“Eolwelo ndo lɔsɛnɔ”

Lam’akandaye oma la Pereya, Yeso akakome lo mbɔtwɛlɔ ka Bɛtaniya, ngelo kaki lo kilɔmɛtrɛ oko 3 lo ɛstɛ ka Jɛrusalɛma. Mariya la Maata, akadiyɛnde la Lazaro wakalelaka ɔnangɛwɔ lele oma la mvɔ. Anto efula wakaye ndjasamba.

Ko onto ɔmɔtshi akatɛ Maata dia Yeso amboya, Maata akalawɔ dia tohomana la nde. Maata akatɛ Yeso kɛnɛ ondo kambowokanyiya nde la kadiyɛnde l’edja ka nshi nyɛi ɔnɛ: “Nkumadiɔndjɔ, otondonga wɛ aki lanɛ, tshike ɔnalengo havwe.” Koko kɛsɔ hɛnya dia nde bu l’elongamelo. Maata akate ate: “Dimi mbeyaka dia kɛnɛ tshɛ kayoyɔlɔmba Nzambi, Nzambi ayokosha.” (Joani 11:21, 22) Nde akɔsaka dia Yeso aakakoke nkimanyiya ɔnango.

Yeso akakadimola ate: “Ɔnanyɔ ayolɔ.” Maata akɔshi dia Yeso akatɛkɛtaka dia eolwelo kayosalema lo nshi yayaye la nkɛtɛ, elongamelo kaki la Abrahama ndo anto akina. Nde akɛnya mbetawɔ kande dia dui sɔ diayosalema mɛtɛ lo mbuta ate: “Dimi mbeyaka dia nde ayolɔ lo eolwelo ka lushi l’ekomelo.”​—Joani 11:23, 24.

Ko, onde Yeso akakoke nsala dui dimɔtshi diakahombe nsamba Maata l’etena kɛsɔ? Yeso akohola Maata dia Nzambi akawosha wolo laadiko dia nyɔi lo mbotɛ ate: “Onto longa la mbetawɔ le mi, oyadi kaanga nde kovɔka, nde ayoyala la lɔsɛnɔ nto, ndo onto tshɛ lasɛna ndo longa la mbetawɔ le mi havɔki pondjo.”​—Joani 11:25, 26.

Yeso kɔmɛnyaka dia ambeki ande wakasɛnaka l’etena kɛsɔ hawovɔki pondjo. Kaanga ndamɛ akahombe mvɔ oko wakandatɛ apɔstɔlɔ ande. (Mateo 16:21; 17:22, 23) Yeso akɛnyaka dia monga la mbetawɔ le nde, mbeyaka nkonya lo lɔsɛnɔ la pondjo. Efula k’anto wayokondja lɔsɛnɔ lɔsɔ lo tshimbo ya eolwelo. Koko, anto wa kɔlamelo wayɔsɛna l’ekomelo ka dikongɛ nɛ di’akambo mbeyaka monga ko hawovɔki pondjo. Onto tshɛ longa la mbetawɔ le nde mbeyaka monga l’eshikikelo dia nde havɔki nyɔi ka pondjo.

Onde Yeso lakate ate “dimi lekɔ eolwelo ndo lɔsɛnɔ,” koka kimanyiya kakianɛ Lazaro lambovɔ nshi ngana? Yeso akambola Maata ate: “Onde wɛ mbetawɔka dikambo sɔ?” Maata akakadimola ate: “Eelo, Nkumadiɔndjɔ. Dimi lambetawɔ dia wɛ ekɔ Kristo Ɔna Nzambi, ɔnɛ lamboya l’andja.” Oko wakinde la mbetawɔ dia Yeso akakoke nsala dui dimɔtshi lushi lɔsɔ, Maata akalawɔ otsha la ngelo ndo akatotɛ Mariya wa kadiyɛnde lo toyi ate: “Ombetsha amboya, nde ekɔ lo kelɛ.” (Joani 11:25-28) Ko Mariya akatombe oma lo luudu ndo anto akina wakafɔnya dia nde ambotshɔ lo diombo dia Lazaro wakoyele.

Lo dihole dia ntshɔ lo diombo, Mariya akatshu le Yeso, akakusama l’ekolo ande alela ndo akate nto kɛnɛ kakate kadiyɛnde ate: “Nkumadiɔndjɔ, otondonga wɛ aki lanɛ, tshike ɔnalengo havwe.” Oko wakandɛnyi Mariya ndo elui w’anto walela, Yeso akasekuma, akatshimbe wɔɔngɔ ndo akalele. Dui sɔ diakananda anto wakendaka. Koko amɔtshi wakambola vate: ‘Naka Yeso akakɔnɔla pami kakotɔ tshungu, onde takandakoke nsala woho waha onto ɔnɛ mvɔ?’​—Joani 11:32, 37.