TSHAPITA 40

Woho Wa Ngɛnyangɛnya Nzambi

KAKƆNA kakokaso sala dia ngɛnyangɛnya Nzambi na? Onde sho koka mbosha ɛngɔ kɛmɔtshi?. . . Jehowa mbutaka ate: “Nyama tshe ya l’ukunda yeli yami.” Nde mbutaka nto ate: “Fesa yeli yami, ndu paunyi yeli yami.” (Osambu 24:1; 50:10; Hangai 2:⁠8) Koko ekɔ ɛngɔ kɛmɔtshi kakokaso mbisha Nzambi. Ɛngɔ kakɔna kɛsɔ na?. . .

Jehowa totshikaka dia shoamɛ sɔna dia mbokambɛ kana bu. Nde hatotshutshuya la wolo dia sho sala kɛnɛ kalangande sho sala. Toyange dia shihodia lande na kakatotonge Jehowa la lotshungɔ la sho sɔna dia mbôkambɛ kana tona di’aha mbôkambɛ.

Ondo wɛ mbeyaka rɔbo. Rɔbo ekɔ mashinyi wasalawɔ dia salaka dikambo tshɛ dialanga onto lakasale mashinyi akɔ disala. Ɔnkɔnɛ, rɔbo hakoke sɔna kɛnɛ kahombatɔ sala. Jehowa akakoke totonga sho tshɛ oko waa rɔbo. Nde akakoke totonga woho wa sho salaka paka kɛnɛ kalangande sho sala keto. Koko Nzambi kototonga ngasɔ. Onde wɛ mbeyaka lande na?. . . Diangɔ dimɔtshi diasalɛwɔ ana w’akɛnda dia kɛnyaka diekɔ oko waa rɔbo. Wonya waminawɔ butɔ kɛmɔtshi, diangɔ sɔ salaka paka kɛnɛ kakalɔngɔsɔla osadi adiɔ dia diɔ sala. Onde wɛ ambɛnaka woho w’ɛngɔ ka tɔkɛnyɔ ka ngasɔ?. . . Mbala efula anto hawɔngɛnangɛna kɛnya l’ɛngɔ kasala paka kɛnɛ kakalɔngɔsɔma dia tɔ salaka keto. Nzambi halange dia sho mbôkitanyiyaka oko waa rɔbo, mbut’ate mbôkambɛ aha la lolango laso. Jehowa nangaka dia sho mbôkambɛ l’ɔtɛ wa ngandji kawokaso ndo nɛ dia sho nangaka mbôkitanyiya.

Oko le yɛ, ngande wayaoka Shɛso lele l’olongo lam’akitanyiyaso awui ande nɛ dia sho nangaka dikambo sɔ na?. . . Ohombutɛ, onde dionga diayɛ koka ngɛnyangɛnya kana nyangiya ambutshi ayɛ?. . . Bible mbutaka ɔnɛ ɔna la lomba “atongenyangenyaka shi” koko ɔna l’enginya “atunyangiyaka nyangu.” (Tukedi 10:⁠1) Onde wɛ ambɛna dia naka wɛ sala kɛnɛ kakotɛ mama kayɛ kana papa kayɛ dia sala, kete vɔ wayɔngɛnangɛna?. . . Ko ngande wayowoyaoka naka wɛ bu l’okitanyiya otsha le wɔ?. . .

Kakianɛ, tokanyiya dikambo diaki Jehowa Shɛso lele l’olongo. Nde totɛka woho wakokaso mbɔngɛnyangɛnya. Ɔsa Bible kayɛ kele fola lo Tukedi 27:11. Lo divɛsa nɛ Nzambi totɛka ate: “On’ami uyali kanga yimba, ongenyangenya utema ami. Ku dimi layeya nkaluya diui le one latomonyolaka.” (Sho mbɛnganyisha alɛta ango.) Onde wɛ mbeyaka kɛnɛ kalembetshiya mɔnyɔla onto?. . . Onto koka kɔnyɔla lo kɔ̂la kana lo mbuta dia wɛ bu l’akoka wa sala kɛnɛ katayɛ ɔnɛ wɛ koka kisala. Satana ngande wɔnyɔlande Jehowa na?. . . Ɛsɔ tende woho wawɔnyɔlande.

Ohɔ dia takeke lo Tshapita 8 ya dibuku nɛ ɔnɛ Satana nangaka monga lo dihole dia Ntondo ndo nde nangaka di’anto tshɛ monga l’okitanyiya otsha le nde. Satana mbutaka ɔnɛ anto wekɔ lo tɛmɔla Jehowa paka nɛ dia nde ayowasha lɔsɛnɔ la pondjo naka vɔ mbɔtɛmɔla. L’ɔkɔngɔ wa Satana tshutshuya Adama la Eva dia vɔ tɔmbɔkwɛ Nzambi, Satana akadje Nzambi tɔfwɛfwɛ. Nde akatɛ Nzambi ate: ‘Anto kokambɛka paka l’ɔtɛ wa kɛnɛ kakondjawɔ oma le yɛ. Dimi kokaka mbaɛkɔla oma le yɛ naka wɛ mbishami diaaso dia dimi sala dikambo sɔ.’

Ekɔ mɛtɛ di’ɛtɛkɛta ɛsɔ hawofundami ngasɔ lo Bible. Koko lam’adiaso ɔkɔndɔ waki Jɔbɔ, mbokɛmaka hwe dia Satana akatɛ Nzambi weho w’ɛtɛkɛta wa ngasɔ. Aki mɛtɛ ohomba efula le Satana ndo le Jehowa dia mbeya kana Jɔbɔ aki la kɔlamelo otsha le Nzambi kana bu. Tofole Bible yaso lo Jobo tshapita 1 ndo ya 2 kele tende kɛnɛ kakete.

Lembetɛ dia lo Jobo tshapita 1, Satana aki l’olongo lam’akaye andjelo dia ndjenda Jehowa. Ɔnkɔnɛ, Jehowa akambola Satana ate: “Uma lendi ayayayi?” Satana akokadimola ate nde akayayaka oma la tokindjakindja nkɛtɛ. Oma lâsɔ, Jehowa akawombola ate: ‘Onde wɛ akɛnyi dia Jɔbɔ ekɔ lo kambɛmi ndo hasale ndoko dikambo ɔtɔi dia kɔlɔ?’​—⁠Jobo 1:​6-8.

Paka ko wonya akɔ Satana akayange tɛkɛ nɛndɛ lo mbuta ate: ‘Jɔbɔ ekɔ lo kɔtɛmɔla paka nɛ dia nde bu ndoko l’okakatanu. Naka wɛ minya ekokelo ndo ɛtshɔkɔ ayɛ oma le nde, kete nde ayotona dia kokambɛ ko wonya akɔ wâmɛ.’ Ɔnkɔnɛ, Jehowa akokadimola ate: ‘Kawɔ Satana, wɛ koka mbosalɛ oseka dikambo tshɛ dialangɛ, koko tɔhɛnyahɛnyake Jɔbɔ lo demba.’​—⁠Jobo 1:​9-12.

Satana akandasale na?. . . Nde akatshutshuya anto dia ndjova ngɔmbɛ la ponda yaki Jɔbɔ ndo dia ndjaka anami wa nyama shɔ. Oma lâsɔ, ndjadi akayake ɛkɔkɔ la anami awɔ. L’ɔkɔngɔ diko, anto wakaye ndo wakave kamɛlɔ ndo wakayake anami ayɔ. L’ekomelo, Satana akela lɔpɛpɛ la wolo lakanyukola luudu lele ana dikumi waki Jɔbɔ waki l’etei ko vɔ tshɛ wakavu. Kânga mbakokomɛ awui asɔ tshɛ, Jɔbɔ akatetemala la kambɛ Jehowa.​—⁠Jobo 1:​13-22.

Lam’akɛnana Jehowa nde la Satana nto, Jehowa akawɛnya dia Jɔbɔ akatetemala la monga la kɔlamelo. Satana akadje tâmu nto ate: ‘Naka wɛ mbetawɔ dia dimi munanda demba diande, kete nde ayokɔsɛka ko wonya akɔ wâmɛ.’ Ɔnkɔnɛ, Jehowa akatshike Satana dia nde pɛnyahɛnya Jɔbɔ lo demba, koko akawotɛ di’aha nde mbôdiaka.

Satana akasha Jɔbɔ hemɔ, mbut’ate akotondja atshutshu wa wolo demba di’otondo. Tonya tɔsɔ taki la nsolo ka kɔlɔ woho ɔnɛ wele ndoko onto lakalange sukana suke la Jɔbɔ. Kânga wadi aki Jɔbɔ akawotɛ ate: ‘Ɔsɛkɛ Nzambi ko wɛ ayovɔ!’ Wanɛ wakataka dia wekɔ angɛnyi waki Jɔbɔ wakaye dia ndjowenda ndo wakayoleka fudja lonyangu lande lo mbuta ɔnɛ lo weho akɔ tshɛ Jɔbɔ akasale awui amɔtshi wa kɔlɔ efula diakɔ diakokomɛ asui asɔ tshɛ. Koko, oyadi asui la pâ tshɛ yakasha Satana Jɔbɔ, Jɔbɔ akatetemala la kambɛ Jehowa la kɔlamelo.​—⁠Jobo 2:​1-13; 7:5; 19:​13-20.

Oko le yɛ, ngande wakayaoke Jehowa lo menda kɔlamelo yaki Jɔbɔ?. . . Dui sɔ diakangɛnyangɛnya Jehowa nɛ dia nde akakoke mbutɛ Satana ate: ‘Enda Jɔbɔ! Nde ekɔ lo kambɛmi nɛ dia nde nangaka sala dikambo sɔ.’ Onde wɛ ayonga oko Jɔbɔ, mbut’ate onto lakoka Jehowa mbɔsa oko ɛnyɛlɔ kɛnya dia Satana ekɔ kanga kashi?. . . Lo mɛtɛ, ekɔ diɛsɛ dia mɛnya dia kɛnɛ kasɛma Satana ɔnɛ nde koka tshutshuya anto tshɛ dia vɔ tshika dia kambɛka Jehowa ekɔ dikambo dia kashi. Yeso mɛtɛ akɔshi dia dikambo sɔ ekɔ tshondo ya diɛsɛ.

Ombetsha a Woke kombetawɔ pondjo dia Satana mbôtshutshuya dia sala dikambo tshɛ dia kɔlɔ. Ohokanyiya woho wakangɛnangɛna She oma l’ɛnyɛlɔ kande. Jehowa akakoke tshuma Yeso lohita ko kadimola Satana ate: ‘Enda Ɔnami! Nde akatshikala la kɔlamelo tshɛ nɛ dia nde mbokakami ngandji!’ Ohokanyiya nto ɔngɛnɔngɛnɔ waki la Yeso lam’akandangɛnyangɛnya otema wa She. L’ɔtɛ w’ɔngɛnɔngɛnɔ ɔsɔ, Yeso akakikɛ ndo nyɔi ka l’otamba w’asui.​—⁠Heberu 12:⁠2.

Onde wɛ nangaka monga oko Ombetsha aso a Woke ndo ngɛnyangɛnya Jehowa?. . . Lâsɔ tetemala la mbeka awui walanga Jehowa dia wɛ sala, ndo ngɛnyangɛnyande lo sala awui akɔ!

Adia kɛnɛ kakasale Yeso dia ngɛnyangɛnya Nzambi ndo kɛnɛ kahombaso sala sho lawɔ lo Tukedi 23:​22-25; Joani 5:30; 6:38; 8:28; ndo 2 Joani 4.

[Osato wa lo lɛkɛ 207]

Lande na kele Nzambi kotosala oko waa rɔbo?

[Osato wa lo lɛkɛ 208]

Ngande wakokayɛ ngɛnyangɛnya Jehowa ndo ambutshi ayɛ?

[Osato wa lo lɛkɛ 209]

L’ɔkɔngɔ w’Adama la Eva sala pɛkato, ngande wakasɛmanɛ Satana nde la Jehowa?

[Osato wa lo lɛkɛ 210]

Awui akɔna wakakikɛ Jɔbɔ, ndo bonde kele dui sɔ diakangɛnyangɛnya Nzambi?