Tshapita 125

L’Otamba w’asui

LAM’ATAWATSHU la Yeso, wekɔ lo tatshu kâmɛ ndo l’ase wevi ahende dia tâdiaka. Olui w’anto wambemala lo dihole dielɛwɔ ɔnɛ Ngɔlɔngɔta, mbuta ate Dihole dia Lowako, dihole diakɔ hanganyi etale l’osomba.

Wambokolola ase lokanu ahɔndɔ. Ko wambowasha wanu wɔsɔhanyemi la kondjo. Ondo amato wa la Jerusalɛma mɛtɛ mbakakatɛ wanu akɔ asɔ, ndo Ase Rɔmɔ hawotone vɔ mbisha wanɛ wohanemi l’otamba wanu asɔ wakitshakitsha kandji. Koko, lam’ɔlɛtshi Yeso wanu akɔ, nde ambotona mbanɔ. Lande na? Mɛtɛ, nɛ dia nde nangaka nama akoka ande tshɛ wonya watokomɛnde ohemba woleki woke lo mbetawɔ kande.

Kakianɛ, wambetamia Yeso lâdiko di’otamba, anya ande lâdiko di’ɔtɛ. Ko asɔlayi wambotatɛ mbɔkɔkɔmɛ sɛti ya weke l’anya ndo l’ekolo. Yeso ekɔ lo kanyɔkanyɔ la pâ efula lam’atɔtɔ nsɛti l’emunyi ndo l’eshisha. Lam’osembudiwɔ otamba tɔɔ, kandji kamboleka tshɛ, nɛ dia wotsho wa demba diande wâtaka mpota ya nsɛti. Koko, lo dihole dia nde manɛ asɔlayi w’Ase Rɔmɔ, Yeso ambâlɔmbɛ ate: “Papa, âdimanyia, ne dia vo haweyi kene katshawo.”

Pilato ambohanɛ djembetelo mɔtshi l’otamba a Yeso, djembetelo yakɔ fundama ɔnɛ: “Jesu y’Usi Nazarɛta, Khum’ekanga k’Asi Juda.” Ondo lam’ofundjinde ɔsɔku, Pilato halange mɛnya paka dilɛmiyɛlɔ diashande Yeso to, koko nde nangaka mɛnya ndo woho wahetshande ɛlɔmbɛdi w’Ase Juda, wanɛ wôtshutshuyisha dia nde fundɛ Yeso nyɔi. Ɔnkɔnɛ, di’anto tshɛ mbala djembetelo yakɔ, Pilato akayifundji l’ɛtɛkɛta esato—lo Hɛbɛru, lo Latino, ɔtɛkɛta wa lɛɛta, la lo Grɛkɛ, ɔtɛkɛta waleka tɛkɛtama.

Kayifasɛ la Anasi, kâmɛ l’ɛlɔmbɛdi wa weke, wambɔsa nsɔnyi. Awui asɔ w’ɛlɔlɔ wambowofunda ko mpanɛ l’otamba wambolanya otshumba awɔ. Vɔ wambotona, wata vate: “Tufundaki wati: Khum’ekanga k’asi Juda, keli ufundi wati: Ndi kakataka ati: Dimi Khum’ekanga k’asi Juda.” Pilato amboka nkɛlɛ, nɛ dia ɛlɔmbɛdi wambowɔsa oko enginya kawɔ, ko nde ambowatɛ la diɔnyɔ tshɛ ate: “Uku akamafundji, mbakamafundji.”

Ɛlɔmbɛdi, kâmɛ l’olui a woke w’anto, wambotshumana kakianɛ lo dihole diôdiakiwɔ ndo wekɔ lo nyanga dia mɛnya ɔnɛ awui wofundami lo djembetelo yohanewɔ l’otamba wekɔ kashi. Wambotatɛ mamatanyiyɛ Yeso akambo oko akawomamatanyiyɛka lam’akawolomboyaka la ntondo k’Ase Sheke. Diɔ diakɔ diambotatɛ ambetshi a mboka mbɔtɛnga, wanyinginya ɛtɛ, ndo wɔ̂sɔka ɔnɛ: “We lukuki mpandjula etemwelo, la nkihika lu nshi shatu, uyashimbeli! Naka On’a [Nzambi, NW] keye, ukiti uma l’utamba [w’asui, NW]!”

Ɛlɔmbɛdi a wake l’anto awɔ wambotatɛ mbɔsɔka ndo vɔ lawɔ ɔnɛ: ‘Nde lakashimbɛka anto akina, ko ahandayashimbɛ ndamɛ! Nkumekanga k’Isariyɛlɛ mbende; aya nde mpolɔka kakianɛ oma l’otamba w’asui ko tayowetawɔ. Nde ndjaɛkɛka le Nzambi; aya Nde mbotshungolaka kakianɛ naka Nde mbolangaka, nɛ dia nde mbakataka ɔnɛ: Ɔna Nzambi mbemi.’

Ndo asɔlayi lawɔ wambosambiyama la yimba shɔ ko wambotatɛ nsɔka Yeso. Vɔ wambɔ̂sɔka lo mbosha wanu w’okai, ondo wambôkitshɛwɔ la ntondo k’onyɔ, koko hawokumi l’ɛlɔmɔ ande wamboma too. Wowotɛ vate: “Naka Khum’ekanga k’asi Juda keye, uyashimbeli.” Kânga ase wevi wohanemi kâmɛ lande—ɔnɛ lo lonya l’omi, okina lo lonya la lɔmɔsɔ—wambotatɛ mbɔsɔka. Ohokanyiya dikambo sɔ! Onto loleki woke lo tena tshɛ, mɛtɛ, ɔnɛ lakakambaka kâmɛ la Jehowa lo tonga diangɔ tshɛ, amboyatshika tshɛ dia nsowa ɔsɔku!

Asɔlayi wambɔsa ahɔndɔ wa Yeso wa lâdiko ko wambokahanya lo bɛtshi nɛi. Wamboka owale dia mbeya ɔnɛ layɔsa tenyi sɔ. Koko dihɔndɔ dia la tshina, dihɔndɔ dia nɛmɔ efula, kema la ɛtɛlɛlɔ. Diɔ diakɔ diambotanela asɔlayi vate: “Tatuwatulaki, tuwûki uwali, teyi layuyala kangawo.” Aha la vɔ mbeya, ɔsɔku mbambowokotsha divɛsa diata ɔnɛ: “Wakakahana ahondo ami, wakuki ukutu ami uwali.”

L’ɔkɔngɔ diko, ose wovi ɔmɔtshi amboyoshihodia ɔnɛ Yeso mɛtɛ pombaka monga nkumekanga. Ɔnkɔnɛ, nde ambohangwɛ onyande, awotɛ ate: “We huki [Nzambi, NW] woma, ne dia we akanyema pupu? Mete, wakasambula dikambu diasu ololo, ne dia shu tambulungula difutu dia etsha asu. Keli untu one, kuntsha nduku dikambu dia kolo.” Ko nde ambɔlɔmba Yeso ate: “Jesu, kumbuho lam’ayuyukuma lu diulelu diaye.”

Ko Yeso ambôkadimola ate: “[Mɛtɛ kakotɛmi ɛlɔ nte: We ayonga la mi lo Paradiso, NW].” Daka sɔ diayokotshama lam’ayolɛ Yeso oko Nkumekanga l’olongo ndo lam’ayondolola otshi w’akambo wa kɔlɔ wamboyatshumuya dia nde ndjɔsɛna lanɛ la nkɛtɛ lo Paradiso kayokondja ehandɔ wa l’Armagɛdɔ la anyawɔ diɛsɛ dia kilɔngɔsɔla. Mateu 27:33-44; Mako 15:22-32; Luka 23:27, 32-43; Joani 19:17-24.

▪ Lande na kambotona Yeso nɔ wanu wɔsɔhanyemi la kondjo?

▪ L’ɔtɛ akɔna, ondo, wambowohanɛ djembetelo mɔtshi l’otamba wa Yeso, ndo kakɔna kambotomba l’asa Pilato nde l’ɛlɔmbɛdi wa weke oma lo dikambo sɔ?

▪ Naa akambo akina wa kɔlɔ wasalɛwɔ Yeso lam’ende l’otamba, ndo kakɔna mɛtɛ kele lo kiɔkɔ y’akambo akɔ?

▪ Woho akɔna wambokotshama pɔlɔfɛsi kɛmɔtshi oma lo kɛnɛ kambowosala l’ahɔndɔ wa Yeso?

▪ Woho akɔna wambotshikitanya ose wovi ɔmɔtshi dionga diande, ndo ngande wayokotsha Yeso kɛnɛ kambondɔ̂lɔmba?