Ɔna womoto ɔmɔtshi ambolɔ!

Jayiro ambɛna dia Yeso ambɔkɔnɔla womoto laki l’ɛkɛlɛlɔ ka dikila. Lo mɛtɛ, Yeso koka nkimanyiya ndo ɔnande kaanga mbele nde akɔshi dia ‘wonyɔsɔ ɔnande pombaka monga ko ambovɔ.’ (Mateo 9:18) Onde ɔnɔsɔ akakoke kimanyiyama?

Etena kakatɛkɛtaka Yeso la womoto lakandakɔnɔla, anto amɔtshi wakaye oma laka Jayiro ndo wakawotɛ ɔnɛ: “Ɔnayɛ amboshila mvɔ!” Vɔ wakakotsha ɔnɛ: “Lande na kɛnyayɛ Ombetsha paa nto?”​—Makɔ 5:35.

Ɔsɔ mɛtɛ aki dindjɛyi! Pami kɛsɔ kakɔsamaka la nɛmɔ efula lo ngelo kɛsɔ, ambɔkɔmɔ tshɛ lo tshɛ kakianɛ. Tshɔi yande y’ɔna womoto ambovɔ. Koko Yeso akoke ɛtɛkɛta ɛsɔ, akakadimɔ otsha le Jayiro ndo akawotɛ l’ekeketshelo tshɛ ate: “Tokake wɔma, onga tsho la mbetawɔ.”—Makɔ 5:36.

Oma laasɔ, Yeso akatshu la Jayiro otsha lakande. Lam’akawakome, vɔ wakatane lofunguso la mamba. Anto waki lawɔ wakalelaka, wakadaka ekoko ndo wakayahomanyaka la nkandji. Yeso akɔtɔ l’etei ko akate ɛtɛkɛta wa diambo ate: “Ɔna havwe, lo djɔ kende.” (Makɔ 5:39) Lam’akawoke ɛtɛkɛta ɛsɔ, anto wakɔlɛ Yeso. Vɔ wakeyaka dia ɔnɔsɔ akavwe mɛtɛ. Koko lo nkamba la wolo wakawosha Nzambi, Yeso ayanga mɛnya dia kokaka mbolola anto oma lo nyɔi oko wakokawɔ memɔma oma lo djɔ.

Yeso akatondja anto tshɛ l’andja onyake Petero, Jakɔba, Joani ndo ambutshi w’ɔna lakavu. Yeso akɔshi anto atanu asɔ ko akatshu lawɔ lɛnɛ akawetanya odo w’ɔna. Nde akokimɛ lo lonya ndo akate ate: “‘Talita kumi,’ kitshimudi ate: ‘Ɔna womoto, lambokotɛ nte: “Etɔ!”’” (Makɔ 5:41) Mbala kakɔ ɔtɔi nde aketɔ ndo akatatɛ nkɛndakɛnda. Ohokanyiya ɔlɔ wakoke Jayiro nde la wadɛnde lam’akawɛnyi dui sɔ! Dia nyomoshikikɛ dia ɔnɔsɔ ambolɔ mɛtɛ, Yeso akate dia vɔ mbosha yangɔ ya ndɛ.

Lo waaso wakete, Yeso akadjangɛka wanɛ wakandakɔnɔlaka diaha vɔ todianganya awui wakandaasalɛ ndo kɛsɔ mbakandatɛ nto ambutshi asɔ. Koko, ambutshi waki l’ɔngɛnɔngɛnɔ asɔ, ndo anto akina wakadianganya lokumu “l’ɛtshi ka nkɛtɛ kɛsɔ tshɛ.” (Mateo 9:26) Onde wɛ hatosanya dikambo sɔ l’ɔlɔ tshɛ naka wɛ mɛna onto ɔmɔtshi lokayɛ ngandji lakavu ko ambolɔ? Ɔsɔ kele onto la hende lakolola Yeso.