Wekelo 3

Ele Yeso Kristo?

Lande na kelɛwɔ Yeso ɔnɛ: Ɔna Nzambi ‘l’enondo’? (1)

Lande na kawelɛwɔ ɔnɛ “Diui”? (1)

Lande na kakaye Yeso la nkɛtɛ oko onto? (2-4)

Lande na kakandasale ahindo? (5)

Kakɔna kaya Yeso suke la sala? (6)

1. Yeso akasɛnaka l’olongo oko onto la lo nyuma la ntondo ka nde ndja la nkɛtɛ. Nde mbakatongama ntondo oma le Nzambi, diɔ diakɔ diawelɛwɔ ɔnɛ: Ɔna Nzambi ‘l’enondo.’ (Kolosai 1:15; Enyelo 3:14) Yeso mbele tshɔi yakɔ y’Ɔna yakatonge Nzambi ndamɛ. Jehowa akɔsɛ Yeso lakasɛnaka ntondo l’olongo oko ‘okambi ande wa kɔmba’ dia ntonga diangɔ dikina tshɛ l’olongo ndo la nkɛtɛ. (Tukedi 8:​22-31; Kolosai 1:16, 17) Nzambi akakambe la nde nto oko yɛmb’awui Yande yoleki woke. Diɔ diakɔ dielɛwɔ Yeso ɔnɛ: “Diui.”​—Joani 1:1-3; Enyelo 19:13.

2. Nzambi akatome Ɔnande lanɛ la nkɛtɛ lo sangola lɔsɛnɔ lande ko lidja l’otema waki Mariya. Omalɔkɔ, Yeso kombotɔ oma l’ekimanyielo k’ombutshi wa pami w’onto. Diɔ diakɔ diakinde kompowɔ pɛkato la ekokele. Nzambi akatome Yeso la nkɛtɛ lo ɛkɔkɔ esato ɛnɛ: (1) Dia tolakanya mɛtɛ k’endana la Nzambi (Joani 18:37), (2) dia nama kɔlamelo ya kokele woho wa tosha ɛnyɛlɔ ka sho ndjela (1 Petero 2:21), ndo (3) dia nambola lɔsɛnɔ lande woho wa totshungola oma lo pɛkato la nyɔi. Lande na kaki dikambo sɔ ohomba?​—⁠Mateu 20:28.

3. Oma lo pindola ɔlɛmbɛ wa Nzambi, Adama, onto la ntondo, akasale dikambo dielɛ Bible ɔnɛ: “Pɛkato.” Ɔnkɔnɛ, Nzambi akôfundɛ nyɔi. (Etatelo 3:17-19, NW) Lam’ele nde akakite tatala dia kotsha ɛlɛmbɛ wa Nzambi, nde kondjala onto la kokele nto. Yema yema nde akatatɛ monga osombe ko ndjovɔ. Adama akasambiya anande tshɛ pɛkato. Diɔ diakɔ diatshundaso esombe ndo diavɔso. Woho akɔna wakoka anto kondja panda na?​—Romo 3:23; 5:12.

4. Yeso aki onto la kokele oko Adama. Koko otshikitanyi la Adama, Yeso akakitanyiya Nzambi l’akambo tshɛ, oyadi kânga l’ehemba wa wolo efula. Diakɔ mbakandakoke nambola lɔsɛnɔ lande l’onto la kokele dia nemanya la pɛkato kakasale Adama. Olambo akɔ mbelɛ Bible ɔnɛ “tshungo.” Oma lo dikambo sɔ mbakoka ana w’Adama tshungɔ oma lo nyɔi kakawâfundɛ. Wanɛ tshɛ wetawɔ Yeso kokaka dimanyiema pɛkato yawɔ ko monga la lɔsɛnɔ la pondjo.​—⁠1 Timɔtɛ 2:​5, 6, NW; Joani 3:16; Romo 5:18, 19.

5. Lam’akinde la nkɛtɛ, Yeso akakɔnɔla ɛkɔnyi, akalesha wanɛ waki la ndjala, ndo akɔ̂ladia mpɛpɛ ya wolo. Nde akolola koyanga edo. Dikambo kona diakandasalaka ahindo asɔ? (1) Nde akokaka amɛnyi fɔnu kɛtshi, diɔ diakɔ diakandalangaka mbakimanyiya. (2) Ahindo ande wakɛnyaka ɔnɛ: nde aki Ɔna Nzambi. (3) Ahindo akɔ wakɛnyaka kɛnɛ kayondoyosalɛ akanga w’okitanyiya lam’ayondolɛ oko Nkumekanga lâdiko dia nkɛtɛ k’otondo.​—Mateu 14:14; Mako 2:10-12; Joani 5:28, 29.

6. Yeso akavu ko Nzambi akawolola oko etongami ka lo nyuma, ko nde akakalola l’olongo. (1 Petero 3:18) Oma k’etena kɛsɔ, Nzambi akawodje Nkumekanga. Kem’edja nto, Yeso ayonya akambo wa kɔlɔ tshɛ ndo asui oma la nkɛtɛ kɛnɛ.​—Osambu 37:9-11; Tukedi 2:21, 22.

[Diombwɛlo di’osato wa lo lɛkɛ 7]

Olimu wa Yeso wakendanaka la mbetsha anto, sala ahindo, ndo nambola kânga lɔsɛnɔ lande l’ɔtɛ aso