Wembola w’oma le ambadi

Kakɔna kalembetshiya monga “la lumu l’utema andi ndame”?

Bible mbutaka lo dikambo dia Yeso ɔnɛ nde aki la “lumu l’utema andi” ndo di’ambeki ande ɔnɛ vɔ waki la ‘lomu l’etema awɔ.’ (Joani 5:26; 6:53) Koko, avɛsa ahende ango kema l’olembetshiyelo akɔ wâmɛ.

Yeso akate ate: “Uku eli Shi la lumu l’utema andi ndame, osoku ndi akasha Ona dia ndu ndi ndjala la lumu l’utema andi.” La ntondo ka nde mbuta ɛtɛkɛta wa diambo engo, Yeso akate ate: “Mete, mete kanyutelami nti: One luka diui diami, letawo lakantumi, ndi eko la lumu la pundju. . . Etena kambukuka, keko kakiane, kayuka edu diui dia Ona [Nzambi]. Wane wawetawo wayuyala la lumu.” Lanɛ Yeso akatɛkɛtaka dikambo dia nkudu ka mamba kakawosha She​—mbuta ate dikoka dia mbisha anto eongelo k’anto wetawɔma le Nzambi. Lâdiko dia lâsɔ, Yeso ekɔ l’akoka wa mbolola wanɛ tshɛ woladi djɔ lo nyɔi ndo mbasha lɔsɛnɔ. Le Yeso, monga “la lumu l’utema andi” mɛnyaka dia nde akalongola nkudu ka sala akambo wɔtɛkɛtshiso ango. L’ɛnyɛlɔ ka She, Ɔna nde lawɔ ekɔ ‘la losha la lɔsɛnɔ l’otema ande ndamɛ.’ (Joani 5:24-26) Ko kakɔna kayotota lo dikambo di’ambeki ande na?

Yɛdikɔ y’ɔnɔnyi ɔtɔi oma lâsɔ, Yeso akatɛ ampokami ande ate: “Mete, mete, kanyutelami nti: Nyu hanyuyala la lumu la pundju l’etema anyu, naka hanyuli dimba dia On’a untu, ndu hanyonwe dikila diandi. One lale dimba diami, ndu lano dikila diami, ndjalaka la lumu la pundju. Dimi layuwulula lushi l’ekumelu.” (Joani 6:53, 54) Lanɛ Yeso ekɔ lo mɛnya diɔtɔnganelo diele lam’asa monga la “lumu l’utema andi” la “ndjala la lumu la pundju.” L’Afundelo wa Grɛkɛ, sho tanaka l’ahole akina ditelo diafundama oko woho akɔ wâmɛ l’etelo kata ɔnɛ monga “la lumu l’etema anyu.” Bɛnyɛlɔ dihende diashikikɛ dui sɔ diɔ nɛ: “Nyuyali la leho l’etema anyu” ndo etelo k’ɔnɛ: “wambulungula difutu.” (Mako 9:50; Romo 1:27) Lo bɛnyɛlɔ ndo, ɛtɛkɛta wa lɔkɔ halembetshiya monga la nkudu ka mbidja lɛhɔ l’etema w’anto akina kana monga la nkudu ka mbisha onto ɔmɔtshi difuto. Koko, dui sɔ nembetshiyaka monga kokele l’otema. Ɔnkɔnɛ, tshɛkɛta yele lo Joani 6:53 yata ɔnɛ: “Ndjala la lumu l’etema anyu” nembetshiyaka tsho monga la lɔsɛnɔ la kokele.

Lam’akandataka di’ambeki ande wekɔ la lɔsɛnɔ l’etema awɔ, Yeso akatɛkɛta dikambo dia demba ndo dia dikila diande. L’ɔkɔngɔ diko, lam’akandayosalaka Dambo dia Dikɔlɔ dia Nkumadiɔndjɔ, Yeso akatɛkɛta nto dikambo dia demba ndo dikila diande ndo akatɛ ambeki ande wanɛ wakandahombe mbidja la wɔ sheke y’oyoyo dia vɔ ndɛ tolembetelo tɔsɔ, mbut’ate mapa waha la wodoya ndo vinyɔ. Onde kɛsɔ mɛnyaka dia paka Akristo w’akitami w’esɔ ato, wele lo sheke y’oyoyo yaki Jehowa Nzambi, mbayokondja lɔsɛnɔ la kokele lɔsɔ? Ndooko. Diɛsɛ sɔ diekɔ le elui akɔ ehende w’anto. Wanɛ wakahokamɛ ɛtɛkɛta waki Yeso watanema lo Joani 6:53, 54 komonga la ewo kendana la difɛstɔ diasalema ɔnɔnyi tshɛ diele la tolembetelo talembetshiya demba ndo dikila dia Kristo.

Lo ndjela Joani tshapita 6, Yeso mbɛdikaka ntondo demba diande la mana, lo mbuta ate: “Watshenyu wakalekaka mana l’usui, ku wakavu. One eko ma diambuya uma l’ulungu, dia untu la dile, tavokaki. Dimi leko ma dia lumu, diakayi uma l’ulungu. Naka untu ayole ma ne, ndi ayulumba pundju.” Demba dia Yeso, ndo dikila diande, diaki ushinga wolo ndeka ndo mana ya mɛtɛ mɛtɛ. Lo woho akɔna? Lo woho ɔnɛ wele demba diande diakakimwama dikambo “dia lumu la wa la kete,” lo mbasha diaaso dia kondja lɔsɛnɔ la pondjo.a Omalɔkɔ, ɛtɛkɛta wa lo Joani 6:53 wendana la monga “la lumu l’etema anyu” mendanaka l’anto tshɛ wayokondja lɔsɛnɔ la pondjo​—oyadi l’olongo kana la nkɛtɛ.​—Joani 6:48-51.

Etena kakɔna kayolongola ambeki wa Yeso lomu le wɔ vɔamɛ, kana kondja lɔsɛnɔ la pondjo? Le ekitɔ wa Diolelo w’akitami w’esɔ, vɔ kondjaka lɔsɛnɔ lɔsɔ lam’olɔwɔ otsha lo lɔsɛnɔ la l’olongo oko ditongami dia lo nyuma diahavu. (1 Koreto 15:52, 53; 1 Joani 3:2) “Ekoko ekina” waki Yeso wayɔtɔ lo lɔsɛnɔ lɔsɔ l’ekomelo k’Ɛlɔmbwɛlɔ Kande k’Ɛnɔnyi Kinunu. Dui sɔ diayonga l’ɔkɔngɔ wa vɔ pembama ndo wa vɔ tanema la kɔlamelo ndo l’ɔkɔngɔ wa vɔ mbɔsama oko anto wosembwe wasungana kondja lɔsɛnɔ la pondjo lo Paradiso ka lanɛ la nkɛtɛ.​—Joani 10:16; Enyelo 20:5, 7-10.

[Nɔtɛ ya l’ɛse ka dikatshi]

[Esato wa lo lɛkɛ 9]

Akristo tshɛ wa mɛtɛ kokaka monga la ‘lɔsɛnɔ l’etema awɔ vɔamɛ’