TSHAPITA 34

Kakɔna Kayeta Naka Tambovɔ?

ONDO wɛ mbeyaka dimɛna dia ɛlɔ kɛnɛ anto wekɔ lo tshunda esombe, wekɔ lo tata hemɔ ndo wekɔ lo mvɔ. Ndo ana amɔtshi mvɔka. Onde wɛ pombaka mboka nyɔi wɔma kana mboka onto lambovɔ wɔma?. . . Onde wɛ mbeyaka kɛnɛ keta etana kavɔso?. . .

Ndoko onto lasɛna ɛlɔ kɛnɛ lele nde ambovɔka ko mbolɔ dia ndjototɛ kɛnɛ keta lam’avɔ onto. Koko lam’aki Yeso, Ombetsha a Woke lanɛ la nkɛtɛ, pami kɛmɔtshi akavu ndo akolɔ. Sho koka mbeya awui wakomɛ wanɛ wavɔ lo mbadia ɔkɔndɔ wendana la pami kɛsɔ. Pami kɛsɔ aki ɔngɛnyi waki Yeso ndo akasɛnaka l’osomba wa tshitshɛ wa Bɛtaniya waki suke la Jerusalɛma. Lokombo la pami kakɔ aki Lazaro ndo nde aki l’akadiyɔ ahende wakawelɛka Mata nde la Mariya. Bible ayanga totɛ kɛnɛ kakete.

Lushi lɔmɔtshi Lazaro aki la hemɔ wolo. L’etena kɛsɔ, Yeso aki etale efula. Ɔnkɔnɛ, Mata nde la Mariya wakatome onto dia tewoya Yeso ɔnɛ ɔnangɛwɔ Lazaro ekɔ la hemɔ. Vɔ wakatome onto ɔsɔ nɛ dia wakeyaka ɔnɛ Yeso koka ndja ko ndjɔkɔnɔya ɔnangɛwɔ. Yeso kema dɔkɔtɛlɛ, koko nde ekɔ la nkudu k’oma le Nzambi ka kɔnɔya oseka hemɔ tshɛ.​—⁠Mateu 15:​30, 31.

Koko la ntondo ka Yeso ntshɔ dia tenda Lazaro, hemɔ ka Lazaro kakoheke ndo nde akavu. Koko Yeso akatɛ ambeki ande ate Lazaro ekɔ lo djɔ ndo Nde otsha ntshɔ dia towemula. Ambeki koshihodia kɛnɛ kakalange Yeso mbuta. Ɔnkɔnɛ Yeso akahonolɛ ate: ‘Lazaro ambovɔ.’ Kakɔna kɛnya dikambo sɔ lo kɛnɛ kendana la nyɔi na?. . . Diɔ mɛnyaka dia nyɔi ekɔ oko djɔ ya wolo. Nyɔi ekɔ djɔ ya wolo efula yele onto hakoke kânga mɛna dɔ.

Oma lâsɔ Yeso akatshu dia tenda Mata nde la Mariya. Angɛnyi efula wa nkumbo kɛsɔ wakashile la koma lo dihole sɔ. Vɔ wakaye dia ndjosamba wamato asɔ nɛ dia ɔnangɛwɔ akavu. Lam’akoke Mata dia Yeso ekɔ lo ndjaye, nde akatshu dia tohomana la nde. Kombeta edja, Mariya nde lawɔ akatshu dia tɛnana la Yeso. Nde aki la lonyangu efula, akalelaka ndo akakɔ l’ekolo waki Yeso. Angɛnyi akina wakayele Mariya wakalelaka ndo vɔ lawɔ.

Ombetsha a Woke akambola lɛnɛ akawakundɛ Lazaro. Ɔnkɔnɛ, anto wakatɔlɛ Yeso otsha lo woko wa dive wakawakundɛ Lazaro. Lam’akɛnyi Yeso anto tshɛ walela, nde lawɔ akatatɛ la ndela. Nde akeyaka dia ekɔ kandji efula mvusha onto lokaso ngandji.

Dive di’akadihe soko dia diombo dia woko a dive sɔ, ɔnkɔnɛ Yeso akate ate: “Nyunya dive.” Onde vɔ wakahombe sala dikambo sɔ?. . . Mata akɛnyi dia ɔsɔ komonga kanyi ya dimɛna. Nde akate ate: “Khumadiondjo, udu aya sulu, ne dia aya nshi nyei loko.”

Koko Yeso akatɛ Mata ate: ‘Shi lakakote dia naka wɛ ayetawɔ, kete wɛ ayɛna lotombo la Nzambi?’ Yeso akalange mbuta dia Mata ayɛna dikambo dimɔtshi diayotombola Nzambi. Kakɔna kaki Yeso suke la sala na? Lam’akawanya dive diakɔ, Yeso akalɔmbɛ Jehowa la dui dia wolo. Oma lâsɔ Yeso akate la dui dia wolo ate: “Lazaro, tumba!” Onde nde akakoke tomba oma lo diombo sɔ dia woko wa dive?. . .

Onde wɛ koka memula onto ɔmɔtshi lele lo djɔ?. . . Eelo, naka wɛ mbeta onto akɔ la dui dia wolo kete nde ayemɔ. Ko onde wɛ koka memula onto ɔmɔtshi lele lo djɔ ya nyɔi?. . . Ndooko. Oyadi wɛ kowelɛka la dui dia wolo tshɛ onto lambovɔ hatoka. Ndoko dikambo ɔtɔi diakokaso dimi la yɛ kana onto okina la lanɛ la nkɛtɛ sala ɛlɔ kɛnɛ dia memula onto lambovɔ.

Koko Yeso koka sala dikambo sɔ. Nde ekɔ la nkudu ka lânde k’oma le Nzambi. Ɔnkɔnɛ, lam’akete Yeso Lazaro, dikambo dimɔtshi dia diambo diakasalema. Onto lakavu ambeta nshi nyɛi akatombe oma lo diombo. Nde akonge nto la lɔsɛnɔ! Nde akakoke pɛnga, kɛndakɛnda ndo tɛkɛta nto! Eelo, Yeso akolola Lazaro oma lo nyɔi.​—⁠Joani 11:​1-44.

Kakianɛ ohokanyiya dikambo sɔ: Kakɔna kakakomɛ Lazaro lam’akandavu na? Onde etenyi kɛmɔtshi ka demba diande, mbut’ate anima kakatombe oma lo demba diande ko ntshɔ dia tɔsɛna dihole dikina? Onde anima waki Lazaro wakadɛ l’olongo? Onde lo nshi nyɛi shɔ nde akasɛnaka kâmɛ la Nzambi ndo l’andjelo w’ekila?. . .

Kema. Ohɔ dia Yeso akate dia Lazaro aki lo djɔ. Ngande watoyongaka naka wɛ ekɔ lo djɔ? Lam’eyɛ lo djɔ ya wolo, wɛ heye kɛnɛ keta suke la yɛ, shi mɛtɛ?. . . Ndo lam’emɔyɛ, wɛ heye wenya engana wakayaladi paka naka wɛ ambenda tango.

Ngasɔ mbediɔ lo kɛnɛ kendana l’anto wambovɔ. Vɔ haweye ndoko dikambo. Vɔ hawoke ndoko dui. Ndo vɔ hawokoke sala ndoko dikambo. Ngasɔ mbaki Lazaro lam’akandavu. Nyɔi ekɔ oko djɔ ya wolo yele onto hohɔ ndoko dikambo. Bible mbutaka ɔnɛ: “Wavo haweyi nduku dikambu.”​—⁠Undaki 9:​5, 10.

Ohokanyiya dikambo nɛ nto: Otondonga Lazaro aki l’olongo nshi shɔ nyɛi, shi tshike nde otota dui dimɔtshi lo kɛnɛ kendana la dikambo sɔ?. . . Ndo otondonga nde aki l’olongo, onde Yeso otowonya oma lo dihole dia dimɛna sɔ ko mbôkaloya lanɛ la nkɛtɛ nto?. . . Ndooko!

Koko anto efula mbutaka ɔnɛ tekɔ la anima ɔmɔtshi ndo vɔ mbutaka dia anima ɔsɔ tetemalaka la sɛna l’ɔkɔngɔ wa nyɔi ka demba diaso. Vɔ mbutaka ɔnɛ anima waki Lazaro waki la lɔsɛnɔ dihole dimɔtshi. Koko Bible hate dikambo sɔ. Bible mbutaka dia Nzambi akatonge pami ka ntondo Adama ‘anima wasɛna.’ Adama aki anima. Bible mbutaka nto dia lam’akasale Adama pɛkato, nde akavu. Nde akakome ‘anima wambovɔ’ ndo nde akakawola lo ditshu nɛ dia oma lo ditshu mbakandɔsama. Bible mbutaka nto di’ana waki Adama wakahowɔ pɛkato ndo nyɔi vɔ lawɔ.​—⁠Etatelu 2:7; 3:​17-19; Walelu 6:6; Romo 5:⁠12.

Mbokɛmaka hwe dia sho bu l’anima ɔmɔtshi wakakitɔna la demba diaso. Onto tshɛ l’atei aso ekɔ anima. Ndo lam’ele anto wakahowɔ pɛkato oma le onto la ntondo, Adama, Bible mbutaka ɔnɛ: ‘Anima wasala pɛkato mbayovɔ.’​—⁠Ezekiyele 18:⁠4.

Anto amɔtshi mbokaka odo wɔma. Vɔ hawolange ntshɔ suke la waembo nɛ dia vɔ fɔnyaka ɔnɛ wanɛ wakavu wekɔ l’anima wakakitɔna l’alemba awɔ ndo wakoka mbâsalɛ kɔlɔ. Ko onde onto lambovɔ koka salɛ ɔnɛ leke la lɔsɛnɔ kɔlɔ?. . . Ndooko.

Anto amɔtshi fɔnyaka ɔnɛ onto lambovɔ koka kawola oko nyuma dia nde ndjenda anto weke la lɔsɛnɔ. Diakɔ diele vɔ kitshɛka wanɛ wakavu diangɔ dia ndɛ. Koko anto wasala dikambo sɔ hawetawɔ mɛtɛ kɛnɛ kata Nzambi lo dikambo dia wanɛ wavɔ. Naka sho mbetawɔka kɛnɛ kata Nzambi, kete sho hatotoka wanɛ wavɔ wɔma. Ndo naka tekɔ mɛtɛ la lowando otsha le Nzambi l’ɔtɛ wa lɔsɛnɔ lakandatosha, kete tayɛnya dikambo sɔ lo sala awui wetawɔ Nzambi.

Ondo wɛ mbeyaka mumbola ɔnɛ: ‘Onde Nzambi ayolola ana wakavu? Onde nde mɛtɛ nangaka sala dikambo sɔ?’ Tayɔtɛkɛta dikambo sɔ lo tshapita yayela.

Tadia awui akina lo Bible wɛnya woho wele wanɛ wavɔ l’Osambu 115:17; 146:​3, 4; ndo Jeremiya 2:⁠34.

[Osato wa lo lɛkɛ 179]

Kakɔna kakasalɛ Yeso Lazaro?

[Osato wa lo lɛkɛ 180]

Ngande waki Lazaro lam’akandavu?

[Osato wa lo lɛkɛ 181]

Lande na kahatahombe mboka wanɛ wavɔ wɔma?