Tshapita 88

Kanga ɔngɔnyi la Lazaro

YESO oma la mbutɛ ambeki ande dia vɔ kamba l’ekundji wa l’emunyi lo yoho y’ɔlɔlɔ, nde ambâlembetshiya ɔnɛ hatokoke ndjâla mbala kakɔ ɔtɔi ɛhɔmbɔ w’ekundji ko ndjâla ndo ekambi wa Nzambi. Ndo Afarisɛ mbalonga awui asɔ, ko vɔ wambotatɛ sɔka Yeso nɛ dia vɔ wekɔ anangi wa falanga. Diɔ diakɔ diamondowatɛ ate: ‘Nyu ndjaɛnyaka ɔlɔlɔ la ntondo k’anto, ko tete Nzambi mbeyaka etema anyu; nɛ dia kɛnɛ kele la nɛmɔ lo asho w’anto kekɔ wɔnɔnyi lo asho wa Nzambi.’

Etena kambokoka ka ngala kadimɔ le wanɛ wele la lomombo la l’andja ɔnɛ, la lowandji la pɔlitikɛ, la lowandji ndo la lokumu l’atei w’ɛtɛmwɛlɔ. Vɔ pombaka kitshakitshama. Ko wanɛ wayakiyanya lo dikambo di’ehomba awɔ wa lo nyuma pombaka mbudiyama. Yeso ambɛnya otshikitanu wa ngasɔ lam’amondotɛ Afarisɛ ate:

“Elembe la aui w’amvutshi wakiko edja ndu le Joani [Obatizanyi]. Uma lu etena keso, watusambishaka lukumu l’ololo la diulelu dia [Nzambi, NW], untu l’untu atuyaotshiyaka loko la khudu. Keli eshishwelu ka ulungu la kete, ambuleka eshishwelu ka shidishidi y’elembe dikambu dia tshitshe.”

Afundji vɔ l’Afarisɛ wekɔ la lotamanya efula ndo wekɔ lo sɛma vate: sho mamemaka Ɛlɛmbɛ wa Mɔsɛ. Ohɔ dia, lam’akasɛnya Yeso pami kɛmɔtshi la Jerusalɛma, vɔ wakayasɛmɛ ɔnɛ: “Shu ambeki wa Mose mbesu. Shu mbeyaka shati: [Nzambi, NW] akateketa la Mose.” Koko l’etena kɛnɛ, Ɛlɛmbɛ wa Mɔsɛ wamboshidiya olimu awɔ wa nɔmbɔla anto wele la ndjakitshakitsha otsha le Yeso Kristo, Nkumekanga kakasɔnama oma le Nzambi. Ɔnkɔnɛ, tatɛ oma l’etatelo k’olimu waki Joani, anto wa weoho tshɛ, djekoleko akanga wa ndjakitshakitsha la ase weola, wekɔ lo ndjatshutshuya dia ndjâla ambolami wa lo Diolelo diaki Nzambi.

Lam’ele Ɛlɛmbɛ wa Mɔsɛ wekɔ lo takotshama, ɔkɛndɛ wa kitanyiya ɛlɛmbɛ akɔ waya suke la mumɔ. Ɛlɛmbɛ akɔ mbishaka anto diaaso dia vɔ ndjaka diwala l’ɔtɛ w’akambo wa weoho la weoho, koko Yeso ate: “Untu tshe layukimo wadendi, naka aha lu dikambu dia [monanyi, NW], ku ndi ntshuka ukina, ndi [ambosala loseka, NW]. Lam’ayutshuka pami umuntu lukimwewo osoku, ndi [ambosala loseka, NW].” Awui wa ngasɔ wambokiya Afarisɛ nkɛlɛ ka mamba, djekoleko lam’ele vɔ mbetawɔka di’onto ndjaka diwala l’ɔtɛ w’akambo efula!

Lam’atandatetemala mbutɛ Afarisɛ, Yeso ambowaokɛ wɛɛla ɔmɔtshi wɛnya anto ahende wele eongelo kawɔ, kana lɔsɛnɔ lawɔ, lakayotshikitanaka lo yoho ya diambo. Onde wɛ kokaka mbeya anto asɔ alembetshiyawɔ ndo kitshimudi y’otshikitanu wa lɔsɛnɔ lawɔ?

Yeso ambolembetshiya ate: “Kanga ongonyi omotshi akalotaka ahondo wa linene wa tilili w’amena. Ndi akangenangenaka la lushi la lushi la ufunu. Olombi a diango omotshi lukumbu landi Lazaro akakitshamaka la suku diandi. Ndi aki la puta dimba tshe. Ndi akalangaka ndjalesha la fusa yakakokaka lu mesa wa kanga ongonyi; ndu fo yakalombolaka puta yandi.”

Kanga ɔngɔnyi lata Yeso lanɛ kɛdikɛdi ewandji w’ɛtɛmwɛlɔ w’Ase Juda, aha paka Afarisɛ la afundji ato, koko ndo Asadukɛ la ɛlɔmbɛdi wa lâdiko. Vɔ wekɔ ɛngɔnyi lo waɛsɛ ndo lo wahɔ awɔ wa lo nyuma, ndo dionga diawɔ fɔnaka la nɛ dia kanga ɔngɔnyi latɛkɛta Yeso. Ahɔndɔ awɔ wa telele w’amɛna mɛnyaka dihole diawɔ dia nɛmɔ, ndo ahɔndɔ wa wɛma wa linɛnɛ mɛnyaka losembwe layashawɔ.

Olui ɔsɔ wa kanga ɔngɔnyi wekɔ la lotamanya ndo vɔ mendaka anto k’anto, ase weola, la diɛngɛku, wawaelɛ ɔnɛ ‛am ha·’aʹrets, mbuta ate anto wa la nkɛtɛ. Ɔlɔmbi Lazaro nembetshiyaka anto asɔ wele ewandji w’ɛtɛmwɛlɔ mbadimaka mma la waɛsɛ wa lo nyuma wahombawɔ kondja. Oko Lazaro lele la mpota demba di’otondo, anto k’anto wekɔ lo mɔnywama wate kana wanɛ wele la hemɔ ka lo nyuma ndo wasungana mbidjasɛ la wa mfɔ dihole ɔtɔi. Koko, wanɛ wele l’olui waki Lazaro wekɔ la ndjala ndo la mposa ka diangɔ dia ndɛ dia lo nyuma, diɔ diakɔ diemadiwɔ la soko, la kanyi ya ndjolongola kânga tofusa ta mbo ya ndɛ ya lo nyuma takɔ oma lo mɛsa wa kanga ɔngɔnyi.

Kakianɛ, Yeso ayanga nembetshiya otshikitanu wa lɔsɛnɔ la kanga ɔngɔnyi la Lazaro. Etshikitanu ɛsɔ kɛdikɛdi na, ndo alembetshiyawɔ na?

Kanga ɔngɔnyi nde la Lazaro wambotshikitana

Kanga ɔngɔnyi nembetshiyaka ewandji w’ɛtɛmwɛlɔ wele la waɛsɛ ndo la wahɔ wa lo nyuma, ndo Lazaro nembetshiyaka anto k’anto wele la ndjala ka diangɔ dia ndɛ dia lo nyuma. L’etenyi kayela k’ɔkɔndɔ ande, Yeso ambolembetshiya otshikitanu wa diambo wambosalema lo nsɛnɔ y’apami asɔ ahende.

Yeso ate: “L’okongo diku olombi akavu, andjelo wakawembe utsha lu tulu ka Abarahama. Ndu kanga ongonyi akavu, ku wakukhunde. Ndi aki la fono lu [Hadɛsɛ, NW]. Ndi akedia ashu, akenyi Abarahama tshalula la Lazaro lu tulu kandi.”

Lam’ele kanga ɔngɔnyi nde la Lazaro kema anto wa mɛtɛ mɛtɛ, koko wekɔ didjidji di’elui w’anto, lâsɔ nyɔi yawɔ mɛtɛ yekɔ nyɔi ya didjidji. Ko nyɔi yakɔ shɔ alembetshiyayɔ na?

Yeso oma la mɛnya otshikitanu wa lɔsɛnɔ lam’otshinde ɔnɛ ‘Ɛlɛmbɛ la awui w’Amvutshi wakikɔ edja ndo le Joani Obatizanyi, koko tatɛ oma l’etena kɛsɔ, Diolelo diaki Nzambi diekɔ lo tasambishama.’ Lâsɔ, esambishelo kaki Joani la kaki Yeso mbambela nyɔi ka kanga ɔngɔnyi la ka Lazaro lo kɛnɛ k’endana la lɔsɛnɔ lawɔ kana eongelo kawɔ ka ntondo.

Anto wele la ndjakitshakitsha ndo la ndjatshumuya, wanɛ wakenga olui wa Lazaro, wambovɔ lo kɛnɛ k’endana la ndjala ka diangɔ dia lo nyuma kakawokaka ntondo, ndo wamboyokondja dihole di’oyoyo: kɛtshi ka Nzambi. Kânga mbakawendɛka ntondo le ewandji w’ɛtɛmwɛlɔ dia tɔngɔna yema yakakɔkaka oma lo mɛsa awɔ wa lo nyuma, kakianɛ mɛtɛ ya l’Afundelo yakasambisha Yeso yambokotsha ehomba awɔ. Ɔsɔku mbambowɔtɔlama suke la Jehowa Nzambi, Abarahama a Woke, lo tolo, mbuta ate lo dihole di’eokelo ka kɛtshi.

Koko, wanɛ wakenga olui wa kanga ɔngɔnyi wamboyaonɛ kɛlɛ ka Nzambi nɛ dia wekɔ lo keketsha etema di’aha mbetawɔ losango la Diolelo lasambisha Yeso. Ɔsɔku mbambowovɔ lo kɛnɛ k’endana la dihole diawɔ dia ntondo, mbuta ate kɛtshi ka Nzambi kɛnamawɔ oko wekɔ latɔ. Mɛtɛ, wekɔ lo totɛ ɔnɛ anto asɔ wekɔ lo fɔnu ka didjidji. Kakianɛ, nyɛsɔ tohokame ɛtɛkɛta wa kanga ɔngɔnyi:

“Papa Abarahama, umbuki ketshi. Untumeli Lazaro, ndi adji sodi ka luhita landi l’ashi, ambodia lulimi; ne dia dimi la fono lu lumbi la dja.” Anto wa l’olui wa kanga ɔngɔnyi wekɔ lo pɛnyahɛnyama la nsango yasambisha ambeki wa Yeso lo dikambo di’elombwelo kaki Nzambi. Vɔ nangaka ambeki wa Yeso tshika sambisha nsango shɔ ɔnɛ kele wakondja yema ya diomuyelo l’asui awɔ.

“Keli Abarahama akati ati: On’ami, uho wati: We akalungulaka diango di’ololo lu nshi yakiye la lumu, ku Lazaro akalungulaka diango dia kolo. Keli kakiane, ndi ambusambema lindu, ku we ambuyala la fono. Dikambu dikina, luwinga la wuki leko l’asasu la nyu. Wane walanga mbeta uma lindu utsha le nyu, haweyi mbeta. La nduku untu leya mbeta uma leko uya le su.”

Sunganaka mɛtɛ di’okitshikitanu wa ngasɔ wa diambo salema l’asa olui wa Lazaro la wa kanga ɔngɔnyi! Otshikitanu ɔsɔ wayosalema l’ɔkɔngɔ wa ngɔndɔ mɔtshi, lo Pɛntɛkɔsta ka l’ɔnɔnyi 33 T.D., lam’ayomɔ sheke y’Ɛlɛmbɛ ko sheke y’oyoyo ndjihɛna. Lâsɔ mbayɛnama hwe ɔnɛ aha Afarisɛ la ewandji w’ɛtɛmwɛlɔ, koko ambeki wa Yeso mbokama kɛtshi le Nzambi. Omalɔkɔ, “luwinga la wuki” lele lam’asa kanga ɔngɔnyi la didjidji l’ambeki wa Yeso kɛdikɛdi elombwelo ka Nzambi ka losembwe kahatshikitanaki pondjo.

Kanga ɔngɔnyi amboyɔlɔmba “papa Abarahama” nto ate: “Ûtumi [Lazaro] lu luudu la papa; ne dia dimi la analingu atanu.” Oma l’ɛtɛkɛta ɛsɔ, kanga ɔngɔnyi ambetawɔ ɔnɛ nde ekɔ la diokanelo la papa kekina, papa kakɔ ko Satana Diabolo. Kanga ɔngɔnyi ekɔ lo nɔmba dia Lazaro tshikitanya nsango y’elombwelo kaki Nzambi ɔnɛ kele aha ‘anango atanu,’ anyande wa l’ɔtɛmwɛlɔ, ndjokoma “lu dihuli ne dia fono.”

“Keli Abarahama akati ati: Vo weko la Mose la amvutshi; vo wawaukeli.” Eelo, naka ‘anango atanu’ nangaka mbewɔ fɔnu kɛsɔ, kete vɔ pombaka mpokɛ lotui lo efundelo wa Mɔsɛ la w’Amvutshi wɛnya ɔnɛ Yeso mbele Mɛsiya, ko ndjoyala ambeki ande. Koko kanga ɔngɔnyi ate: “Kema, papa Abarahama. Keli naka untu omotshi lakavu ayutsho le wo, vo wayukadimula etema.”

Koko wambôkaloya dui ɔnɛ: “Naka vo hawukela Mose la amvutshi, keti vo hawetawo kuyanga untu lulwi uma lu nyoi.” Nzambi hatosala ndoko tolembetelo kana ahindo amɔtshi wa lânde dia nde mbetawoya anto. Naka vɔ nangaka nde mbaoka kɛtshi, kete vɔ pombaka mbala ndo kitanyiya Afundelo. Luka 16:14-31; Joani 9:28, 29; Mateu 19:3-9; Ngalatiya 3:24; Kolosai 2:14; Joani 8:44.

▪ Lande na kahomba nyɔi ka kanga ɔngɔnyi la ka Lazaro monga nyɔi ya didjidji, ndo nyɔi yawɔ alembetshiyayɔ?

▪ Lo ndjela kɛnɛ kotshi Yeso, otshikitanu akɔna wakasalema lam’akatatɛ Joani kamba olimu ande w’esambishelo?

▪ Kakɔna kayomɔ l’ɔkɔngɔ wa nyɔi ka Yeso, ndo ngande wayendana dikambo sɔ l’odiakelo wa diwala?

▪ Lo wɛɛla wa Yeso, kanga ɔngɔnyi la Lazaro alembetshiyawɔ na?

▪ Asui akɔna wakakomɛ kanga ɔngɔnyi ndo kakɔna kalɔmbande dia vɔ mbonyɛwɔ?

▪ “Luwinga la wuki” kɛdikɛdi na?

▪ Akɔna ele she kanga ɔngɔnyi mɛtɛ, ndo wa na wele anango atanu?