Tshapita 105

Etatelo ka lushi l’ohomba efula

LUSHI l’Ɔtɔi la dikɔlɔ, Yeso ambonɛ oma la Jerusalɛma dia kalola la Bɛtaniya, ngielongelo yele l’oholola wa Dikona di’Ɔlivɛ, lo lɛkɛ l’ehotwelo ka wonya. Ɔsɔku mbambokomɛ lushi la hende lakandasale olimu la Jerusalɛma. Mɛtɛ, nde ambotshɔ nto dia tolala laka ɔngɛnyi ande Lazaro. Ɔsɔ mbele otsho wa nɛi wamondolala la Bɛtaniya, tatɛ lam’akandakome oma la Jeriko.

Kakianɛ, taya Lushi la Hende la pindju, lo ngɔndɔ ka Nisana 11, nde l’ambeki ande wambokimɛ lɔkɛndɔ nto. Lushi l’ɛlɔ layoyala lushi l’ohomba efula l’olimu wa Yeso, lushi layondoleka sala olimu. Ɔnɛ mbele lushi la komelo layondɛnama lo tɛmpɛlɔ. Ɔnɛ nto mbele lushi la komelo layondosala olimu ande wa lo sɛkɛ la ntondo ka vɔ mbolomboya ndo mbodiaka.

Dia vɔ ntshɔ la Jerusalɛma, Yeso l’ambeki ande wambodjɛ lo mboka kakɔ kâmɛ keta lo Dikona di’Ɔlivɛ. L’omamu wa mboka k’oma la Bɛtaniya, Petero ambɛna osongo wakadje Yeso mananu lui ketshi la pindju. Mbawotɛnde ate: “Umbetsha, enda! Utamba a fingu wakayadji mananu ambolengela.”

Bonde kakalɛngia Yeso osongo ɔsɔ na? Nde ambɛnya ɔkɔkɔ wakandɔ̂lɛngia lam’atande ate: “Mete kanyutelami nti: Naka nyu nyeko la mbetawo ndu hanyukandakanda, nyu hanyutsha paka dikambu diutshedimi utamba a fingu one tu. Keli naka nyayutela ukungu one [Dikona di’Ɔlivɛ, lɛnɛ akiwɔ l’etena kɛsɔ] nyati: Uyanya, uyakadja l’uduwa, dikambu so mbeyaka ntshama. Naka nyu la mbetawo, nyayulungula akambu tshe walombanyu lu dombelo dianyu.”

Ɔnkɔnɛ, lam’akandalɛngia osongo a fingu, Yeso akɛnya ambeki ande ɔnɛ wekɔ l’ohomba wa monga la mbetawɔ le Nzambi. Nde lawɔ ate: “Lam’alombanyu [Nzambi, NW], nyetawo nyati: Tambulungula kene kalombasu; ku mete, nyu nyayukilungula.” Ɔsɔ mɛtɛ ekɔ wetshelo w’ohomba wahombawɔ nkimɛ, djekoleko lo kɛnɛ k’endana l’ehemba wa wɔma waki suke la mbakomɛ. Koko, dikambo dikina diekɔ l’asa nyɔi k’osongo ɔsɔ la mbetawɔ.

Oko osongo ɔsɔ wa fingu, wodja w’Isariyɛlɛ wekɔ l’ɛnamelo ka lokeso. Koyanga mbakawadje sheke vɔ la Nzambi, ndo mbɛnamawɔ l’andja oko anto wakitanyiya adjango ande, vɔ mɛnyaka dia vɔ kema la mbetawɔ, vɔ hawɔtɔ elowa w’ɛlɔlɔ. L’ɔtɛ wewɔ bu la mbetawɔ, vɔ waya suke la ntona ndo Ɔna Nzambi! Ɔnkɔnɛ, lo nɛngia osongo wa fingu waki kɔtɔka elowa, Yeso ambɛnya kɛnɛ kayokomɛ wodja ɔsɔ wahatɔ elowa ndo wele kema la mbetawɔ.

Yema l’ɔkɔngɔ, Yeso nde l’ambeki ande wambɔtɔ lo Jerusalɛma. Oko wele mbekelo kawɔ, vɔ wambɔtɔ lo tɛmpɛlɔ, ko Yeso ambotatɛ ndakanya anto. Mɛtɛ, ɛlɔmbɛdi a weke kâmɛ la dikumanyi dia wodja watohɛ kɛnɛ kakatshelɛ Yeso amengudi wa falanga lui ketshi, ko vɔ wambowombola dimbola nɛ dia mbosola vate: “La wulu akona watshaye akambu ane? Ndu akakusha wulu one na?”

Ko Yeso ambâkaloya dui ate: “Ndu dimi layunyumbula umbula omotshi. Naka nyu nyayukadimula umbula ako, ku ndu dimi layunyutela uma lu wulu akona watshami akambu ane. Batiza ka Joani, uma lendi akito? Uma l’ulungu, kana uma le antu?”

Ɛlɔmbɛdi la dikumanyi wambotatɛ mendana ndo mumbwana lam’asawɔ dia vɔ kondja okadimwelo wa mbosha. “Lam’ayututa shati: Uma l’ulungu, ndi ayuta ati: Ya ukundi akinyu kumbêtawo? Keli naka shu tayuta shati: Uma le antu, shu mbukaka elui w’antu woma, ne dia antu tshe mamemaka Joani vati: Umvutshi mbendi.”

Ewandji w’ɛtɛmwɛlɔ hawoyeya ndoko kɛnɛ ka mbokadimola. Mbatɛwɔ Yeso vate: “Shu hateyi.”

Ko Yeso nde lawɔ ate: “Ndu dimi hanyutela uma lu wulu akona watshami akambu ane.” Mateu 21:19-27; Mako 11:19-33; Luka 20:1-8.

▪ Kakɔna wambeetɛ Lushi la Hende, lo ngɔndɔ ka Nisana 11, lushi l’ohomba?

▪ Wetshelo akɔna wambosha Yeso lam’amondɔlɛngia osongo wa fingu?

▪ Ngande wambokadimola Yeso wanɛ wowombudi dia mbeya ɔnɛ lakawosha wolo wasalande akambo amɔtshi?