TSHAPITA 20

Onde Wɛ Nangaka Monga Nshi Tshɛ Lo Dihole Dia Ntondo?

ONDE wɛ mbeyaka onto ɔmɔtshi lalanga monga nshi tshɛ lo dihole dia ntondo?. . . Nde mbeyaka sokola onto ɔmɔtshi l’ɔnɔngɔ dia nde mbeta lo dihole dia ntondo. Onde wɛ atɛnaka dikambo dia ngasɔ?. . . Ombetsha a Woke akɛnyi ndo epalanga w’anto wona dia mbeta lo dihole dia ntondo kana mbɔsa ahole woleki amɛna. Koko nde konangaka dikambo sɔ. Tende kɛnɛ kakete.

Bible totɛka dia wakete Yeso lo dambo dimɔtshi dia woke laka Ofarisɛ ɔmɔtshi laki owandji wa woke w’ɔtɛmwɛlɔ. L’ɔkɔngɔ wa Yeso koma lɛkɔ, nde akatatɛ menda woho wakayaka anto akina wakawete ndo woho wakasɔnaka anto asɔ ahole woleki amɛna. Ɔnkɔnɛ, nde akakɔndɔlɛ wanɛ wakawete lo dambo sɔ ɔkɔndɔ ɔmɔtshi. Onde wɛ nangaka mboka ɔkɔndɔ akɔ?. . .

Yeso akate ate: ‘Naka onto ɔmɔtshi amboketa lo fɛtɛ ka diwala, todjasɛke lo dihole dioleki dimɛna.’ Onde wɛ mbeyaka lande na kakate Yeso dikambo sɔ?. . . Nde akalembetshiya ɔnɛ mbeyaka monga ko wakete ndo onto ɔmɔtshi l’ohomba efula lo fɛtɛ kakɔ. Ɔnkɔnɛ, oko wakokayɛ mɛna lo sango nɛ, onto lasala fɛtɛ amboya ko nde l’onto ongo ate: ‘Tshikɛ onto ɔnɛ dihole nɛ ndo tshɔka todjasɛ lɛnɛ.’ Lâsɔ, ngande wayoyaoka onto lakandete ɔsɔ na?. . . Nde ayoka sɔnyi efula nɛ di’anto akina tshɛ wakawetshi lo fɛtɛ kakɔ wayɛna woho watandatshu dia todjasɛ lo dihole diele bu dimɛna efula.

Yeso akɛnyaka dia kema dimɛna nanga dia monga lo dihole dioleki dimɛna. Diakɔ diakandate ate: ‘Naka wamboketa lo fɛtɛ ka diwala, kodjasɛ lo dihole dioleki tshɛ kɔlɔ. Lâsɔ onto lakaketshi mbeyaka ndja ko ndjokotɛ ate: ‘Ɔngɛnyi todjasɛ lo dihole dia dimɛna efula ndo.’ Etena kɛsɔ, wɛ ayonga la nɛmɔ la ntondo k’anto akina tshɛ wakawetshi wonya watayatshu dia todjasɛ lo dihole dia dimɛna efula.’​—⁠Luka 14:​1, 7-11.

Onde wɛ ambolembetɛ wetshelo w’oma l’ɔkɔndɔ waki Yeso ɔsɔ?. . . Ohɛsɔ tɔshi ɛnyɛlɔ dia menda kana wɛ ambolembetɛ wetshelo akɔ. Ohɔsa dia wɛ ekɔ lo tadɛ lo mutuka wɛ l’anto akina efula. Onde wɛ pombaka susana dia kondja dihole dia mbidjasɛ koko opalanga w’onto memala?. . . Onde Yeso koka ngɛnangɛna dikambo sɔ naka wɛ disala?. . .

Onto ɔmɔtshi mbeyaka mbuta ate Yeso ndoko lɛnɛ adjande yimba lo kɛnɛ kasalaso. Ko onde wɛ mbetawɔka dikambo sɔ?. . . Lam’aki Yeso lo dambo dia woke sɔ diaki laka Ofarisɛ, nde akendaka woho wakasɔnaka anto ahole wa vɔ mbidjasɛ. Onde wɛ hafɔnya dia Yeso ekɔ lo mbidja yimba lo kɛnɛ kasalaso ɛlɔ kɛnɛ?. . . Wony’ɔnɛ waya Yeso l’olongo, mamondoleka monga l’akoka wa menda kɛnɛ tshɛ kasalaso.

Onto koka ndjayangɛ ekakatanu lo nyanga dia monga lo dihole dia ntondo. Mbala efula anto kakatanaka ndo momalaka. Mbala mɔtshi dikambo sɔ tombaka lam’adɛ ana kâmɛ lo mutuka ɔtɔi. Kam’adiholawɔ lokuke la mutuka, ana susanaka dia mbeta ntondo. Vɔ nangaka mbidjasɛ l’ahole woleki amɛna, wosukanyi l’adidishi. Kakɔna kakoka ndjotomba l’ɔkɔngɔ na?. . . Eelo, vɔ mbeyaka tondja owanu lam’asawɔ.

Nyanga dia monga lo dihole dia ntondo koka mbela ekakatanu efula. Dui sɔ diakatondja ekakatanu ndo l’atei w’apɔstɔlɔ waki Yeso. Oko wakateke lo Tshapita 6 ya dibuku nɛ, vɔ wakawane lam’asawɔ dia mbeya akɔna oleki woke l’atei awɔ. Yeso akandasale l’ɔkɔngɔ wa lâsɔ na?. . . Nde akawangola. Koko vɔ wakayowana nto l’ɔkɔngɔ wa lâsɔ. Tende woho wakatatɛ owanu akɔ.

Apɔstɔlɔ kâmɛ l’anto akina wakatatshɔka vɔ la Yeso mbala k’ekomelo otsha l’osomba wa Jerusalɛma. Yeso akatasawolaka la wɔ awui wendana la Diolelo, ɔnkɔnɛ Jakɔba nde la Joani wakakanyiyaka dia mbolɛ oko nkumi ya dikanga kâmɛ la nde. Vɔ wakatɛkɛta ndo la Salɔme ka nyangɛwɔ dikambo sɔ. (Mateu 27:56; Mako 15:40) Ɔnkɔnɛ, lam’akawatatshɔka otsha la Jerusalɛma, Salɔme akaye le Yeso, akake adwe la ntondo kande ndo akɔ̂lɔmbɛ dia nde mbohumuya lokolo l’ɔlɔ.

Yeso akawombola ate: “Alangaye na?” Salɔme akôkadimola ate: Dimi nangaka dia wɛ mbetawɔ di’anami anɛ mbidjasɛ suke la yɛ lo Diolelo diayɛ, ɔmɔtshi lo lonya layɛ l’omi ndo okina lo lonya layɛ la lɔmɔsɔ. Oko le yɛ, ngande wafɔnyayɛ wakayaoke apɔstɔlɔ akina dikumi lam’akawoke kɛnɛ kakalɔmbɛ Jakɔba nde la Joani lo tshimbo ya nyangɛwɔ na?. . .

Eelo, vɔ wakômalɛ Jakɔba nde la Joani efula. Diakɔ diakasha Yeso apɔstɔlɔ ande tshɛ alako amɔtshi w’amɛna efula. Yeso akawatɛ ate ewandji w’ase wedja nangaka dia monga anto wa weke ndo w’ehomba. Vɔ nangaka monga l’ahole wa lâdiko lɛnɛ ele oseka onto tshɛ pombaka monga l’okitanyiya otsha le wɔ. Koko Yeso akatɛ ambeki ande dia vɔ hawohombe monga anto wa woho ɔsɔ. Yeso akate ate: “One lalanga ndjala wuki l’atei anyu, dieli la ndi dia ndjala [ɔhɔmbɔ] anyu.” Ohokanyiya dikambo sɔ!​—⁠Mateu 20:​20-28.

Onde wɛ mbeyaka kɛnɛ katosalaka ɔhɔmbɔ?. . . Nde kambɛka anto akina koko nde halongamɛ di’anto akina mbokambɛ. Nde mbidjasɛka lo dihole dioleki l’ɛse koko aha lo dihole dia ntondo. Nde salaka awui oko onto loleki bu ohomba, koko aha oko onto loleki ohomba. Ndo ohɔ dia Yeso akate dia ɔnɛ lalanga monga lo dihole dia ntondo pombaka monga oko ɔhɔmbɔ w’anto akina.

Oko le yɛ dikambo sɔ alangadiɔ nembetshiya le so?. . . Onde ɔhɔmbɔ koka mana l’owandji ande lo kɛnɛ kendana l’onto lahomba mbɔsa dihole dioleki dimɛna? Kana onde vɔ koka mana lo kɛnɛ kendana l’ɔnɛ lahomba ndɛ ntondo? Akanayɛ lo dikambo sɔ?. . . Yeso akalembetshiya dia nshi tshɛ ɔhɔmbɔ mbetshaka owandji ande lo dihole dia ntondo.​—⁠Luka 17:​7-10.

Lâsɔ, lo dihole dia nyanga dia monga lo dihole dia ntondo, ahombaso sala na?. . . Eelo, sho pombaka monga oko ɛhɔmbɔ w’anto akina. Kɛsɔ nembetshiyaka mbetsha anto akina la ntondo kaso. Mbut’ate mbaɔsa dia vɔ toleka ohomba. Onde wɛ koka kanyiya toho takokayɛ mbetsha anto akina lo dihole dia ntondo?. . . Tokawole lo lɛkɛ 40 ndo 41 kele tonyomenda toho tɔmɔtshi takokayɛ mbetsha anto akina lo dihole dia ntondo lo mbâkambɛ.

Wɛ ayohɔ di’Ombetsha a Woke aketshaka anto akina la ntondo kande ndamɛ lo mbâkambɛ. Dikɔlɔ di’ekomelo diakinde kâmɛ l’apɔstɔlɔ ande, nde akakusama ndo akawaɔtsha ekolo. Naka sho lawɔ mbetsha anto akina lo dihole dia ntondo lo mbâkambɛ, kete tayɔngɛnyangɛnya Ombetsha a Woke nde la Jehowa Nzambi ka She.

Ɛsɔ tadia avɛsa amɔtshi wa lo Bible watokeketsha dia mbetsha anto akina la ntondo kaso: Luka 9:48; Romo 12:3; ndo Filipi 2:​3, 4.

[Osato wa lo lɛkɛ 107]

Onde wɛ ambɛnaka anto wayanga dia monga lo dihole dia ntondo?

[Esato wa lo lɛkɛ 108, 109]

Naa wetshelo wakasha Yeso lam’akandatɛkɛta dikambo dia wanɛ wakɔsaka ahole woleki amɛna kana wa ntondo?

[Osato wa lo lɛkɛ 110]

Salɔme akandalɔmbɛ Yeso ndo etombelo akɔna wakonge la dui sɔ?