Tshapita 56
Kakɔna keetɛ onto mindo?
ƆLƆSHANELO wambohomana la Yeso wamboleka ndjâla wolo. Aha paka nɛ dia ambeki ande efula wambɔsɛka, koko nɛ dia la Judeya, Ase Juda wekɔ lo nyanga mbodiaka, oko akawayange mbodiaka lam’akinde la Jerusalɛma, lo difɛstɔ di’Elekanelo dia l’ɔnɔnyi 31 T.D.
Kakianɛ, difɛstɔ di’Elekanelo dia l’ɔnɔnyi 32 T.D. diambokoka. Aha la tamu, lo ndjela ɔlɛmbɛ wa Nzambi, Yeso ambotshɔ la Jerusalɛma dia tosala difɛstɔ diakɔ di’Elekanelo. Koko nde ekɔ la yewo efula, nɛ dia lɔsɛnɔ lande lekɔ lo wâle. L’ɔkɔngɔ diko, nde ambokalola la Ngalileya.
Ondo Yeso ekɔ la Kapɛrɛnauma l’etena kamboya Afarisɛ l’afundji oma la Jerusalɛma oya le nde. Vɔ wekɔ lo mboyanga la dikambo dia mbofunda ɔnɛ nde ekɔ lo mɔnyɔla ɛlɛmbɛ w’ɔtɛmwɛlɔ. Vɔ wambowombola ɔnɛ: ‘Lande na ambeki ayɛ sekolaka mbekelo y’ashidi? Dikambo vɔ hawosole anya la ntondo ka ndɛ.’ Aha Nzambi mbakadje ɔlɛmbɛ ɔsɔ, koko lo asho w’Afarisɛ, ekɔ pɛkato ka woke le onto lahayele mbekelo kɛsɔ k’ashidi ka solaka anya polo ndo lo wɛɔdu.
Lo dihole dia nde kadimola lo kɛnɛ kawofundawɔ, Yeso ambɛnya ɔnɛ vɔ mbasekola Ɛlɛmbɛ wa Nzambi l’okonda. Nde lawɔ ate: “Ya ukundi adiakanyu elembe wa [Nzambi, NW] ndu nyu ne dia ditshelu dianyu? Ne dia [Nzambi, NW] akati ati: Olemia sho la nyo, ndu ati: One lateketa diui dia kolo lu dikambu dia shi, kana dia nyangu, ndi avu! Keli nyu nyatutaka nyati: Untu layutela shi kana nyangu ati: Engo kutumukukimanyia, lambukikimo le [Nzambi, NW], ndi halemia shi kana nyangu.”
Mɛtɛ, Afarisɛ ndakanyaka ɔnɛ akuta, kana diangɔ dikina tshɛ diakimɔma oko woshasha le Nzambi diekɔ diangɔ dia tɛmpɛlɔ, ndo diɔ hadiokoke kambema olimu okina. Koko, lo mɛtɛ, woshasha wakimɔma lo yoho shɔ tshikalaka l’anya w’ɔnɛ lowokimwe. Lo yoho shɔ mbakoka ɔna ndawɔ ɔkɛndɛ wa kimanyiya ambutshi ande waya esombe, wanɛ wele ondo wekɔ la pâ, paka lo mbuta tsho ɔnɛ: akuta ami kana diangɔ diami diekɔ “Korobana”—mbuta ate woshasha wambokimɔma le Nzambi kana lo dikambo dia tɛmpɛlɔ.
Mɛtɛ, Yeso amboka kɛlɛ lo mɛna woho wasekola Afarisɛ Ɛlɛmbɛ wa Nzambi, diɔ diakɔ diamondowatɛ ate: “Nyu nyatulanyaka diui dia [Nzambi, NW] ne dia ditshelu dianyu. Nyu akanga a lukesu! mete kakati Isaya dikambu dianyu ati: Antu ane watonemiaka l’elomo. Keli etema awo weko etali uma le mi. Vo watontemolaka otemolatemola, watetshaka dietshelu dieli uku elembe w’antu.”
Ondo olui w’anto wambangana dia vɔ tshikɛ Afarisɛ dihole dia vɔ mboka Yeso wembola. Ko lam’ele Afarisɛ kema ndoko la dui dia mbokadimola lo lohango la wolo lâhangwɛnde, Yeso ambelɛ olui w’anto dia vɔ sukana. Nde ambowatɛ ate: ‘Nyombisha lotui kele nyomanya fundo. Lam’ɛnanyu ango, aha kɛnɛ kalɛ onto kawetɛ mindo. Koko kɛnɛ katomba oma l’onyɔ ande kawetɛ mindo.’
L’ɔkɔngɔ diko, ambeki ande wambowombola lam’ɔtwɛwɔ lo luudu vate: “We mbeyaka wati: Afarise wakatakanyi lam’ukiwo diui so?”
Yeso ambâkadimola ate: “Wayuhikula etumbatumba tshe kaki Papa leli l’ulungu kumune. Nyuwaete; elombodi wa tutshungu mbewo. Naka kanga tshungu ayolombola kanga tshungu, vo ahendi wayoko lu difuku.”
Mɛnamaka di’oko Yeso amamba lam’owombodi Petero, lo lokombo l’ambeki, dia nde mbalembetshiya kɛnɛ kolanginde mbuta lam’ɔtɛkɛtshinde dikambo dia kɛnɛ keetɛ onto mindo. Yeso ambokadimola ate: “Ndu nyu mbahatamani fundu? Nyu hanyeyi nyati: Kene tshe koto l’unyo, katetaka lu dikundju, katutumbaka utsha lu kumba? Keli kene katutumbaka uma l’unyo, katuyakaka uma l’utema. To katulanyaka untu. Ne dia uma l’utema katutumbaka tukanyi ta kolo, diakanelu, luseka, munanyi, uvi, omenyi wa kashi, la dimamanyelu. Akambu aso [mbeetɛ onto mindo, NW]. Keli nde ma l’anya mindu, [heetɛ onto mindo, NW].”
Ɛtɛkɛta wa Yeso hɛnya ɔnɛ nde halange onto ndjâla pudipudi. Nde hatshi ɔnɛ ndoko ohomba w’onto mbɔtsha anya la ntondo ka katɛ kana ka ndɛ diangɔ. Koko Yeso ekɔ lo manya lɔkɛwɔ la dungi pende lele l’ewandji w’ɛtɛmwɛlɔ, wanɛ wahemba dia tshikitanya ɛlɛmbɛ w’ɛlɔlɔ waki Nzambi lo kɔkɔmiyaka mbekelo y’ashidi yahatumbi oma l’Afundelo. Mɛtɛ, ditshelo dia kɔlɔ mbeetɛ onto mindo, ndo Yeso ambɛnya ɔnɛ diɔ ndjâka oma l’otema w’onto. Joani 7:1; Euhwelu k’Elembe 16:16; Mateu 15:1-20; Mako 7:1-23; Etumbelu 20:12; 21:17; Isaya 29:13.
▪ Ɔlɔshanelo akɔna wambohomana la Yeso?
▪ Afarisɛ ambowɔsɔngɔlɛ Yeso, ko lo ndjela kanyi yande, woho akɔna wɔnyɔla Afarisɛ Ɛlɛmbɛ wa Nzambi l’okonda?
▪ Lo ndjela kɛnɛ kotshi Yeso, akambo akɔna weetɛ onto mindo?