Nyetsha ananyu

Wakelamɛ ɔnɛ: “Ana wa dikhungula dia mvula”

NAKA mvula kambela efula, wɛ kokaka mboka dikungola dia wolo. Onde diɔ diatakotshaka wɔma?—a Eelo, Yeso akelɛ ambeki ande amɔtshi ahende ɔnɛ: “Ana wa dikhungula dia mvula.” Nyɛsɔ tênde lande na kakandawaelɛ ngasɔ.

Ambeki ahende wa Yeso asɔ ko Jakɔba la Joani. Vɔ waki enondo la kose, ana waki Zebede nde la wadɛnde Salome. Ondo Salome aki kosh’aki Mariya wa nyango Yeso. Ɔnkɔnɛ, mbeyaka monga ko Yeso, Jakɔba la Joani waki ana l’ana ndo ondo wakonge angɛnyi w’eshika etena kakawayolaka.

Zebede aki omundji wa nse ndo Jakɔba nde la Joani waki vɔ lawɔ amundji wa nse. Ndo vɔ mbaki l’atei w’anto wa ntondo wakasɔnɛ Yeso dia vɔ monga ambeki ande. Etena kakandawaelɛ, mbala kakɔ ɔtɔi vɔ wakatshike olimu awɔ wa munda nse ko wakôyele. L’ɔkɔngɔ diko, Yeso akayɔsɔna ambeki 12 dia vɔ monga apɔstɔlɔ ande. Jakɔba la Joani waki l’atei awɔ.

Ngɔndɔ ngana la ntondo ka Yeso ndjakema, nde l’apɔstɔlɔ ande wakatshu l’ɛtshi ka nkɛtɛ kaki l’akona ka la Samariya. Vɔ wakatokomaka wonya ambeta nɛ dia vɔ tshɛ wakalɛmbɛ efula. Koko ase Samariya wakatone dia Yeso nde l’apɔstɔlɔ ande ndala l’osomba awɔ. Onde wɛ mbeyaka lande na?— Ɛsɔ tênde dui sɔ.

Yeso nde l’apɔstɔlɔ ande waki ase Juda ndo ase Juda efula kombokanaka l’ase Samariya. Lo mɛtɛ, ndoko lushi lakonge Yeso la dionga dia ngasɔ. Nde akâsalɛka akambo la ngandji tshɛ, ndo Jakɔba la Joani wakahombe vɔ lawɔ mbasalɛ akambo lo yoho shɔ. Koko, ambeki asɔ ahende wakoke ase Samariya nkɛlɛ l’ɔtɛ wakiwɔ kombalongola ndo vɔ wakambola Yeso ɔnɛ: ‘Onde wɛ nangaka dia sho mbuta dia dja polɔ ndo mbadiaka?’ Oko le yɛ kakɔna kakakoke Yeso mbuta?— Nde akawatɛ dia vɔ wambosala kɔlɔ lo mbuta dikambo dia kɔlɔ dia ngasɔ. Jakɔba la Joani wakahombe mbeka akambo efula lo kɛnɛ kendana la mbokana nkɛtshi.

Okakatanu okina wa woke waki la Jakɔba la Joani ele vɔ wakalange monga lo dihole dia ntondo, mbuta ate anto woleki ohomba. Yema tshitshɛ la ntondo ka nyɔi ka Yeso, vɔ wakatome nyangɛwɔ otsha le Yeso dia towotɛ ɔnɛ: “Uti diui dia an’ami ahendi ane mbidjase: omotshi lu lunya laye la pami, la ukina lu lunya laye la lomoso, lu diulelu diaye.” Etena kakoke apɔstɔlɔ akina dikumi kɛnɛ kakasale Jakɔba la Joani, vɔ wakomala efula. Onde ndo wɛ lawɔ mbotomala?—

Ondo ngasɔ. Hatotɔngɛnangɛnaka naka anto akina wolanga mbeta lo dihole dia ntondo ndo monga anto woleki ohomba. L’ɔkɔngɔ diko, Jakɔba la Joani wakayokondjaka wetshelo oma lo kɔlɔ kakawasale ndo wakayotshikitanyaka waonga awɔ. Vɔ wakayongaka apɔstɔlɔ wakokanaka ngandji ndo nkɛtshi k’efula. Wetshelo akɔna wakokaso nkondja oma lo dikambo sɔ?—

Wetshelo wahombaso nkondja oma le Yeso ele sho lawɔ pombaka salanɛ akambo la kɛtshi. Yeso akasalɛka anto tshɛ akambo w’amɛna oyadi apami, wamato kana ana. Onde wɛ ayosalaka nshi tshɛ la wolo dia mbohɔka ɛnyɛlɔ kande ndo kiyela?—

Adia lo Bible kayɛ

Mako 3:17

Mateu 27:55, 56; Mako 15:40, 41

Mateu 4:18-22

Joani 4:4-15, 21-26; Luka 9:51-55

Mateu 20:20-24; Mako 10:35-37, 41

[Nɔte ka l’ɛse ka dikatshi]