Ekambi wa Jehowa wambotshungɔ wekɔ lo mbotombola lo nkɛtɛ k’otondo
“Ku dimi layukadimula eteketa w’antu dia vo ndjala pudipudi, dia vo tshe mbeya mbeta lukumbu la [Jehowa].”—ZEFANIYA 3:9.
1. Lande na kakakotshama nsango y’elanyelo le Juda ndo le wedja ekina?
NSANGO y’elombwelo yakasha Jehowa Zɛfaniya dia mbewoya anto yekɔ mɛtɛ la nkudu k’efula! Nsango shɔ y’elanyelo yakakotshama le wodja wa Juda la kapitalɛ kayɔ Jerusalɛma, nɛ dia ewandji ndo anto lo tshɛ kawɔ kotshaka lolango laki Jehowa. Nkɛlɛ kaki Nzambi kakahombe nto komɛ wedja wakasukana la wɔ, ɛnyɛlɔ oko, Filistiya, Mɔaba la Amɔna. Lande na na? L’ɔtɛ wakawasoya ekambi waki Jehowa l’edja k’ɛnɔnyi nkama. Paka l’ɔkɔkɔ akɔ wamɛ mbakahombe ndanyema ndo Asuriya, wodja wakahemɛ andja w’otondo l’etena kɛsɔ, lo yoho yahawakoke mbikama nto pondjo.
2. Waa na wele ondo vɔ mbakawatɛka ɛtɛkɛta wa lo Zɛfaniya 3:8?
2 Koko, anto amɔtshi w’ɔlɔlɔ wakikɔ la Juda shɔ y’edjedja. Vɔ wakakongɛka l’asolo walomɔlomɔ dia Nzambi ndanya anto wa kɔlɔ ndo ondo vɔ mbakawafundɛ ɛtɛkɛta ɛnɛ ɔnɛ: “Okone mbata [Jehowa] ati: Nyunkungeli edja ndu lushi layumunela uku omenyi. Esangweyu kami eli dia motsha wedja, dia dimi motsha waulelu, la mbatshulwela kele kami, ududu ami tshe, ne dia kete tshe yayulongula la dja ya kandjema kami.”—Zefaniya 3:8.
‘Ɔtɛkɛta wa pudipudi’ dikambo diaki waa na?
3. Losango lakɔna lasha elongamelo lakahombe mbewoya Zɛfaniya?
3 Eelo, Zɛfaniya akewoya nsango yaki Jehowa y’elanyelo. Koko, oma lo wolo wa nyuma, omvutshi ɔsɔ akewoya ndo losango lɔmɔtshi la diambo efula lasha elongamelo, lakahombe keketsha wanɛ wakatetemala monga la kɔlamelo le Jehowa. Oko wofundamidiɔ lo Zefaniya 3:9, Jehowa Nzambi akate ate: “Ku dimi layukadimula eteketa w’antu dia vo ndjala pudipudi, dia vo tshe mbeya mbeta lukumbu la [Jehowa], la mbôtemola [dihɛka lo dihɛka].”
4, 5. (a) Kakɔna kayokomɛ anto wa kɔlɔ? (b) Waa na wayokondja wahɔ oma lo dikambo sɔ, ndo lande na?
4 Koko aki anto amɔtshi wakiwɔ kokoka mbisha ɔtɛkɛta ɔsɔ wa pudipudi. Prɔfɛsiya kɛsɔ mbutaka lo dikambo diawɔ ɔnɛ: “Ne dia dimi layunya akanga w’utaku weli l’atei aye, la we huyala la lahi ntu l’ukungu ami w’ekila.” (Zefaniya 3:11) Ɔnkɔnɛ, akanga w’otako, wanɛ wakɔnyɔlaka ɛlɛmbɛ waki Nzambi ndo wakatshaka awui wa kɔlɔ wakahombe ndjakema. Ko waa na wakahombe kondja wahɔ oma lo dikambo sɔ na? Zefaniya 3:12, 13 mbutaka ɔnɛ: “Keli dimi [Jehowa] layutshika wudja weli la lunyangu la wula l’atei aye. Ku vo wayuyanga eshamelu lu lukumbu la [Jehowa]. Atshikadi wa Isariyele hawutsha kolo. Vo hawuta kashi, kuyanga aui wa lukesu ntanema l’enyo awo. Vo wayolekaka, wayetamaka, ku nduku lawautsha woma.”
5 Atshikadi wa kɔlamelo wa la Juda y’edjedja wakahombe kondja wahɔ. Lande na na? Nɛ dia vɔ wakakitanyiya ɛtɛkɛta ɛnɛ wata ɔnɛ: “Nyuyangi [Jehowa], nyu akanga a memakana tshe wa la kete, nyu wane watulamaka adjangu andi. Nyuyangi [losembwe], nyuyangi [okitshakitsha]. Undu, nyu mbeyaka mpanda lu lushi la kele ka [Jehowa].”—Zefaniya 2:3.
6. Kakɔna kakatombe l’ekotshamelo ka ntondo ka prɔfɛsiya ka Zɛfaniya?
6 Lo ekotshamelo ka ntondo ka prɔfɛsiya kaki Zɛfaniya, Nzambi akasha ase Juda dilanya lo woho wakiwɔ komonga la mbetawɔ, lo tshika dia Babilɔna, Diolelo Diakahemɛ Andja w’Otondo mbatɔla lo lɔhɔmbɔ l’ɔnɔnyi wa 607 N.T.D. Ase Juda amɔtshi, mbidja ndo Jeremiya l’anto akina wakahandɔ, ndo akina wakatotetemala tshikala la kɔlamelo le Jehowa kânga lɛn’akiwɔ lo lɔhɔmbɔ. L’ɔnɔnyi wa 539 N.T.D., Mediya la Pɛrɛsiya wakayɔkɔshaka Babilɔna oma l’ɛlɔmbwɛlɔ kaki Nkumekanga Kurɔ. Oko ɛnɔnyi ehende l’ɔkɔngɔ, Nkumekanga Kurɔ akayotondja didjango diakayoshaka atshikadi w’ase Juda diaaso dia vɔ kalola otsha lo wodja awɔ. L’ɔkɔngɔ diko, tɛmpɛlɔ ka la Jerusalɛma kakayohikama nto, ndo Jehowa akanyomoyoshikikɛ dioho di’ɛlɔmbɛdi dia vɔ ndakanyaka anto Ɛlɛmbɛ. (Malaki 2:7) Ɔnkɔnɛ, Jehowa akangɔnya atshikadi asɔ wakakawola lo wodja awɔ, edja tshɛ kakiwɔ la kɔlamelo.
7, 8. Ɛtɛkɛta wa prɔfɛsiya wa lo Zefaniya 3:14-17 wakendanaka la waa na, ndo lande na kakadimolayɛ ngasɔ?
7 Lo kɛnɛ kendana la wanɛ waki la diɛsɛ dia kawola lo wodja awɔ, Zɛfaniya akate ate: “We ona umuntu a Siona, imbi esambu! Isariyele, uhangohango! We on’a umuntu a Jerusalema, uyali la ongenongeno! Utamanya ngenangena l’utema aye tshe. [Jehowa] akanya dumbwelu diaye. Ndi akatshanya utunyi aye. Khum’ekanga ka Isariyele, [Jehowa], eko l’atei aye. We huka elanyelu woma ntu. Lushi lako, wayutela Jerusalema vati: Tukaki woma! La Siona vati: Anya aye tawokomoki! [Jehowa Nzambi kayɛ] eko l’atei aye, ondoshi w’ata, latushanaka elembielo. Ndi ayongenangena utamanya lu dikambu diaye. Ndi ayukulula la ngandji kandi, ayukongenangena utamanya imba esambu la diui dia wulu.”—Zefaniya 3:14-17.
8 Ɛtɛkɛta ɛsɔ wa prɔfɛsiya mendanaka l’atshikadi wakatondjama oma lo lɔhɔmbɔ la Babilɔna oya lo nkɛtɛ ya watshɛwɔ. Zefaniya 3:18-20 kɛnɛmɔlaka dui sɔ, l’ɛtɛkɛta ɛnɛ: “Dimi layunya lukulu l’engeno uma le nyu, ne dia nyu nyutukuyala la tshumu lu dikambu diako. Nyulungi, l’etena kako dimi layendana la waku watunyusuyaka. Dimi layushimbela akanga wa tshumbi, layusanganya wane wakatshanyema. Dimi layukadimula sonyi kawo lutumbu la lukumu lu kete tshe. L’etena kako, dimi layunyela leko, ndu l’etena kako, kayumunyusanganya. Ee, dimi layunyete lukumbu, la lutumbu l’atei a wedja tshe wa la kete, lam’ayumunyukaluya engonyi anyu la ntundu k’ashu anyu, mbata [Jehowa].”
9. Ngande wakatombola Jehowa lokombo lande lo kɛnɛ kendana la wodja wa Juda?
9 Ohokanyiya nganɛ wakambe ndo wakanyange wedja wakâdinge, wanɛ waki atunyi w’ekambi waki Nzambi! Ase Juda wakatɔlama lo lɔhɔmbɔ oma le Babilɔna wodja wa wolo, ondo aha la monga l’elongamelo ka vɔ tshungɔ nto pondjo. Ndo nto, wodja awɔ wakahandjɔ vwa. Koko, oma lo nkudu kaki Nzambi, vɔ wakakaloyama oya lo wodja awɔ, ɛnɔnyi 70 l’ɔkɔngɔ, etena kɛnɛ kakalakema wedja wakâlɔshaka dia ndanyema. Jehowa mɛtɛ akatombola lokombo lande lam’akandakawoya atshikadi waki la kɔlamelo oya lo wodja awɔ! Nde ‘akawaetɛ lokombo la lotombo l’atei a wedja tshɛ wa laa nkɛtɛ.’ Okalwelo ɔsɔ mɛtɛ wakatombola Jehowa ndo wanɛ tshɛ wakɛmbaka lokombo lande!
Ɔtɛmwɛlɔ wa Jehowa wambotombwama
10, 11. Etena kakɔna kakonge ekotshamelo ka woke ka prɔfɛsiya kaki Zɛfaniya kendana l’okalwelo, ndo woho akɔna weyaso dikambo sɔ?
10 Okalwelo okina wakonge lo ntambe ka ntondo ka lo nshi yaso nyɛ lam’akatshumanya Yeso Kristo atshikadi w’Isariyɛlɛ lo ɔtɛmwɛlɔ wa mɛtɛ. Ɔsɔ aki etatelo k’akambo wakahombe ndjôyala, nɛ dia ekotshamelo ka woke ka prɔfɛsiya ka eolwelo k’ɔtɛmwɛlɔ wa pudipudi kaki la ntondo. Prɔfɛsiya ka lo Mika akatatshi ɔnɛ: “Keli lu [“etena k’ekomelo ka nshi,” NW], ukungu wa luudu la [Jehowa] wayushikikala l’ete w’ekungu. Vo wayediama ladiku dia akuna, antu wayumbela leko.”—Mika 4:1.
11 Etena kakɔna kakahombe kotshama akambo asɔ na? Oko wakadite prɔfɛsiya kɛsɔ, ekɔ lo “etena k’ekomelo ka nshi” mbut’ate lo “nshi y’ekomelo.” (2 Timɔtɛ 3:1, NW) Awui asɔ pombaka kotshama la ntondo k’ekomelo k’andja ɔnɛ, etena kakatetemala wedja la tɛmɔla tozambizambi ta kashi. Mika 4:5 mbutaka ɔnɛ: “Wedja tshe, wudja la wudja, watuyelaka lukumbu la etemolatemola kawo.” Ko kayotota dikambo di’atɛmɔdi wa mɛtɛ na? Prɔfɛsiya ka Mika kadimolaka ɔnɛ: “Keli shu tayuyela lukumbu la [Jehowa Nzambi k]asu, pundju pundju.”
12. Ngande wambodiyama ɔtɛmwɛlɔ wa mɛtɛ lo nshi nyɛ y’ekomelo?
12 Omalɔkɔ, lo nshi nyɛ y’ekomelo, “ukungu wa luudu la [Jehowa] wa[mb]ushikikala l’ete w’akuna.” Oko watongaka akona woleki ɛsɔdi tshɛ, ɔtɛmwɛlɔ wa mɛtɛ wa Jehowa wambodiyama, wambolwama ndo wamboshikikala lâdiko dia weho tshɛ w’ɛtɛmwɛlɔ. Ndo oko wakadite Mika, ‘otsha [l’okongo] ɔsɔ mbahomba pongumɔ anto.’ Ndo wanɛ wele l’ɔtɛmwɛlɔ wa mɛtɛ ‘wayɔkɛndakɛnda lo lokombo la Jehowa, Nzambi kawɔ pondjo pondjo.’
13, 14. Etena kakɔna kakɔtɔ andja ɔnɛ lo ‘etenyi katɔ k’ekomelo,’ ndo akambo akɔna wakatombe oma k’etena kɛsɔ lo kɛnɛ kendana l’ɔtɛwmwɛlɔ wa mɛtɛ?
13 Akambo wɛnya ekotshamelo ka prɔfɛsiya ya lo Bible mɛnyaka dia andja ɔnɛ wakatatɛ mbɔtɔ l’‘etenyi kawɔ k’ekomelo’ oma l’ɔnɔnyi wa 1914. (Mako 13:10) Ɔkɔndɔ mɛnyaka dia Jehowa akatatɛ tshumanya atshikadi w’akitami w’esɔ wa kɔlamelo waki l’elongamelo ka ntshɔ l’olongo oya l’ɔtɛmwɛlɔ wa mɛtɛ. Otshumanyelo ɔsɔ akayelana l’otshumanyelo wa ‘lemba la woke l’anto lotumbi oma lo wedja tshɛ, lo waoho tshɛ ndo l’ɛtɛkɛta tshɛ,’ wanɛ wele l’elongamelo ka nsɛna pondjo pondjo lanɛ la nkɛtɛ.—Enyelo 7:9.
14 Tatɛ oma lo Ta dia Ntondo di’Andja w’Otondo polo ndo ɛlɔ kɛnɛ, ɔtɛmwɛlɔ wa Jehowa watɛmɔla wanɛ wɛmba lokombo lande wekɔ lo tatetemala pama lo ɛlɔmbwɛlɔ kande. L’ɔkɔngɔ wa Ta dia Ntondo di’Andja w’Otondo, vɔ waki nunu dingana to, koko ɛlɔ kɛnɛ, atɛmɔdi waki Jehowa waya oko yɛdikɔ ya miliyɔ shamalo, yotshumanyemi lo tshumanelo oko 91 000 dia lo wedja 235. Ɔnɔnyi tshɛ, esambisha wa Diolelo ɛsɔ mbetshaka ndekana miliyara ɔtɔi ka wenya lo tombola Nzambi la ntondo k’anto. Mbokɛmaka hwe dia paka Ɛmɛnyi wa Jehowa mbakotsha ɛtɛkɛta ɛnɛ wa prɔfɛsiya waki Yeso w’ɔnɛ: ‘Lokumu l’ɔlɔlɔ lɔnɛ la diolelo layosambishama lo nkɛtɛ k’otondo, oko ɔmɛnyi le wedja tshɛ; ko l’ɔkɔngɔ diko ekomelo kayoya.’—Mateu 24:14.
15. Ngande wakotshama Zefaniya 2:3 ɛlɔ kɛnɛ?
15 Zefaniya 3:17 mbutaka ɔnɛ: ‘Jehowa Nzambi kayɛ ekɔ l’atei ayɛ. Oko wende Nzambi ka nkudu, nde ayokoshimbɛ.’ Ɔngɔnyi wa lo nyuma wele l’ekambi waki Jehowa lo nshi y’ekomelo nyɛ, mɛnyaka mɛtɛ dia nde ekɔ l’‘atei awɔ’ oko Nzambi kawɔ ka nkudu tshɛ. Ɔsɔku mbediɔ ndo ɛlɔ kɛnɛ oko wakidiɔ lam’akolwama Juda y’edjedja, l’ɔnɔnyi wa 537 N.T.D. Lâsɔ sho kokaka mɛna dia Zefaniya 2:3 ekɔ lo ndeka kotshama lo nshi yaso nyɛ, nɛ dia divɛsa sɔ mbutaka ɔnɛ: ‘Nyoyange Jehowa, nyu akanga wa ndjakitshakitsha tshɛ wa la nkɛtɛ.’ L’ɔnɔnyi wa 537 N.T.D., tshɛkɛta ‘tshɛ’ yakendanaka l’atshikadi w’ase Juda wanɛ wakakawola oma lo lɔhɔmbɔ la Babilɔna. Koko ɛlɔ kɛnɛ, tshɛkɛta shɔ mendanaka l’akanga wa ndjakitshakitsha wa lo wedja tshɛ wa lo nkɛtɛ k’otondo, wanɛ wetawɔ esambishelo kasalema l’andja w’otondo ndo wahungumɔ oya l’‘okongo wa luudu laki Jehowa.’
Ɔtɛmwɛlɔ wa mɛtɛ wekɔ lo tangɔnɛ
16. Ngande woka atunyi aso lam’ɛnawɔ ɔngɔnyi wele l’ekambi waki Jehowa lo nshi nyɛ?
16 L’ɔkɔngɔ w’ɔnɔnyi wa 537 N.T.D., wedja efula wakâdinge wakambe heyama lo mɛna woho wakakalola ekambi waki Nzambi oya lo wodja awɔ wa lôtɔ ndo woho wakolwama ɔtɛmwɛlɔ wa mɛtɛ. Koko, eolwelo kɛsɔ akonge paka lo yɛdikɔ ya tshitshɛ tsho. Onde wɛ kokaka kanyiya kɛnɛ kata anto amɔtshi, mbidja ndo atunyi w’ekambi waki Nzambi, lam’ɛnawɔ ehamelo, ɔngɔnyi, ndo woho watatshu ekambi waki Jehowa la diambo tshɛ otsha la ntondo nshi nyɛ? Aha la tamu, l’atei w’atunyi asɔ, amɔtshi mbokaka nganɛ wakoke Afarisɛ lam’akawɛnyi woho wakahungumɔka anto otsha le Yeso. Vɔ wakate vate: “Enda, wa la kete tshe wambûyela.”—Joani 12:19.
17. Ofundji ɔmɔtshi akandate lo dikambo di’Ɛmɛnyi wa Jehowa, ndo ohamelo akɔna wamonga lawɔ?
17 Lo dibuku diande dielɛwɔ These Also Believe (Ndo Vɔ Lawɔ Wambetawɔ), prɔfɛsɛrɛ Charles Samuel Braden akate ate: “Ɛmɛnyi wa Jehowa wambolodia nkɛtɛ k’otondo l’esambishelo kawɔ. Sho kokaka mbetawɔ aha la ndjakesa dia ndoko ɔtɛmwɛlɔ ɔtɔi l’andja ɔnɛ wambɛnya ohetoheto ndo etete k’efula lo odianganyelo wa lokumu l’ɔlɔlɔ la Diolelo oko Ɛmɛnyi wa Jehowa. Ondo ɔlɔngɔswamelo ɔnɛ wayotatetemalaka pama tsho.” Nde mɛtɛ aki la shadiya ya mbuta ngasɔ! Ambeta oko ɛnɔnyi akumi atanu tatɛ lam’akandafunde awui asɔ, lâsɔ ko Ɛmɛnyi wa Jehowa wakasambishaka l’andja w’otondo wêke paka anto 300 000 ato! Ko, otondota ɛlɔ kɛnɛ kele lofulo la wanɛ wasambisha lokumu l’ɔlɔlɔ laya oko lofulo la lo nshi shɔ ndodja lo 20, mbut’ate taya oko miliyɔ shamalo na?
18. Elɛwɔ ɔtɛkɛta wa pudipudi, ndo Nzambi anto akɔna wakandasha ɔtɛkɛta ɔsɔ?
18 Nzambi akalake lo tshimbo y’omvutshi ande ate: “Ku dimi layukadimula eteketa w’antu dia vo ndjala pudipudi, dia vo tshe mbeya [“ntɛndɛ,” NW] lukumbu la [Jehowa], la [“mbokambɛ dihɛka lo dihɛka,” NW].” (Zefaniya 3:9) Lo nshi nyɛ y’ekomelo, ekɔ paka Ɛmɛnyi wa Jehowa mbatɛndɛ lokombo la Jehowa ndo mbôkambɛ kâmɛ lo dimama dia wolo dia ngandji, mbut’ate ‘dihɛka lo dihɛka.’ Jehowa vɔ mbakandasha ɔtɛkɛta wa pudipudi. Dia tɛkɛta ɔtɛkɛta wa pudipudi, pombaka monga l’eokelo k’ɔlɔlɔ k’akambo wa mɛtɛ wendana la Nzambi ndo l’asangwelo ande. Paka Jehowa oto mbakoka mbisha anto eokelo kɛsɔ oma l’ekimanyielo ka nyuma kande k’ekila. Ko lâsɔ Jehowa waa na washande nyuma kande k’ekila na? Paka ‘wanɛ wôkitanyiya oko wende owandji.’ (Etsha 5:32) Paka Ɛmɛnyi wa Jehowa ato mbetawɔ kitanyiya awui wa Nzambi l’akambo tshɛ oko wende Owandji. Diɔ diakɔ dialongolawɔ nyuma ka Nzambi ndo mbatɛkɛtawɔ ɔtɛkɛta wa pudipudi, mbut’ate, akambo wa mɛtɛ wendana la Jehowa ndo l’asangwelo ande wa diambo. Vɔ kambaka l’ɔtɛkɛta ɔsɔ wa pudipudi dia tombola Jehowa lo nkɛtɛ k’otondo lo yoho ya diambo ndo yatahame paka pama tsho.
19. Ntɛkɛta ɔtɛkɛta wa pudipudi kɛdikɛdi na?
19 Tɛkɛta ɔtɛkɛta wa pudipudi halembetshiya tsho mbetawɔ akambo wa mɛtɛ ndo mbaetsha anto akina, koko vɔ nembetshiyaka nto mbɔtɔnganyiya lɔkɛwɔ laso l’ɛlɛmbɛ ndo l’atɔndɔ waki Nzambi. Akristo w’akitami w’esɔ wakatosha ɛnyɛlɔ lo kɛnɛ kendana la nyanga Jehowa ndo tɛkɛta ɔtɛkɛta wa pudipudi. Ohokanyiya yema lo kɛnɛ tshɛ kambosalema! Kânga mambokitakita lofulo l’akitami w’esɔ polo l’ɛse k’anto oko 8 700, yɛdikɔ yele oko miliyɔ shamalo y’anto akina wele l’elongamelo ka nsɛna lanɛ la nkɛtɛ, wekɔ lo mbaokoya lo nyanga Jehowa ndo lo tɛkɛta ɔtɛkɛta wa pudipudi. Vɔ wekɔ lemba la woke lele lofulo lalɔ lekɔ lo tadɛ paka mbudɛ tsho, vɔ ndja oma lo wedja tshɛ, ndo wekɔ la mbetawɔ l’olambo wa tshungo waki Yeso, ndo wekɔ lo kamba olimu w’ekila lo sɛkɛ dia lo tɛmpɛlɔ ka lo nyuma kaki Nzambi kele lanɛ la nkɛtɛ, ndo vɔ wayohandɔ lo ‘fɔnu ka woke’ kaya suke la komɛ andja ɔnɛ wambolola l’akambo wa kɔlɔ.—Enyelo 7:9, 14 15.
20. Kakɔna kalongamɛ akitami w’esɔ wele la kɔlamelo vɔ l’anto wa lo lemba la woke?
20 Lemba la woke lɔsɔ layɔtɔ l’andja w’oyoyo wosembwe waki Nzambi. (2 Petero 3:13) Yeso Kristo nde l’akitami w’esɔ 144 000 wolwama otsha lo lɔsɛnɔ la l’olongo dia tokamba oko nkumi ya dikanga ndo ɛlɔmbɛdi kâmɛ la nde mbayokenga olui w’oyoyo w’anto wayɔlɔmbɔla nkɛtɛ kɛnɛ. (Romo 8:16, 17; Enyelo 7:4; 20:6) Oma lâsɔ, ko wanɛ woyohandɔ lo fɔnu ka woke ndjotatɛ nɔngɔsɔla andja w’oyoyo ndo tetemala la tɛkɛta ɔtɛkɛta wa pudipudi wakawasha Nzambi. Lo mɛtɛ, ɛtɛkɛta ɛnɛ mendanaka la wɔ: ‘Ana ayɛ tshɛ wayetshama oma le Jehowa, ko vɔ wayoyala la wɔladi w’otamanya. Wɛ ayoshikimala lo sambo k’ɔlɔlɔ.’—Isaya 54:13, 14.
Olimu wa wetshelo wahatongaka lakatɔngɔ andja
21, 22. (a) Oko wadiɛnya Etsha 24:15, waa na wayonga l’ohomba wa mbetshama ɔtɛkɛta wa pudipudi? (b) Olimu akɔna wotshikitanyi wa wetshelo wayotokambema l’ɛlɔmbwɛlɔ ka Diolelo?
21 Ekɔ olui okina wa woke efula wayonga la diaaso dia mbeka ɔtɛkɛta wa pudipudi l’andja w’oyoyo. Dikambo diawɔ mbatɛkɛtawɔ lo Etsha 24:15, divɛsa diata ɔnɛ: ‘Eolwelo k’anto w’ɔlɔlɔ la k’anto wa kɔlɔ oma lo nyɔi kayonga.’ Miliyara y’anto wakasɛnaka ndo wakavu lo nshi yakete aha la vɔ kondja ewo k’oshika kaki Jehowa. Lo yoho yaha l’ofukutanu, nde ayowaolola oya lo lɔsɛnɔ. Anto asɔ wayolwama wayonga l’ohomba wa mbeka ɔtɛkɛta wa pudipudi.
22 Ande diɛsɛ diayonga laso dia monga l’atei w’anto wayokamba olimu ɔsɔ wa woke wa wetshelo lee! Ɔsɔ mɛtɛ ayonga olimu wa wetshelo woleki tshɛ ndo wahatongaka lakatɔngɔ andja. Olimu ɔsɔ tshɛ wayokambema lo ɛlɔmbwɛlɔ ka lowandji l’ɔlɔlɔ la Diolelo diaki Nkumekanga Yeso Kristo. L’ekomelo a shimu, anto wayɛna ekotshamelo k’Isaya 11:9, lɛnɛ atawɔ ɔnɛ: “Kete ayulula la ewu ka [Jehowa], uku atululaka ashi a waki.”
23. Lande na kakokayɛ mbuta ɔnɛ tekɔ la diɛsɛ dia woke efula oko weso ekambi waki Nzambi?
23 Ekɔ mɛtɛ diɛsɛ dia woke, dia sho ndjalɔngɔsɔla lo nshi nyɛ y’ekomelo, dia ndjɛna nshi ya diambo yayolola ewo ka Jehowa lo nkɛtɛ k’otondo! Ndo, tekɔ mɛtɛ la diɛsɛ dia mɛna oma ko kakianɛ ekotshamelo k’ɛtɛkɛta wa prɔfɛsiya wɔkɔndwami lo Zefaniya 3:20! Lo divɛsa sɔ, Jehowa toshikikɛka ɔnɛ: “Ee, dimi layunyete lukumbu, la lutumbu l’atei a wedja tshe wa la kete.”
Ngande wayoyokadimola?
• Naa ekotshamelo wakonge la prɔfɛsiya kaki Zɛfaniya k’okalwelo?
• Ngande wambɔngɔna ɔtɛmwɛlɔ wa mɛtɛ lo nshi nyɛ y’ekomelo?
• Naa olimu wa woke wayotokambema l’andja w’oyoyo?
[Osato wa lo lɛkɛ 16]
Ekambi waki Jehowa wakakawola otsha lo wodja awɔ wa lotɔ dia nyomotohika nto ɔtɛmwɛlɔ wa mɛtɛ. Onde wɛ mbeyaka kitshimudi ya dikambo nɛ ɛlɔ kɛnɛ?
[Esato wa lo lɛkɛ 18]
Lo tɛkɛta ‘ɔtɛkɛta wa pudipudi,’ Ɛmɛnyi wa Jehowa mbewoyaka anto losango l’oma lo Bible lakeketsha