Tshapita 81

Wamboyanga nto dia ndjaka Yeso

TEKƆ lo nshi ya ntshitshi, Yeso ekɔ lo teteta lo dɛfu dielɛwɔ ɔnɛ mbalasa ka Sɔlɔmɔna. Dɛfu diakɔ diekɔ l’omamu wa tɛmpɛlɔ. Lɛkɔ, Ase Juda wambôdinga ko wambotatɛ mbotɛ ɔnɛ: “Edja ndu kaandi ayuyukimo ntutshimbiatshimbia? Naka we keli Kristu, utuhunweli.”

Ko Yeso ambâkadimola ate: “Dimi lakanyutela, ku nyu hanyumbetawo.” Yeso kombahonolɛ ate: Kristo mbemi, oko wakandatɛ omoto l’Ose Samariya suke l’ɛtɛkɔ k’ashi. Koko mɛtɛ, nde akawasholɛ lonto lande lam’akandâlembetshiya ate: dimi lakaye oma la diko ndo laki la lɔsɛnɔ la ntondo k’Abarahama mbotɔ.

Koko, Yeso nangaka di’anto vamɛ shihodia ɔnɛ nde mbele Kristo lo mbɛdika akambo watshande la wanɛ wakatama lo Bible ɔnɛ Kristo ayoyohomba mbasala. Diɔ diakɔ diakandatɛ ambeki ande ntondo di’aha vɔ mbutɛ ndoko onto ɔnɛ nde mbele Kristo. Ndo l’ɔkɔkɔ akɔ nto mbamondoyotɛ Ase Juda wôhetsha ate: “Dimi lakanyutela, ku nyu hanyumbetawo. Elimu watshami lu lukumbu la Papa, vo mbamvuta.”

Lande na kahawetawɔ Ase Juda? Onde nɛ dia vɔ kema la tolembetelo tɛnya ɔnɛ Yeso mbele Kristo? Kema, Yeso ambɛnya lande na kahawetawɔ lam’atande ate: “Nyu hanyumbetawo ne dia nyu kema wa lu ekoko ami. Ekoko ami watukaka diui diami. Dimi mbaeyaka, vo watundjelaka. Dimi mbashaka lumu la pundju. Vo hawuvo pundju. Nduku untu ayuwahotola uma lu lunya lami. Papa lakambishawo, kuleki tshe. Nduku untu leli la wulu wa mbahotola uma lu lunya la Papa.”

Oma lâsɔ, Yeso ambolembetshiya diokanelo di’oshika diele lam’asande la She, ata ate: “Dimi la Papa teko otoi.” Mɛtɛ, Yeso hatshi ɔnɛ, lo mɛtɛ mɛtɛ, vɔ akɔ ahende wekɔ otondo ɔtɔi lo demba lam’ele nde ekɔ la nkɛtɛ ko She l’olongo. Koko, nde ekɔ lo mbuta ɔnɛ vɔ wekɔ la sangwelo diamɛ ndo wekɔ kâmɛ.

Ɛtɛkɛta wa Yeso ɛsɔ wambokiya Ase Juda nkɛlɛ ko vɔ wambɔtɔngɔna ave dia mbodiaka, oko wakawalange mbodiaka lam’akinde lo Difɛstɔ dia Tabɛrnakɛlɛ. La dihonga tshɛ, Yeso ambotɛ wanɛ walanga mbodiaka ate: “Dimi lakanyenya etsha efula w’ololo uma le Papa. Dikambu diakona diutshimi, diambukanyu ave?”

Ko vɔ wambôkadimola vate: “Shu hatukuki ave ne dia etsha aye w’ololo, keli ne dia lotengo laye; ndu ne dia we untu, [ko wɛ ndjaetɛka nzambi, NW].” Lande na kata Ase Juda dui sɔ lam’ele ndoko lushi lakate Yeso ate: nzambi mbemi?

Ondo nɛ dia Yeso ndjashaka wolo wele, lo ndjela atunyi ande, paka Nzambi oto mbakoka ndjâla lawɔ. Oko ɛnyɛlɔ, nde aki oma la mbuta dikambo di’“ekoko” ande ate: “Dimi mbashaka lumu la pundju,” dikambo diele ndoko onto lakoka disala. Koko Ase Juda wekɔ lo mbohɛ ɔnɛ Yeso mbetawɔka dia nde akalongola wolo ɔsɔ oma le She.

Oma lo dimbola diamondowaoka, Yeso ambɛnya hwe dia nde ekɔ l’ɛse ka Nzambi: ‘Onde hafundami l’Ɛlɛmbɛ anyu [l’Osambu 82:6] ɔnɛ: Dimi lakate nte: Nyu nyekɔ tozambizambi? Naka nde akelɛ wanɛ wakaye dui dia Nzambi dia ndjɔlɔshana lawɔ ate: tozambizambi, . . . ko nyu mbutaka dia ɔnɛ lakakidia Papa ndo lakandatome l’andja ɔnɛ ɔnɛ: Dimi lambɔtɛnga Nzambi nɛ dia lambota nte Ɔna Nzambi mbemi?’

Lam’ele Afundelo mbelɛka kânga toshushi ta kɔlɔ ɔnɛ ‘tozambizambi,’ lâsɔ munga kakɔna kakoka Ase Juda asɔ tana le Yeso l’ɔtɛ wotshinde ɔnɛ: ‘Ɔna Nzambi mbemi’? Yeso ambokotsha ate: “Naka dimi hatutshaka elimu wa Papa, tanyumbetawoki. Keli naka dimi latuwatshaka, kuyanga nyu hanyumbetawo, nyetawo etsha eku. Dia nyu mbeya la nimbitela nyati: Papa eko [kâmɛ la mi, NW], la dimi leko [kâmɛ la, NW] Papa.”

Lam’otshi Yeso ɔsɔku, Ase Juda wamboyanga monda. Koko nde ambâdingɔ, oko akandâdingɔ ntondo lo Difɛstɔ dia Tabɛrnakɛlɛ. Nde ambomɔ oma la Jerusalɛma ko ambotshɔ otsha lo wedi okina wa Jɔrɔdana, lɛnɛ akatatɛ Joani batiza anto, lâsɔ ko ambeta oko ɛnɔnyi ɛnɛi. Dihole sɔ tanemaka ondo suke l’ɔkɛngɛ wa Ndjale ka Ngalileya wa la diko dia nkushi, lo yɛdikɔ ya lɔkɛndɔ la nshi hiende oma la Jerusalɛma.

Anto efula wamboya le Yeso lo dihole sɔ ko wambotatɛ mbuta vate: “Mete, Joani kuntsha nduku djimbitelu. Keli akambu tshe wakati Joani dia untu one, waki mete.” Ko anto efula wambetawɔ Yeso. Joani 10:22-42; 4:26; 8:23, 58; Mateu 16:20.

▪ Lo yoho yakɔna yalanga Yeso anto mbeya ɔnɛ nde mbele Kristo?

▪ Yeso nde la She wekɔ ɔtɔi lo woho akɔna?

▪ Oko wokɛmadiɔ, lande na kata Ase Juda ɔnɛ Yeso ndjaetɛka nzambi?

▪ Woho akɔna wambɛnya Yeso, lo shila awui wofundami lo Esambu, ɔnɛ nde hayasɛmɛ ɔnɛ nde mbɛdima la Nzambi?