TSHAPITA 23

Ɔkɔkɔ Woka Anto Hemɔ

ONDE wɛ mbeyaka onto ɔmɔtshi lele la hemɔ?. . . Ondo mbala mɔtshi wɛmɛ ambokaka hemɔ. Ondo wɛ ambokaka demba dja kana l’otema. Anto amɔtshi wekɔ la hemɔ ya wolo. Vɔ hawokoke kânga memala naka onto ɔmɔtshi hakimanyiyisha. Dikambo sɔ mongaka mbala efula naka onto aya osombe efula.

Onto tshɛ mbokaka hemɔ tena dimɔtshi. Onde wɛ mbeyaka bonde koka anto hemɔ, katshundawɔ esombe ndo kavɔwɔ?. . . Lushi lɔmɔtshi wakela Yeso pami kɛmɔtshi kaki kokoka kɛndakɛnda, ko Yeso akɛnya lande na koka anto hemɔ ndo kavɔwɔ. Layanga kotɛ dui sɔ.

Yeso akadjasɛka lo luudu lɔmɔtshi la l’osomba waki suke la Ndjale ka Ngalileya. Olui ɔmɔtshi w’anto wakaye dia ndjɛnana la nde. Anto efula wakaye le nde woho ɔnɛ wele dihole di’anto akina mbɔtɔ lo luudu lakɔ komonga nto. Ndoko onto lakakoke kânga sukana la lokuke. Koko anto wakayaka paka ndja tsho! Olui ɔmɔtshi w’anto wakaye la pami kɛmɔtshi k’ekuse kaki kokoka kɛndakɛnda. Akahombe apami anɛi mɛmba pami kɛsɔ lo mbeto ka tshitshɛ kana lo kɔsa ka lɛɛmbɛ.

Onde wɛ mbeyaka lande na kakawela Yeso pami kaki la hemɔ kɛsɔ?. . . Wakela Yeso pami kɛsɔ nɛ dia vɔ waki la mbetawɔ ɔnɛ nde kokaka mbôkimanyiya. Lam’ele anto wakalole tɔɔ lo luudu lakɔ, onde wɛ mbeyaka nganɛ wakawakonya kanga ekuse ɔsɔ suke la Yeso?. . .

Osato wɛnayɛ lanɛ ɔnɛ mɛnyaka woho wakawasale dui sɔ. Ntondotondo vɔ wakɛmbɛ pami kɛsɔ la diko dia luudu. Sambe ka luudu lakɔ kaki ebamubamu. Oma lâsɔ, vɔ wakatondola wosho wa woke la diko ka sambe. Ko wakaholoya pami kaki la hemɔ kɛsɔ lo mbeto kande lo wosho akɔ lo luudu laki l’ɛse. Vɔ mɛtɛ waki la mbetawɔ k’efula!

Anto tshɛ waki lo luudu lɔsɔ wakambe efula lam’akawɛnyi kɛnɛ kaki lo salema kɛsɔ. Wakaholoya pami k’ekuse lo mbeto kande paka l’atei awɔ. Onde Yeso akomala lam’akandɛnyi kɛnɛ kakasale anto asɔ?. . . Kema! Nde akangɛnangɛna dia mɛna dia vɔ waki la mbetawɔ. Nde akatɛ pami k’ekuse kɛsɔ ate: ‘Pɛkato yayɛ yambodimanyiyama.’

Anto amɔtshi kɔfɔnyaka dia Yeso aki la lotshungɔ la mbuta ngasɔ. Vɔ kɔfɔnyaka dia nde akakoke dimanyiya anto pɛkato. Ɔnkɔnɛ, dia mɛnya ɔnɛ nde mɛtɛ akakokaka dimanyiya anto pɛkato, Yeso akatɛ pami kɛsɔ ate: ‘Emala, ɔsa mbeto kayɛ ndo tshɔka otsha lakayɛ.’

Lam’akate Yeso ngasɔ, pami kakɔ akakɔnɔ! Nde komonga ekuse nto. Etena kɛsɔ nde akakoke memala ndamɛ ndo kɛndakɛnda. Anto wakɛnyi dihindo sɔ wakambe efula. Ndoko lushi lakawɛnyi dui dia diambo dia ngasɔ lakawotɔ! Vɔ wakatombola Jehowa lo woho wakandawasha Ombetsha a Woke ɔsɔ, wakakoke ndo kɔnɔla hemɔ yawɔ.​—⁠Mako 2:​1-12.

Wetshelo akɔna wakondjaso oma lo dihindo sɔ na?. . . Dihindo nɛ tɛnyaka dia Yeso ekɔ la wolo wa dimanyiya anto pɛkato ndo wa kɔnɔla ase hemɔ. Koko sho mbekaka nto dikambo dikina di’ohomba efula. Sho mbekaka dia anto mbokaka hemɔ l’ɔtɛ wa pɛkato.

Lam’ele sho tshɛ mbokaka hemɔ lo tena dimɔtshi, kema dui sɔ mɛnyaka dia sho tshɛ tekɔ atshi wa pɛkato?. . . Eelo, Bible mbutaka dia sho tshɛ mbotɔka la pɛkato. Onde wɛ mbeyaka kɛnɛ kalembetshiya mbotɔ la pɛkato?. . . Kɛsɔ nembetshiyaka dia hatotɔ kokele. Tena dimɔtshi sho salaka awui wa kɔlɔ aha la lolango laso. Onde wɛ mbeyaka woho wakatayokomaka dia monga la pɛkato sho tshɛ?. . .

Takotɔ atshi wa pɛkato nɛ dia Adama, onto la ntondo komonga l’okitanyiya le Nzambi. Nde akasale pɛkato lam’akandasekola ɔlɛmbɛ waki Nzambi. Ɔnkɔnɛ, sho tshɛ takahowɔ pɛkato oma le Adama. Onde wɛ mbeyaka woho wakatahowɔ pɛkato oma le nde? Lotsha kolembetshiya yoho yakokayɛ shihodia dui sɔ.

Ondo wɛ ambokimanyiyaka onto ɔmɔtshi dia nde sala mapa lo mashinyi wa mapa. Ngande wakoka mapa monga naka mashinyi wa mapa ambominɔka dihole dimɔtshi na? Onde wɛ mbeyaka?. . . Ɛkɔmɔ k’oma lo dihole diakaminɔ mashinyi ɔsɔ kayɛnama lo mapa tshɛ wayotomba oma lo mashinyi akɔ, shi mɛtɛ?. . .

Adama aki oko mashinyi ɔsɔ ndo sho tekɔ oko mapa. Nde komonga nto kokele lam’akandasekola ɔlɛmbɛ waki Nzambi. Aki oko nde akaminɔ kana akadjama djembetelo ya kɔlɔ. Lâsɔ, lam’akandote ana, ngande wakahombe anasɔ monga na?. . . Ana ande tshɛ wakahombe mbotɔ aha la monga kokele.

Ana efula hawotɔ la dikɔmɔ dia weke diakokayɛ mɛna. Vɔ tshɛ wekɔ l’anya ndo l’ekolo ehende. Koko ɛkɔmɔ kele lawɔ kekɔ woke efula ndo tɔ kokaka mbatatsha hemɔ ndo l’edjedja ka wonya mbaela nyɔi.

Oko weyaso, anto amɔtshi tataka mbala efula ndeka anto akina. Lande na na? Onde ekɔ nɛ dia vɔ wakotɔ la pɛkato efula?. . . Kema, onto tshɛ mbotɔka la yɛdikɔ yamɛ ya pɛkato. Sho tshɛ mbotɔka anto wele kema kokele. Lâsɔ edja l’edja, onto tshɛ ayoka woho ɔmɔtshi wa hemɔ. Kânga anto wasala la wolo dia kitanyiya ɛlɛmbɛ waki Nzambi ndo wahasale mɛtɛ ndoko dui dia kɔlɔ koka mboka hemɔ.

Ko lâsɔ, lande na koka anto amɔtshi hemɔ mbala efula ndeka anto akina na?. . . Ekɔ l’ɔtɛ w’awui efula. Mbeyaka monga ko vɔ bu la diangɔ efula dia ndɛ. Kana ondo vɔ hawole diangɔ di’amɛna. Kana ondo vɔ ndɛka diangɔ efula diasha paka mpɛ keto l’onyɔ, koko hadiokeketsha demba. Dui dikina ele ondo vɔ sawolaka edja efula l’otsho ko hawolale djɔ efula. Kana ondo lo nshi ya tshitshi, vɔ hawɔlɔtɛ ahɔndɔ wakokɛ demba oma lo tshitshi. Alemba waki anto amɔtshi wekɔ wɔdu efula ndo hawokoke ndɔshana la hemɔ oyadi vɔ koyakokɛka vɔamɛ.

Onde ayonga etena kɛmɔtshi kahatatoka hemɔ nto? Onde tayotshungɔ oma lo pɛkato lushi lɔmɔtshi?. . . Yeso akandasalɛ ekuse kɛnɛ na?. . . Yeso akôdimanyiya pɛkato yande ndo akɔkɔnɔla. Yoho shɔ mbakɛnya Yeso kɛnɛ kayondosala lushi lɔmɔtshi dikambo di’anto wasala la wolo dia sala kɛnɛ kele ɔlɔlɔ.

Naka sho mɛnya dia hatolange sala pɛkato ndo dia tekɔ lo mpetsha kɛnɛ kele kɔlɔ, kete Yeso ayoyotɔkɔnɔla. Lo nshi yayaye, nde ayotonyɛ pɛkato yele laso ɛlɔ kɛnɛ. Nde ayosala dui sɔ oko wende Nkumekanga ka Diolelo diaki Nzambi. Pɛkato hatomɔ oma le so mbala kak’ɔtɔi. Tɔ kayonyɛma l’ɔkɔngɔ w’etena kɛmɔtshi. Lâsɔ lam’ahatatonga nto la pɛkato, sho hatotoka hemɔ nto pondjo. Sho tshɛ tayonga l’alemba wa kokele. Dui sɔ diayotosha mɛtɛ ɔngɛnɔngɛnɔ efula!

Dia mbeya awui efula lo shɛngiya yele la pɛkato le onto tshɛ, adia Jobo 14:4; Osambu 51:5; Romo 3:23; 5:12; ndo 6:⁠23.

[Osato wa lo lɛkɛ 123]

Yeso akandatɛ kanga ekuse dia sala?

[Osato wa lo lɛkɛ 124]

Naa wetshelo wakondjaso oma lo dihindo nɛ?

[Osato wa lo lɛkɛ 125]

Ngande wakatayokomaka sho tshɛ atshi wa pɛkato?

[Osato wa lo lɛkɛ 126]

Woho akɔna wa demba diayonga laso lam’ahatatonga nto la pɛkato?