Tshapita 90

Elongamelo k’eolwelo

YESO ambokoma kakianɛ l’omamu wa Bɛtaniya, ngelo kânganyi la Jerusalɛma suke la kilɔmɛtɛlɛ shato. Nshi ngana tsho mbambeta l’ɔkɔngɔ wa nyɔi l’ekundelo ka Lazaro. Mariya nde la Mata, akadiyɛnde, wekɔ paka lo delo, ndo anto efula wakaye dia ndjâsamba.

Lam’ewɔ lo ndela onto ɔmɔtshi amboyotɛ Mata ɔnɛ Yeso ekɔ lo ndjaye. Ɔnkɔnɛ, nde ambonɛ ko ambotshɔ esadi esadi dia ntohomana lande, ondo nde hatate ndo kadiyɛnde. Lam’okuminde lale Yeso, Mata ambowotɛ kɛnɛ kakandataka nde la kadiyɛnde esangɔ efula lo nshi nyɛi yetshi ate: “Utuyuyala lindu, tshiki onalingu kumvo.”

Koko, ɛtɛkɛta waki Mata mɛnyaka ɔnɛ nde ekɔ l’elongamelo k’ɔnɛ Yeso âkakoke salɛ ɔnango dikambo dimɔtshi. Nde lande ate: “Dimi mbeyaka nti: [Nzambi, NW] ayukusha tshe kayuyôlomba.”

Ko Yeso ambôlaka ate: “Onanyo ayulo.”

Koko Mata ekɔ lo kanyiya ɔnɛ Yeso ekɔ lo tɛkɛta dikambo di’eolwelo ka la nkɛtɛ kayosalema lo nshi yayaye, eolwelo kakalongamɛka ndo Abarahama la ekambi wa Nzambi ekina. Diɔ diakɔ diamondokadimola ate: “Dimi mbeyaka nti: Ndi ayulo lu eulwelu ka lushi l’ekumelu.”

Koko, Yeso ambowosha elongamelo ka kondja ekimanyielo ko wonya akɔ, awotɛ ate: “Dimi leko eulwelu la lumu.” Nde ambôhola Mata ɔnɛ Nzambi akawosha wolo wa mbahemɛ nyɔi, ata ate: “One lambetawo, kuyanga ndi ayuvo, ayuyala la lumu. One leli la lumu, lambetawo, ndi havu pundju.”

Yeso hate Mata ɔnɛ akanga wa kɔlamelo wele la lɔsɛnɔ lo nshi yande hawovɔkaki pondjo. Koko kɛnɛ kalangande mbuta ele ɔnɛ: onto lawetawɔ kokaka kondja lɔsɛnɔ la pondjo. Anto efula wayokondja lɔsɛnɔ la pondjo wayotokotôlwe lo lushi l’ekomelo. Koko anto akina wele la kɔlamelo wayokondja panda l’ekomelo ka dikongɛ di’akambo nɛ lanɛ la nkɛtɛ, le wɔ mbayokotshamaka ɛtɛkɛta ɛsɔ waki Yeso lo mɛtɛ mɛtɛ. Vɔ hawovɔkaki pondjo! L’ɔkɔngɔ w’ɛtɛkɛta ɛsɔ wa diambo efula, Yeso amombola Mata ate: “We mbetawoka diui so?”

Ko nde ambôkadimola ate: “Elu, Khumadiondjo. Dimi lambetawo nti: We eko Kristu, On’a [Nzambi, NW]. Ndi kayayi la kete.”

Oma lâsɔ, Mata ambokalola dia telɛ kadiyɛnde, nde ambotowotɛ lo yishɛshɛ ate: “Umbetsha one aketa.” Oshimu kele edja, he Mariya ɔnɛ atomba oma lo luudu. Lam’owɛnyiwɔ atatshu, anto akina wambôyela, wɔ̂fɔnya ɔnɛ kana otsha la diombo mbatandatshu.

Lam’okuminde lale Yeso, Mariya ambɔkɔ l’ekolo ande la delo. Nde ambowotɛ ate: “Khumadiondjo, utunduyala we aki lindu, tshiki onalingu kumvo.” Asolo wa Yeso wambɔkɛta efula lam’ɛnyinde Mariya kâmɛ l’elui w’anto wayoyele walela. Mbambolande ate: “Lendi akanyukhunde na?”

Ko wango mbôkadimolawɔ vate: ‘Nkumadiɔndjɔ oyeta tênde.’

Yeso ambolela ndo nde lawɔ, ko Ase Juda wota vate: ‘Ohonyenda ngandji kakandawokaka!’

Amɔtshi wambohɔ ɔnɛ, lo Difɛstɔ dia Tabɛrnakɛlɛ, ambeta ngɔndɔ mɔtshi, Yeso akakɔnɔya ɔlɔngɔlɔngɔ ɔmɔtshi wakotɔ tshungu, ko vɔ woyambola vate: “Untu one akasenya kanga tshungu, ndi ntutundeya nshimbela ndu untu one, diaha ndi mvo?” Joani 5:21; 6:40; 9:1-7; 11:17-37.

▪ Etena kakɔna kambokoma Yeso la Bɛtaniya, ndo kakɔna katshama lɛkɔ?

▪ Kakɔna kambokimanyiya Mata dia nde ndjâla la mbetawɔ lo eolwelo?

▪ Woho akɔna wambonyanga Yeso lo nyɔi ka Lazaro?