Osukelo w’olimu wa Diolelo lo dihole dieso ndo l’andja w’otondo

DIA nkotsha prɔfɛsiya ka Yeso kendana la nshi y’ekomelo, Ɛmɛnyi wa Jehowa wambosambisha lokumu l’ɔlɔlɔ “polo ndo l’ahole woleki etale wa lo nkɛtɛ.” (Ets. 1:8; Mat. 24:14) Dia nsala dikambo sɔ, vɔ kimɔka wenya ndo welo awɔ dia mbewoya awui wa lo nyuma. Oko wewɔ l’eshikikelo dia Jehowa kotshaka ehomba wa wanɛ wakamba kaamɛ la nde, vɔ tetemalaka mbetɛ Diolelo dia Nzambi lo dihole dia ntondo lo nsɛnɔ yawɔ. (Mat. 6:25-34; 1 Kɔr. 3:5-9) Etombelo mɛnyaka hwe dia Jehowa mbaetawɔka ndo mbatshɔkɔlaka.

WOHO WA NSUKƐ WAHƆ WA DIOLELO L’ANDJA W’OTONDO

² Etena kɛnawɔ toho taso ta nsambisha ndo efula ka Bible ndo ekanda walembetshiya Bible washaso anto aha la nsondja, anto amɔtshi mimbolaka ɔnɛ: “Ngande wasalema akambo anɛ tshɛ?” Ekɔ mɛtɛ dia otondjelo wa Bible ndo ekanda walembetshiya Bible nɔmbaka falanga. Falanga efula nɔmbamaka dia mbika ndo dia nɔngɔsɔlaka mvudu ya Bɛtɛlɛ yadjasɛ ekambi wakamba la waa mashinyi wa ɛprimɛri, wenda olimu w’esambishelo ndo wakamba lo toho tokina dia ntɔla lokumu l’ɔlɔlɔ otsha la ntondo. Laadiko dia laasɔ, emendji w’etshimbedi, waa misiɔnɛrɛ, ambatshi mboka wa laande ndo ekambi ekina wakamba olimu wa laande wa lo tena tshɛ nongolaka yema y’ekimanyielo ka l’emunyi dia vɔ ntetemala l’olimu awɔ. Mbokɛmaka hwe dia, olimu w’esambishelo ka lokumu l’ɔlɔlɔ lo nshi yaso nyɛ nɔmbaka falanga efula, oyadi lo dihole dieso kana l’andja w’otondo. Oma lende aya falanga shɔ?

³ Anto efula wangɛnangɛna olimu wa wetshelo wa Bible wakamba Ɛmɛnyi wa Jehowa, ngɛnangɛnaka nkimɔ weshasha dia nsukɛ olimu wa l’andja w’otondo. Koko, anto wa ntondo wasukɛ olimu aso ele Ɛmɛnyi wa Jehowa vɔamɛ, amɔtshi tomaka weshasha awɔ wa la lolango lo filialɛ ka lo wodja awɔ. Vɔ mongaka suke dia nkimɔ la lolango oko wakasale ekambi wa Nzambi wa lo nshi y’edjedja wakakimɔ weshasha la lokaho tshɛ dia nsukɛ wokelo wa dihole di’ɔtɛmwɛlɔ diaki Jehowa. (Eto. 35:20-29; 1 Ɛk. 29:9) Amɔtshi kimɔka diangɔ diawɔ dia nɛmɔ ndo weshasha ekina ndjaaka oma le anto, tshumanelo ndo etshimbedi ndo mbala efula weshasha akɔ bu efula. Koko, etena kasanganyema weshasha ɛsɔ tshɛ, vɔ komaka lofulo la falanga lakimanyiya di’olimu ntetemala.

⁴ Ɛmɛnyi wa Jehowa mbɔsaka dia ekɔ tshondo ya diɛsɛ dia nkamba la falanga ndo la diangɔ diawɔ dikina dia ntɔla olimu w’esambishelo otsha la ntondo. Yeso l’ambeki ande waki la shɛtɛshɛtɛ yakawadjaka falanga dia nsala adepasɛ. (Jni. 13:29) Bible totɛka dikambo dia wamato amɔtshi wakakimanyiyaka Yeso nde l’ambeki ande. (Makɔ 15:40, 41; Luka 8:3) La lowando tshɛ, ɔpɔstɔlɔ Pɔɔlɔ aketawɔ ekimanyielo ka l’emunyi koludi la ngandji k’oma le wanɛ wakayashaka dia ntɔla lokumu l’ɔlɔlɔ otsha la ntondo ndo wakakombolaka nsukɛ olimu ande. (Flpɛ. 4:14-16; 1 Tɛs. 2:9) Ɛmɛnyi wa Jehowa tetemalaka ndjela bɛnyɛlɔ di’edjedja sɔ di’olimu w’ohetoheto ndo w’okimwelo wa weshasha la lokaho tshɛ. Kɛsɔ kimanyiyaka di’anto wele l’etema w’ɛlɔlɔ wa l’ahole tshɛ mbɔsa “ashi wa lɔsɛnɔ wɔsɔsa.”​—Ɛny. 22:17.

WOHO WA NKOTSHA EHOMBA WA L’ETSHUMANELO KESO

⁵ Adepasɛ wa l’etshumanelo keso salemaka nto oma lo weshasha wa la lolango. Ndooko ɛkɔngɔ wa falanga wasalema ndo hawofundɛ ndooko onto lofulo la falanga lahombande nkimɔ. Tɔshɛtɛshɛtɛ ta weshasha tekɔ l’ahole wa nsanganya di’onto l’onto nkimɔ woshasha “oko wakandashikikɛ l’otema ande.”​—2 Kɔr. 9:7.

⁶ Falanga yakimɔma kambemaka ntondo l’awui wa Mbalasa ka Diolelo ndo dia kilɔngɔsɔla. Olui wa dikumanyi koka mbɔsa yɛdikɔ ya ntoma falanga mɔtshi otsha lo filialɛ k’Ɛmɛnyi wa Jehowa dia nsukɛ olimu wa l’andja w’otondo. Yɛdikɔ ya ngasɔ pombaka mbetawɔma oma le etshumanelo. Yoho shɔ mbakimɔ tshumanelo efula weshasha mbala la mbala dia nsukɛ olimu wa l’andja w’otondo. Naka anto tshɛ mbeyaka di’etshumanelo mongaka l’ehomba ɛmɔtshi wendana la falanga tena la tena, kete waewoyelo wa mbala la mbala wendana la weshasha hawotonga ohomba.

WOHO WA NKAMBA LA WESHASHA

⁷ L’ɔkɔngɔ wa losanganya tshɛ, anangɛso ahende wayotshumanyaka falanga tshɛ yadjama lo tɔshɛtɛshɛtɛ ta weshasha ko mfunda lofulo layɔ. (2 Ku. 12:9, 10; 2 Kɔr. 8:20) Olui wa dikumanyi wayɔsa tɛdikɔ tahombama dia momba falanga shɔ polo l’etena kakokawɔ tomɛ filialɛ kana nkamba la yɔ di’ehomba w’etshumanelo. Ngɔndɔ tshɛ, ɔnangɛso lendana la kɔntɛ k’etshumanelo nɔngɔsɔlaka diewoyelo dia mbewoya etshumanelo ndo l’ɔkɔngɔ wa ngɔndɔ shato tshɛ, ɔnɔmbɔdi w’olui wa dikumanyi mbɔsaka tɛdikɔ dia nsala owadi wa kɔntɛ.

ADEPASƐ WA L’OTSHIMBEDI

⁸ Adepasɛ wasalema lo nsanganya ya weke, ɛnyɛlɔ oko adepasɛ akina wasalema lo nsanganya y’etshimbedi ndjaaka oma lo weshasha wakimɔ Ɛmɛnyi wa l’otshimbedi wasalemayɔ. Tɔshɛtɛshɛtɛ ta weshasha mongaka l’ahole wasalema nsanganya ya weke di’anto nkimɔ weshasha wa la lolango l’otshimbedi. Laadiko dia laasɔ, dia nkimanyiya lo adepasɛ watatetemala monga, tshumanelo koka kimɔka weshasha lo tena dikina.

⁹ Ndeka dimɛna dia etshimbedi salaka adepasɛ tshɛ wele ohomba, ndo naka falanga yambotshikala ko vɔ ndjitoma l’olimu wa l’andja w’otondo. Ko naka falanga yele lo kɔntɛ k’otshimbedi hayokoki nsala adepasɛ wa lo losanganya losalemi kana dia nsala adepasɛ wendana l’ɔlɔngɔswɛlɔ wa losanganya layaye, ɛnyɛlɔ dia futɛ dihole dia nsala losanganya, kete omendji w’otshimbedi koka mbewoya tshumanelo ohomba wa nkimɔ weshasha. Olui wa dikumanyi tshɛ wa l’etshumanelo wayɔkɛtshanya dui sɔ ndo nshikikɛ weshasha wayokoka etshumanelo kawɔ tomɛ otshimbedi. Oma laasɔ ko vɔ ndjɔsa yɛdikɔ shɔ kaamɛ l’etshumanelo.

¹⁰ Naka awui wa falanga wambɔlɔmba yambalo ya dikumanyi dia l’otshimbedi, kete losanganya la dikumanyi dia l’otshimbedi layɔtɔma lushi la losanganya l’otshimbedi. Tɛdikɔ tokina tshɛ tɔsama laadiko dia tɔnɛ tendana la adepasɛ wa l’otshimbedi waketawɔma pombaka fundama oko tɛdikɔ tambetawɔma le dikumanyi. Tɛdikɔ tɔsɔ pombaka mendana la lofulo la falanga shikaa ndo mbala tshɛ katomba falanga y’otshimbedi, pombaka mbewoyaka dikumanyi tɛdikɔ takɔ dia vɔ tietawɔ.

¹¹ Tɛdikɔ mbɔsamaka dia owadi wa kɔntɛ k’otshimbedi salemaka l’ɔkɔngɔ w’etena kɛmɔtshi.

WOHO WA NKIMANYIYA ASE WOLA

¹² Oyango ɔmɔtshi waki la falanga y’oma lo shɛtɛshɛtɛ yaki Yeso l’ambeki ande aki wa nkimanyiya ase wola. (Makɔ 14:3-5; Jni. 13:29) Akristo wakahombe ntetemala mɛmba ɔkɛndɛ wa nkimanyiya ase wola nɛ dia Yeso akate ate: “Nyu nyekɔ nshi tshɛ kaamɛ la ase wola.” (Makɔ 14:7) Ngande wakotsha Ɛmɛnyi wa Jehowa ɔkɛndɛ awɔ ɔsɔ ɛlɔ kɛnɛ?

¹³ Tena dimɔtshi, anto amɔtshi wa kɔlamelo wa l’etshumanelo mbeyaka monga l’ohomba w’ekimanyielo ka l’emunyi l’ɔtɛ wa lotshundu, ɛkɔmɔ, kana w’ekakatanu ɛmɔtshi waakomɛ aha la lolango lawɔ. Ase nkumbo, ewotɔ ndo anto akina weya ehomba ɛsɔ koka tshutshuyama dia mbisha ekimanyielo. Dui sɔ mbɔtɔnɛka l’ɛtɛkɛta w’ɔpɔstɔlɔ Joani wata ɔnɛ: “Onto tshɛ lele la diangɔ dia l’emunyi dia l’andja ɔnɛ, ko nde mɛnaka ɔnango ele lo dihombo, koko halange mbooka kɛtshi, onde sho koka mbuta dia ngandji ka Nzambi kekɔ le nde? Anami wa tshitshɛ, tatokanake ngandji tsho lo ɛtɛkɛta ndo laadiko di’ɛlɔmɔ, koko lo etsha ndo lo mɛtɛ.” (1 Jn. 3:17, 18; 2 Tɛs. 3:6-12) Ɔtɛmwɛlɔ wa mɛtɛ nɔmbaka dia nkokɛ anto wa kɔlamelo wakoka monga l’ohomba w’ekimanyielo ka l’emunyi.​—Jak. 1:27; 2:14-17.

¹⁴ Lo mukanda wa ntondo wakandafundɛ Timɔte, ɔpɔstɔlɔ Pɔɔlɔ akalembetshiya woho wakoka mbisha wanɛ wele lo dihombo ekimanyielo ka l’emunyi. Wɛ koka mbadia alako ande lo 1 Timɔte 5:3-21. Ɔkɛndɛ wa ntondo wele l’Okristo tshɛ ele wa nkotsha ehomba w’anto wa lo luudu lande hita. Esombe ndo wanɛ wele la dikɔmɔ pombaka nongola ekimanyielo oma le anawɔ, ekana awɔ kana ewotɔ awɔ wa suke. Tena dimɔtshi, vɔ koka nkondja ekimanyielo ka l’emunyi oma le lɛɛta kana oma le atshunda wakimanyiya anto, ɔnkɔnɛ, ewotɔ kana anto akina koka nkimanyiya onto lele lo dihombo dia nɔmba ekimanyielo kɛsɔ lo yoho yahombama. Akambo amɔtshi mbeyaka ntomba walɔmba di’etshumanelo k’otondo mbisha yoho mɔtshi y’ekimanyielo le anangɛso l’akadiyɛso wele lo dihombo wambokamba ɛnɔnyi efula la kɔlamelo. Naka anangɛso l’akadiyɛso asɔ keema la ase nkumbo kana l’ewotɔ wakoka mbakimanyiya ndo naka ndooko ekimanyielo k’oshika oma le lɛɛta kana oma le atshunda wakimanyiya anto, kete olui wa dikumanyi koka mbɔsa tɛdikɔ tahombama dia mbasha yema y’ekimanyielo. Akristo wa kɔlamelo mbɔsaka dia nkahana diangɔ diawɔ dia l’emunyi l’anto wele lo dihombo ekɔ tshondo ya diɛsɛ.

¹⁵ Anangɛso l’akadiyɛso efula koka ndjokoma lo dihombo l’ɔtɛ w’ɔhɛnyɔhɛnyɔ, w’ata, w’adidimu wa nkɛtɛ, wa dola, wa ndjala ya kasha, kana wa mpokoso nkina yatomba efula lo tena nɛ dia wolo. (Mat. 24:7-9) Etena kasalema awui asɔ, mbeyaka monga ko tshumanelo dia l’ahole akɔ bu kaanga l’ɛngɔ ka mbishana lam’asawɔ, ɔnkɔnɛ Olui-walɔmbɔla nɔmbɔlaka kɛnɛ kasala anangɛso wa l’ahole akina dia ntoma kɛnɛ kahombama. Woho ɔsɔ mbakatomɛ Akristo wa l’Asie Mineure anangɛwɔ wa la Judeya mbo ya ndɛ lo etena kaki ndjala ka kasha. (1 Kɔr. 16:1-4; 2 Kɔr. 9:1-5) Lo ndjela ɛnyɛlɔ kawɔ, sho mɛnyaka ngandji kaso otsha le anangɛso ndo mɛnyaka dia tekɔ ambeki wa mɛtɛ wa Yeso Kristo.​—Jni. 13:35.

OKAHANYELO W’EKANDA

¹⁶ Bible ndo ekanda walembetshiya Bible kimanyiyaka efula l’odianganyelo wa losango la Diolelo. Mbala efula okambi wakimanyiya ɔmɔtshi sɔnamaka oma le olui wa dikumanyi dia mɛmba ɔkɛndɛ w’ekanda wa l’etshumanelo. Anangɛso wendana l’ɛkɛndɛ ɛsɔ mbaɔsaka la nɛmɔ. Vɔ fundaka ekanda tshɛ wɔtɔ ndo watomba di’etshumanelo mongaka nshi tshɛ la lofulo lɔmɔtshi l’ekanda dia nkamba la wɔ.

¹⁷ Oko weso Akristo wakayakimɔ, sho mbeyaka dia wenya aso, yimba yaso, akoka aso, diewo diaso, diangɔ diaso dia l’emunyi ndo kaanga tshondo ya lɔsɛnɔ laso ekɔ weshasha w’oma le Nzambi wahombaso nkamba la wɔ l’olimu ande. (Luka 17:10; 1 Kɔr. 4:7) Etena kakambaso dimɛna la kɛnɛ tshɛ kele la so, sho mɛnyaka woke woke wa ngandji kokaso Jehowa. Nsaki kaso ele ka nɛmiya Jehowa la diangɔ diaso dia nɛmɔ teya dia nde ngɛnangɛnaka woshasha tshɛ wakimɔso dia mɛnya omamemelo wa la anima aso tshɛ. (Tok. 3:9; Makɔ 14:3-9; Luka 21:1-4; Kɔl. 3:23, 24) Yeso akate ate: “Nyakalongola olongolalongola, nyotokimɔ okimɔkimɔ.” (Mat. 10:8) Sho lawɔ mongaka l’ɔngɛnɔngɛnɔ w’efula etena kayakimɔso shoamɛ ndo kakimɔso diangɔ diaso l’olimu wa Jehowa.​—Ets. 20:35.