Kakɔna ketawɔma nsala lushi la sabato?

Lushi lokina la Sabato, Yeso akatshu lo shinangɔnga kekina ondo ka la Ngalileya. Lɛkɔ nde akatane pami kakome lonya l’omi. (Luka 6:6) Afundji la Afarisɛ wakendaka Yeso tɛɛ. Lande na? Vɔ wakashola kɛnɛ kaki mɛtɛ oyango awɔ etena kakawambola ɔnɛ: “Onde ekɔ kɔlɔ nkɔnɔla onto lushi la Sabato?”​—Mateo 12:10.

Ewandji w’ɔtɛmwɛlɔ w’ase Juda wakɔsaka dia nkɔnɔla bu kɔlɔ lushi la Sabato paka naka lɔsɛnɔ lekɔ lo waale. Ɔnkɔnɛ, aki kɔlɔ ɛnyɛlɔ lushi la Sabato dia nkaloya weka wakasekɔ kana mɔmba onto mpota, nɛ dia lɔsɛnɔ bu lo waale. Mbokɛmaka hwe dia afundji ndo Afarisɛ komboka Yeso dimbola l’ɔtɛ wakawayakiyanyaka l’otema ɔtɔi dikambo dia pami kakasowaka kɛsɔ. Vɔ wakayangaka dia nkondja yɛkɛ nɛndɛ dia ntana Yeso l’onongo.

Koko Yeso akeye ekanelo kawɔ ka yimba ka kɔlɔ. Nde akashihodia dia vɔ waki la kanyi ya kɔlɔ efula, yahɔtɔnɛ l’afundelo lo kɛnɛ kendana la nsekola ɔlɛmbɛ wata diaha nkamba olimu lushi la Sabato. (Etombelo 20:8-10) Wamboshilaka la mɔnyɔla Yeso lo yoho ya kɔlɔ ya ngasɔ lo elimu ande w’ɔlɔlɔ. Kakianɛ, Yeso ambota dui dimɔtshi diayowatshutshuya dia nyomowana la nde wolo lo mbutɛ pami kaki la lonya lamboma ate: “Emala, yaka lanɛ l’atei.”​—Makɔ 3:3.

Lo nkadimɔ otsha le afundji la Afarisɛ, Yeso akate ate: “Onto akɔna l’atei anyu lele l’ɔkɔkɔ ande 1, ko naka vɔ wambotambɛ lo difuku lushi la Sabato ko nde hɔtɔ lɔkɔ dia mbotondja?” (Mateo 12:11) Monga la ɔkɔkɔ akalembetshiyaka monga la dikuta dia kambe, diakɔ diele takawakoke mbotshika lo difuku polo la wedi a pindju; vɔ mbeyaka ndjovɔ ko vɔ ndjoshisha. Ndo nto, Afundelo mbutaka ɔnɛ: “Onto ɔlɔlɔ kanɛka dongalonga diande.”​—Tokedi 12:10.

Lo nkamba la wɛdikelo wokɛma hwe, Yeso akatetemala mbuta ate: “Shi onto ndeka ɔkɔkɔ nɛmɔ la fwa? Ɔnkɔnɛ, ekɔ dimɛna nsala dikambo di’ɔlɔlɔ lushi la Sabato.” (Mateo 12:12) Laasɔ, Yeso kɔmɔnyɔla lushi la Sabato lo nkɔnɔla pami kɛsɔ. Ewandji w’ɔtɛmwɛlɔ komonga l’akoka wa ntona ekanelo ka yimba kokɛma hwe ndo koludi la kɛtshi kɛsɔ. Vɔ wakatshikala tsho ki.

La nkɛlɛ ndo la lonyangu, oma l’ekanelo kawɔ ka yimba ka kɔlɔ, Yeso akende anto waki lawɔ, ko akatɛ pami kakɔ ate: “Sembola lonya layɛ.” (Mateo 12:13) Etena kakasembola pami kakɔ lonya lande lakome, lɔ lakakɔnɔ. Ɔsɔ aki dui di’ɔngɛnɔngɛnɔ le pami kɛsɔ, ko shɛngiya yakɔna yaki la dui sɔ le wanɛ wakayangaka dia minda Yeso?

Lo dihole dia monga l’ɔngɛnɔngɛnɔ dia lonya la pami kɛsɔ lambɔkɔnɔ, Afarisɛ wakatshu ndo mbala kakɔ ɔtɔi wakɔtɔ sheke “kaamɛ la aseka Hɛrɔdɛ dia [ndjaka Yeso].” (Makɔ 3:6) Ondo tshunda dia pɔlitikɛ sɔ diaki ndo l’anto wa lo yaato y’ɔtɛmwɛlɔ wakawelɛka Asadukɛ. Asadukɛ ndo Afarisɛ wokongaka atunyi nshi tshɛ, koko kakianɛ, vɔ wambosangana kaamɛ dia ndɔshana la Yeso.