Nyɛsɔ Tolamake Dihole Diaso di’Ɔtɛmwɛlɔ Pudipudi
1. Naa oyango wa Mbalasa ka Diolelo?
1 L’andja w’otondo tekɔ la tshumanelo ndekana 94000 di’Ɛmɛnyi wa Jehowa. Tshumanelo efula sanganaka dia mbeka Bible ndo dia monga kâmɛ l’Akristo w’asekawɔ lo Mbalasa ka Diolelo, dihole di’ɔtɛmwɛlɔ wa pudipudi.
2. Lande na ekɔ ohomba namaka Mbalasa ka Diolelo pudipudi ndo kɔmba?
2 Tonge l’Ekongelo ka Solaka ndo ka Mɔmbaka Mbalasa ka Diolelo Mbala la Mbala: Olimu wakambema dia namaka Mbalasa ka Diolelo pudipudi ekɔ etenyi k’ohomba k’olimu aso w’ekila. Dibuku Organisés mbutaka lo lɛkɛ 61-62 ɔnɛ: “Anangɛso l’akadiyɛso la dia mbɔsa diekɔ diɛsɛ kokɛ Mbalasa ka Diolelo aha tsho lo kimɔ falanga koko ndo lo ndjasha la lolango dia kamba ntumu yakimanyiya dia kietɛ pudipudi, kɔmba ndo kilɔngɔsɔlaka dimɛna. Oma l’ɛnamelo katɔ ka l’etei ndo ka l’andja, Mbalasa ka Diolelo la dia mɛnya dia tɔ kekɔ didjidji di’ɔlɔngɔswamelo wa Jehowa.” Naka nyekɔ lo kamba la Mbalasa ka Diolelo olimu tena efula lomingu tshɛ, kete ayonga ohomba kiɔmbaka ndo kisolaka mbala la mbala. Mbala efula wanɛ wayakimɔ la lolango lawɔ oma lo tshumanelo diasangana lo Mbalasa ka Diolelo kɛsɔ mbasala elimu ɛsɔ. Oko wakidiɔ lo nshi yakafundama Bible, ekambi waki Jehowa wa nshi nyɛ la dia monga l’etete ‘lo nɔngɔsɔlaka’ dihole diaso di’ɔtɛmwɛlɔ.—2 Ek. 34:10.
3. Ngande wahomba kongɛma olimu wa mɔmbaka ndo solaka Mbalasa ka Diolelo, ndo waa na wahomba mbisha lonya lo diɛsɛ sɔ?
3 Ekongelo ka mɔmbaka ndo ka solaka Mbalasa ka Diolelo lomingu la lomingu la dia panema lo dibaya dia waewoyelo. Elui tshɛ wa wekelo wa dibuku wayongaka la lushi lawɔ la mɔmbaka kana solaka Mbalasa ka Diolelo lomingu tshɛ lo ndjela listɛ l’elimu wahomba kambema. Wanɛ tshɛ wele l’akoka la dia mbisha lonya lo diɛsɛ diele lawɔ lomingu la lomingu dia namaka Mbalasa ka Diolelo pudipudi ndo kɔmba. L’ɛlɔmbwɛlɔ k’ambutshi awɔ, ana koka mbisha lonya lo wɔmbɛlɔ kana osolelo wa Mbalasa ka Diolelo dia mɛnya woho wangɛnangɛnawɔ kambɛ anto akina. Naka tshumanelo efula diekɔ lo kamba la Mbalasa ka Diolelo ɔtɔi, kete ayoleka dimɛna kamba kâmɛ dia Mbalasa mɔmbamaka ndo solamaka mbala la mbala nɛ dia ɔsɔ kema ɔkɛndɛ w’anto angana ato.
4. Kakɔna kahomba salema di’etshumanelo mbeyaka kɛnɛ kahombatɔ sala etena kɔmbama kana kasolama Mbalasa ka Diolelo?
4 Listɛ l’elimu wahomba salema koka panema, mbala mɔtshi lɛnɛ ombama dihomɔ dia mɔmbaka kana solaka Mbalasa ka Diolelo. Listɛ lɔsɔ la dia nembetshiya elimu wahomba salemaka lomingu tshɛ, mbidja ndo wotelo w’ashi, wonyelo wa tɛi y’ahoha, osolelo w’adidishi, w’odihe, duwola otoko l’ekala, mbikasha akatshi, nɔngɔsɔla alɛmbɔlɛmbɔ kana sola tovitrɛ. Elimu ɛmɔtshi halɔmbɛ dia salemaka mbala la mbala, oko nɔngɔsɔla mɛsa, sola wa kɔsa, ekala, rido kana mengola atala etena kele watalana. Diangɔ tshɛ diakamba laso dia mɔmbaka la solaka Mbalasa ka Diolelo la dia namema lo dihole dia dimɛna diele ana hawokoke minanda. Ekɔ nto ohomba mɛnya lo tshena pe woho wakambawɔ l’ɛngɔ tshɛ.
5. Naa ohomba wa mbewɔ wâle, ndo awui akɔna wele ekɔ ohomba mbidjaka yimba? (Enda kiombo yele lo lɛkɛ 4.)
5 Mbewɔ wâle lo Mbalasa ka Diolelo ekɔ dui dioleki ohomba efula. (Euh. 22:8) Lo dikambo sɔ, kiombo ya lo lɛkɛ 4 yekɔ la diangɔ diahomba mendaka mbala la mbala dia mbewɔ wâle. Ɔnɛ lele l’ɔkɛndɛ wa namaka Mbalasa ka Diolelo la dia mbidjaka yimba l’awui asɔ.
6. Ngande wahomba kongɛmaka elimu w’ɔlɔngɔswɛlɔ wa Mbalasa ka Diolelo?
6 Ɔlɔngɔswɛlɔ wa Mbalasa ka Diolelo: Olui wa dikumanyi wekɔ l’ɔkɛndɛ wa mbidja yimba l’ɔlɔngɔswɛlɔ wa Mbalasa ka Diolelo. Mbala efula, ekumanyi kana okambi ɔmɔtshi w’olimu sɔnamaka dia kongɛ olimu ɔsɔ. Nde kongɛka elimu wahomba kambemaka lushi la lushi lo Mbalasa ka Diolelo, lo ndjashikikɛka dia tɔ namemaka pudipudi, nɔngɔswamaka ndo ɔnɛ dihomɔ tshɛ diele ohomba diekɔ. Ekɔ ohomba mbewɔ dui tshɛ diakoka tondja wâle lo Mbalasa ka Diolelo kana lo sɛkɛ diadiɔ. Naka tshumanelo efula diekɔ lo kamba la mbalasa ɔtɔi, kete elui wa dikumanyi wayosala kɔmite kahomba mbɔsaka tɛdikɔ t’ohomba dia nɔngɔsɔlaka Mbalasa ka Diolelo ndo sɛkɛ diadiɔ. Kɔmite kɛsɔ kayoyelaka ɛlɔmbwɛlɔ k’elui wa dikumanyi.
7. (a) Kakɔna kasalema ɔnɔnyi tshɛ dia ndjashikikɛ dia Mbalasa ka Diolelo namemaka pudipudi? (b) Awui akɔna wele ohomba mbidjaka yimba mbala la mbala? (Enda kiombo ya lo lɛkɛ 5.)
7 Ɔnɔnyi l’ɔnɔnyi, Mbalasa ka Diolelo sɛdingɔmaka dimɛna dimɛna l’ekimanyielo ka fɔrmilɛrɛ CN-14, katoma Biro ka Filialɛ Kenda Awui wa Wokelo wa Mbalasa ka Diolelo. Dikumanyi ndjelaka awui tshɛ wa lo fɔrmilɛrɛ kɛsɔ lo mbɔsa tɛdikɔ ta mbidja yimba l’awui amɔtshi wahombama. Apandjudi koka nɔmbama dia kimanyiya dia nɔngɔsɔla ahole amɔtshi wele Mbalasa ka Diolelo ambolana. Anto tshɛ la dia monga suke dia nɔngɔsɔla oyadi yangɔ ya tshitshɛ mambolana.
8. Etena kakɔna kahomba dikumanyi fundɛ Biro ka Filialɛ Kenda Awui wa Wokelo wa Mbalasa ka Diolelo lo kɛnɛ kendana l’awui amɔtshi w’ɔlɔngɔswɛlɔ?
8 Naka dikumanyi diekɔ l’ohomba wa dako lo kɛnɛ kendana l’elimu ɛmɔtshi wahomba kambema lo Mbalasa ka Diolelo, kete vɔ koka fundɛ kana mbewoya Biro ka Filialɛ Kenda Awui wa Wokelo wa Mbalasa ka Diolelo. Ɛnyɛlɔ, naka vɔ wekɔ lo nanga shidiya ehele kɛmɔtshi kana wekɔ l’okakatanu ɔmɔtshi wendana l’olimu wa masɔ kana lo woho wa kakɛ kana fufa sambe kasela.
9. Ahomba salema naka nyekɔ l’ohomba wa ndowɛ onto ɔmɔtshi leya olimu ɔmɔtshi dimɛna?
9 Tokambe la Falanga ya l’Etshumanelo la Lomba: Olimu w’efula wendana la Mbalasa ka Diolelo ndo w’asɛkɛ salemaka oma le wanɛ wayasha la lolango lawɔ. Welo w’efula wadjawɔ mɛnyaka ngandji kawɔ ndo kitshakitshaka adepasɛ. Naka nyambɛna ohomba ndowɛ onto ɔmɔtshi leya olimu ɔmɔtshi, oko ɛnyɛlɔ ɔnɛ latɛ okanga dia mbitshanya mpɛkɛsɛnɛ kana mɛmbɛlɛ, ɔnɛ leya tshima komba, kete dikumanyi koka nyanga kɔpanyi hiende kana ndekana yotshikitanyi yasɛmanɛ l’eshinga dia sala olimu ɔsɔ. Vɔ salaka dui sɔ lo fundɛ ntondotondo kɔpanyi shɔ awui tshɛ wendana l’olimu wahomba kambema kana diangɔ tshɛ diayonga ohomba l’olimu ɔsɔ. Oma lâsɔ ko vɔ tomɛ kɔpanyi shɔ tshɛ listɛ lɔsɔ dia vɔ mbeya kɛnɛ kenyu l’ohomba. L’ɔkɔngɔ wa dikumanyi nongola okadimwelo oma le waa kɔpanyi shɔ tshɛ, vɔ koka sɔna kɔpanyi koleki oshinga dimɛna. Ngasɔ mbahomba salaka oyadi ɔnangɛso ɔmɔtshi mambolanga sala olimu ɔsɔ kana tosha diangɔ diele laso ohomba.
10. Kakɔna kasalema dia ndjashikikɛ ɔnɛ falanga ya l’etshumanelo yakakambema olimu lo woho wa dimɛna?
10 Dikumanyi la dia mbɔsa nto tɛdikɔ tahombama dia kondja okanda wa lokombo kana mukanda waha futaka taksɛ. Naka tshumanelo efula diekɔ lo kamba la Mbalasa ka Diolelo ɔtɔi, kete kɔmite kendana l’ɔlɔngɔswɛlɔ wa Mbalasa ka Diolelo kayongaka la yema y’akuta l’omamu lo kɛnɛ kendana la dikambo sɔ ndo vɔ salaka alapɔlɔ wa lofunda ngɔndɔ tshɛ dia mɛnya elui wa dikumanyi kɛnɛ kakawasale la falanga shɔ. Dui sɔ kimanyiyaka dikumanyi dia mbeya lɛnɛ atshɔ falanga. Dikumanyi wekɔ l’ɔkɛndɛ wa falanga ya l’etshumanelo.
11. Kakɔna kahomba salema naka ɔlɔngɔswɛlɔ wa woke wekɔ ohomba?
11 Ɔlɔngɔswɛlɔ wa Woke wa Mbalasa ka Diolelo: Naka kɔmite kendana l’ɔlɔngɔswɛlɔ wa Mbalasa ka Diolelo ambɛna di’olimu ɔmɔtshi wa woke nɔmbamaka dia salema lo dikambo di’ɔlɔngɔswɛlɔ atɔ, kete kɔmite kɛsɔ kayofundɛ olui wa dikumanyi dikambo diakɔ dia vɔ mbasha ɛlɔmbwɛlɔ. Naka wambɛna di’ekɔ ohomba ɔlɔngɔswɛlɔ wa woke salema kana ɔnɛ wayonga l’ohomba w’ekimanyielo dia tshumanelo salaka nsanganya yawɔ l’andja wa Mbalasa ka Diolelo kɛsɔ, kete dikumanyi la dia mbewoya Biro ka Filialɛ Kenda Awui wa Wokelo wa Mbalasa ka Diolelo. Anangɛso asɔ wele l’akoka ndo wambohokɔ akambo wayowasha alako w’amɛna efula ndo woho wahomba nɔmbwama olimu ɔsɔ. Naka falanga efula pombaka tomba, kete ayonga ohomba mbɛdika yɛdikɔ ya falanga yayohomba tomba ndo nɔngɔsɔla yɛdikɔ mɔtshi yahomba etshumanelo mbetawɔ.—Enda lo kiombo yele l’ɔtɛ a dui ɔnɛ: Ekadimwelo lo Wembola Anyu l’Olimu Aso wa Diolelo wa Ngɔndɔ k’Enanɛi 1994.
12. Ngande wakokaso mɛnya lowando laso lo diɛsɛ diele laso dia mbɔtɔka lo nsanganya lo Mbalasa ka Diolelo?
12 Tekɔ la lowando lo diɛsɛ diele laso dia sanganaka kâmɛ lo Mbalasa ka Diolelo! Hatohombe pondjo minya nsanganya yaso yimba kana ndjiɔsa oko ɛngɔ k’anyanya. Anto tshɛ kokaka mbisha lonya lo yɛdikɔ shɔ yakɔsama dikambo di’ekeketshelo kaso lo kokɛka Mbalasa kaso ka Diolelo. Dui sɔ tombolaka ɔtɛmwɛlɔ aso wa pudipudi ndo lokombo la Jehowa. Nyɛsɔ toyashikikɛ dia namaka dihole diaso di’ɔtɛmwɛlɔ pudipudi.
[Box on page 4]
Awui wa Ndjela dia Mbewɔ Wâle
◻ Diangɔ dia nimaka dja la dia mongaka suke ndo dilɔngɔsɔlaka ɔnɔnyi tshɛ naka nyekɔ ladiɔ.
◻ Mvudu yombanyu diangɔ ndo komba pombaka monga pudipudi, diangɔ nɔngama dimɛna ndo mbewɔ diangɔ diakoka towɔ dja esadi ndo ndoko onto lahomba momba diangɔ diande hita lɔkɔ.
◻ Sambe kana odiko wa Mbalasa ka Diolelo la dia mendamaka mbala la mbala ndo mongaka pudipudi.
◻ Ɛsɛsɛ ndo waa parkingɛ la dia monga l’atala naka atala wekɔ lo ngelo kanyu ndo diangɔ diakoka kɔsha onto hakoke monga l’ahole asɔ.
◻ Pombaka mendaka dimɛna atala la waa vatilatɛrɛ kânga yɔ yatalana, naka nyekɔ la diangɔ sɔ.
◻ Pombaka kakɛ ahole tshɛ wasela dia mbewɔ ekakatanu wa weke.
◻ Luudu lombawɔ diangɔ la dia mongaka nshi tshɛ pudipudi, kɔmba, aha momba diangɔ diakoka towɔ dja esadi.
◻ Mbalasa la dia dihamaka naka onto bu l’etei.
[Box on page 5]
Okokelo wa Mbalasa ka Diolelo ndo wa Lokombo Latɔ
◻ L’andja: Onde sambe, mukubu, adidishi, kana djembetelo ya Mbalasa ka Diolelo atalana?
◻ Sɛkɛ: Onde sɛkɛ nɔngɔsɔmaka dimɛna? Onde ɛsɛsɛ, lokombo ndo parkingɛ ekɔ amɛna?
◻ L’etei: Onde wa rido, kɔsa, ekala, atala, mukubu wa lo mpele ndo dihole diombama ekanda ekɔ pudipudi?
◻ Dihomɔ: Onde atala, dihomɔ diadiya wendjo wa dui ndo waa vatilatɛrɛ eke amɛna?
◻ Komba: Onde yɔ yekɔ pudipudi?
◻ Mikanda w’etshumanelo: Onde nyekɔ l’ekanda w’aseka lɛɛta wendana la lokombo, ɛnyɛlɔ oko (Okanda Wakawadje Lokombo lo Dibuku dia Lɛɛta, Okanda Wendana l’Ofutelo, Okanda w’Osombelo)? Onde nyu mombaka ɔnɔnyi tshɛ mikanda w’aseka lɛɛta wendana l’etshumanelo kana mikanda wɛnya dia hanyofutaka taksɛ?