Tɛdikɔ tendanal’ahole w’ɔtɛmwɛlɔ

ATƐMƆDI wa mɛtɛ wa Jehowa nɔmbamaka dia sanganaka kaamɛ dia mbetshamaka ndo dia keketshanaka lam’asawɔ. (Hɛb. 10:23-25) Dihole dia ntondo di’ɔtɛmwɛlɔ dia wodja wa Nzambi wakasɔnama mbuta ate Isariyɛlɛ, aki “tabɛrnaklɛ, mbuta ate luudu la dipɛma l’esanganelo.” (Eto. 39:32, 40) L’ɔkɔngɔ diko, Sɔlɔmɔna ɔna Davidɛ akayokaka luudu, mbuta ate tɛmpɛlɔ dia lotombo la Nzambi. (1 Ku. 9:3) L’ɔkɔngɔ wa tɛmpɛlɔ kɛsɔ nanyema l’ɔnɔnyi 607 N.T.D., ase Juda wakɔshi yɛdikɔ ya sanganaka dia tɛmɔlaka Nzambi lo mvudu yakelamɛka shinangɔnga. L’edjedja ka wonya, wakayohikaka tɛmpɛlɔ nto ndo tɛmpɛlɔ kakɔ kakayonga dihole diakalɔmbɔmaka ɔtɛmwɛlɔ wa mɛtɛ nto. Yeso aketshaka lo toshinangɔnga ndo lo tɛmpɛlɔ. (Luka 4:16; Jni. 18:20) Yeso akasale losanganya lɔmɔtshi lo dikona.​—Mat. 5:1–7:29.

² L’ɔkɔngɔ wa nyɔi ka Yeso, Akristo wakasanganaka l’asɛkɛ ndo lo mvudu y’anto dia mbetsha Afundelo ndo monga kaamɛ l’asekawɔ ambetawudi. (Ets. 19:8, 9; Rɔmɔ 16:3, 5; Kɔl. 4:15; Filɛ. 2) Tena dimɔtshi, aki ohomba di’Akristo wa lo ntambe ka ntondo nsangana l’ahole wa tale diaha atunyi awɔ mbaɛna. Mɛtɛ, ekambi wa Nzambi wa kɔlamelo wa lo nshi ya ntondo waki la nsaki k’oma k’ɛse otema ka sanganaka l’ahole w’ɔtɛmwɛlɔ dia vɔ ‘mbetshama oma le Jehowa.’​—Isa. 54:13.

³ Ɛlɔ kɛnɛ, sho la wɔ kambaka la ahole wa lo sɛkɛ ndo la mvudu y’anangɛso dia nsanganya y’Akristo. Mbala efula, mvudu y’anangɛso kimanyiyaka dia nsala nsanganya y’otsha l’olimu w’esambishelo. Wanɛ wakimɔ mvudu yawɔ dia nsala nsanganya shɔ mbɔsaka dia ɔsɔ ekɔ tshondo ya diɛsɛ. Efula ka l’atei awɔ mbutaka dia vɔ wambokondja wahɔ lo nyuma lo woho wakawetawɔ dia nkimɔ mvudu yawɔ lo yoho shɔ.

MBALASA KA DIOLELO

⁴ Mbalasa ka Diolelo mbele dihole dialeka Ɛmɛnyi wa Jehowa nsala nsanganya yawɔ. Mbala efula, vɔ sombaka lokombo ko mbika Mbalasa ka Diolelo k’oyoyo kana nɔngɔsɔla luudu lɔmɔtshi lele lɔkɔ. Dia momba falanga ndo dia nkamba dimɛna la mvudu yaso, tshumanelo efula mbeyaka sanganaka lo Mbalasa ka Diolelo kakɔ ɔtɔi naka kokaka. L’ahole amɔtshi, ekɔ ohomba futɛ luudu lɔmɔtshi. Ekongelo k’osapwelo kokaka monga naka Mbalasa ya Diolelo y’eyoyo yambokama kana naka wambosala etshikitanu wa weke lo luudu lɔmɔtshi. Koko, naka etshikitanu wa totshitshɛ eto kana ɔlɔngɔswɛlɔ wa toholehole tɔmɔtshi mbosalemi lo Mbalasa ka Diolelo kokongaka, kete keema ohomba nsala osapwelo.

⁵ Mbalasa ka Diolelo hahombe monga luudu la kawotake lokami dia mambiya anto. Kaanga mbele toho ta wokelo atɔ koka ntshikitana lo ndjela dihole la dihole, mbala tshɛ oyango ele dia nkamba la tɔ. (Ets. 17:24) Lo ndjela awui wa lo ngelo, tɔ pombaka monga dihole diakoka ndo dia dimɛna nsala nsanganya y’Akristo.

⁶ Falanga yendana l’okambelo, ɔlɔngɔswɛlɔ ndo okokelo wa Mbalasa ka Diolelo kimɔmaka oma le tshumanelo tshɛ di’Ɛmɛnyi wa Jehowa diɔtɔ lɔkɔ. Hawosale ɛkɔngɔ kana nɔmba falanga lɔlɔmba. Shɛtɛshɛtɛ ya weshasha yekɔ ndo wanɛ wɔtɔ lo nsanganya wekɔ la diɛsɛ dia kimɔka weshasha wakimanyiya dia salaka adepasɛ wendana la mbalasa. Vɔ salaka dikambo sɔ la lolango ndo l’otema ɔtɔi.​—2 Kɔr. 9:7.

⁷ Anto tshɛ wa lo etshumanelo mbɔsaka dia ekɔ diɛsɛ nsukɛ Mbalasa ka Diolelo lo nkimɔ falanga ndo lo ndjakimɔ la lolango l’elimu tshɛ dia tɔ mongaka pudipudi ndo kɔmba. Ekumanyi kana okambi wakimanyiya mbele l’ɔkɛndɛ wa mendaka ekongelo kɛsɔ k’olimu. Tena efula, ekongelo ka wɔmbɛlɔ la osolelo salemaka lo ndjela elui w’esambishelo ndo omendji w’olui la ɔhɛna ande pombaka mbisha ɛnyɛlɔ. Oyadi l’andja kana l’etei, Mbalasa ka Diolelo pombaka nkɛnɛmɔla dimɛna woho wele Jehowa ndo okongamelo ande.

⁸ L’ahole wasangana tshumanelo efula lo mbalasa ɔtɔi, dikumanyi dia lo tshumanelo diakɔ pombaka nkenga Kɔmite kenda Mbalasa ka Diolelo dia mendaka kana luudu ndo sɛkɛ diekɔ lo nɔngɔsɔma dimɛna. Elui wa dikumanyi wayɔsɔna ɔnangɛso ɔmɔtshi dia monga ɔnɔmbɔdi wa kɔmite kɛsɔ. Kɔmite kenda mbalasa kambaka l’ɛlɔmbwɛlɔ k’elui wa dikumanyi dia menda wɔmbɛlɔ l’osolelo wa mbalasa, nshikikɛ dia kana mbalasa kekɔ dimɛna ndo dia kana diangɔ diahombama tshɛ diekɔ. Kɛsɔ nɔmbaka dia tshumanelo tshɛ diɔtɔ lo mbalasa nkamba kaamɛ.

⁹ Etena kakamba tshumanelo efula la Mbalasa ka Diolelo ɔtɔi, wenya wa nsanganya mbeyaka tatshikitanaka. Dikumanyi diayosalaka ekongelo kɛsɔ pombaka ndjakiyanyaka dikambo di’anto akina ndo oma lo ngandji k’onto l’ɔnango. (Flpɛ. 2:2-4; 1 Pe. 3:8) Ndooko etshumanelo kahomba mbɔsa tɛdikɔ tɔsɔ tɔamɛ lo dihole dia tshumanelo dikina. Etena kasala omendji w’otshimbedi wembwelo lo etshumanelo kɛmɔtshi l’atei wa tshumanelo diasangana lo Mbalasa ka Diolelo ɔtɔi, tshumanelo dikina diayotshikitanya wenya awɔ wa nsanganya lo yoho yahombama lo lomingu lakɔ.

¹⁰ Koka nkamba la Mbalasa ka Diolelo dia nsala asawo w’awala ndo asawo w’okundelo naka Kɔmite k’olimu ka l’etshumanelo ambosha dikimɔ. Dikumanyi sɔ sɛdingolaka dɛmandɛ tshɛ dimɛna ndo mbɔsaka yɛdikɔ yawɔ lo ndjela ɛlɔmbwɛlɔ k’oma le filialɛ.

¹¹ Wanɛ washawɔ dikimɔ dia nkamba la Mbalasa ka Diolelo l’akambo asɔ nɔmbamaka dia nkɛndakɛnda lo yoho yɔtɔnɛ l’Akristo wa mɛtɛ. Ndooko ɛngɔ kahomba salema lo Mbalasa ka Diolelo kahomba nyangiya etshumanelo kana tɛngamisha Jehowa ndo lokombo la dimɛna lele la etshumanelo. (Flpɛ. 2:14, 15) Tena dimɔtshi, filialɛ koka mbuta dia nkamba la Mbalasa ka Diolelo dikambo di’awui amɔtshi wa lo nyuma, ɛnyɛlɔ Kalasa k’olimu wa Diolelo ndo k’ambatshi mboka.

¹² Etshumanelo pombaka mbɔsaka dihole diatɔ di’ɔtɛmwɛlɔ la nɛmɔ nshi tshɛ. Ɔlɔtɔ aso, ɛnamelo kaso ndo dionga diaso pombaka nkɛnɛmɔla nɛmɔ diahomba monga la ɔtɛmwɛlɔ wa Jehowa. (Ond. 5:1; 1 Tim. 2:9, 10) Lo ndjela alako asɔ, sho mɛnyaka dia sho mbɔsaka nsanganya yaso y’Akristo la nɛmɔ.

¹³ Ekɔ ohomba di’awui tshɛ salemaka dimɛna wonya wa losanganya. Ana pombaka mbidjasɛ kaamɛ l’ambutshi awɔ. Koka nɔmba ambutshi wele la ana wa totshitshɛ dia mbidjasɛ lo dihole diahawatofutanya efula naka ambonga ohomba ntomba la ana l’andja dia towangola kana tokotsha ehomba ekina.

¹⁴ Anangɛso wakotsha kɛnɛ kalɔmbama kambaka dia nongolaka anto lo nsanganya ya lo Mbalasa ka Diolelo. Vɔ pombaka mbidja yimba dimɛna, salɛka anto akambo la lɔngɛnyi tshɛ ndo monga l’ekanelo k’ɔlɔlɔ. Ɔkɛndɛ awɔ ele wa nongola eyoyo ndo nsala dia vɔ ngɛnangɛna, nkimanyiya wanɛ wamboyokoma l’ɔkɔngɔ dia ntana ahole wa mbidjasɛ, mbadia lofulo l’ampokami, ndo mendaka djungudungu la hiɛlɛlɛ ya lo mbalasa. Lɛnɛ ele ohomba, wanɛ walongola anto pombaka mboholaka ambutshi dia nama anawɔ dimɛna diaha vɔ ndawɔlawɔ la ntondo kana l’ɔkɔngɔ wa nsanganya kana tɔkɛnya lo lɔyɛnga. Naka ɔna ɔmɔtshi ofukutanya, kete ɔnɛ lalongola anto pombaka nɔmba she kana nyango la ngandji tshɛ ndo la ɔkɔmi dia ntomba l’ɔnakɔ diaha nde ndeka mfukutanya ampokami. Olimu wakamba wanɛ walongola anto kimanyiyaka efula mɛtɛ di’anto tshɛ nkondja wahɔ lo nsanganya. Ndeka dimɛna mbisha dikumanyi l’ekambi wakimanyiya ɔkɛndɛ wa nongolaka anto.

WOKELO WA MBALASA KA DIOLELO

¹⁵ Lo ntambe ka ntondo, Akristo amɔtshi waki l’ekondjelo kakaleke akina, ɔnkɔnɛ ɔpɔstɔlɔ Pɔɔlɔ akafunde ate: “Oma lo wɛdimo, dia ekondjelo kanyu k’efula kele kakianɛ nkomba kɛnɛ kahombawɔ, dia ekondjelo kawɔ k’efula ndjokomba kɛnɛ kahombanyu, kele wɛdimo kawoyale.” (2 Kɔr. 8:14) Ɛlɔ kɛnɛ “wɛdimo” wa ngasɔ wekɔ lo salema. Falanga yakimɔ tshumanelo dia l’andja w’otondo sanganyemaka dia nkimanyiya l’ɔlɔngɔswɛlɔ kana lo wokelo wa Mbalasa ya Diolelo. Ekimanyielo ka la ngandji k’oma le nkumbo k’onto l’ɔnango ka l’andja w’otondo kɛsɔ mandɔmaka efula oma le okongamelo ndo oma le tshumanelo diakondja wahɔ oma lo weshasha ɛsɔ.

¹⁶ Lo mbidja yimba l’awui wa lo ngelo la ngelo, biro ka filialɛ shikikɛka tshumanelo diayosalaka nsanganya lo Mbalasa ka Diolelo. Biro ka filialɛ shikikɛka nto etena ndo dihole dia mbika Mbalasa ka Diolelo k’oyoyo ndo ka nɔngɔsɔla Mbalasa mɔtshi ya l’ɛtshi ka nkɛtɛ ka filialɛ. Etena katomba mpokoso, tɛdikɔ mbɔsamaka dia nɔngɔsɔla Mbalasa ya Diolelo yolanyi ndo tena dimɔtshi mvudu y’anangɛso l’akadiyɛso.

¹⁷ Biro ka filialɛ mbalɔmbɔla okambelo w’anto wayakimɔ la lolango, osombelo wa nkombo, osangelo wa woho wayonga Mbalasa ka Diolelo, okondjelo wa mikanda washa lotshungɔ la mbika, wokelo ndo ɔlɔngɔswɛlɔ. L’ɔtɛ w’ohomba w’efula wa Mbalasa ya Diolelo lo wedja efula, ohomba w’anto efula wayakimɔ la lolango wekɔ. Apandjudi tshɛ wambobatizama wakotsha kɛnɛ kalɔmbama ndo wakombola mbisha lonya keketshamaka dia ndodia dɛmandɛ ko disha Kɔmite k’olimu k’etshumanelo kawɔ. Kaanga apandjudi wahatabatizama koka mbisha lonya lo wokelo ndo l’ɔlɔngɔswɛlɔ wa Mbalasa kawɔ ka Diolelo.

MBALASA YA NSANGANYA YA WEKE

¹⁸ Akristo wa ntondo wakasanganaka mbala efula lo tolui ta totshitshɛ. Koko lo tena dimɔtshi, “olui a woke w’anto” wakasanganaka. (Ets. 11:26) Woho akɔ waamɛ mbele, ɛlɔ kɛnɛ ekambi wa Jehowa sanganaka lo elui wa weke lo nsanganya y’etshimbedi ndo ya rɛjɔ. Mbala efula, vɔ futɛka mvudu kana ahole wa weke wa lo ngelo kawɔ dia nsala nsanganya shɔ, koko lo ngelo yele keema dimɛna nsala ngasɔ kana yele ahole wa ngasɔ bu, koka nyanga dia nkondja dihole di’ɔtɛmwɛlɔ dielɛwɔ Mbalasa ka nsanganya ya weke.

¹⁹ Mbala mɔtshi, koka nsomba luudu lɔmɔtshi ko lilɔngɔsɔla dia nkamba la lɔ oko Mbalasa ka nsanganya ya weke. Koko mbala efula, vɔ sombaka ɛtshi ka nkɛtɛ ko mbika mbalasa k’oyoyo. Woke wa Mbalasa ya nsanganya ya weke tshikitanaka lo ndjela ehomba wa dihole la dihole. Biro ka filialɛ mbɔsaka yɛdikɔ ya nsomba kana mbika mbalasa ka ngasɔ paka l’ɔkɔngɔ wa nsɛdingola oshinga dimɛna ndo mbeya mbala ngana yayowokambaka la tɔ.

²⁰ Biro ka filialɛ sɔnaka anangɛso amɔtshi dia mendaka awui weta lo Mbalasa ka nsanganya ya weke ndo kilɔngɔsɔlaka. Tɛdikɔ mbɔsamaka woho wa etshimbedi solaka mbala la mbala Mbalasa ka nsanganya ya weke, dia osolelo wasalema mbala hiende l’ɔnɔnyi salema ndo nɔngɔsɔlaka ahole wayanga ndana. Ekɔ ohomba di’anangɛso l’akadiyɛso ndjakimɔka dia nkamba olimu ɔsɔ. Diakɔ diele, tshumanelo keketshamaka dia nsukɛ tɛdikɔ tɔsɔ l’otema ɔtɔi.​—Os. 110:3; Mal. 1:10.

²¹ Tena dimɔtshi, koka nkamba nto la Mbalasa ka nsanganya ya weke dia nsala awui amɔtshi wa teokrasi, ɛnyɛlɔ Kalasa ya Bible ndo nsanganya ya laande y’emendji w’etshimbedi. Oko wele Mbalasa ka Diolelo, Mbalasa ka nsanganya ya weke kekɔ dihole diakalambɔma dikambo di’ɔtɛmwɛlɔ. Etena kasanganaso lo Mbalasa ka nsanganya ya weke, dionga diaso, ɔlɔtɔ aso, ɛnamelo kaso pombaka nkɛnɛmɔla kɛnɛmɔ oko etena katshɔso lo nsanganya lo Mbalasa ka Diolelo dia tɔtɛmɔla.

²² Anto w’eyoyo efula wekɔ lo nsamanya dia mbɔtɔ l’okongamelo waki Nzambi l’etena k’ekomelo ka nshi y’ekomelo kɛnɛ. Ɔsɔ ekɔ djembetelo y’ɛtshɔkɔ wa Jehowa. (Isa. 60:8, 10, 11, 22) Diakɔ diele, sho pombaka sukɛ tɛdikɔ tɔsama dia nkondja ahole w’ɔtɛmwɛlɔ wa pudipudi ndo w’amɛna. Lo nsala ngasɔ, sho mɛnyaka lowando laso lo woho watokimanyiya mvudu shɔ dia keketshana lam’asaso ndo toleke nsala dikambo sɔ oko wɛnaso dia lushi la Jehowa laya suke.