Nde mbeyaka nto ɔnɛ vɔ wekɔ la lokanyi la tshambandeko ndo lahɔtɔnɛ l’Afundelo lo dikambo dia ɛɔnywɛlɔ k’ɔlɛmbɛ wasekɛ onto sala olimu lushi la Sabato. Ɔnkɔnɛ, Yeso ambɔlɔngɔsɔla owanu ɔmɔtshi lam’asande lawɔ lo mbutɛ pami kele la lonya lamboma ate: “Unela, [kele yaka l’atei, NW].”

Yeso mbasekesɔnde otsha le afundji l’Afarisɛ ko nde mbatɛ ate: “Untu akona l’atei anyu ele la okoko otoi, naka vo wamboko lo difuku lushi la [sabato, NW], ku ndi hûkimela dia mbutundja?” Lam’ele ɔkɔkɔ kokaka kundjiyɛ onto falanga y’efula, onto hakoke mbotshika lo difuku polo ndo la wedi a pindju, nɛ dia vɔ kokaka ndjovɔ ko nde ndjoshisha falanga. Ndo nto, Afundelo mbutaka ɔnɛ: “Untu ololo atukanelaka elungalunga kandi.”

Kakianɛ, Yeso ambɛnya ohomba w’ɛtɛkɛta ande, ata ate: “Nd’efula kuleki untu ushinga wa okoko li! Okone ntsha dikambo di’ololo lushi la [sabato, NW] kema ekila.” Ewandji w’ɛtɛmwɛlɔ wambotshikala enyɔ ku la ntondo k’ɛtɛkɛta wa ngasɔ waki Yeso woludi la yimba ndo la kɛtshi, ko hawoyɔkɔsula kânga lɔkɔsu.

Yeso amboka nkɛlɛ ndo asolo ande wambɔkɛta lo menda dinginya diawɔ la ɛtɛ wolo awɔ, ko nde ambotatɛ mbakɛsakɛsa. Nde la pami kakɔ ate: “Usimbuli lunya laye.” Ongo mbalosembolande ko lonya lakɔ lambɔkɔnɔ.

Lo dihole dia vɔ ngɛnangɛna l’ɔtɛ w’ɛkɔnwɛlɔ kɛsɔ, Afarisɛ wambotomba ko, aha la tshimbatshimba, vɔ l’aseka Hɛrɔdɛ wambotɔtɔ sheke dia ndjaka Yeso. Aseka Hɛrɔdɛ asɔ wekɔ olui ɔmɔtshi wa pɔlitikɛ wele ndo l’Asaduka l’atei awɔ ondo. Esangɔ efula, aseka Hɛrɔdɛ l’Afarisɛ hawokana kânga yema lam’asawɔ, koko dia ndɔshana la Yeso vɔ waya kâmɛ. Mateu 12:9-14; Mako 3:1-6; Luka 6:6-11; Tukedi 12:10; Etumbelu 20:8-10.

▪ Woho akɔna wambɔngɔsɔla Yeso owanu ɔmɔtshi lam’asande l’ewandji w’ɛtɛmwɛlɔ w’Ase Juda?

▪ Dikambo diakɔna diafɔnya ewandji w’ɛtɛmwɛlɔ w’Ase Juda lo kɛnɛ k’endana l’ɔkɔnwɛlɔ w’onto lushi la Sabato na?

▪ Ɛnyɛlɔ kakɔna kambosha Yeso dia nde kɔsha tokanyi tawɔ ta kɔlɔ?