“Nyoyasukanya la Nzambi, ko nde ayoyasukanya la nyu”

1-3. a) Diɔtɔnganelo diele lam’asa ambutshi l’ɔnawɔ l’ashashi ɛnyadiɔ lo dikambo dia eongelo k’anto? b) Kakɔna katotokaka etena katokawɔ ngandji, ndo dimbola diakɔna di’ohomba diahombaso ndjambola?

AMBUTSHI ngɛnangɛnaka dia mɛna tɔla t’ɔnawɔ l’ashashi. Mbala efula vɔ tosukanyaka dungi diawɔ la elungi k’ɔna oko onto l’ɔnɔna ko vɔ mbɔmɔnɛmɔnɛ. Vɔ nomɔlomɔka dia mɛna kɛnɛ kayosala ɔna. Ndo esadi eto ɔna todiholaka onyɔ la tɔla ele l’elungi k’ɔngɛnɔngɛnɔ. Ɔna mbɔsaka dia tɔla tɔsɔ mɛnyaka ngandji kokande ambutshi ande nde la wɔ.

² Tɔla t’ɔna ashashi kɛnɛmɔlaka eongelo k’ohomba kele la anto, ka ngandji ka lam’asawɔ. Ngasɔ mbakatatongama. (Osambo 22:9) Dikoka sɔ tahamaka lo ndjela yɛdikɔ y’ɛnɔnyi wele l’onto. Ondo wɛ akohɔ totshelo ta ngandji takakosalɛ ambutshi, ase nkumbo kana angɛnyi ayɛ oma ko dikɛnda diayɛ. Awui asɔ wakonɛma l’otema ayɛ, wakahame, polo ndo lo vɔ ndjɛnama l’etsha. Wɛ la wɔ akoke anto asɔ ngandji. Onde ngasɔ mbediɔ ndo lo diɔtɔnganelo diasayɛ la Jehowa Nzambi?

³ Bible mbutaka ɔnɛ: “Sho mbokaka anto ngandji, nɛ dia Nzambi akatolange ntondo.” (1 Joani 4:19) Etenyi 1 polo 3 ka dibuku nɛ kakakohola dia Jehowa Nzambi akakambe la wolo, losembwe, ndo la lomba lande la ngandji tshɛ lo wahɔ ayɛ ndo etenyi ka nɛi, kakakɛnya dia ndamɛ akɛnya ngandji kande otsha le anto ndo le yɛ wɛmɛ lo toho ta diambo efula. Diakɔ diahombayɛ ndjambola dimbola diele ondo diɔ mboleki ohomba le yɛ ɔnɛ: ‘Ngande wayomosala lo menda ngandji kamboka Jehowa?’

Kɛnɛ kalembetshiya nanga Nzambi

4. Kanyi yakɔna ya kɔlɔ yele l’anto efula lo kɛnɛ kalembetshiya nanga Nzambi?

⁴ Jehowa lele Kiɔkɔ ya ngandji mbeyaka dimɛna dia ngandji kekɔ la wolo wa mamba wa tshutshuya anto dia ndeka kɛnɛmɔla waonga woleki amɛna. Diakɔ diele kaanga mbatetemala ɔtɔmbɔkwɛlɔ waki anto wele bu la kɔlamelo, nde ekɔ l’eshikikelo dia anto amɔtshi wayosala dui dimɔtshi l’ɔtɛ wa ngandji kande. Ndo kɛsɔ mbasala miliyɔ y’anto. Lonyangu ko, ɛtɛmwɛlɔ wa l’andja wa kɔlɔ ɔnɛ mbishaka wetshelo wa kɔlɔ lo kɛnɛ kalembetshiya nanga Nzambi, diakɔ mbele, efula k’ambetawudi wɔsaka dikambo sɔ oko nsaki kɛmɔtshi k’anyanya kɛnyama tsho l’ɛtɛkɛta. Ngandji ka Nzambi mbeyaka monga ngasɔ l’etatelo oko wele tɔla ɔkɛnɛmwɛlɔ wa ntondo wɛnya ɔna ashashi dia nde nangaka ambutshi ande. Koko le epalanga w’anto, mboka ngandji hakomɛ tsho laasɔ.

5. Ngande walembetshiya Bible ngandji ka Nzambi, ndo lande na kakotɔmaso l’elembetshielo ɛsɔ?

⁵ Jehowa tɛnyaka kɛnɛ kalembetshiya mbooka ngandji. Ɔtɛkɛta ande mbutaka ɔnɛ: “Nɛ dia kɛnɛ kalembetshiya nanga Nzambi tɔ kɛnɛ: dia sho nkitanyiya ɛlɛmbɛ ande.” Ɔnkɔnɛ, ngandji kɛsɔ pombaka mɛnama oma l’etsha. Mɛtɛ anto efula hawɔngɛnangɛna kanyi shɔ yɛnya dia monga l’okitanyiya, koko divɛsa sɔ mbutaka l’ɔlɔlɔ tshɛ ɔnɛ: “koko ɛlɛmbɛ ande bu wotsho.” (1 Joani 5:3) Ɛlɛmbɛ ndo atɔndɔ waki Jehowa wekɔ dikambo dia wahɔ aso, koko aha dia tosoya. (Isaya 48:17, 18) Ɔtɛkɛta wa Nzambi ndola tɔɔ la atɔndɔ watokimanyiya dia ndeka ndjasukanya la nde. Lo woho akɔna? Tɔsɛdingole toho tosato ta diɔtɔnganelo diasaso la Nzambi. Toho takɔ ko sawo, ɔtɛmwɛlɔ ndo wokoyelo.

Sawola la Jehowa

6-8. a) Yoho yakɔna yakokaso mpokamɛ Jehowa? b) Ngande wakoka Afundelo wadiaso monga la lɔsɛnɔ?

⁶ Tshapita 1 yakatatɛ la dimbola nɛ: “Sawola la Nzambi, shi ɔsɔ ekɔ mɛtɛ dikambo dia wɔma efula”? Takɛnyi dia dikambo sɔ kokaka salema nɛ dia Mɔsɛ akasawola la Nde. Kayotota dikambo diaso? Nshi nyɛ Jehowa hayɔtɛkɛta l’anto lo tshimbo ya andjelo, koko nde ekɔ la toho tokina t’amɛna efula tasawolande la so. Ngande wakokaso mpokamɛ Jehowa?

⁷ Lam’ele “Afundelo tshɛ wakasambiyama oma le Nzambi,” sho mpokamɛka Jehowa etena kadiaso Ɔtɛkɛta ande. (2 Timɔte 3:16) Omembi w’esambo akatokeketsha dia salaka dui sɔ “la yanyi ndo l’otsho.” (Osambo 1:1, 2) Dia nsala dikambo sɔ nɔmbaka dia mbidja welo w’efula, koko welo akɔ kokaka mɛtɛ. Oko wakatadiɛnyi lo tshapita 18, Bible ekɔ oko mukanda wa nɛmɔ wakatotomɛ Shɛso lele l’olongo. Diakɔ diele, wadielo atɔ hahombe monga dikambo dia wolo le so. Sho pombaka nsala woho w’Afundelo monga la lɔsɛnɔ etena kawadiaso. Ngande wakokaso nsala dui sɔ?

⁸ Ɔsa dia wɛ ekɔ lo mɛna kɛnɛ keta l’ɔkɔndɔ wadiayɛ. Kanyiya woho waki anto watawɔ. Yanga dia nshihodia woho wakawasalaka awui akɔ, kɛnɛ kaki lawɔ ndo tokanyi taki lawɔ, oma laasɔ sɛdingola kɛnɛ kadiayɛ, ko wɛ ndjambola wate: ‘Kakɔna kambetsha ɔkɔndɔ ɔnɛ lo dikambo dia Jehowa? Naa dionga diande diɛnama lanɛ? Tɔndɔ diakɔna dialangande mbetshami ndo ngande wakokami nkamba la diɔ lo lɔsɛnɔ lami?’ Adia, nkana yimba ndo nkamba la kɛnɛ kadiayɛ ko Ɔtɛkɛta wa Nzambi wayoyala la lɔsɛnɔ le yɛ.​—Osambo 77:12; Jakɔba 1:23-25.

9. Akɔna ele “ɔhɔmbɔ wa kɔlamelo ndo kɛsɔ,” ndo lande na kahombaso mpokamɛ “ɔhɔmbɔ” ɔsɔ la yambalo tshɛ?

⁹ Jehowa tɛkɛtaka la so nto oma lo tshimbo ya “ɔhɔmbɔ wa kɔlamelo ndo kɛsɔ.” Oko wakadite Yeso, olui w’Akristo w’akitami w’esɔ wakasɔnama dia mbishaka ‘mbo ya ndɛ ya lo nyuma l’etena ka hombama’ lo nshi y’ekomelo nyɛ y’ofukutanu. (Mateo 24:45-47) Etena kadiaso ekanda wakalɔngɔsɔma dia tokimanyiya dia nkondja ewo ka mɛtɛ ka lo Bible ndo kɔtɔso lo nsanganya y’Akristo ya totshitshɛ ndo ya weke, sho ndeshamaka lo nyuma oma le ɔhɔmbɔ ɔsɔ. Oko weyaso dia olui ɔsɔ wekɔ ɔhɔmbɔ wa Kristo, la lomba tshɛ sho kitanyiyaka ɛtɛkɛta ɛnɛ wa Yeso wata ɔnɛ: “Nyodje yimba lo woho wahokamɛnyu.” (Luka 8:18) Sho pokamɛka la yambalo tshɛ nɛ dia sho mbeyaka dia ɔhɔmbɔ ɔsɔ ekɔ tshimbo mɔtshi yatɛkɛta Jehowa la so.

10-12. a) Lande na kele dɔmbɛlɔ ekɔ woshasha wa diambo w’oma le Jehowa? b) Ngande wakokaso nɔmba lo yoho yangɛnyangɛnya Jehowa ndo ngande weyaso dia nde mbɔsaka alɔmbɛlɔ aso la nɛmɔ?

¹⁰ Ko kayotota lo kɛnɛ kendana la sawo dia la Nzambi? Onde sho koka ntɛkɛta la Jehowa? Ɔsɔ ekɔ dikambo dia diambo, shi mɛtɛ? Ohɔsa dia wɛ ekɔ lo nanga mpomana l’owandji waheme tshɛ lo wodja anyu dia wɛ mbotɛ akambo amɔtshi wele l’otema ayɛ. Onde wɛ ayɛnana la nde esadi eto? L’ahole amɔtshi, onto lahemba dia nsala dikambo sɔ mbidjaka lɔsɛnɔ la nde lo waale! Lo nshi yaki Ɛsta la Mɔrɔdɛkai, onto lakahembaka dia nsukana la nkumekanga ka Pɛrɛsiya aha la nkondja leeta oma le nde akakokaka ndjakema. (Ɛsta 4:10, 11) Ko ohokanyiya dia nsukana la Nkumi kaheme l’andja w’otondo, ɔnɛ lele wanɛ woleki wolo l’andja ɔnɛ “wekɔ oko akata.” (Isaya 40:22) Onde sho pombaka mboka wɔma dia nsukana la nde? Ndooko!

¹¹ Jehowa akalɔngɔsɔla yoho ya wɔdu ndo yakoka onto tshɛ nkamba la yɔ dia ntɛkɛta la nde, mbuta ate dɔmbɛlɔ. Kaanga ɔna dikɛnda koka nɔmba Jehowa la mbetawɔ lo lokombo la Yeso. (Joani 14:6; Hɛbɛru 11:6) Dɔmbɛlɔ tokimanyiyaka nto dia mbewoya tokanyi ndo nsaki yaso yoleki wolo ndo y’oma k’ɛse otema kaamɛ ndo awui wa kandji wele wolo ntɛkɛta. (Rɔmɔ 8:26) Bu ohomba nyanga dia mambiya Jehowa la ɛtɛkɛta wa kawotake kana l’alɔmbɛlɔ w’ɛtshɔlɔlɔ. (Mateo 6:7, 8) Koko sho koka mbɔlɔmba l’edja kalangaso ndo tena tshɛ dialangaso. Ɔtɛkɛta ande tɔlɔmbaka ɔnɛ: “Nyotetemale nɔmba.”​—1 Tɛsalɔnika 5:17.

¹² Ohɔ dia paka Jehowa ndaamɛ oto mbele ɔnɛ “latokaka dɔmbɛlɔ” ndo nde pokamɛka la kɛtshi ka mɛtɛ. (Osambo 65:2) Ɔsɔ bu dui dia wotsho le nde, koko alɔmbɛlɔ asɔ mboshaka ɔngɛnɔngɛnɔ wa mɛtɛ. Ɔtɛkɛta ande mbɛdikaka alɔmbɛlɔ w’ekambi ande la tshɔ yele dinga diayɔ mbidiyaka opomu wa dimɛna ndo wangɛnyangɛnya. (Osambo 141:2; Ɛnyɛlɔ 5:8; 8:4) Shi ekɔ mɛtɛ ekeketshelo mbeya dia alɔmbɛlɔ aso w’oma k’ɛse otema mbidɛka otsha le Nkumi Kaheme Tshɛ ndo mbɔngɛnyangɛnyaka? Ɔnkɔnɛ, naka wɛ nangaka ndjasukanya la Jehowa, kete lɔmbakande la ndjakitshakitsha mbala la mbala, mbuta ate lushi tshɛ. Diholɛnde otema, toombake ndooko dui. (Osambo 62:8) Ewoyaka Shɔ lele l’olongo ekiyanu, ɛngɛnɔngɛnɔ, lowando, ndo lotombo layɛ ko dimama diele lam’asayɛ la nde diayoleka nkeketala.

Tɛmɔla Jehowa

13, 14. Ntɛmɔla Jehowa kɛdikɛdi na, ndo lande na kahombaso nsala dui sɔ?

¹³ Etena kasawolaso la Jehowa Nzambi, hatokomɛ tsho lo mbohokamɛ ndo ntɛkɛta la nde woho watotosalaka l’ɔngɛnyi kana l’owotɔ aso. Ɔsɔ ekɔ mɛtɛ ntɛmɔla Jehowa, ndo mbosha nɛmɔ dioludi la dilɛmiɛlɔ diahombande nongola. Ɔtɛmwɛlɔ wa mɛtɛ nɔmbɔlaka lɔsɛnɔ laso l’otondo. Vɔ tokimanyiyaka dia mɛnya Jehowa dia sho mbolangaka ndo dia sho mamatana la nde l’anima aso tshɛ. Ndo nto, vɔ kakatanyaka ditongami dia kɔlamelo diele l’olongo ndo la nkɛtɛ. Lo ɛnɛlɔ kɛmɔtshi, ɔpɔstɔlɔ Joani akoke ondjelo ewoya didjango nɛ: “Nyɔtɛmɔlɛ Ɔnɛ lakatonge olongo la nkɛtɛ la ndjale ndo tɔkɔkɔ t’ashi.”​—Ɛnyɛlɔ 14:7.

¹⁴ Lande na kahombaso ntɛmɔla Jehowa? Ohokanyiya waonga ande wamboteka lo dibuku nɛ: Eongelo k’ekila, wolo, ndjakimɛ, losembwe, dihonga, kɛtshi, lomba, okitshakitsha, ngandji, kandji, kɔlamelo ndo ɔlɔlɔ. Oko wakatadiɛnyi, lo waonga asɔ tshɛ, Jehowa mbele ɛnyɛlɔ koleki tshɛ ndo kahomba mbokoya. Etena kasɛdingolaso waonga w’amɛna efula asɔ wele la lonto lande, sho shihodiaka dia nde ekɔ Onto lele la woke waheyama mbuta ndo lakoka tombɔma. Nde ekɔ la lotombo laheyama mbuta ndo toleka lo yoho yaheyama mbɛdika. (Isaya 55:9) Aha la taamu, Jehowa mbele la lotshungɔ la monga owandji Waheme tshɛ ndo nde mɛtɛ mbahombaso ntɛmɔla. Ko ngande wahombaso ntɛmɔla Jehowa?

15. Ngande wakokaso ntɛmɔla Jehowa “lo nyuma ndo lo mɛtɛ” ndo waaso akɔna watosha nsanganya y’Akristo dia nsala dui sɔ?

¹⁵ Yeso akate ate: “Nzambi ekɔ Nyuma, wanɛ wɔɔtɛmɔla pombaka mbɔtɛmɔla lo nyuma ndo lo mɛtɛ.” (Joani 4:24) Kɛsɔ nembetshiyaka ntɛmɔla Jehowa l’otema woludi la mbetawɔ ndo la ngandji ndo walɔmbwama la nyuma kande. Kɛsɔ nembetshiyaka nto mbɔtɛmɔla lo yoho yɔtɔnɛ la mɛtɛ, mbuta ate ewo ka mɛtɛ kele l’Ɔtɛkɛta Ande. Tekɔ la waaso w’amɛna efula wa ntɛmɔla Jehowa “lo nyuma ndo lo mɛtɛ” lo nsanganya yaso y’Akristo. (Hɛbɛru 10:24, 25) Etena kembɛso Jehowa esambo wa lotombo, kalɔmbaso kaamɛ, kahokamɛso ndo kashaso kɔmatɛrɛ ya l’Ɔtɛkɛta ande, sho mbɛɛnyaka ngandji kaso lo ɔtɛmwɛlɔ wa pudipudi.

16. Naa ɔlɛmbɛ ɔmɔtshi wa woke wakawadjɛ Akrito wa mɛtɛ ndo kakɔna katotshutshuya dia nkitanyiya ɔlɛmbɛ ɔsɔ?

¹⁶ Sho tɛmɔlaka Jehowa nto etena kewoyaso anto akina akambo wendana la nde, lo mbotombola lo sɛkɛ. (Hɛbɛru 13:15) Keema esambishelo ka lokumu l’ɔlɔlɔ la Diolelo dia Jehowa ekɔ ɔtɔi ɔmɔtshi w’ɔlɛmbɛ woleki woke wakawadjɛ Akristo? (Mateo 24:14) Sho kitanyiyaka ɔlɛmbɛ ɔsɔ l’otema ɔtɔi nɛ dia sho nangaka Jehowa. Etena kakanyiyaso akambo wa kashi wadianganya “nzambi ka dikongɛ nɛ di’akambo,” Satana Diabolo, ‘lambetɛ wanɛ wele bu ambetawudi totshungu,’ lo mbuta kashi lo dikambo dia Jehowa, shi sho tshutshuyamaka dia nkamba oko Ɛmɛnyi dia mbuta kɛnɛ kele mɛtɛ lo dikambo dia Nzambi kaso? (2 Kɔrɛtɔ 4:4; Isaya 43:10-12) Ndo etena kasɛdingolaso waonga ande wa diambo, sho mongaka la nsaki ka mbewoya anto akina akambo wendana la nde. Eelo, ndooko diɛsɛ dioleki dia nkimanyiya anto akina dia vɔ mbeya ndo mboka Shɛso lele l’olongo ngandji woho wasalaso.

17. Akambo akɔna wendana la ɔtɛmwɛlɔ wa tɛmɔlaso Jehowa ndo lande na kahombaso mbɔtɛmɔla la olowanyi?

¹⁷ Ɔtɛmwɛlɔ watɛmɔlaso Jehowa ekɔ la akambo akina efula. Vɔ mendanaka la lɔsɛnɔ laso l’otondo. (Kɔlɔsayi 3:23) Naka mɛtɛ sho mbetawɔka dia Jehowa monga Nkumi kaso Kaheme Tshɛ, kete lolango lande layonga dui diayotetsha lo dihole dia ntondo lo lɔsɛnɔ laso l’otondo, lo lɔsɛnɔ la lo nkumbo kaso, l’olimu aso wa l’emunyi, lo diɔtɔnganelo diasaso l’anto akina ndo lo tɔkɛnyɔ taso. Tayoyanga dia kambɛ Jehowa “l’otema ɔtɔi,” la kɔlamelo tshɛ. (1 Ɛkɔndɔ 28:9) Kɛsɔ mɛnyaka dia hatokoke monga l’etema ehende, kana lokolo l’ashi lokolo l’okongo, mbuta ate monga la lɔkɛwɔ la dungi pende, lɛnya di’oko tekɔ lo kambɛ Jehowa ko tete tekɔ lo nsala pɛkato ya weke lo woshɛshɛ. Olowanyi hokana la dionga dia dungi pende kaanga yema ndo ngandji dihetshaka. Wɔma wa Nzambi ekɔ ohomba nto lo dikambo sɔ nɛ dia lo ndjela Bible, wɔma ɔsɔ konyaka onto lo monga la diɔtɔnganelo dia wolo la Jehowa wonya tshɛ.​—Osambo 25:14.

Okoya Jehowa

18, 19. Lande na kakokaso mbuta ɔnɛ anto wele bu kokele koka mbokoya Jehowa Nzambi?

¹⁸ Etenyi tshɛ ka dibuku nɛ kekɔ la tshapita yɛnya woho ‘wa mbokoya Nzambi oko anande wa ngandji.’ (Ɛfɛsɔ 5:1) Tatohɛke dia kaanga mbeso bu kokele, sho koka mɛtɛ mbokoya yoho ya kokele yakamba Jehowa la wolo ande, yɛnyande losembwe, yasalande akambo la lomba ndo yɛnyande ngandji. Ngande weyaso dui sɔ? Lo ndjela kitshimudi ya lokombo lande, Jehowa ndjalaka kɛnɛ tshɛ kalangande dia nkotsha asangwelo ande. Onde dikoka diatambiya sɔ mɛnyaka dia hatokoke mbookoya? Ndooko.

¹⁹ Takatongama lo efanelo ka Nzambi. (Etatelo 1:26) Diakɔ diele, anto tshikitana la ditongami dikina tshɛ dia la nkɛtɛ. Sho hatɔlɔmbwama tsho la nsaki ka lootɔ kahakanyiya, la kɛnɛ kakatahowɔ kana la kɛnɛ kotodingi. Jehowa akatosha woshasha wa nɛmɔ efula, mbuta ate lotshungɔ la nsala kɛnɛ kalangaso. Kanga mbeso l’elelo ndo anto wele bu kokele, tekɔ la lotshungɔ la nsɔna kɛnɛ kayotonga. Ndo nto ohɔ dia lokombo la Nzambi nembetshiyaka dia nde koka nsala di’atɛmɔdi ande nkoma woho walangande dia vɔ ndjaala. Onde wɛ nangaka ndjaala onto lele la ngandji, la lomba, la losembwe ndo lakamba dimɛna la wolo ayɛ? Oma lo ekimanyielo ka nyuma ka Jehowa, wɛ koka ndjaala woho w’onto la ngasɔ. Ohokanyiya akambo w’ɛlɔlɔ wayoyosala.

20. Ɔlɔlɔ akɔna wasalaso etena kokoyaso Jehowa?

²⁰ Wɛ ayokiya Shɔ lele l’olongo ɔlɔ ndo ayɔngɛnyangɛnya otema ande. (Tokedi 27:11) Oko weyande elelo ayɛ, wɛ ayokoka kaanga “mbɔngɛnyangɛnya lo akambo tshɛ.” (Kɔlɔsayi 1:9, 10) Ndo etena katetemalayɛ mbokoya waonga ande, wɛ ayokondja diɛsɛ dia woke efula dia monga ɔmɛmbi w’osase l’andja ɔnɛ wele lo wodjima ndo wanganyi la Nzambi. (Mateo 5:1, 2, 14) Wɛ ayokimanyiya dia osase wa lotombo la lonto laki Jehowa mpɛta la nkɛtɛ! Ɔsɔ mɛtɛ ekɔ nɛmɔ di’efula!

“Nyoyasukanya la Nzambi ko Nde ayoyasukanya la nyu”

21, 22. Lɔkɛndɔ lakɔna laha l’ekomelo lakongɛ wanɛ tshɛ woka Jehowa ngandji?

²¹ Leeta lele lo Jakɔba 4:8 bu tsho oyango ɔmɔtshi wahombaso ndjadjɛ, koko ekɔ tshondo ya lɔkɛndɔ lahombaso minda. Lɔkɛndɔ lɔsɔ layotetemala edja tshɛ kayototshikala la kɔlamelo. Hatotshikaki pondjo dia ndeka ndjasukanya la Jehowa. Tayongaka nshi tshɛ l’akambo efula wa mbeka lo dikambo diande. Tatɔfɔnyake dia dibuku nɛ diambotetsha akambo tshɛ wendana la Jehowa. Yema tshitshɛ tsho mbɔtɛkɛtshiso lo kɛnɛ kata Bible lo dikambo diande. Ndo kaanga Bible hatetsha akambo tshɛ wendana la Jehowa. Ɔpɔstɔlɔ Joani akɛnyi dia otondonga wakafunde akambo tshɛ wakasale Yeso l’olimu wakandakambe lanɛ la nkɛtɛ, tshike “kaanga andja w’otondo totowokoka dia mbidja wɛɔmbɔ akɔ w’afundelo.” (Joani 21:25) Naka ngasɔ mbediɔ lo dikambo dia ɔna, kete hoke lo dikambo dia She!

²² Kaanga lɔsɛnɔ la pondjo hatokoka tokonya lo mbeya akambo tshɛ wendana la Jehowa. (Ondaki 3:11) Ohokanyiya akambo tshɛ watokongɛ la ntondo. L’ɔkɔngɔ wa sho nsɛna ɛnɔnyi nkama, nunu, miliyɔ ndo kaanga miliyara, tayeya Jehowa ndeka woho waweyaso ɛlɔ kɛnɛ. Koko tayotetemala mɛna dia ekekɔ lokema l’akambo laheyama mbuta lahombaso nyomeka. Tayolomɔlɔmɔ dia ndeka mbeya, tele l’eshikikelo oko omembi w’esambo, lakembe ate: “Koko le mi, nsukana la Nzambi kele ɔlɔlɔ le mi.” (Osambo 73:28) Lɔsɛnɔ la pondjo layonga l’ɔngɔnyi ndo l’awui efula wahatakoke ndo nkanyiya, koko paka lo ndjasukanya la Jehowa mbayotoleka nkondja ɛlɔlɔ w’efula.

23. Kakɔna kamboyokeketshama dia nsala?

²³ Tekɔ lo nongamɛ dia wɛ mbetawɔ ngandji ka Jehowa lo mbolanga la otema ayɛ tshɛ, la anima ayɛ tshɛ, la yimba yayɛ tshɛ ndo la wolo ayɛ tshɛ. (Makɔ 12:29, 30) Ngandji kayɛ konge ka kɔlamelo ndo nge. Tɛdikɔ tshɛ tɔsayɛ, oyadi ta totshitshɛ kana ta weke tɔsame lo ndjela tɔndɔ di’ohomba nɛ: Sɔnaka nshi tshɛ mboka kayokokimanyiya dia ndeka keketsha diɔtɔnganelo diasayɛ la Shɔ lele l’olongo. Kɛnɛ koleki tshɛ ele, tetemala ndjasukanya Jehowa ko nde la wɔ ayotetemala sukana la yɛ pondjo pondjo!