Nde la she wekɔ ɔtɔi, koko nde bu Nzambi

Yeso akaye la Jɛrusalɛma lo Fɛtɛ k’Osapwelo (kana Hanuka). Ɔsɔ aki fɛtɛ kakawanyomosapola nto tɛmpɛlɔ. Ambeta ɛnɔnyi lokama, Antiochus IV Epiphane, nkumekanga ka Suriya akake elambwelo laadiko dia elambwelo ka woke ka lo tɛmpɛlɔ ka Nzambi. L’ɔkɔngɔ diko, ana w’ɔlɔmbɛdi ɔmɔtshi w’ose Juda wakayɔsa nto Jɛrusalɛma ndo wakayosapola nto tɛmpɛlɔ le Jehowa. Ntatɛ oma laasɔ, fɛtɛ kakasalemaka ɔnɔnyi tshɛ lo Ngɔndɔ ka Kislɛvɛ 25, ngɔndɔ kɔtɔnɛ la etenyi k’ekomelo ka Ngɔndɔ ka dikumi l’ɔtɔi ndo etatelo ka Ngɔndɔ ka dikumi l’ahende.

Ɔsɔ aki lo nshi ya tshitshi efula. Yeso akatakɛndakɛdaka lo tɛmpɛlɔ lo dɛfu dia Sɔlɔmɔna. Lɛkɔ, ase Juda wakodinge ndo wakawombola vate: “Polo ndo l’etena kakɔna kayoyotetemala totshika l’okandokando? Naka wɛ kele Kristo, otote hwe.” (Joani 10:22-24) Ngande wakakadimola Yeso? Nde akakadimola ate: “Dimi lakanyote, koko nyu hanyetawɔ.” Yeso atawatɛka mbala kakɔ ɔtɔi dia nde ekɔ Kristo oko wakandatɛ womoto l’ose Samariya l’ɛtɛkɔ. (Joani 4:25, 26) Koko nde akɛnya onto akɔna eende lo mbuta ate: “Ntondo ka Abrahama mbotɔ, dimi lakikɔ.”​—Joani 8:58.

Yeso akalange dia anto vwamɛ mbeya dia nde ekɔ Kristo lo mbɛdika kɛnɛ kakandasalaka la kɛnɛ kakatama dia Kristo ayosala. Diakɔ diele lo tena dikina nde akatɛ ambeki ande diaha mbutɛ ndooko onto dia nde mbele Mɛsiya. Koko kakianɛ, nde ambohonolɛ ase Juda wakohetshaka ate: “Akambo wasalami lo lokombo la Papa mɛnyaka eemi. Koko nyu hanyetawɔ.”​—Joani 10:25, 26.

Lande na kakiwɔ kombetawɔ dia Yeso mbele Kristo? Nde akate ate: “Nyu hanyetawɔ, nɛ dia nyu keema ɛkɔkɔ ami. Ɛkɔkɔ ami pokamɛka dui diami, dimi mbaeyaka ndo vɔ ndjelakami. Dimi mbashaka lɔsɛnɔ la pondjo, ndo lo weho akɔ tshɛ, vɔ hawolanyemaki pondjo ndo ndooko onto layɔmpɔtɔlawɔ oma lo lonya lami. Kɛnɛ kakambisha Papa ndeka diangɔ dikina tshɛ.” Ko Yeso akawatɛ dia diɔtɔnganelo dia ma ma diaki lam’asande la She ate: “Dimi la Papa tekɔ 1.” (Joani 10:26-30) Yeso aki lanɛ la nkɛtɛ ndo She aki l’olongo, laasɔ nde konanga mbuta dia nde la She wekɔ ɔtɔi lo yoho ya mɛtɛ mɛtɛ. Koko, vɔ wekɔ l’oyango wamɛ.

Ɛtɛkɛta wa Yeso wakomadia ase Juda ko wakatɔngɔna nto ave dia mbodiaka. Koko dui sɔ kombokiya Yeso wɔma. Nde akate ate: “Dimi lambonyɛnya akambo efula w’ɛlɔlɔ w’oma le Papa. L’atei w’akambo asɔ, l’ɔtɛ wa dikambo diakɔna diambokanyu ave?” Vɔ wakakadimola ɔnɛ: “Aha l’ɔtɛ wa dikambo di’ɔlɔlɔ mbakookaso ave, koko l’ɔtɛ wamboyɔtɛnga Nzambi . . . lo ndjaɔsa oko nzambi.” (Joani 10:31-33) Ndooko lushi lakate Yeso dia nde ekɔ nzambi, laasɔ ko lande na kohindɛwɔ dui sɔ?

Yeso akataka dia nde ekɔ la wolo waketawɔka ase Juda dia paka Nzambi ndaamɛ oto mbele la wɔ. Ɛnyɛlɔ, lo kɛnɛ kendana la “ɛkɔkɔ” nde akate ate: “Dimi mbashaka lɔsɛnɔ la pondjo,” dui diele anto hawokoke nsala. (Joani 10:28) Ase Juda koshihodia dia Yeso aketawɔ lo sɛkɛ dia nde akalongola lowandji oma le She.

Lo mɛnya dia kɛnɛ kakawataka lo dikambo diande kaki kashi, Yeso akambola ate: “Onde hafundami lo Ɛlɛmbɛ anyu [lo Osambo 82:6] ɔnɛ ‘lakate nte: “Nyu nyekɔ tozambizambi”’? Naka Nzambi mbelɛka anto wele ɔtɛkɛta ande wakaye le wɔ ɔnɛ ‘tozambizambi,’ ko afundelo hawokoke tshikitanyema, onde nyombutɛ dimi onto lele Papa akakidia ndo akantome l’andja nyate: ‘Wɛ ambɔtɛnga Nzambi,’ nɛ dia lakatshi nte, ‘dimi lekɔ Ɔna Nzambi’?”​—Joani 10:34-36.

Eelo, Afundelo mbelɛka kaanga toshushi t’ana w’anto tele bu la losembwe ɔnɛ “tozambizambi.” Ko ngande wakoka ase Juda asɔ mbuta dia Yeso ambosala kɔlɔ lo mbuta ate “dimi lekɔ Ɔna Nzambi”? Nde akatɛkɛta dui dimɔtshi diakahombe mbowaetawoya ate: “Naka aha elimu wa Papa kasalami, tanyombetawɔke. Ko naka elimu ande kasalami, oyadi kaanga nyu hanyombetawɔ, nyetawɔ elimu akɔ dia nyu mbeya ndo ntetemala mbeya dia Papa ekɔ kaamɛ la mi ndo dimi lekɔ kaamɛ la Papa.”​—Joani 10:37, 38.

Lo mboka ɛtɛkɛta ɛsɔ, ase Juda wakayange minda Yeso koko ndo mbala kɛsɔ nto, nde akanya demba. Nde akamɔ oma la Jɛrusalɛma ko akatshu lo wedi w’Ɔkɛdi wa Jɔrdana lo dihole diakatatɛ Joani batiza anto ambeta ɛnɔnyi suke l’ɛnɛi. Ondo dihole sɔ komonga etale l’omamu wa Ndjale ka Ngalileya lo sidɛ.

Elui w’anto wakaye le Yeso ko wakate vate: “Joani kosala kaanga djembetelo 1, koko akambo tshɛ wakate Joani lo lokombo la pami kɛnɛ wekɔ mɛtɛ.” (Joani 10:41) Ɔnkɔnɛ, ase Juda efula wakonge la mbetawɔ le Yeso.