TSHAPITA 35

Sho Koka Mbolɔ Oma Lo Nyɔi!

NAKA sho mvɔ, onde Nzambi ayolanga tolola, mbut’ate nyomotosha lɔsɛnɔ nto?. . . Pami k’ɔlɔlɔ kakawelɛka Jɔbɔ aketawɔka dia Nzambi ayolola anto. Ɔnkɔnɛ, lam’akɛnyi Jɔbɔ dia nde aya suke la mvɔ, nde akatɛ Nzambi ate: “We ayumbeta, ku dimi layuketawo.” Jɔbɔ akate dia Jehowa Nzambi ayoyakiyanya kana kombola efula dia mbôlola.​—⁠Jobo 14:​14, 15.

Yeso ekɔ paka oko wele Jehowa Nzambi ka She. Yeso nangaka dia tokimanyiya. Lam’akawotɛ onto laki la hemɔ ka sudi ate: ‘Naka wɛ nangaka, kete wɛ koka mbɛdiami,’ Yeso akokadimola ate: ‘Dimi nangaka.’ Oma lâsɔ, nde akakɔnɔla pami kaki la hemɔ ka sudi kɛsɔ.​—⁠Mako 1:​40-42.

Yeso akeke oma le She dia mboka ana w’akɛnda ngandji. Lo nshi y’edjedja, Jehowa akakambe l’ekambi ande mbala hiende y’etondo dia mbolola ana w’akɛnda. Elidja akalɔmbɛ Jehowa dia mbolola ɔnaki womoto lakôlongola dimɛna. Ko Jehowa akasale dikambo sɔ. Jehowa akakambe nto l’okambi ande Elisha dia mbolola kiɛndakɛnda mɔtshi ya pami.​—⁠1 Nkumi ya Dikanga 17:​17-24; 2 Nkumi ya Dikanga 4:​32-37.

Kema ekɔ dikambo di’ɔngɛnɔngɛnɔ efula dia mbeya ɔnɛ Jehowa tolangaka efula?. . . Nde hakanyiya dikambo diaso paka l’etena keso la lɔsɛnɔ keto. Nde tohɔka oyadi kânga tambovɔ. Yeso akate dia She mbɔsaka wanɛ wambovɔ wokande ngandji oko wekɔ la lɔsɛnɔ! (Luka 20:38) Bible mbutaka dia ‘oyadi nyɔi kana lɔsɛnɔ, oyadi akambo wa kakianɛ koyanga akambo wayaye hawotokoka tanganya oma lo ngandji kaki Nzambi.’​—⁠Romo 8:​38, 39.

Lam’aki Yeso lanɛ la nkɛtɛ, nde akɛnya dia Jehowa ndjakiyanyaka dikambo di’ana w’akɛnda. Wɛ mbohɔka dia Yeso akatshungolaka etena ka mbutɛ ana w’akɛnda awui wendana la Nzambi. Ko onde wɛ mbeyaka dia Nzambi akasha Yeso wolo wa mbolola ana w’akɛnda oma lo nyɔi?. . . Tɔtɛkɛtɛ dikambo di’etena kakolola Yeso ɔna womoto ɔmɔtshi l’ɛnɔnyi 12 laki ɔnaki pami kakawelɛka Jayiro.

Jayiro akadjasɛka nde la wadɛnde ndo la tshɔi y’ɔnawɔ suke la Ndjale ka Ngalileya. Lushi lɔmɔtshi, dikɛnda dia womoto sɔ akoke hemɔ wolo efula ndo Jayiro akɛnyi di’ɔnande aki suke la mvɔ. Jariyo, pami ka diambo efula akatatɛ kanyiya dikambo diaki Yeso, ɔnɛ lakandoke anto wata dia nde koka kɔnɔla anto. Ɔnkɔnɛ, Jayiro akatshu dia tɛnana la Yeso. Nde akatane Yeso l’omamu wa Ndjale ka Ngalileya, alakanya anto efula.

Jariyo akɔmɔmɔ l’atei w’olui w’anto ndo akakusama l’ekolo waki Yeso. Nde akatɛ Yeso ate: ‘Ɔnami la womoto ekɔ la hemɔ wolo. Lam’alangɛ otshu dia tôkimanyiya. Lambokɔsɛngasɛnga dia wɛ ndja.’ Yeso akatshu nde la Jariyo aha la tshimbatshimba. Olui w’anto wakaye dia ndjenda Ombetsha a Woke wakatshu kâmɛ la wɔ. Koko l’ɔkɔngɔ wa vɔ ntshɔ yema etale, apami amɔtshi wakaye oma lo luudu laki Jariyo ndo wakatɛ Jariyo ɔnɛ: “On’aye a umuntu ambuvo. Ukundi asuyaye umbetsha ntu?”

Yeso akoke apami amɔtshi watɛ Jariyo dikambo sɔ. Nde akɛnyi dia Jariyo aki la lonyangu efula dia mvusha tshɔi yande y’ɔna. Ɔnkɔnɛ, Yeso akawotɛ ate: ‘Tokake wɔma. Onga tsho la mbetawɔ le Nzambi ko ɔnayɛ ayonga tshɛ dimɛna.’ Vɔ wakatshu polo lo luudu laki Jariyo. Vɔ wakatane angɛnyi waki ase nkumbo kɛsɔ walela. Vɔ waki la lonyangu efula lo woho wakawavusha ɔngɛnyi awɔ wa dikɛnda. Koko Yeso akawatɛ ate: ‘Nyotshike ndela. Ɔna dikɛnda ɔnɛ havwe koko nde ekɔ lo djɔ.’

Lam’akate Yeso dikambo sɔ, anto wakatatɛ la mbɔla nɛ dia vɔ wakeyaka ɔnɛ dikɛnda dia womoto sɔ akashidi la mvɔ. Oko le yɛ, lande na kakate Yeso ate dikɛnda dia womoto sɔ ekɔ lo djɔ?. . . Wetshelo akɔna wafɔnyayɛ wakandalange mbisha anto na?. . . Nde akalange vɔ mbeya dia nyɔi koka monga oko djɔ ya wolo. Nde akalange mbaetsha dia oma lo nkudu kaki Nzambi, nde koka mbolola onto lambovɔ esadi eto oko wakokaso memula onto oma lo djɔ.

Yeso akatɛ anto tshɛ dia tomba oma lo luudu onyake apɔstɔlɔ ande Petero, Jakɔba, ndo Joani la she ndo nyango aki ɔna womoto lakavu ɔsɔ. Oma lâsɔ, nde akatshu lɛnɛ aki dikɛnda diakɔ. Nde akokimɛ lo lonya ndo akate ate: ‘Ɔna womoto, etɔ!’ Ɔn’akɔ aketɔ ko wonya akɔ wâmɛ ndo akatatɛ la nkɛndakɛnda! She la nyango wakangɛnangɛna efula.​—⁠Mako 5:​21-24, 35-43; Luka 8:​40-42, 49-56.

Kakianɛ ohokanyiya dikambo sɔ. Lam’ele Yeso akakoke mbolola dikɛnda dia womoto sɔ, onde nde hakoke salɛ anto akina woho akɔ wâmɛ?. . . Onde wɛ fɔnyaka dia nde mɛtɛ ayosala dikambo sɔ?. . . Eelo, nde ayodisala. Yeso ndamɛ akate ate: “Etena kambukuka, kayuka wane weli lu waumbu tshe diui [diami], ku vo wayutumba.”​—⁠Joani 5:​28, 29.

Onde wɛ fɔnyaka dia Yeso nangaka mbolola anto?. . . Ɛnyɛlɔ kekina ka lo Bible tokimanyiyaka dia sho kadimola dimbola sɔ. Kɛnɛ kakete lushi lɔmɔtshi suke l’osomba wa Nayina mɛnyaka woho wayaoka Yeso lo dikambo di’anto wele la lonyangu nɛ dia wambovusha lakiwɔ ɔmɔtshi.

Womoto ɔmɔtshi aki l’ɔnɔngɔ w’olui w’anto wakayɛmbaka odo w’ɔnande la pami oma l’osomba wa Nayina. Kombeta edja omɛnde aki oma la mvɔ ndo kakianɛ tshɔi yande y’ɔna ambovɔ. Womoto ɔsɔ mɛtɛ aki la lonyangu efula! Ase Nayina efula wakatatshɔka l’ɔkɔngɔ wa wanɛ wakatɛmbaka odo w’ɔnande otsha l’andja w’osomba. Womoto ɔsɔ akatalelaka ndo ndoko kɛnɛ kakahombe anto sala dia mbosamba.

Lushi lɔsɔ, Yeso nde l’ambeki ande wakatatshɔka otsha l’osomba wa Nayina. Suke la soko di’osomba ɔsɔ, vɔ wakahomana la lemba l’anto watatshu dia tokundɛ ɔnaki womoto ɔsɔ. Lam’akɛnyi Yeso woho wakalelaka womoto akɔ, nde akawoke kɛtshi efula. Otema ande wakanandema lo mɛna lonyangu laki la womoto ɔsɔ. Nde akalange dia mbokimanyiya.

Ɔnkɔnɛ, lo menda kɛtshi ndo eshikikelo kakatshutshuya womoto akɔ dia mbôhokamɛ, Yeso akawotɛ ate: ‘Takolela.’ Kɛnɛ kakandasale ndo yoho yakandasale dikambo sɔ akatshutshuya anto tshɛ dia menda la yambalo efula. Lam’akatshu Yeso otsha lɛnɛ aki odo, anto tshɛ wakahombe ndjambola dia mbeya kɛnɛ kakandalange sala. Yeso akatɛkɛta ndo akate ate: “Olongo, dimi lambukutela nti: Eto.” Mbala kakɔ ɔtɔi ɔna pami ɔsɔ aketɔ! Ndo nde akatatɛ la tɛkɛta.​—⁠Luka 7:​11-17.

Ohokanyiya woho wakahombe womoto ɔsɔ ndjaoka! Ngande wokokiyɛ ndjaoka naka vɔ kololɛ onto lakiyɛ ɔmɔtshi la ngandji na?. . . Kema dui sɔ mɛnyaka dia Yeso mɛtɛ mbokaka anto ngandji ndo nangaka dia mbâkimanyiya?. . . Ohokanyiya ɔngɛnɔngɛnɔ w’efula wayonga l’andja w’oyoyo waki Nzambi lam’ayotolongola anto wakavu oya lo lɔsɛnɔ!​—⁠2 Petero 3:13; Enyelo 21:​3, 4.

L’etena kɛsɔ, anto amɔtshi l’atei wa wanɛ wayolɔ wayonga wanɛ wakateyaka ntondo, mbidja ndo ana. Tayowaeya paka oko wakeye Jariyo ɔnande la womoto lam’akawolola Yeso. Anto akina wayonga wanɛ wakavu ambeta ɛnɔnyi nkama kana nunu. Koko, Nzambi hatowaohɛ l’ɔtɛ w’ɔnɛ vɔ wambovɔ edja efula.

Kema ekɔ dikambo dia diambo dia mbeya ɔnɛ Jehowa Nzambi nde l’Ɔnande Yeso tolangaka efula?. . . Vɔ nangaka dia sho sɛna aha paka l’edja k’ɛnɔnyi engana eto koko pondjo pondjo!

Dia wɛ mbeya elongamelo ka diambo efula kendana la wanɛ wakavu kele lo Bible, lam’alangɛ adia Isaya 25:8; Etsha 24:15; ndo 1  Koreto 15:​20-22.

[Osato wa lo lɛkɛ 182]

Ngande wakɛnya Jehowa dia nde nangaka ana w’akɛnda?

[Osato wa lo lɛkɛ 184]

Wetshelo akɔna wakondjaso lo woho wakolola Yeso ɔnaki Jariyo la womoto?

[Osato wa lo lɛkɛ 186]

Kakɔna kɛnya eolwelo ka tshɔi y’ɔna pami laki womoto ɔnɛ?