Diolelo diaki Nzambi kɛdikɛdi na?

KƐNƐ KETSHA BIBLE

“[Nzambi] leli l’ulungu ayutundja diulelu diahalanaki pundju.”​—Danyele 2:44.

‘Wambotosha ɔna pami. Lowandji layoyala lo ahɛka ande.’​—Isaya 9:6.

KƐNƐ KALEMBETSHIYA DUI SƆ LE YƐ

• Lowandji la losembwe lakoka kokondjiyɛ wahɔ.​—Isaya 48:17, 18.

• L’andja w’oyoyo wayaye, anto wayonga la lɔsɛnɔ la kokele ndo l’ɔngɛnɔngɛnɔ.​—Ɛnyɛlɔ 21:3, 4.

ONDE SHO POMBAKA MBETAWƆ KƐNƐ KETSHA BIBLE?

Eelo, l’ɔtɛ w’ɛkɔkɔ ehende ɛnɛ:

• Yeso akɛnya kɛnɛ kayosala Diolelo diaki Nzambi. Yeso aketsha ambeki ande dia vɔ nɔmbaka dia Diolelo diaki Nzambi ndja ndo dia lolango lande salema la nkɛtɛ. (Mateo 6:9, 10) Yeso akɛnya woho wayokadimɔma dɔmbɛlɔ sɔ.

  Etena kakinde la nkɛtɛ, Yeso akalesha wanɛ waki la ndjala, akakɔnɔla ase hemɔ, ndo akoolola edo. (Mateo 15:29-38; Joani 11:38-44) Oko wende Omboledi wa lo nshi yayaye wa Diolelo diaki Nzambi, Yeso akɛnya anto lo yoho ya dimɛna kɛnɛ kayosalɛ Diolelo ambolami adiɔ.​—Ɛnyɛlɔ 11:15.

• Akambo weta l’andja ɔnɛ shikikɛka dia Diolelo diaki Nzambi diaya suke la ndja. Yeso akatatshi dia yema tshitshɛ la ntondo ka Diolelo mbela wɔladi la nkɛtɛ, andja ɔnɛ wayodiɛnɛ l’ata, la ndjala ndo l’adidimu wa nkɛtɛ.​—Mateo 24:3, 7.

  Tekɔ lo mɛna akambo asɔ ɛlɔ kɛnɛ. Diakɔ diakokaso monga l’eshikikelo dia keem’edja, Diolelo diaki Nzambi diayanga minya ekakatanu ɛsɔ tshɛ.