TSHAPITA 46

Onde Mvula K’elola Kayolanya Andja Nto?

ONDE ndoko lushi lakayoke onto ɔmɔtshi atɛkɛta dikambo di’ekomelo k’andja ɔnɛ?. . . Ɛlɔ kɛnɛ anto efula tɛkɛtaka dikambo di’ekomelo k’andja. Anto amɔtshi fɔnyaka ɔnɛ andja ɔnɛ wayolanyema lo ta dimɔtshi diayowokamba la waa bɔmbɛ atomikɛ. Onde wɛ fɔnyaka dia lushi lɔmɔtshi Nzambi ayolanya nkɛtɛ kaso k’olangala kɛnɛ ndo olongo walangaso ɔnɛ kâmɛ la tɔɔtɔ tahɛta lɔkɔ?. . .

Oko wakateke, Bible tɛkɛtaka dikambo di’ekomelo k’andja ɔnɛ. Tɔ mbutaka ɔnɛ: ‘Andja ɔnɛ wekɔ lo teete.’ (1 Joani 2:17) Onde wɛ fɔnyaka di’ekomelo k’andja ɔnɛ nembetshiyaka ekomelo ka nkɛtɛ?. . . Kema, Bible mbutaka dia Nzambi akatonge nkɛtɛ ‘dia anto mbidjasɛ lɔkɔ!’ Eelo, nde akatonge nkɛtɛ di’anto sɛnaka ndo ngɛnangɛnaka lɔkɔ. (Isaya 45:18) Osambu 37:29 mbutaka ɔnɛ: “Antu w’ololo wayukita kete, wayudjaseka loko pundju.” Diakɔ diata Bible nto ɔnɛ nkɛtɛ kɛnɛ kayotshikala pondjo pondjo.—Osambu 104:5; Undaki 1:4.

Lâsɔ naka ekomelo k’andja ɔnɛ halembetshiya ekomelo ka nkɛtɛ, dikambo sɔ alembetshiyadiɔ na?. . . Sho koka kondja okadimwelo lo dimbola sɔ naka sho sɛdingola dimɛna kɛnɛ kakete lo nshi ya Nɔa. Bible nembetshiyaka ɔnɛ: ‘Andja wa l’etena kɛsɔ wakalanyema lam’akonge elola k’ashi.’—2 Petero 3:6.

Onde anto amɔtshi wakatshikala la lɔsɛnɔ l’ekomelo k’andja lo Mvula k’Elola kakalɔ lo nshi ya Nɔa?. . . Bible mbutaka dia Nzambi ‘akashimbɛ Nɔa, osambisha w’akambo w’ɔlɔlɔ nde l’anto akina esambele lam’akandalɔsha mvula k’elola dia nanya anto wa kɔlɔ.’—2 Petero 2:5.

Lâsɔ andja akɔna wakakomɛ l’etena kɛsɔ? Onde aki nkɛtɛ nyɛ kana anto wa kɔlɔ?. . . Bible mbutaka dia aki ‘anto wa kɔlɔ wa l’andja.’ Ndo lembetɛ dia Nɔa mbetamaka ɔnɛ ‘osambisha.’ Awui akɔna wafɔnyayɛ wakasambishaka Nɔa na?. . . Nɔa akewolaka anto dikambo di’ekomelo ‘k’andja wa l’etena kɛsɔ.’

Lam’akatɛkɛta Yeso dikambo di’Elola ka woke, nde akatɛ ambeki ande dikambo di’awui wakasalaka anto la ntondo k’ekomelo ndja. Nde akawatɛ ate: “Lu nshi yako, la ntundu ka elula atayi, antu wakalekaka, wakanokaka, wakatshukanaka, wakatshukamaka, edja ndu lushi lakoto Noa lu watu a luudu. Vo kumbeya, edja ndu lam’akayi elula, akawakhumela tshe.” Oma lâsɔ, Yeso akate di’anto wayosalaka awui wa ngasɔ la ntondo k’ekomelo k’andja ɔnɛ.—Mateu 24:37-39, sho mbɛnganyisha alɛta ango.

Ɛtɛkɛta waki Yeso tɛnyaka dia sho koka kondja wetshelo oma lo kɛnɛ kakasalaka anto la ntondo ka Mvula k’Elola. L’ɔkɔngɔ wa wadielo wa Tshapita 10 ya dibuku nɛ, onde wɛ mbohɔka awui amɔtshi wakasalaka anto l’etena kɛsɔ?. . . Apami amɔtshi wakahɛnyɔlaka wanɛ waki komonga la wolo ndo wakayakimɔka l’awui wa ngala. Koko Yeso akate di’anto akina efula kompokamɛ kɛnɛ kakatome Nzambi Nɔa dia mbâsambisha.

Ɔnkɔnɛ, etena kakakoke ka Jehowa mbutɛ Nɔa dia Nde nangaka ndanya anto wa kɔlɔ la Mvula k’Elola. Ashi wakahombe komba nkɛtɛ k’otondo ndo akona. Jehowa akatɛ Nɔa dia mbika wato wa woke wa luudu. Wato ɔsɔ aki oko ɔshɛtɛ ɔmɔtshi wa woke efula naka wɛ menda lo sango diele lo lɛkɛ 238.

Nzambi akatɛ Nɔa dia nde mbika wato wa luudu wa woke efula woho wa nde la nkumbo kande ndo nyama kina efula shimbamɛ l’etei. Nɔa nde l’ase nkumbo kande wakakambe olimu la wolo tshɛ. Vɔ wakakɔtɛ ndo wakahembola esongo wa weke ndo wakakambe l’esongo akɔ dia tatɛ mbika wato ɔsɔ wa luudu. Olimu ɔsɔ akɔshi ɛnɔnyi efula nɛ dia wato ɔsɔ waki woke wa mamba.

Onde wɛ mbohɔka dikambo dikina diakasalaka Nɔa l’edja k’ɛnɔnyi ɛsɔ tshɛ wakandakaka wato ɔsɔ wa luudu?. . . Nde akasambishaka, akewolaka anto lo dikambo di’oyelo wa Mvula k’Elola. Onde onto ɔmɔtshi akadje yimba l’awui wakandataka? Ndoko onto onyake Nɔa nde la nkumbo kande ato. Anto akina wakayasha paka dia sala awui akina. Onde wɛ mbohɔka kɛnɛ kakate Yeso kakawasalaka?. . . Vɔ wakayashaka l’olelo, l’ɔnwɛlɔ ndo l’otshukanelo. Vɔ kɔfɔnyaka dia vɔ waki anto wa kɔlɔ efula ndo vɔ komonga l’etena ka mpokamɛ Nɔa. Lâsɔ, tende kɛnɛ kakayakomɛka.

L’ɔkɔngɔ wa Nɔa nde la nkumbo kande mbɔtɔ lo wato ɔsɔ wa luudu, Jehowa akadihe lokuke. Anto waki l’andja wakatetemala la fɔnya ɔnɛ Mvula k’Eloka hatɔlɔ. Koko la shashimoya apɔpɔ wa mvula wakatatɛ la ndɔ oma l’olongo! Ɔsɔ komonga mvula kele oko mvula kina. Tɔ kaki mvula ka wolo efula! Kombeta edja ashi wakakome oko ɛkɛdi wa weke w’ashi wakamɔmbɔka. Ashi asɔ wakanyukola esongo wa weke ndo wakakɛdja ave wa weke watekana oko ave wa totshitshɛ. Ko kakɔna kakakomɛ anto waki l’andja wa wato na?. . . Yeso akate ate: “Lam’akaye elula, [tɔ k]akawakumela tshe.” Anto tshɛ waki l’andja wa wato wa luudu ɔsɔ wakavu. Lande na na?. . . Oko wakate Yeso, “vo kumbeya.” Vɔ kompokamɛ!—Mateu 24:39; Etatelu 6:5-7.

Kakianɛ, ohɔ dia Yeso akate ɔnɛ kɛnɛ kakakomɛ anto asɔ ekɔ ɛnyɛlɔ katewola ɛlɔ kɛnɛ. Wetshelo akɔna wakokaso kondja na?. . . Anto wakalanyema aha tsho l’ɔtɛ w’ɔnɛ vɔ waki anto wa kɔlɔ koko nɛ dia efula wakayasha tshɛ l’awui akina efula, ko komonga l’etena ka mbeka awui wendana la Nzambi ndo la kɛnɛ kakinde suke la sala. Sho pombaka menda dimɛna di’aha monga oko vɔ, shi mɛtɛ?. . .

Onde wɛ fɔnyaka dia Nzambi ayolanya andja nto la mvula k’elola?. . . Kema, Nzambi akalake dia nde hatosala dikambo sɔ. Nde akate ate: “Dimi lambukitsha ngulu l’ulungu. To kayali djimbitelu ya daka diami l’asami la kete.” Jehowa akate dia ngolo ayongaka djembetelo y’ɔnɛ “ashi hawuyuyala elula ntu dia nanya diango tshe dieli la lumu.”—Etatelu 9:11-17.

Ɔnkɔnɛ sho koka monga l’eshikikelo dia Nzambi halanyaki andja ɔnɛ nto l’elola. Koko, oko wakatɛnyi, Bible tɛkɛtaka hwe dikambo di’ekomelo k’andja ɔnɛ. Lam’ayolanya Nzambi andja ɔnɛ, anto akɔna wayondotshika la lɔsɛnɔ na?. . . Onde ayonga anto wakayashaka efula l’awui akina ko hawolange mbeka awui wendana la Nzambi kânga yema? Onde ayonga wanɛ waki komonga l’etena ka mbeka Bible nɛ dia waki l’awui efula wa sala? Akanyiyayɛ lo dikambo sɔ?. . .

Sho nangaka monga l’atei w’anto wayotshika Nzambi la lɔsɛnɔ, shi mɛtɛ?. . . Shi ayonga dimɛna efula naka nkumbo kaso monga oko kaki Nɔa dia Nzambi toshimbɛ sho tshɛ?. . . Dia sho shimbamɛ l’ekomelo k’andja ɔnɛ, sho pombaka mbeya woho wayolanya Nzambi andja akɔ ko mbela andja ande w’oyoyo wa losembwe. Tende woho wayondosala dikambo sɔ.

Bible tolembetshiyaka lo Danyele tshapita 2, divɛsa 44. Divɛsa nɛ tɛkɛtaka dikambo dia nshi yaso nyɛ lam’atadiɔ ɔnɛ: “Lu nshi ya khumi ya dikanga yako, [Nzambi] leli l’ulungu ayutundja diulelu [kana ɛlɔmbwɛlɔ] diahalanaki pundju. Dio hadiuyala l’okongo a wudja ukina. Dio diayulanya waulelu ako tshe, diayâshila oshiki, ku dio diame diayushikikala pundju.”

Onde wɛ shihodiaka dikambo sɔ?. . . Bible mbutaka dia lowandji laki Nzambi layolanya mandji tshɛ ya lanɛ la nkɛtɛ. Lande na na?. . . Nɛ dia mandji yakɔ bu l’okitanyiya otsha le Ɔnɛ lele Nkumekanga kakasɔnama oma le Nzambi. Ele Nkumekanga kɛsɔ na?. . . Yeso Kristo!

Jehowa Nzambi ekɔ la lotshungɔ la sɔna woho wa lowandji lahomba mbolɛ, ndo nde akasɔnɛ Ɔnande, Yeso dia monga Nkumekanga. Kem’edja, Yeso Kristo, Omboledi wakasɔnama oma le Nzambi, ayɔlɔmbɔla elanyelo ka mandji tshɛ ya l’andja ɔnɛ. Bible mɛnyaka lo Enyelo tshapita 19, divɛsa 11 polo 16 woho wayondolanya mandji shɔ tshɛ oko wɛnaso kânga l’osato ɔnɛ. Lo Bible, vɔ mbetaka ta diaki Nzambi diayolanya mandji tshɛ ya l’andja ɔnɛ Aramangɛdɔna.

Lâsɔ, Nzambi mbutaka dia Diolelo diande diayolanya mandji tshɛ y’ana w’anto. Ko onde nde totɛka dia ndanya mandji shɔ?. . . Kema, Bible mbetaka Aramangɛdɔna ɔnɛ ‘ta dia lushi la woke la Nzambi Kanga-Nkudu-Tshɛ.’ (Enyelo 16:14, 16) Eelo, Aramangɛdɔna ekɔ ta diaki Nzambi ndo nde ayokamba la Yeso Kristo dia nɔmbɔla alembe wa l’olongo lo ta sɔ. Onde ta dia Aramangɛdɔna diaya suke? Tende woho wakokaso mbeya dikambo sɔ.

Tadia kâmɛ kɛnɛ kendana l’etena kayolanya Nzambi anto wa kɔlɔ tshɛ ndo kayondoshimbɛ wanɛ wôkambɛ lo Tukedi 2:21, 22; Isaya 26:20, 21; Jeremiya 25:31-33; ndo Mateu 24:21, 22.

[Osato wa lo lɛkɛ 238]

Woho akɔna w’andja wakalanyema lo nshi ya Nɔa?

[Osato wa lo lɛkɛ 241]

Lande na kahatahombe tsho kanyiya paka dia ndjangɛnyangɛnya?

[Osato wa lo lɛkɛ 243]

Yeso Kristo, Nkumekanga kakasɔnama oma le Nzambi ayolanya andja ɔnɛ lo Aramangɛdɔna