TSHAPITA 43

Waa Na Wele Anangɛso L’akadiyɛso?

MBALA kɛmɔtshi Ombetsha a Woke akambola dimbola dimɔtshi la shashimoya ate: “Akona eli nyomi? Ndu wana weli analingu?” (Mateu 12:48) Onde wɛ koka kadimola dimbola sɔ?. . . Ondo wɛ mbeyaka dia Mariya mbaki lokombo la nyango Yeso. Ko onde wɛ mbeyaka nkombo y’anango?. . . Onde Yeso aki ndo l’akadiyɔ?. . .

Bible mbutaka dia anango Yeso nkombo yawɔ “Jakoba, la Josefu, la Simona la Judasi.” Ndo Yeso aki l’akadiyɔ waki la lɔsɛnɔ lam’akandasambishaka. Lam’ele Yeso mbaki ɔn’enondo, anango l’akadiyɛnde waki akɔsɛnde.​—⁠Mateu 13:​55, 56; Luka 1:​34, 35.

Onde anango Yeso waki vɔ lawɔ ambeki ande?. . . Bible mbutaka dia ntondotondo, “anangu kûmbetawo.” (Joani 7:⁠5) Koko l’ɔkɔngɔ diko, Jakɔba nde la Judasɛ (lakawelɛka nto Juda) wakayokomaka ambeki ande ndo vɔ wakafunde abuku amɔtshi wa lo Bible. Onde wɛ mbeyaka abuku wakawafunde?. . . Eelo, nkombo y’abuku akɔ ko dibuku dia Jakoba la dia Jude.

Kânga mbele nkombo y’akadiyɔ waki Yeso hayofundami lo Bible, sho mbeyaka dia Yeso aki l’akadiyɔ oko ahende. Koko, ondo akadiyɛnde wakakoke ndekana ahende. Onde akadiyɛnde asɔ wakakome ambeki ande?. . . Bible hatɛkɛta dikambo sɔ, diakɔ diele sho hateye. Ko onde wɛ mbeyaka lande na kakambola Yeso dimbola di’ɔnɛ: “Akona eli nyomi? Ndu wana weli analingu?”. . . Ɛsɔ tende dikambo sɔ.

Yeso akalakanyaka ambeki ande lam’akohembola onto ɔmɔtshi ɔtɛkɛta lo mbotɛ ate: “Enda, nyo la ananyo ane wemadi l’andja wayanga nkutela diui.” Yeso akakambe la diaaso sɔ dia mbisha wetshelo w’ohomba efula lo mboka wombola ɔnɛ wa la shashimoya ɔnɛ: “Akona eli nyomi? Ndu wana weli analingu?” Nde akasembola lonya lande otsha le ambeki ande ndo akakadimola dimbola sɔ lo nembetshiya ate: “Wane mbeli nyomi la analingu!”

Oma lâsɔ, Yeso akalembetshiya kɛnɛ kakandalange mɛnya lo mbuta ate: “Untu tshe latutshaka lulangu la Papa le l’ulungu, keli onalingu, ndu kadiemi, la nyomi.” (Mateu 12:​47-50) Kɛsɔ mɛnyaka dia Yeso akalangaka ambeki ande efula mɛtɛ. Nde akatolakanya di’ambeki ande waki oko nyango, anango kana akadiyɛnde wa pɛtɛ pɛtɛ.

L’etena kɛsɔ, ko anango Yeso w’otema ɔtɔi Jakɔba, Simɔna la Judasɛ watetawɔ dia Yeso aki Ɔna Nzambi. Vɔ kombetawɔka kɛnɛ kakatɛ ondjelo Ngabiriyɛlɛ nyangɛwɔ. (Luka 1:​30-33) Ɔnkɔnɛ, ondo vɔ wakahetshaka Yeso. Onto tshɛ lakasalaka dikambo dia ngasɔ komonga ɔnango kana kadiyɛnde ka mɛtɛ. Onde wɛ mbeyaka onto ɔmɔtshi lakahetshama oma le ɔnango kana kadiyɛnde?. . .

Bible tɛkɛtaka dikambo diaki Esau nde la Jakɔba ndo woho wakomala Esau efula ndo wakandate ate: “Dimi layudiaka onalingu Jakoba.” Rɛbɛka wa nyangɛwɔ akoke wɔma efula lo dikambo sɔ, diakɔ diakandalawoya Jakɔba di’aha Esau ndjôdiaka. (Etatelu 27:​41-46) Koko, Esau akayotshikitanya kanyi yande l’ɔkɔngɔ w’ɛnɔnyi efula ndo akalongola Jakɔba, akôkumbatɛ ndo akawoke ɛlɔmɔ.​—⁠Etatelu 33:⁠4.

L’etena kɛsɔ Jakɔba aki l’ana 12. Koko ana waki Jakɔba wa nondo konangaka kosɛwɔ lakawelɛka Yɔsɛfu. Vɔ wakawokaka kandjema nɛ dia shɛwɔ akawokaka ngandji efula. Ɔnkɔnɛ, vɔ wakôsondja le wanɛ wakasombaka fumbe wakatatshɔka otsha l’Edjibito. Oma lâsɔ, vɔ wakatotɛ shɛwɔ ɔnɛ nyama kɛmɔtshi ka pango akadiaki Yɔsɛfu. (Etatelu 37:​23-36) Kema ɔsɔ aki dikambo dia kɔlɔ efula?. . .

L’ɔkɔngɔ diko, anango Yɔsɛfu wakayongaka la lonyangu l’ɔtɛ wa kɔlɔ kakawasale. Ɔnkɔnɛ, Yɔsɛfu akâkimwɛ. Onde wɛ koka mɛna woho waki Yɔsɛfu oko Yeso?. . . Apɔstɔlɔ waki Yeso wakalawɔ lam’akawande Yeso ndo Petero akanguna Yeso. Koko l’ɛnyɛlɔ kaki Yɔsɛfu, Yeso akâkimwɛ vɔ tshɛ.

Oma lâsɔ, tekɔ nto l’ɔkɔndɔ waki Kɛna nde l’Abɛlɛ wanɛ waki onto l’ɔnango. Sho koka nto kondja wetshelo oma le wɔ. Nzambi akɛnyi l’otema waki Kɛna dia nde komonga mɛtɛ la ngandji otsha le ɔnango. Ɔnkɔnɛ, Nzambi akatɛ Kɛna dia nde pombaka tshikitanya dionga diande. Otondonga Kɛna mɛtɛ akokaka Nzambi ngandji, tshike nde otoyela awui asɔ. Koko nde kombokaka Nzambi ngandji. Lushi lɔmɔtshi, Kɛna akatɛ Abɛlɛ ate: ‘Yete totshu otsha l’ekambɔ.’ Abɛlɛ akatshu nde la Kɛna. Lam’akiwɔ lɛkɔ vɔ ahende ato, Kɛna akakɔmɔla ɔnango la wolo ndo akôdiake.​—⁠Etatelu 4:​2-8.

Bible totɛka dia sho koka kondja wetshelo ɔmɔtshi w’ohomba efula lo dikambo sɔ. Onde wɛ mbeyaka wetshelo akɔ?. . . ‘Ɔsɔ ekɔ losango lakanyoke oma k’etatelo lata ɔnɛ: Sho pombaka monga la ngandji lam’asaso; aha oko Kɛna lakaye oma le kanga kɔlɔ.’ Ɔnkɔnɛ, anangɛso l’akadiyɛso pombaka monga la ngandji lam’asawɔ. Vɔ hawohombe monga oko Kɛna.​—⁠1 Joani 3:​11, 12.

Lande na kahatalange monga oko Kɛna na?. . . Nɛ dia Bible mbutaka dia nde ‘akaye oma le kanga kɔlɔ,’ Satana Diabolo. Lam’ele Kɛna akasale awui oko Diabolo, lâsɔ Diabolo mbaki she.

Onde wɛ ambɛna lande na kele ekɔ ohomba monga la ngandji otsha le ananyɔ l’akadiyɛyɛ?. . . Naka wɛ hawaoke ngandji, kete ana waki onto akɔna wokoyayɛ na?. . . Ana waki Diabolo. Shi wɛ halange monga ɔnaki Diabolo?. . . Lâsɔ, ngande wakokayɛ mɛnya dia wɛ nangaka monga ɔnaki Nzambi na?. . . Ele lo monga la ngandji ka mɛtɛ otsha le ananyɔ l’akadiyɛyɛ.

Ko ngandji kɛdikɛdi na?. . . Ngandi ekɔ nsaki k’efula ka l’etei kaso katotshutshuya dia salɛ anto akina awui w’ɔlɔlɔ. Sho mɛnyaka dia sho mbokaka anto akina ngandji etena keso la tokanyi t’amɛna otsha le wɔ ndo lam’awasalɛso awui w’ɔlɔlɔ. Ko waa na wele anangɛso l’akadiyɛso wahombaso mboka ngandji na?. . . Tohɛke dia Yeso akalakanya dia vɔ wekɔ wanɛ wele lo nkumbo ka woke k’Akristo k’anto l’ɔnango.

Lande na kele ekɔ ohomba sho mboka anangɛso l’akadiyɛso w’Akristo asɔ ngandji na?. . . Bible mbutaka ɔnɛ: “Untu lahalangi unyandi lenandi, ndi heyi nanga [Nzambi] lahandenyi.” (1 Joani 4:20) Lâsɔ aha paka anto amɔtshi ato wa lo nkumbo k’Akristo mbahombaso mboka ngandji. Sho pombaka mbaoka ngandji vɔ tshɛ. Yeso akate ate: “Uma lu dikambu ne, antu tshe wayeya vati: Ambeki ami mbenyu, naka nyu nyayukana ngandji.” (Joani 13:35) Onde wɛ mbokaka anangɛso l’akadiyɛso tshɛ ngandji?. . . Ohɔ dia naka wɛ hawaoke ngandji, kete wɛ mɛtɛ hakoke mboka Nzambi ngandji.

Ngande wakokaso mɛnya mɛtɛ dia sho mbokaka anangɛso l’akadiyɛso ngandji na?. . . Lo mɛtɛ, naka sho mbaokaka ngandji, kete hatototona dia monga la wɔ kâmɛ nɛ dia hatolange tɛkɛta la wɔ. Tayokana la wɔ vɔ tshɛ. Tayowasalɛka ɔlɔlɔ nshi tshɛ ndo tayongaka la lokaho otsha le wɔ. Ndo naka wekɔ l’okakatanu, kete tayowakimanyiya nɛ dia tekɔ mɛtɛ nkumbo ka woke.

Naka tekɔ mɛtɛ la ngandji otsha le anangɛso l’akadiyɛso, kete dikambo sɔ ɛnyadiɔ na?. . . Diɔ mɛnyaka dia tekɔ ambeki waki Yeso, Ombetsha a Woke. Kema ngasɔ mbalangaso monga?. . .

Woho wa mɛnya ngandji otsha le anangɛso l’akadiyɛso mɛnyamaka nto lo Ngalatiya 6:10 ndo lo 1 Joani 4:​8, 21. Fola Bible kayɛ kele adia avɛsa asɔ.

[Osato wa lo lɛkɛ 223]

Yeso, waa na wakandate ɔnɛ vɔ mbele anango l’akadiyɛnde?

[Osato wa lo lɛkɛ 224]

Wetshelo akɔna wahombaso kondja oma lo kɛnɛ kakasalɛ Kɛna Abɛlɛ?

[Osato wa lo lɛkɛ 226]

Ngande wakokɛ mɛnya dia wɛ mbokaka ananyɔ ngandji?