Akɔna alɔmbɔla andja ɔnɛ mɛtɛ?

KƐNƐ KATA BIBLE

“Andja w’otondo wekɔ lo nɔmbɔma oma le Kanga kɔlɔ.”​—1 Joani 5:19.

“Ɔna Nzambi akɛnama dia ndanya akambo wa Diabolo.”​—1 Joani 3:8, Ekadimwelo k’andja w’oyoyo.

ƐLƆLƆ WAKOKAYƐ NKONDJA

Wɛ koka nkondja elembetshiyelo w’eshika wendana l’ekakatanu wa l’andja ɔnɛ.​—Ɛnyɛlɔ 12:12.

Wɛ koka mbetawɔ dia andja ɔnɛ wayotshikitana lo yoho ya dimɛna efula.​—1 Joani 2:17.

ONDE SHO KOKAKA MƐTƐ MBETAWƆ KƐNƐ KATA BIBLE?

Eelo, l’ɔtɛ w’ɛkɔkɔ esato ɛnɛ:

• Ɛlɔmbwɛlɔ kaki Satana kambokita tatala. Jehowa amboyashikikɛ dia nkomiya ɛlɔmbwɛlɔ kaki Satana. Nde ndakaka dia “ndanya . . . Diabolo” ndo minya mpokoso tshɛ yakela Satana.​—Hɛbɛru 2:14, Ekadimwelo k’andja w’oyoyo.

• Nzambi akasɔnɛ Yeso Kristo dia nɔmbɔla andja ɔnɛ. Yeso ntshikitana tshɛ lo tshɛ l’owandji w’esehe ndo wa lokaki w’andja ɔnɛ. Lo kɛnɛ kendana la lowandji laki Yeso, Nzambi ndakaka ate: ‘Nde ayoka kanga okitshakitsha ndo kanga wola kɛtshi ndo ayoshimbɛ nyumu yawɔ.’​—Osambu 72:13, 14.

• Nzambi hakoke mbuta kashi. Bible mbutaka ɔnɛ: “Nzambi hakoke pondjo mbuta kashi.” (Hɛbɛru 6:18) Etena kalaka Jehowa dia nsala dui dimɔtshi, diɔ mbɔsamaka oko diamboshila salema. (Isaya 55:10, 11) “Owandji w’andja ɔnɛ ayokashema.”​—Joani 12:31.