TSHAPITA 31

Lɛnɛ Akokaso Tana Esambelo

ONDE ndoko lushi lakayonge la lonyangu kana ndjaoka oko ɔn’etshike?. . . Onde wɛ atayambolaka dia kana onto ɔmɔtshi kokaka ngandji?. . . Ana amɔtshi ndjambolaka ngasɔ. Koko Nzambi ndakaka ate: ‘Dimi hantokohɛ.’ (Isaya 49:15) Kema ɔsɔ ekɔ dikambo dia diambo efula dia kana ladiɔ yimba?. . . Eelo, Jehowa Nzambi tolangaka efula mɛtɛ!

Ofundji ɔmɔtshi wa Bible akate ate: “Lam’amboseka papa la nyomi, [Jehowa] ayunungula.” (Osambu 27:10) Mbeya dikambo sɔ koka monga tshondo y’esambelo le so, shi mɛtɛ?. . . Eelo, Jehowa totɛka ate: ‘Tanyokake wɔma, nɛ dia dimi lekɔ la nyu. Dimi mɛtɛ layonyokimanyiya.’​—⁠Isaya 41:⁠10.

Koko tena dimɔtshi Jehowa mbetawɔka dia Satana tela ekakatanu. Jehowa mbetawɔka ndo dia Satana pemba ekambi Ande. Mbala kɛmɔtshi Diabolo akasoya Yeso efula polo l’etena ka Yeso ndelɛ Jehowa la dui dia wolo ate: ‘Nzambi kami le, Nzambi kami le, lande na kamboyokalɛ na?’ (Mateu 27:46) Kânga mbakasowe Yeso, nde akeyaka dia Jehowa mbokaka ngandji. (Joani 10:17) Koko Yeso akeyaka nto dia Nzambi tshikaka Satana dia nde pemba ekambi Ande ndo dia nde mbâsoya. Lo tshapita kina tayolembetshiya lande na katshika Nzambi Satana dia sala dikambo sɔ.

Lam’ekeso dikɛnda sho mbokaka wɔma tena dimɔtshi. Ɛnyɛlɔ, onde wɛ atashishɔka ndoko lushi?. . . Onde wɛ aki la wɔma?. . . Akɛnda efula mbokaka wɔma. Mbala kɛmɔtshi, Ombetsha a Woke akakɔndɔla ɔkɔndɔ ɔmɔtshi wendana la nyama kakashishɔ. Aha ɔna dikɛnda mbakashishɔ. Aki ɔkɔkɔ ɔmɔtshi mbakashishɔ.

Lo yoho mɔtshi wɛ ekɔ oko ɔkɔkɔ. Lande na? Nɛ dia ɛkɔkɔ bu weke kana la lokalo efula. Ndo ɛkɔkɔ wekɔ l’ohomba w’onto ɔmɔtshi mbâlama ndo mbâkokɛ. Vɔ mbetaka onto lalama ɛkɔkɔ ɔnɛ olami w’ɛkɔkɔ.

L’ɔkɔndɔ ande, Yeso akatɛkɛta dikambo di’olami w’ɛkɔkɔ waki l’ɛkɔkɔ lokama. Koko ɔkɔkɔ ɔmɔtshi wakashishɔ. Ondo ɔkɔkɔ ɔsɔ akalange ntshɔ dia tenda kɛnɛ kaki lo wedi okina wa dikona. Koko kombet’edja, ɔkɔkɔ ɔsɔ akangana l’ɛkɔkɔ ekina etale efula. Onde wɛ koka kanyiya woho wakayaoke ɔkɔkɔ ɔsɔ lam’akandɛnyi dia asekande waya bu?. . .

Kakɔna kakahombe olami w’ɛkɔkɔ sala lam’akandɛnyi di’ɔkɔkɔ ɔmɔtshi wamboshishɔ na? Onde nde akahombe mbuta ate ɔkɔkɔ ɔsɔ akasale kɔlɔ lâsɔ halohombe ndjakiyanya dikambo di’ɔkɔkɔ akɔ? Kana onde nde akahombe tshika ɛkɔkɔ 99 lo dihole di’ekokelo ko ntshɔ dia tayangaka paka tshɔi y’ɔkɔkɔ yakashishɔ shɔ? Onde akakokaka mɛtɛ nde sala la wolo tshɛ paka dia nyanga tshɔi y’ɔkɔkɔ shɔ?. . . Otondonga wɛ mbaki ɔkɔkɔ ɔsɔ wakashishɔ, onde wɛ otolanga di’olami w’ɛkɔkɔ ntshɔ dia tokoyanga?. . .

Olami w’ɛkɔkɔ akalangaka ɛkɔkɔ ande tshɛ oyadi tshɔi yakashishɔ shɔ. Ɔnkɔnɛ nde akatshu dia toyanga ɔkɔkɔ ɔtɔi wakashishɔ. Ohokanyiya ɔngɛnɔngɛnɔ waki l’ɔkɔkɔ wakashishɔ ɔsɔ lam’akandɛnyi olami w’ɛkɔkɔ ayaye! Ndo Yeso akate dia olami w’ɛkɔkɔ akoke ɔlɔ nɛ dia nde akatane ɔkɔkɔ wakashishɔ ɔsɔ. Nde akangɛnangɛna l’ɔtɛ w’ɔkɔkɔ ɔsɔ oleki l’ɔtɛ w’ɛkɔkɔ 99 waki koshishɔ. Lâsɔ onto akɔna ele oko olami w’ɛkɔkɔ ɔsɔ wa l’ɔkɔndɔ waki Yeso na? Onto akɔna atokokɛ lo yoho yoleki ndo woho wakakokɛ olami w’ɛkɔkɔ ɔkɔkɔ ande?. . . Yeso akate dia She lele l’olongo mbatokokɛ. Jehowa mbele She.

Jehowa Nzambi ekɔ Olami a Woke w’ekambi ande. Nde nangaka anto tshɛ wokambɛ mbidja ndo akɛnda wele oko wɛ. Nde halange di’onto ɔmɔtshi l’atei aso salemɛ kɔlɔ kana ndanyema. Ekɔ mɛtɛ dikambo dia diambo dia mbeya ɔnɛ Nzambi tokokɛka efula!​—⁠Mateu 18:​12-14.

Onde wɛ ekɔ mɛtɛ la mbetawɔ le Jehowa Nzambi?. . . Onde nde ekɔ onto la mɛtɛ le yɛ?. . . Mɛtɛ sho hatokoke mɛna Jehowa, nɛ dia nde ekɔ Nyuma. Nde ekɔ la demba diahɛnama lo washo aso. Koko nde ekɔ onto la mɛtɛ ndo nde tɛnaka. Nde mbeyaka etena keso l’ohomba w’ekimanyielo. Sho koka tɛkɛta la nde lo dɔmbɛlɔ oko watɛkɛtaso l’onto okina la lanɛ la nkɛtɛ. Jehowa nangaka dia sho mbɔlɔmbaka.

Ɔnkɔnɛ, naka wɛ ekɔ la lonyangu kana amboyaoka oko etshike, ahombayɛ sala na?. . . Ewoya Jehowa. Yasukanya otsha le nde ko nde ayokosamba ndo ayokokimanyiya. Ohɔ dia Jehowa kolangaka, kânga lam’ayaokayɛ dia wɛ aya oko etshike. Tɔshi Bible kaso. Vɔ totɛka l’Osambu 23 tatɛ oma lo divɛsa 1 ɔnɛ: “[Jehowa] keli ulami ami, halahumbi engo. Ndi atumbetamiaka l’omongela w’adiyu, atonombolaka utsha l’ashi wa hoi.”

Enda kɛnɛ kata nto ofundji lo divɛsa 4 ate: “Ee, lam’atumetaka l’ukidi a udjima a tshududu, dimi hatukaka kolo woma, ne dia we eli la mi. Ukalimba aye la danga diaye watunsambaka.” Ngasɔ mbayaoka anto naka Jehowa mbele Nzambi kawɔ. Vɔ tanaka esambelo lam’ewɔ l’atei w’ekakatanu. Shi ngasɔ mbayaokayɛ?. . .

Jehowa kokɛka ekambi ande dimɛna woho watokokɛka olami w’ɛkɔkɔ wele la ngandji ɛkɔkɔ ande. Nde mɛnyaka ekambi ande mboka ka dimɛna ka vɔ mbidjɛ ndo ekambi ande mbôyelaka l’ɔngɛnɔngɛnɔ tshɛ. Oyadi efukutanu wekɔ l’ahole wewɔ, vɔ hawohombe mboka wɔma. Olami w’ɛkɔkɔ kambaka l’okalemba ande kana la danga diande dia kokɛ ɛkɔkɔ ande oma le nyama yakoka mboyisalɛ kɔlɔ. Bible mbutaka woho wakakokɛ Davidi laki olami w’ɛkɔkɔ wa dikɛnda ɛkɔkɔ ande oma le kimbwe ndo lawondo. (1 Samuele 17:​34-36) Ndo ekambi waki Nzambi mbeyaka dia Jehowa ayowakokɛ ndo vɔ lawɔ. Vɔ koka ndjaoka lo ekokelo nɛ dia Nzambi ekɔ kâmɛ la wɔ.

Jehowa nangaka ekambi ande mɛtɛ ndo nde mbâkokɛka la ngandji tshɛ. Bible mbutaka ɔnɛ: ‘Oko olami w’ɛkɔkɔ nde ayɔlɔmbɔla ɛkɔkɔ ande hita. Nde ayotshumanya ana w’ɛkɔkɔ l’anya ande.’​—⁠Isaya 40:⁠11.

Shi wɛ ngɛnangɛnaka dia mbeya ɔnɛ Jehowa tokokɛka?. . . Onde wɛ nangaka monga ɔkɔkɔ ande ɔmɔtshi?. . . Ɛkɔkɔ mpokamɛka dui diaki olami awɔ. Vɔ tshikalaka suke la nde. Onde wɛ mpokamɛka kɛnɛ kata Jehowa?. . . Onde wɛ tshikalaka suke lande?. . . Lâsɔ wɛ hahombe pondjo mboka wɔma. Jehowa ayonga kâmɛ la yɛ.

Jehowa kokɛka wanɛ wokambɛ la ngandji tshɛ. Tadia kâmɛ kɛnɛ kata Bible lo dikambo sɔ l’Osambu 37:25; 55:22; ndo Luka 12:​29-31.

[Osato wa lo lɛkɛ 163]

Oko le yɛ ngande wayaoka ɔkɔkɔ wa tshitshɛ wamboshishɔ ɔnɛ?

[Osato wa lo lɛkɛ 164]

Ele oko olami w’ɛkɔkɔ wakakokɛ ɔkɔkɔ ande?

[Osato wa lo lɛkɛ 165]

Onde Jehowa ekɔ onto la mɛtɛ le yɛ oko wele papa kayɛ kana onto okina?

[Osato wa lo lɛkɛ 166]

Oko olami wakokɛ ɛkɔkɔ ande, onto akɔna akoka tokimanyiya lam’eso la pâ?