AMBOLA W’OMA LE AMBADI
Lo ndjela Joani 11:35, lande na kakalele Yeso la ntondo ka nde mbolola Lazaro?
Etena kavɔ lakiso ɔmɔtshi la ngandji, sho ndelaka nɛ dia nde aya bu la so nto. Kaanga mbakokaka Yeso Lazaro ngandji k’efula, nde kondela l’ɔtɛ wakavu Lazaro. Yeso akalele l’ɔtɛ wa ngandji kakandokaka ase nkumbo ka Lazaro ndo angɛnyi ande, oko wadiɛnya avɛsa wosukanyi l’ɔkɔndɔ wa lo Joani ɔsɔ.—Jni. 11:36.
Etena kakoke Yeso mbala ka ntondo ɔnɛ Lazaro ekɔ la hemɔ, nde kotshɔ mbala kakɔ ɔtɔi le nde dia tɔɔkɔnɔla. Ɔkɔndɔ mbutaka ɔnɛ: “Lam’akoke Yeso dia Lazaro ekɔ la hemɔ, nde akatshikala lɛnɛ akinde nshi hiende.” (Jni. 11:6) Lande na kakatshimbatshimba Yeso ngasɔ? Nɛ dia nde aki l’oyango ɔmɔtshi. Nde akate ate: “Hemɔ kɛsɔ bu l’oyango wa mbokonya lo nyɔi, koko kekɔ dia lotombo la Nzambi, dia Ɔna Nzambi tombɔma lo tshimbo yatɔ.” (Jni. 11:4) Hemɔ ka Lazaro komonga “l’oyango” wa mbokonya lo nyɔi. Koko Yeso akalange nkamba la nyɔi ka Lazaro dikambo “dia lotombo la Nzambi.” Lo ngande? Nɛ dia Yeso aki suke dia nsala dihindo dia woke lo mbolola ɔngɛnyi ande oma lo nyɔi.
Etena kakandasawolaka l’ambeki ande lo diaaso sɔ, Yeso akɛdika nyɔi la djɔ. Diakɔ diakandawatɛ ate “layanga ntshɔ lɛkɔ dia temula [Lazaro].” (Jni. 11:11) Le Yeso, mbolola Lazaro oma lo nyɔi aki oko ombutshi mbemula ɔnande oma lo djɔ. Ɔkɔnɛ, Yeso komonga ndooko l’ɔkɔkɔ wa nyanga efula l’ɔtɛ wa nyɔi ka Lazaro.
Ko lande na kakalele Yeso? Avɛsa wosukanyi l’ɔkɔndɔ ɔsɔ toshaka okadimwelo. Etena kakahomana Yeso la Mariya w’ɔnango Lazaro ndo kakandawɛnyi nde l’anto akina walela, nde “akayakiyanya efula, akatshimbe wɔɔngɔ.” Mɛna kandji kaki lawɔ akatshutshuya Yeso dia nde lawɔ mboka kandji polo ndo lo ‘ntshimba wɔɔngɔ.’ Kɛsɔ mbakatshutshuya Yeso ‘dia nde ndela.’ Aki dui dia kandji efula le Yeso dia mɛna angɛnyi ande wakandokaka ngandji wayakiyanya efula l’ɔkɛyi.—Jni. 11:33, 35.
Ɔkɔndɔ ɔnɛ mɛnyaka dia Yeso ekɔ la wolo ndo l’akoka wa mbolola wakiso wa ngandji ndo mbasha yoonge ya dimɛna lo andja w’oyoyo wayaye. Ɔkɔndɔ akɔ tɛnyaka nto woho wayakiyanya Yeso lo dikambo dia wanɛ wavusha wakiwɔ wa ngandji l’ɔtɛ wa nyɔi kakatahowɔ oma le Adama. Wetshelo okina wakondjaso oma lo ɔkɔndɔ ɔnɛ ele, sho lawɔ pombaka mboka wanɛ wavusha wakiwɔ wa ngandji kɛtshi.
Tolembete dia Yeso akeyaka dia nde ayanga tolola Lazaro. Koko kaanga mbakidiɔ ngasɔ, nde akalele l’ɔtɛ wa ngandji ndo kɛtshi kakandokaka angɛnyi ande. Woho akɔ waamɛ mbele, kɛtshi kokaso anto akina mbeyaka totshutshuya dia “[ndela] la wanɛ walela.” (Rɔmɔ 12:15) Ndela lo waaso wa ngasɔ hɛnya di’onto bu la mbetawɔ lo eolwelo. Ɔkɔnɛ, Yeso akatotshikɛ ɛnyɛlɔ ka dimɛna kendana la mboka anto wele la ɔkɛyi kɛtshi lo ndela, kaanga mbakandeyaka dia nde ayanga mbolola Lazaro.