Etini 6
Lande na Nzambi aketawo asui
1, 2. Woho akona wakalanya ambutshi aso wa ntondo akambo w’ololo ane wakâsale Nzambi l’etatelo na?
BONDE kele akambo wakafukutana na? Kakona kakalanya akambo w’ololo ane wakalongosola Nzambi l’etatelo otsha le ambutshi aso wa ntondo lo Paradiso ka l’Edena na? Lande na kele akambo wa ngala ndo paa weko lo tetemala la salema omako deko di’enonyi, lo dihole dia lutui ki ndo diokanelo ne diaki lo Paradiso na?
2 Eko paka dikambo dia Adama la Eva wakakambe la diaaso diawo dia sona kene kalangawo olimu lo woho wa kolo. Wakohe dia tâkawatongama dia monga la loseno l’ololo aha la Nzambi kame ndo elembe ande mbekama lateyi. Wakahome ntolo dia monga la dipanda lasawo la Nzambi, la lokanyi l’one loseno lawo l’ayonga dimena efula. Onkone, wakatambe olelo wakadje Nzambi lo kene kak’endaka diaaso diakiwo dia sona kene kalangawo.—Etatelo, tshapita 3.
Dikambo di’endana la lowandji l’andja w’otondo
3-5. Lande na Nzambi kondjaka Adama la Eva woho wa nde mimɛ l’akambo w’eyoyo na?
3 Lande na Nzambi kondjaka Adama la Eva ko nde tonga pami kikina la womoto okina na? Ne dia lowandji lande la andja w’otondo, mbuta ate wolo ande wa mbole, akadjama tamu.
4 Dimbola diako diakokama dio ne: Ele la wolo wa mbole, ndo lowandji laki na lele la losembwe? Lam’ele nde eko Kanga-Wolo-Tshe ndo Otungi wa ditongami tshe, Nzambi eko la wolo wa mbole ladiko diawo. Lam’ele lomba lande kema l’ekomelo, lowandji lande leko ololo efula le ditongami diande tshe. Koko lowandji laki Nzambi lakadjama tamu. Nto, onde komonga ɛkɔmɔ k’oma le—onto, etongami kande? Tayenda dikambo so yema la ntondo woho akona wele losembwe l’anto pakemaka lateyi.
5 Lam’akakondja onto dipanda lo ndjakakitola kande la Nzambi, dimbola dikina diakatombe: Onde anto w’ayonga la loseno l’ololo aha la monga la tshina dia lowandji laki Nzambi? Lo mete, Otungi akeye okadimwelo, koko woho omotshi wa nde mbidja anto lo mboka dia vo kondja okadimwelo ako aki dia nde mbasha lotshungo lone lakawalombaka. Lam’ele oso kele mboka kakawasone oma lo diaaso diaki lawo dia sona kene kalangawo, Nzambi akâtshike dihole.
6, 7. Bonde kele Nzambi akatshike anto lotshungo etena k’otale ngane na?
6 Lo tshike anto etena k’otale dia vo monga la lotshungo l’akambo tshe, Nzambi akalange menya mbala kako otoyi ndo pondjo dia kana anto wakakoke monga la loseno l’ololo la tshina dia lowandji lande kana lo ndjâlombola voameme. Etena kakawakondja akahombe ndjâla otale dia anto kotsha kene kakawenaka one ndeka ololo lo awui w’endana la politike kawo, mashinyi wa tonga tonga, akambo wa diewo ndo olimu w’onganga.
7 Omaloko mbele, Nzambi akasha anto lotshungo lo akambo tshe polo ndo ɛlɔ kene dia vo menya l’ololo tshe kana vo kokaka mbidja dia ndjalombola voameme lo ndjakakitola kawo la Nzambi kana pudi. Woho ako wame mbele, anto wakakoke dia sona lasa ololo la kolo, lasa lolango la lohetsho, lasa losembwe la diengiya. Koko, vo w’enako etombelo w’oma lo kene kakawasonola: lutui ki lone latomba oma lo ololo kana asui ane watomba oma lo kolo.
Otombokwelo wa ditongami dia lo nyuma
8, 9. (a) Woho akona wakatate otombokwelo lo edjaselo ka henama? (b) Ladiko dia Adama la Eva, waana akona wakasokoyasama nto oma le Satana l’otombokwelo na?
8 One eko dikambo dikina diahombama sedingoma. Ambutshi aso wa ntondo komonga vo ameme ato wane wakatombokwe lowandji laki Nzambi. Ko waana akona akina wakasenaka etena kako na? Ditongami dia lo nyuma. La ntondo ka tonga anto, Nzambi akatonge woho omotshi wa seno yoleki anto, lofulo la woke la andjelo, wane wakatongama dia sena l’olongo. Wakatongama la lotshungo la sona kene kalangawo ndo la ohomba wa nemiya lowandji laki Nzambi.—Jobo 38:7; Osambu 104:4; Enyelo 5:11.
9 Bible menyaka dia otombokwelo wakamɛ ntondo lo edjaselo ka henama. Etongami kimotshi ka lo nyuma akalange monga la lotshungo l’akambo tshe. Nde akalange nto dia anto mbôtemola. (Mateu 4:8, 9) Nyuma kakatomboko akasokoya Adama la Eva l’otombokwelo oma lo lokeso l’one Nzambi akâdime engo kimotshi k’ololo. (Etatelo 3:1-5) Omaloko, nde akelamɛ Djambolo (Omamatanyi) ndo Satana (Ondoshi). L’okongodiko, nde akayosokoya ditongami dikina dia lo nyuma dia vo tomboko. Wakelamɛ edienge.—Ehwelo k’Elembe 32:17; Enyelo 12:9; 16:14.
10. Akambo akona wakatombe oma lo otombokwelo w’anto ndo wa ditongami dia lo nyuma?
10 Oma lo otombokwelo awo otsha le Nzambi, anto wakayaete voameme la tshina dia lowandji laki Satana la edienge ande. Woho ako wame mbele Bible mbetaka Satana ate: “nzambi k’andja one,” one “l’etɛ tokanyi ta wane wahalange mbetawo totshungu.” Dui dia Nzambi mbutaka nto ate: “Andja w’otondo weko lo kawakawa la tshina dia wolo wa kanga kolo.” Yeso ndameme akelɛ Satana ate: “Umbuledi [w’andja one, NW].”—2 Koreto 4:4, NW; 1 Joani 5:19, NW; Joani 12:31.
Akambo ahende
11. Satana akadjɛ Nzambi tembe lo dikambo dikina diakona?
11 Satana akadje tembe otsha le Nzambi lo dikambo dikina diakandatondja. Lo mete, nde akahindɛ Nzambi ate: nde akayakese lo woho wakandatonge anto ndo nto ate: ndoko onto layolanga ntsha ololo endaka nde ambotanema la ntondo k’ehemba. Solo mete, nde akenya dia lo ehemba, anto wayokoma polo ndo lo ndoka Nzambi. (Jobo 2:1-5) Lo monga la lokanyi la woho oso, Satana akadje tembe lo ndjâlama k’anto.
12-14. Woho akona wele etena kene kak’ete akahombe menya mete ka akambo ahende ako wakatondja Satana na?
12 Oma lo woho ako mbakatshikɛ Nzambi ditongami tshe diele la tomba etena k’otale dia vo mena woho akona wayoshila dikambo so ndo dikambo ne di’endana la lowandji laki Nzambi la andja w’otondo. (Enda Etombelo 9:16.) Akambo akina wakahombe tomba l’okongo wa okondo w’anto wakenya mete ka akambo ahende ako.
13 La ntondo ka akambo akina tshe, wenya w’eta ene enyawo lo kene kendana la lowandji laki Nzambi la andja w’otondo na? Onde anto kokaka ndjalombola voameme l’ololo tshe oleki woho one wohalombola Nzambi? Onde olongoswamelo wosalemi oma le anto dia mbole aha la Nzambi mbekama lateyi, ayokoka mbela andja w’ongenongeno, wele ata kema, kolo ndo shonodi? Onde wayokoka shidiya wola ndo mbela lolombe le anto tshe? Onde wayokoka shidiya hemo, lotshundu kame ndo nyoi? Lowandji laki Nzambi lotokotsha weho w’akambo aso tshe.—Etatelo 1:26-31.
14 Tena di’eta ne, ayodi’enya lo kene kendana la dikambo diahende diele l’ohomba efula lo etshelo w’anto na? Onde Nzambi akatshe munga dia tonga anto? Onde anto amotshi wayoshikimala dia ntsha ololo oyadi kanga l’ehemba wayowakome? Onde anto wayenya dia vo nangaka lowandji laki Nzambi oleki lone l’anto?
[Osato wa lo lɛkɛ 13]
Nzambi akatshike anto etena dia vo koma l’ekomelo ka elimu awo
[Efundelo wɛnya kanga]
Weteto wa lo lôwa: oma le Fɔtɔ nasa