Wolo wa nɔngɔsɔla ​—Jehowa ‘eetɛ diangɔ tshɛ eyoyo’

1, 2. Diangɔ diakɔna diashisha anto ɛlɔ kɛnɛ, ndo shɛngiya yakɔna yonga la dikambo sɔ le so?

ƆNA ekɔ lo ndela efula l’ɔtɛ wambondoshisha kana wambondolanya ɛngɔ kakɛnyande la tɔ kalangande efula. Solo tɛtɛka mɛtɛ lo menda woho walelande! Koko papa mbeyaka mɛna kana nɔngɔsɔla ɛngɔ kɛsɔ, ko ɔna ngɛnangɛna. Kiambokambo yele tshitshɛ le opalanga ambokiya ɔna ɔlɔ ndo ambowambiya efula. Ɔn’ɔsɔ ambokondja nto ɛngɔ kakandafɔnyisha dia nde hakɛnyaki la tɔ nto pondjo!

² Jehowa lele Ombutshi aso woleki tshɛ ekɔ la wolo wa nɔngɔsɔlɛ anande wa la nkɛtɛ kɛnɛ kakokawɔ mɛna oko tɔ kamboshishɔ lo pondjo. Koko aha dikambo dia diangɔ dia tɔkɛnyɔ mbatɛkɛtaso lanɛ. Lo “tena dia paa dia wolo mbikikɛ” nɛ tayonyomoleka pomana l’ekakatanu efula. (2 Timɔte 3:1-5) Wonya tshɛ anto wekɔ la wɔma wa shisha etenyi ka woke ka kɛnɛ kele ohomba lewɔ oko: Mvudu, diangɔ, olimu ndo kaanga lɔsɛnɔ. Olanyelo w’ahole wadjasɛ anto, ndo etombelo waya oma lɔkɔ, omanelo wa weho wa diangɔ diele la lɔsɛnɔ, ekɔ nto akambo akina washa lonyangu. Koko, ndooko dikambo dialeka tosha paa l’asolo oko nyɔi ka lakiso ɔmɔtshi la ngandji. Sho ndjaokaka oko etshike ndo kɔmɔka tshɛ.​—2 Samuɛlɛ 18:33.

3. Elongamelo kakɔna ka dimɛna katosha Etsha 3:21 ndo Jehowa ayokamba la ehomɔ kakɔna dia sala dikambo sɔ?

³ Ekɔ mɛtɛ ekeketshelo efula dia mbeya ɔnɛ wolo wa Jehowa nɔngɔsɔlaka! Oko wayotodiɛna, Jehowa koka ndo ayosha anande wa la nkɛtɛ diangɔ efula heyama. Bible mɛnyaka dia Nzambi nangaka ‘nɔngɔsɔla diangɔ tshɛ.’ (Etsha 3:21) Dia nsala dikambo sɔ, nde ayokamba la Diolelo dia Mɛsiya diakatatɛ mbolɛ l’olongo lo 1914.a (Mateo 24:3-14) Kakɔna kayɔlɔngɔswama? Tɔsɛdingole akambo amɔtshi wa weke walɔngɔsɔla Jehowa. Dikambo dimɔtshi l’atei w’akambo asɔ koka mɛnama oma ko kakiye ndo sho koka nkondja wahɔ oma lɔkɔ. Akambo akina wayosalema lo yɛdikɔ y’efula lo nshi yayaye.

Ɔlɔngɔswɛlɔ wa ɔtɛmwɛlɔ wa pudipudi

4, 5. Kakɔna kakakomɛ ekambi waki Nzambi lo 607 N.T.D., ndo elongamelo kakɔna kakawasha Jehowa?

⁴ Ɛngɔ kɛmɔtshi kambɔlɔngɔsɔla Jehowa ko ɔtɛmwɛlɔ wa pudipudi. Dia mana dikambo sɔ mfundo, tɔsɛdingole ɔkɔndɔ wa diolelo dia Juda lo tshena pe. Ɔsɛdingwelo ɔsɔ ayotokimanyiya dia monga la kanyi ya shikaa lo woho wakamba wolo wa nɔngɔsɔla wa Jehowa olimu.​—Rɔmɔ 15:4.

⁵ Ohokanyiya woho wakayaoke ase Juda waki la kɔlamelo lo 607 N.T.D., etena kakalanyema Jɛrusalɛma. Osomba awɔ wakawalangaka efula wakalanyema, mpele diawɔ diakanyukɔ ndo kɛnɛ kakaleke tshɛ, tɛmpɛlɔ ka lotombo kakahike Sɔlɔmɔna, kaki etshina kaamɛ ka ɔtɛmwɛlɔ wa pudipudi wa Jehowa lo nkɛtɛ k’otondo kakakome tota di’ave. (Osambo 79:1) Wanɛ waki kondjakema wakatɔlama lo lɔhɔmbɔ la Babilɔna ndo wakatshike wodja awɔ wa lootɔ tɔngɔ to ndo waya edjaselo ka nyama ya l’okonda. (Jɛrɛmiya 9:11) Lo kanyi y’anto, akɛnama dia tshɛ amboshishɔ. (Osambo 137:1) Koko, Jehowa lakatɛkɛta la ntondo dikambo dia elanyelo kɛsɔ akasha nto elongamelo k’ɔnɛ osomba ɔsɔ wayɔlɔngɔsɔma lo nshi yayaye.

6-8. a) Dikambo diakɔna diatɛkɛtama mbala la mbala lo efundelo wa amvutshi w’ase Hɛbɛru, ndo ngande wakakotshama prɔfɛsiya shɔ ntondo? b) Lo nshi yaso nyɛ, okotshamelo akɔna wa prɔfɛsiya y’ɔlɔngɔswɛlɔ wambɛna ekambi waki Nzambi?

⁶ Ɔlɔngɔswɛlɔ aki ɔtɛ wa dui wakalekaka amvutshi w’ase Hɛbɛru ntɛkɛta mbala la mbala.b Lo tshimbo yawɔ, mbakalake Jehowa dia wodja ɔsɔ mpikama nto, ndola nto la anto, monga la nkɛtɛ y’ɛtɛtɔ ndo ekambi ande kokamɛ oma le nyama ya ngala ndo ɔlɔshamelo wa atunyi, tshondo ya Paradiso mɛtɛ! (Isaya 65:25; Ɛzɛkiyɛlɛ 34:25; 36:35) Kɛnɛ kakaleke tshɛ ohomba ele ɔtɛmwɛlɔ wa pudipudi wakahombe nɔngɔsɔma nto ndo tɛmpɛlɔ kakahombe mbikama nto. (Mika 4:1-5) Prɔfɛsiya shɔ yakasha ase Juda waki lo lɔhɔmbɔ elongamelo ndo yakaakimanyiya dia vɔ mbikikɛ ɛnɔnyi 70 wakawetsha lo lɔhɔmbɔ la Babilɔna.

⁷ L’ekomelo, etena k’ɔlɔngɔswɛlɔ kakayokokaka. Lam’akawatshungɔ oma la Babilɔna, ase Juda wakakalola la Jɛrusalɛma ndo wakatohika tɛmpɛlɔ ka Jehowa nto. (Ɛzɛra 1:1, 2) L’edja tshɛ kakawamamemaka ɔtɛmwɛlɔ wa pudipudi, Jehowa akaatshɔkɔla ndo aketɛ wodja awɔ nkɛtɛ y’ɛtɛtɔ ndo y’ɔngɔnyi. Nde akaakokɛ oma le atunyi awɔ ndo oma le nyama ya ngala yakafulanɛ lo wodja awɔ. Wolo wa nɔngɔsɔla waki Jehowa akaangɛnyangɛnya efula! Koko akambo asɔ waki tsho ekotshamelo ka ntondo ndo ka tshenyitenyi ka prɔfɛsiya yendana la ɔlɔngɔswɛlɔ. Ekotshamelo ka hende ndo koleki woke kakahombe ndjosalema ‘l’etenyi k’ekomelo ka nshi yaso nyɛ,’ mbuta ate etena kakahombe Okitɔ waki nkumekanga Davidɛ wakalakema edja mbahenyama lo nkiti ka lowandji.​—Isaya 2:2-4; 9:6, 7.

⁸ Yema tshitshɛ l’ɔkɔngɔ wa vɔ mbaahenya lo nkiti ka lowandji ka Diolelo dia l’olongo lo 1914, Yeso akadje yimba l’ehomba wa lo nyuma w’ekambi wa Nzambi wa kɔlamelo wele la nkɛtɛ. Oko wakatshungola Kurɔ k’ose Pɛrɛsiya lakalɛndja Babilɔna atshikadi w’ase Juda lo 537 N.T.D., Yeso akatshungola atshikadi w’ase Juda wa lo nyuma, mbuta ate ambeki ande, oma lo tɔsɛngiya ta Babilɔna ka nshi nyɛ, mbuta ate tshunda dia l’andja w’otondo di’ɛtɛmwɛlɔ wa kashi. (Ɛnyɛlɔ 18:1-5; Rɔmɔ 2:29) Tatɛ lo 1919, ɔtɛmwɛlɔ wa pudipudi wambɔlɔngɔsɔma lo dihole diawɔ lo nsɛnɔ y’Akristo wa mɛtɛ ndo tatɛ oma l’ɔnɔnyi ɔsɔ, ekambi wa Jehowa wekɔ lo mbɔtɛmɔla lo tɛmpɛlɔ kande ka lo nyuma, mbuta ate ekongelo kakalɔngɔsɔla Nzambi dikambo di’ɔtɛmwɛlɔ wa pudipudi. (Malaki 3:1-5) Lo na ele ɔlɔngɔswɛlɔ ɔsɔ ohomba le so ɛlɔ kɛnɛ?

Ohomba w’ɔlɔngɔswɛlɔ wa lo nyuma

9. Kakɔna kakasale Lokristokristo l’ɔtɛmwɛlɔ wa Nzambi l’ɔkɔngɔ wa nyɔi k’apɔstɔlɔ, ndo kakɔna kasala Jehowa lo nshi yaso nyɛ?

⁹ Tɔsɛdingole akambo wa l’ɛkɔndɔ wendana la dikambo sɔ. Akristo wa lo ntambe ka ntondo waki l’ɛtshɔkɔ efula wa lo nyuma. Koko, Yeso nde la apɔstɔlɔ wakatatshi dia ɔtɛmwɛlɔ wa mɛtɛ wayolanyema ndo wayoshishɔ. (Mateo 13:24-30; Etsha 20:29, 30) L’ɔkɔngɔ wa nyɔi k’apɔstɔlɔ, Lokristokristo lakatombe. Ewandji alɔ waketawɔ wetshelo ndo ditshelo dia apanganu. Ehekesa dikambo ka Losato l’Osanto, wotelo wa kɔfɛshɔ le asasɛrdɔsɛ, alɔmbɛlɔ otsha le Mariya ndo otsha le lokema la wanɛ welɛwɔ asato lo dihole dia nɔmbaka Jehowa, wetshelo ɛsɔ tshɛ mɛnyaka di’oko anto hawokoke pondjo ndjasukanya la Jehowa. Kakɔna kakasale Jehowa l’ɔkɔngɔ wa nkama y’ɛnɔnyi yakalanyema ɔtɛmwɛlɔ wa mɛtɛ? Nde akalɔngɔsɔla ɔtɛmwɛlɔ wa pudipudi l’atei w’andja ɔnɛ wambolanyema la wetshelo wa kashi w’oma l’ɛtɛmwɛlɔ ndo la ditshelo dia kɔlɔ! Sho koka mbuta aha la mbidja oshimu esɔ dia ɔlɔngɔswɛlɔ ɔsɔ ekɔ dikambo dimɔtshi dioleki ohomba lo nshi nyɛ.

10, 11. a) Toho takɔna tohende ta weke tɛnama Paradiso ka lo nyuma, ndo ngande wendana dikambo sɔ layɛ? b) Weho akɔna w’anto watshumanya Jehowa lo Paradiso ka lo nyuma, ndo kakɔna kayowonga la diɛsɛ dia mɛna?

¹⁰ Akristo wa mɛtɛ wekɔ lo Paradiso ka lo nyuma katatetemala ndowana ndo mpama. Ngande wele Paradiso kɛsɔ? Tɔ mɛnamaka lo toho tohende: Ntondotondo, tɔ kekɔ ɔtɛmwɛlɔ wa mɛtɛ wa Jehowa Nzambi, wakandanya akambo tshɛ wa kashi ndo wa lokolonganya. Shɛso lele l’olongo ekɔ lo tosha mbo ya ndɛ ya lo nyuma yatokimanyiya dia mbeeya, mbɔɔngɛnyangɛnya ndo ndjasukanya la nde. (Joani 4:24) Yoho ya hende yɛnama Paradiso ka lo nyuma mendanaka l’anto. Oko wakadite Isaya, “lo nshi y’ekomelo,” Jehowa ambetsha atɛmɔdi ande mboka ya wɔladi. Nde akanya ata lam’asawɔ. Kaanga mbewɔ la wandja, nde mbakimanyiyaka dia vɔ ndɔta “lonto l’oyoyo.” Nde tshɔkɔlaka welo wadjaso lo ntosha nyuma kande k’ekila katokimanyiya dia kɛnɛmɔla waonga w’amɛna efula. (Ɛfɛsɔ 4:22-24; Ngalatiya 5:22, 23) Onto tshɛ letawɔ nɔmbɔma la nyuma ka Nzambi ekɔ mɛtɛ lo Paradiso ka lo nyuma.

¹¹ Lo Paradiso kɛsɔ, Jehowa ekɔ lo tshumanya weho w’anto walangande: anto walanga wana woolanga, walanga wɔladi ndo weya “ehomba awɔ wa lo nyuma.” (Mateo 5:3) Anto asɔ wayɛna ɔlɔngɔswɛlɔ okina woleki tshɛ, mbut’ate ɔlɔngɔswɛlɔ w’anto ndo wa nkɛtɛ k’otondo.

“Enda, dimi leetɛ diangɔ tshɛ eyoyo”

12, 13. a) Lande na kahomba prɔfɛsiya y’ɔlɔngɔswɛlɔ monga l’okotshamelo okina? b) Naa sangwelo diendana la nkɛtɛ diakɛnya Jehowa l’Ɛdɛna, ndo eshikikelo kakɔna katosha Jehowa lo nshi yayaye?

¹² Prɔfɛsiya efula ya y’ɔlɔngɔswɛlɔ hayokomɛ paka l’okotshamelo wa lo nyuma oto. Ɛnyɛlɔ, Isaya akatɛkɛta dia etena kayoshila hemɔ, kayɔkɔnɔ akanga wa dikɔmɔ, kayɔsɛna totshungu, kayoka akanga a mpoke ndo kayonyɛma nyɔi lo pondjo. (Isaya 25:8; 35:1-7) Alaka asɔ kokotshama lo yoho ya mɛtɛ mɛtɛ le ase Isariyɛlɛ w’edjedja. Ndo kaanga mbɛnaso ekotshamelo ka lo nyuma ka prɔfɛsiya shɔ ɛlɔ kɛnɛ, tekɔ l’eshikikelo dia yɔ yayokotshama lo yoho ya mɛtɛ mɛtɛ ndo yoleki woke lo nshi yayaye. Ngande weyaso dikambo sɔ?

¹³ L’ekambɔ k’Ɛdɛna Jehowa akɛnya sangwelo diande hwe lo dikambo dia nkɛtɛ. Yɔ yakahombe ndola la nkumbo k’anto wele kaamɛ l’ɔngɛnɔngɛnɔ ndo l’alemba w’amɛna. Pami la womoto wakahombe nɔngɔsɔlaka nkɛtɛ ndo kokɛka waa nyama ya lɔkɔ tshɛ l’oyango wa mbetɛ nkɛtɛ k’otondo Paradiso. (Etatelo 1:28) Ɛlɔ kɛnɛ aha ngasɔ mbɛnaso akambo. Koko tonge l’eshikikelo dia Jehowa tokotshaka asangwelo ande nshi tshɛ. (Isaya 55:10, 11) Yeso, lele Nkumekanga ndo Mɛsiya wakasɔnama oma le Jehowa mbayetɛ nkɛtɛ k’otondo Paradiso.​—Luka 23:43.

14, 15. a) Ngande wayetɛ Jehowa “diangɔ tshɛ eyoyo”? b) Ngande wayonga lɔsɛnɔ lo Paradiso, ndo dikambo diakɔna dia lo lɔsɛnɔ lɔsɔ dialekayɛ nanga?

¹⁴ Ohokanyiya dia nkɛtɛ k’otondo kambokadimɔ Paradiso! Jehowa mbutaka lo dikambo di’etena kɛsɔ ate: “Eenda! Dimi leetɛ diangɔ tshɛ eyoyo.” (Ɛnyɛlɔ 21:5) Kakɔna kalembetshiya ɛtɛkɛta ɛsɔ? Lam’ayoshidiya Jehowa nkamba la wolo ande w’elanyelo dia nanya dikongɛ di’akambo dia kɔlɔ nɛ, ayotshikala “olongo w’oyoyo la nkɛtɛ y’oyoyo.” Kɛsɔ mɛnyaka di’oma l’olongo lowandji l’oyoyo layɔlɔmbɔla nkɛtɛ k’oyoyo, mbuta ate tshunda di’anto woka Jehowa ngandji ndo wasala lolango lande. (2 Petero 3:13) Satana l’ɛdiɛngɛ ande wayokangema woho wahawakoke salɛ ndooko onto kɔlɔ. (Ɛnyɛlɔ 20:3) Ɔsɔ ayonga mbala ka ntondo kayomɔ anto lo shɛngiya ya mindo, ya lohetsho ndo ya kɔlɔ l’ɔkɔngɔ wa vɔ monga lo shɛngiya shɔ l’edja ka nunu la nunu di’ɛnɔnyi. Aha la taamu ekimanyielo kɛsɔ kayonga lo yoho yaheyama mbuta.

¹⁵ Laasɔ mbayotoyonga la akoka wa nɔngɔsɔla okama aso wa nkɛtɛ wa dimɛna efula ɔnɛ woho wakahombe dikambo sɔ salema l’etatelo. Nkɛtɛ twamɛmɛ kekɔ l’akoka wa ndjalɔngɔsɔla. Eduwa ndo nkushi yambolanyema la diangɔ dia mindo yayɛla yɔamɛ naka kɛnɛ kadja mindo shɔ kambomɔ. Ahole walanyema la ata wayɔlɔngɔswama naka ata wamboshila. Ayonga mɛtɛ ɔngɛnɔngɛnɔ w’efula dia nkamba kaamɛ la nkɛtɛ dia ndjikimanyiya dia yɔ nɔngɔsɔma ko nkoma ekambɔ k’Ɛdɛna ka woke ka mamba kele la tombatomba ndo la waa nyama ya weho waheyama mbuta! Odiakelo wa l’okonda wa waa nyama kana olanyelo wa tombatomba hatonga nto. Wɔladi wayonga lam’asa onto la ditongami tshɛ dia la nkɛtɛ. Kaanga ana w’akɛnda hawotoka nyama ya mpango wɔma nto.​—Isaya 9:6, 7; 11:1-9.

16. Ɔlɔngɔswɛlɔ akɔna wayendana l’onto tshɛ lele la kɔlamelo lo Paradiso?

¹⁶ Ɔlɔngɔswɛlɔ ɔsɔ wayendana ndo la so onto l’onto. L’ɔkɔngɔ wa Aramangɛdɔna, anto wayohandɔ wayɛna woho wayosalemaka ɛkɔnwɛlɔ ka lo dihindo lo tokoma tshɛ ta nkɛtɛ. Oko wakandasale lam’akinde lanɛ la nkɛtɛ, Yeso ayokamba la wolo wakawosha she dia sɛnya akanga wa totshungu, nkɔnɔla akanga wa mpoke, tshumbe, ndo anto wele la dikɔmɔ. (Mateo 15:30) Esombe w’anto wayonga nto l’alemba wa wolo ndo w’amɛna oko akɛnda. (Jɔbɔ 33:25) Enyanga wa lo demba wayodimɔ, onto ayonga nto la wolo wa demba, ndo emunyi wayokeketala nto. Anto tshɛ wa kɔlamelo wayotokaka woho watashile etombelo wa kɔlɔ w’oma lo pɛkato yema yema polo ndo lam’ayowoshila tshɛ lo tshɛ. Tayonga mɛtɛ la lowando l’efula otsha le Jehowa l’ɔtɛ wa wolo ande wa diambo wa nɔngɔsɔla! Tɔsɛdingole kakianɛ yoho mɔtshi ya laande yendana l’etena ka diambo kɛsɔ k’ɔlɔngɔswɛlɔ.

Eolwelo

17, 18. a) Lande na kakaanya Yeso Asaduka? b) Kakɔna kakakonya Elidja lo nɔmba Jehowa dia nsala eolwelo?

¹⁷ Lo ntambe ka ntondo, ewandji ɛmɔtshi w’ɛtɛmwɛlɔ wakawelɛka Asaduka komonga la mbetawɔ lo eolwelo. Yeso akaanya ewandji w’ɛtɛmwɛlɔ ɛsɔ l’ɛtɛkɛta ɛnɛ ate: “Nyu nyekɔ lo dindja, nɛ dia hanyeye oyadi Afundelo kana wolo wa Nzambi.” (Mateo 22:29) Afundelo mɛnyaka dia Jehowa ekɔ la wolo wa nɔngɔsɔla ɔsɔ.

¹⁸ Ohokanyiya kɛnɛ kakasalema lo nshi y’Elidja. Wadi aki odo ɔmɔtshi akɛmbɛ odo wa tshɔi y’ɔnande. Ɔna pami ɔsɔ akashile la mvɔ. Omvutshi Elidja laki oma la mpanga lo luudu laki wadi aki odo ɔsɔ akahombe tshimba wɔɔngɔ efula. Atete edja, nde aki oma la kimanyiya ɔn’ɔsɔ di’aha nde mvɔ la ndjala, ndo ondo Elidja akalangaka ɔnakɔ. Nyango akandama la lɔkɔnyɔ l’efula. Le yana ya hiami shɔ mbakandendaka elungi k’omɛnde lakavu. Ondo nde akafɔnyaka dia ɔn’ɔsɔ ayoyookimanyiya etena kayondokoma osombe. Oko wakandahandjɔ wɔɔngɔ efula, wadi aki odo ɔsɔ akafɔnya dia ɔsɔ aki dilanya diakandakondja l’ɔtɛ wa kɔlɔ kɛmɔtshi kakandasale ntondo. Elidja takandakoke mbikikɛ nto. Nde akɔshi odo wa ɔn’ɔsɔ ɔkɔkɛ oma l’anya wa nyango, akadɛ la nde lo luudu lande, ndo lɛkɔ nde akalɔmbɛ Jehowa dia mbolola ɔn’ɔsɔ.​—1 Nkumi ya dikanga 17:8-21.

19, 20. a) Ngande wakɛnya Abrahama mbetawɔ lo wolo wa nɔngɔsɔla wele la Jehowa ndo oma lende akaye mbetawɔ kɛsɔ? b) Ngande wakafute Jehowa mbetawɔ k’Elidja?

¹⁹ Elidja komonga onto la ntondo laki la mbetawɔ lo eolwelo. Nkama y’ɛnɔnyi la ntondo kande, Abrahama aketawɔ dia Jehowa aki la wolo ɔsɔ wa mbolola, ndo nde aki la shadiya. Lam’aki Abrahama l’ɛnɔnyi 100 ndo Sara ka wadɛnde la ɛnɔnyi 90, Jehowa akalɔngɔsɔla mbuta ate mbolola akoka awɔ wa diwutshi lo yoho ya dihindo dia nkimanyiya Sara dia mbota ɔna pami. (Etatelo 17:17; 21:2, 3) L’ɔkɔngɔ diko, etena kakoole ɔn’ɔsɔ, Jehowa akalɔmbɛ Abrahama dia nde mboolambola ɔnande. Abrahama akɛnya mbetawɔ, eya dia Jehowa koka mbolola Isaka w’ɔnande la ngandji. (Hɛbɛru 11:17-19) Ondo oma lo mbetawɔ ka wolo kaki lande kɛsɔ Abrahama akashikikɛ ekambi ande dia nde l’ɔna wayokalola.​—Etatelo 22:5.

²⁰ Jehowa akasale di’aha Isaka ndjakema, komonga ohomba wa nde mboolola. Koko lo dikambo diaki Elidja, ɔn’aki wadi aki odo ɔsɔ akavu mɛtɛ koko aki atete edja. Jehowa akafute mbetawɔ kaki omvutshi ande lo mbolola ɔnakɔ. Lam’akandasha mama kɛsɔ ɔnande, Elidja akate ɛtɛkɛta wahohamamɛki pondjo ɛnɛ: “Eenda, ɔnayɛ aya la lɔsɛnɔ”!​—1 Nkumi ya dikanga 17:22-24.

21, 22. a) Oyango akɔna wele la ɛkɔndɔ wa eolwelo wele lo Afundelo? b) Polo lo yɛdikɔ ya ngande yayosalema eolwelo lo Paradiso, ndo onto akɔna ayosala dikambo sɔ?

²¹ Ɔsɔ aki mbala ka ntondo katɛkɛta Bible kakakambe Jehowa la wolo ande dia nɔngɔsɔla kana mbolola lɔsɛnɔ l’onto. L’ɔkɔngɔ, Jehowa akasha wolo ɔsɔ le Elisha, Yeso, Pɔɔlɔ ndo Petero. Mɛtɛ wanɛ wakolɔma asɔ wakayovɔ nto, koko kɛnɛ kakaakomɛ tɛnyaka dimɛna woho wayosalema akambo lo nshi yayaye.

²² Lo Paradiso, Yeso ayonga mɛtɛ “eolwelo ndo lɔsɛnɔ.” (Joani 11:25) Nde ayolola miliyɔ y’anto dia mbasha diaaso dia vɔ nsɛna pondjo pondjo lo Paradiso ka la nkɛtɛ. (Joani 5:28, 29) Ohokanyiya di’angɛnyi la ewotɔ wa ngandji wele nyɔi akaakakitola edja efula ko wambɛnana nto, wokumbatanɛ ndo wɔkɛdia asɔi w’ɔngɛnɔngɛnɔ! Andja w’otondo wayotombola Jehowa l’ɔtɛ wa wolo ande wa nɔngɔsɔla.

23. Yoho yakɔna yakaleke woke yakɛnya Jehowa wolo ande, ndo dikambo sɔ atoshikikɛdiɔ lo kɛnɛ kendana la elongamelo kaso ka nshi yayaye?

²³ Jehowa akasha djembetelo ya shikaa yɛnya di’alaka asɔ tshɛ wayokotshama. Nde akɛnya wolo ande lo yoho yoleki tshɛ lo mbolola Ɔnande, Yeso oko etongami ka lo nyuma ka nkudu ko mbookonya onto lahɔnyi la Jehowa l’andja w’otondo. L’ɔkɔngɔ wa nde mbolɔ oma lo nyɔi, Yeso akɛnama le nkama y’anto. (1 Kɔrɛtɔ 15:5, 6) Keema djembetelo nyɛ koka mbetawoya akanga wa taamu? Jehowa mɛtɛ ekɔ la wolo wa mbolola.

24. Kakɔna katoshikikɛ dia Jehowa ayolola anto wakavu, ndo elongamelo kakɔna kakokaso sho tshɛ monga latɔ?

²⁴ Nzambi kaso kema tsho la wolo wa mbolola koko nde ekɔ nto la nsaki ka nsala dikambo sɔ. Jɔbɔ laki pami ka kɔlamelo akasokoyama la nyuma ka Nzambi dia mbuta ate Jehowa nomɔlomɔka dia mbolola wanɛ wakavu. (Jɔbɔ 14:15) Onde wɛ hakotɔma otsha le Nzambi kɛsɔ kele la nsaki k’efula ka nkamba la wolo ande wa mbolola la ngandji tshɛ? Tatohɛke dia eolwelo ekɔ dikambo ɔtɔi nto l’atei w’akambo wendana l’olimu wa woke w’ɔlɔngɔswɛlɔ waki Jehowa wayosalema lo nshi yayaye. Ɔnkɔnɛ, oko wayangayɛ dia ndeka ndjasukanya la nde, ɔsaka elongamelo kayɛ nshi tshɛ la nɛmɔ, elongamelo k’ɔnɛ wɛ ayokoka mɛna lushi lɔmɔtshi woho ‘wayetɛ Jehowa diangɔ tshɛ eyoyo.’​—Ɛnyɛlɔ 21:5.