Tshapita 55

Ambeki efula wambotshika ndjela Yeso

YESO ekɔ lo mbetsha anto lo luudu l’ɔtɛmwɛlɔ la la Kapɛrɛnauma dikambo di’endana l’ɔkɛndɛ wele lande oko mapa w’oma l’olongo. Ondo dako sɔ diashande diekɔ etenyi kɛmɔtshi k’ɔkɛtshanyelo wakandasale nde l’anto wakayowɛna lam’akawayakalolaka oma lo wedi wa l’Ehotwelo ka Wonya wa Ndjale ka Ngalileya, lɛnɛ akawale mapa la nse lo dihindo.

Yeso ambotetemala mbuta ate: ‘Demba diami mbele mapa wayomokimɔ lo dikambo dia lɔsɛnɔ l’andja ɔnɛ.’ Ambeta yɛdikɔ y’ɛnɔnyi ehende, l’eleko kamɔnga akatshi ka l’ɔnɔnyi 30 T.D., Yeso akatɛ Nikɔdɛmɔ ate Nzambi akalange andja otamanya, ongo akandakimɔ Ɔnande oko Oshimbedi. Diɔ diakɔ diɛnya Yeso ɔnɛ onto tshɛ lalɛ demba diande lo yoho ya didjidji, lo monga la mbetawɔ l’olambo wende suke la nkimɔ, kokaka kondja lɔsɛnɔ la pondjo.

Koko anto wambotakana lam’okiwɔ ɛtɛkɛta ɛsɔ wotshi Yeso. Wombwana vate: “Ukundi weya untu one ntusha dimba diandi dia shu dile?” Yeso nangaka mbaokiya ɔnɛ aha lo mɛtɛ mɛtɛ mbahombawɔ ndɛ demba diande koko lo didjidji. Ɔnkɔnɛ, dia nde tɔtɔmiya dikambo sɔ, nde ambota dui dikina nto dioleki wolo le anto dia vɔ dietawɔ naka vɔ diɔsa lo yoho ya mɛtɛ mɛtɛ.

Yeso nde lawɔ ate: “Nyu hanyuyala la lumu la pundju l’etema anyu, naka hanyuli dimba dia On’a untu, ndu hanyonwe dikila diandi. One lale dimba diami, ndu lano dikila diami, ndjalaka la lumu la pundju. Dimi layuwulula lushi l’ekumelu, ne dia dimba diami dieko engo ka nde ka mete, dikila diami dieko enono ka mete. One lale dimba diami, lano dikila diami, ndi eko [kâmɛ lami, ndo dimi lekɔ kâmɛ lande, NW].”

Mɛtɛ, wetshelo ɔsɔ wotoyala kɔlɔ ka tshɛ otondonga Yeso akatshutshuyaka anto dia vɔ ndɛ emunyi w’onto la nɔ dikila di’onto. Koko lo mɛtɛ, Yeso hakeketshisha ampokami ande dia vɔ ndɛ demba kana nɔ dikila dia mɛtɛ mɛtɛ. Nde ekɔ lo nkɔkɔmiya ɔnɛ wanɛ tshɛ walanga kondja lɔsɛnɔ la pondjo pombaka monga la mbetawɔ l’olambo wende suke la nkimɔ lo nambola demba diande ndo lo kɛdia dikila diande. Koko kânga l’atei w’ambeki ande, efula hawolange mana wetshelo fundo ande ko wota vate: ‘Ɔtɛkɛta ɔsɔ kandji; akɔna akoka mbohokamɛ?’

Lam’ɛnyinde ɔnɛ ambeki ande efula wambotatɛ ngunanguna, Yeso ambota ate: “Undi, dikambu so diambunyutakanya? Ukundi ayunyutsha lam’ayunyena On’a untu atambela utsha lene akindi na? . . . Aui wakamanyutedi mbeli [n]yuma la lumu. Keli nyu amotshi hanyetawo.”

Yeso ambotetemala mbuta ate: ‘Diɔ diakɔ dianyotɛmi nte: Ndoko onto lokoki ndja le mi naka Papa hawetawe.’ Kam’okiwɔ ɛtɛkɛta ɛsɔ, ambeki ande efula wambomɔ ko vɔ hawoyowoyela nto. Yeso mbasekesɔnde otsha le apɔstɔlɔ ande 12 ko nde mbambola ate: “Ndu nyu mbalanga ntsho?”

Ko Petero mbôkadimolande ate: “Khumadiondjo, le na atshosu? We keli la aui wa lumu la pundju. Shu taketawo; shu mbeyaka shati: We keli [Okilami wa Nzambi, NW].” Mɛtɛ, Petero nde l’apɔstɔlɔ akina wekɔ la kɔlamelo ya mamba, nɛ dia ondo vɔ hawoshihodia wetshelo washa Yeso lo dikambo sɔ, koko hawɔsɛki!

Kânga mbɔngɛnyingɛnyinde okadimwelo waki Petero, Yeso ambota dui nɛ ate: ‘Shi dimi mbakanyɔsɔnɛ nyu akɔ dikumi l’ahende? Koko ɔmɔtshi a l’atei anyu ekɔ omamanyishi.’ Nde ekɔ lo ntɛkɛta dikambo dia Judasɛ Isakariyɔtɛ. Ondo l’etena kɛnɛ ko nde ambotatɛ mbishola “etatelo” ka lɔkɛwɔ la kɔlɔ le Judasɛ.

Yeso oma la tona dia ngɛnyangɛnya nsaki y’anto, nɛ dia nde akatunyi vɔ mbodja nkumekanga, ndo ondo vɔ wekɔ lo ndjatɛ ɔnɛ: ‘Onto ɔnɛ woho akɔna wakokande monga Mɛsiya lam’ele nde halange kotsha ɔkɛndɛ wa Mɛsiya?’ Ɔsɔ nto ekɔ dimbola diahɛtahɛta lo timba tawɔ. Joani 6:51-71; 3:16.

▪ Yeso ambokimɔ demba diande lo dikambo dia wa na, ndo woho akɔna wakokawɔ ndɛ ‘demba diande’?

▪ Naa ɛtɛkɛta ekina wambɔtɛkɛta Yeso wambômadja anto, ko kakɔna katɛtɛnde?

▪ Kakɔna kambota Petero lam’ambotshɔ ambeki efula ko wambɔsɛka Yeso?