TSHAPITA 6

Ombetsha A Woke Akakambɛ Anto Akina Olimu

ONDE wɛ tɔngɛnangɛnaka lam’akosalɛ onto dikambo dimɔtshi dia dimɛna?. . . Eelo, ndo anto akina tɔngɛnangɛnaka etena kâsalɛ onto dikambo dimɔtshi dia dimɛna. Sho tshɛ tɔngɛnangɛnaka dikambo sɔ. Ombetsha a Woke akeyaka dikambo sɔ, ndo nde akakambɛka anto olimu nshi tshɛ. Nde akate ate: ‘Dimi lakaye, aha di’anto kambɛmi olimu, koko dia dimi mbâkambɛ olimu.’​—⁠Mateu 20:⁠28.

Lâsɔ, ahombaso sala naka sho nangaka monga oko Ombetsha a Woke?. . . Sho pombaka kambɛ anto akina. Sho pombaka mbâsalɛ awui w’ɔlɔlɔ. Mɛtɛ anto efula hawosale dikambo sɔ. Anto efula nangaka di’anto akina mbâkambɛka olimu nshi tshɛ. Kânga ambeki waki Yeso waki mbala kɛmɔtshi la kanyi shɔ. Onto l’onto l’atei awɔ akalangaka monga onto loleki woke kana loleki ohomba.

Lushi lɔmɔtshi, Yeso akande lɔkɛndɔ nde l’ambeki ande. L’ɔkɔngɔ wa vɔ mbɔtɔ l’osomba wa Kapɛrɛnauma, suke la Ndjale ka Ngalileya, vɔ tshɛ wakɔtɔ lo luudu lɔmɔtshi. Yeso akawambola lam’akiwɔ lo luudu ate: ‘Lande na kakanyayawanaka lo mboka?’ Vɔ wakalɛmbɔhala ki nɛ dia lo mboka, vɔ wakayawanaka dia mbeya ɔnɛ loleki woke l’atei awɔ.​—⁠Mako 9:​33, 34.

Yeso akeyaka dia kema dimɛna di’ɔmɔtshi l’atei w’ambeki ande fɔnya dia nde mboleki asekande woke. Ɔnkɔnɛ, oko wakateke lo tshapita ya ntondo ya dibuku nɛ, nde akemadja kiɛndakɛnda l’atei awɔ ndo akawatɛ dia vɔ pombaka monga la ndjakitshakitsha kele oko ka kiɛndakɛnda shɔ. Koko vɔ kokondja wetshelo oma lo dikambo sɔ. Diakɔ diele yema tshitshɛ la ntondo ka nyɔi kande, Yeso akawasha wetshelo ɔmɔtshi wakiwɔ kokoka mbohɛ pondjo. Akandasale na?. . .

Lam’akawadjasɛ kâmɛ dia ndɛ yangɔ, Yeso akemala oma la mɛsa ndo akanya ahɔndɔ ande wa lâdiko. Nde akadinge esiyamɛ lo lokende. Oma lâsɔ, nde akɔshi dɔnga dia woke ko akadje ashi lɔkɔ. Ambeki ande wakahombe ndjambola ɔnɛ kakɔna kayangande sala. Lam’akendaka ambeki ande, Yeso akatshu le ɔmɔmɔ la l’atei awɔ, akakusɛ adwe ndo akâsole ekolo. Oma lâsɔ, nde akakitola ekolo awɔ l’esiyamɛ. Ohokanyiya dikambo sɔ! Otoyosala otondonga wɛ aki lâwɔ? Ngande wotoyoyaoka?. . .

Ambeki ande kɔfɔnyaka di’ekɔ dimɛna Ombetsha a Woke mbakambɛ olimu lo yoho ya ngasɔ. Vɔ wakangasana. Ndo Petero kombetawɔ dia Yeso mbokambɛ woho w’olimu wele oko dibɔyi ɔsɔ. Koko Yeso akate di’aki ohomba nde sala dikambo sɔ.

Ɛlɔ kɛnɛ, sho hatosolana ekolo. Koko dikambo sɔ diakasalemaka lam’aki Yeso lanɛ la nkɛtɛ. Onde wɛ mbeyaka lande na?. . . Diɔ diakasalemaka nɛ dia lo wodja wakasɛnaka Yeso nde l’ambeki ande, anto wakalɔtaka sabata y’ɛkɔdi aha mbidja shishɛtɛ. Ɔnkɔnɛ, etena kakawakɛndakɛndaka l’etadimbo wa ditshu, ekolo awɔ wakongaka l’otoko efula. Lâsɔ, sola ekolo w’ɔngɛndangɛnda aki tshelo y’ɔlɔlɔ.

Koko l’etena kɛnɛ ndoko ombeki waki Yeso wakakoke mbetawɔ sola ekolo w’anto akina. Diakɔ diakasale Yeso dikambo sɔ ndamɛ. Lo sala dikambo sɔ, Yeso akasha ambeki ande wetshelo ɔmɔtshi w’ohomba efula. Aki ohomba vɔ mbeka wetshelo ɔsɔ. Ndo ekɔ ohomba sho lawɔ mbeka wetshelo ɔsɔ ɛlɔ kɛnɛ.

Onde wɛ mbeyaka wetshelo akɔ?. . . L’ɔkɔngɔ wa Yeso ndɔta ahɔndɔ ande wa lâdiko wakandakolodi ndo wa nde mbidjasɛ nto lo mɛsa, nde akâlembetshiya ate: “Nyu mbeyaka dikambu diunyutshedimi? Nyu mbetakami nyati: Umbetsha la Khumadiondjo. Ololo mbatanyu, osoku mbemi. Ku naka dimi Khumadiondjo la Umbetsha lakanyotshisha ekulu, ndu nyu nyambuhumba mbotshanya ekulu.”​—⁠Joani 13:​2-14.

Lanɛ, Ombetsha a Woke akɛnya dia nde nangaka di’ambeki ande kambɛka asekawɔ olimu. Nde konanga dia vɔ kanaka paka dikambo diawɔ vɔamɛmɛ to. Nde konanga dia vɔ fɔnya ɔnɛ vɔ wekɔ anto w’ohomba efula wele paka anto akina mbahomba mbakambɛka nshi tshɛ. Nde akalange dia vɔ mongaka suke dia kambɛ anto akina.

Kema ɔsɔ aki wetshelo wa dimɛna?. . . Onde wɛ ayonga oko Ombetsha a Woke lo kambɛ anto akina?. . . Sho tshɛ tekɔ l’awui wakokaso salɛ anto akina. Dui sɔ diayowangɛnyangɛnya. Koko kɛnɛ koleki tshɛ ele diɔ diayɔngɛnyangɛnya Yeso nde la She.

Kambɛ anto akina kema dui dia wolo. Naka wɛ menda ɔlɔlɔ, kete wɛ ayɛna di’ekɔ awui efula wakokayɛ salɛ anto akina. Ohokanyiya kakianɛ: Onde ekɔ dikambo dimɔtshi diakokayɛ sala dia kimanyiya mama kayɛ? Wɛ mbeyaka dia nde salaka awui efula dikambo diayɛ ndo di’ase nkumbo akina. Onde wɛ kokaka mbokimanyiya?. . . Lande na kahayawombola kɛnɛ kakokayɛ sala na?

Ondo wɛ koka nɔnga diangɔ lo mɛsa la ntondo k’ase nkumbo ndja dia ndjɔlɛ. Ondo wɛ koka minya alɔnga wa mindo la mfusa oma la mɛsa l’ɔkɔngɔ w’ase nkumbo shidiya la ndɛ. Ana amɔtshi mbikashaka mindo lo dâla oseka lushi tshɛ. Oyadi kakɔna kakokayɛ sala, eya dia wɛ ayokambɛ anto akina oko wakasale Yeso.

Onde wɛ ekɔ l’akose w’apami ndo wa wamato wakokayɛ kambɛ? Ohɔ dia Yeso laki Ombetsha a Woke akakambɛ kânga ambeki ande. Naka wɛ kambɛ akosɛyɛ w’apami la wa wamato, kete wɛ ayokoya Yeso. Kakɔna kakokayɛ mbâsalɛ na?. . . Ondo wɛ koka mbâkimanyiya dia vɔ kawoyaka diangɔ diawɔ dia tɔkɛnyɔ l’ahole adiɔ l’ɔkɔngɔ wa vɔ shidiya la kɛnya. Kana wɛ koka mbâkimanyiya dia vɔ ndɔta ahɔndɔ. Kana ondo wɛ koka mbâkimanyiya dia mbala kana nɔngɔsɔla mbeto yawɔ. Onde wɛ kokaka kanyiya dui dikina tshɛ diakokayɛ mbâsalɛ?. . . Vɔ wayokoka ngandji lo menda woho wasalɛyɛ awui asɔ oko wakokama Yeso ngandji oma le ambeki ande.

Wɛ koka nto kambɛ anto akina la kalasa. Wɛ koka kambɛ asekayɛ wa lo kalasa kana ombetsha ayɛ. Naka onto ɔmɔtshi ambɔkɔsha kayɛ kana abuku ande, kete ekɔ dimɛna wɛ mbôkimanyiya la mbɔtɔngɔnɛ. Wɛ koka nimola dibaya kana salɛ ombetsha ayɛ dikambo dikina. Ndiholɛ onto lokuke ekɔ tshelo mɔtshi ya dimɛna.

Tena dimɔtshi, tayɛna di’anto hawotosha losaka lo kɛnɛ kâsalɛso. Onde wɛ fɔnyaka dia dui sɔ pombaka toshimba dia sala kɛnɛ kele ɔlɔlɔ?. . . Kema! Anto efula kombishaka Yeso losaka l’awui w’ɔlɔlɔ wakandâsalɛka. Koko dui sɔ koshimba Yeso dia nde sala kɛnɛ kele ɔlɔlɔ.

Ɔnkɔnɛ, tatotshikake pondjo dia kambɛka anto akina. Tohɔke kɛnɛ kakasale Yeso, Ombetsha a Woke ndo tonake lushi tshɛ dia ndjela ɛnyɛlɔ kande.

Dia kondja avɛsa efula wendana la woho wa kimanyiya anto akina, adia Tukedi 3:​27, 28; Romo 15:​1, 2; ndo Ngalatiya 6:⁠2.

[Osato wa lo lɛkɛ 37]

L’ɔtɛ wa dikambo diakɔna diakawanaka ambeki waki Yeso?

[Osato wa lo lɛkɛ 39]

Wetshelo akɔna wakasha Yeso ambeki ande na?

[Esato wa lo lɛkɛ 40, 41]

Akokayɛ sala dia kimanyiya anto akina?