“Nyosale akambo tshɛ dia lotombo la Nzambi”

OKO weso ekambi waki Nzambi wakayakimɔ, sho pombaka nkɛnɛmɔla lotombo la Jehowa lo kɛnɛ tshɛ kataso ndo kasalaso. Ɔpɔstɔlɔ Pɔɔlɔ akasha tɔndɔ diahomba tɔlɔmbɔla etena kakandafunde ate: “Oyadi nyekɔ lo ndɛ, kana nyekɔ lo nnɔ, kana nyekɔ lo nsala dikambo dikina tshɛ, nyosale akambo tshɛ dia lotombo la Nzambi.” (1 Kɔr. 10:31) Kɛsɔ tɔlɔmbaka dia ndjela ɛlɛmbɛ wosembwe wa Jehowa wakɛnɛmɔla lonto lande la kokele. (Kɔl. 3:10) Sho pombaka mbokoya Nzambi oko weso ekambi ande w’ekila.​—Ɛf. 5:1, 2.

² Lo nkotola yambalo y’Akristo lo dikambo sɔ, ɔpɔstɔlɔ Petero akafunde ate: “Oko wenyu ana wele la okitanyiya, nyotshike tshikitanyema oma le nsaki yaki la nyu ntondo lam’akinyu nyateye Nzambi, koko oko Ɔnɛ lele Ekila lakanyelɛ, nyoyale ekila lo dionga dianyu tshɛ, dikambo akafundama ɔnɛ: ‘Nyu pombaka monga ekila, nɛ dia dimi lekɔ ekila.’” (1 Pe. 1:14-16) Oko wakidiɔ lo Isariyɛlɛ w’edjedja, anto tshɛ wa lo etshumanelo k’Akristo nɔmbamaka dia mongaka ekila. Kɛsɔ nembetshiyaka dia vɔ pombaka monga aha la vadi, pudipudi aha la mbɔtɔ mindo y’oma lo pɛkato kana y’oma lo yimba y’andja ɔnɛ. Vɔ kitshama laande dia salaka olimu w’ekila.​—Eto. 20:5.

³ Dia monga ekila, pombaka ndjelaka ɛlɛmbɛ ndo atɔndɔ wa Jehowa wɛnyama hwe l’Afundelo w’Ekila. (2 Tim. 3:16) Oma lo wekelo wa Bible, taketshama awui wa Jehowa ndo mboka yande ndo takakotɔma otsha le nde. Wekelo aso wa Bible wakatɛnya dia ekɔ ohomba nyanga ntondo Diolelo diaki Nzambi ndo mbetɛ osalelo wa lolango lande dui dioleki ohomba lo lɔsɛnɔ laso. (Mat. 6:33; Rɔmɔ 12:2) Kɛsɔ akatɔlɔmbɛ dia ndɔta lonto l’oyoyo.​—Ɛf. 4:22-24.

PUDIPUDI KA LO NYUMA NDO KA LO LƆKƐWƆ

⁴ Hatongaka nshi tshɛ wɔdu dia ndjela ɛlɛmbɛ wosembwe wa Jehowa. Otunyi aso Satana Diabolo ekɔ lo nyanga dia totakoya mboka k’akambo wa mɛtɛ. Tɔsɛngiya ta kɔlɔ t’andja ɔnɛ ndo nsaki ka nsala pɛkato telaka ekakatanu lo tena dimɔtshi. Nsɛna lo yoho yɔtɔnɛ la ndjakimɔ kaso, tɔlɔmbaka dia ndɔ ta dia lo nyuma. Afundelo totɛka diaha mamba etena kahomanaso l’ɔlɔshamelo kana l’ehemba. Tayosowa l’ɔtɛ wa losembwe. (2 Tim. 3:12) Sho koka monga l’ɔngɛnɔngɛnɔ etena kahomanaso l’ehemba, lo mbeya dia ehemba ɛsɔ wekɔ djembetelo yɛnya dia tekɔ lo nsala lolango la Nzambi.​—1 Pe. 3:14-16; 4:12, 14-16.

⁵ Kaanga mbaki Yeso kokele, nde akeke okitanyiya oma l’asui wakookomɛ. Ndooko lushi lakɔlɛndja ehemba wa Satana kana lakandonge la nsaki ya l’andja ɔnɛ. (Mat. 4:1-11; Jni. 6:15) Ndooko mbala kakakanyiya Yeso dia mɔnyɔla ɛlɛmbɛ. Kaanga mbele kɔlamelo yande yakawela lohetsho oma le andja ɔnɛ, nde akayelaka nshi tshɛ ɛlɛmbɛ wosembwe wa Jehowa. Yema tshitshɛ la ntondo ka nyɔi kande, Yeso akewola ambeki ande dia andja wayowahetsha ndo vɔ. Ntatɛ l’etena kɛsɔ, ambeki wa Yeso wakadiɛnɛ la asui, koko waki la dihonga lo mbeya dia Ɔna Nzambi akadje andja otshumba.​—Jni. 15:19; 16:33; 17:16.

⁶ Diaha sho ndjatambiya l’andja ɔnɛ, sho pombaka ndjela ɛlɛmbɛ wosembwe wa Jehowa, oko wakasale Owandji aso. Laadiko dia sho ntona dia ndjatambiya l’awui wa pɔlitikɛ ndo w’atshunda wa l’andja ɔnɛ, sho pombaka nshika ntanga lo lɔkɛwɔ lawɔ la kɔlɔ. Sho mbɔsaka la nɛmɔ dako diele lo Jakɔba 1:21 diata ɔnɛ: “Nyonya mindo tshɛ ndo akambo wa kɔlɔ tshɛ, ndo nyetawɔ la memakana tshɛ wonamelo w’ɔtɛkɛta wakoka nyoshimbɛ.” Lo tshimbo ya wekelo ndo ya wɔtwɛlɔ wa lo nsanganya, sho kokaka nsala dia “wonamelo w’ɔtɛkɛta” w’akambo wa mɛtɛ monga lo timba ndo l’etema aso ndo hatototatɛ kaanga ntatɛ nkombola kɛnɛ kasha andja ɔnɛ. Ombeki Jakɔba akafunde ate: “Onde hanyeye dia lɔngɛnyi la l’andja ɔnɛ mbetɛka onto otunyi wa Nzambi? Ɔnkɔnɛ, onto tshɛ lalanga monga ɔngɛnyi w’andja ɔnɛ ekɔ lo ndjaetɛ otunyi wa Nzambi.” (Jak. 4:4) L’ɔtɛ wa dikambo sɔ, Bible totɛka la wolo tshɛ dia ndjelaka ɛlɛmbɛ wosembwe wa Jehowa ndo dia nkakitɔna la andja ɔnɛ.

⁷ Ɔtɛkɛta wa Nzambi tɔhɛmɔlaka diaha sho nsala awui wa nsɔnyi ndo wa mindo. Vɔ totɛka ɔnɛ: “Awui wa mindo wa dieyanelo ndo weho tshɛ wa mindo kana lokaki watodimɔmake kaanga nimɔma l’atei anyu, oko wahombadiɔ monga le ekilami.” (Ɛf. 5:3) Ɔnkɔnɛ, hatohombe mbetawɔ dia yimba yaso nkanyiya awui wa mindo, wa nsɔnyi kana wa kɔlɔ ndo hatohombe ntɛkɛta awui asɔ lo asawo aso. Lo nsala ngasɔ, tayɛnya dia sho nangaka ndjela ɛlɛmbɛ wa Jehowa wa pudipudi ndo wosembwe wendana la lɔkɛwɔ.

PUDIPUDI KA LO DEMBA

⁸ Laadiko dia pudipudi ka lo nyuma ndo ka lo lɔkɛwɔ, Akristo mbeyaka ohomba wa monga pudipudi lo demba. L’Isariyɛlɛ w’edjedja, Nzambi k’ekila akalɔmbaka dia mpango kawɔ mongaka pudipudi. Sho la wɔ pombaka mongaka pudipudi diaha Jehowa “mɛna ɛngɔ kɛmɔtshi ka kɔlɔ” le so.​—Eoh. 23:14.

⁹ Lo Bible, ekila la pudipudi ka lo demba kakatana efula. Ɛnyɛlɔ, Pɔɔlɔ akafunde ate: “Analengo wa ngandji, lam’ele tekɔ la alaka asɔ, nyɛsɔ toyaɛdia oma lo mindo tshɛ ya demba ndo ya yimba ndo toleke monga ekila lo wɔma wa Nzambi.” (2 Kɔr. 7:1) Diakɔ diele, Akristo w’apami ndo wa wamato pombaka nsala la wolo dia mongaka l’alemba wa pudipudi lo mbɔkaka ndo solaka ahɔndɔ mbala la mbala. Kaanga mbele awui wa lo wodja la wodja ntshikitana, mbala efula sho koka ntana savɔ ndo ashi wahombama dia monga l’alemba wa pudipudi ndo dia nshikikɛ dia anaso wekɔ pudipudi.

¹⁰ Lam’ele tekɔ lo nsambisha lo sɛkɛ, mbala efula sho mbeyamaka dimɛna l’ahole wodjashiso. Naka sho monga la luudu lele kɔmba, pudipudi ndo la kiongamu oyadi l’andja kana l’etei, kete ɔsɔ ekɔ tshondo y’esambishelo le asukanyi. Ɔsɔ ekɔ dikambo diahomba ase nkumbo tshɛ ndjasha lɔkɔ. Anangɛso pombaka ndjasha efula lo kɛnɛ kendana la luudu ndo la sɛkɛ dialɔ, lo mbeya dia sɛkɛ ndo luudu lalɔngɔsɔma dimɛna ekɔ esambishelo le anto akina. Nsala dui sɔ, kaamɛ la mbisha ɛnyɛlɔ l’akambo wa lo nyuma ekɔ djembetelo yɛnya dia ɛtɛ wa nkumbo wekɔ lo nɔmbɔla nkumbo yawɔ dimɛna. (1 Tim. 3:4, 12) Akadiyɛso vɔ la wɔ wekɔ l’ɔkɛndɛ wa mbidja yimba l’akambo asɔ, djekoleko l’etei ka luudu. (Tito 2:4, 5) Ana wetshama dimɛna vɔ la wɔ salaka dia vɔamɛ monga pudipudi ndo dia toshambrɛ tawɔ monga tɔkɔmba ndo pudipudi. Lo nsala ngasɔ, ase nkumbo tshɛ kambaka kaamɛ dia mongaka bɛnyɛlɔ dia pudipudi di’anto wakoka nsɛna l’andja w’oyoyo l’ɛlɔmbwɛlɔ ka Diolelo diaki Nzambi.

¹¹ Nshi nyɛ ekambi wa Jehowa efula kambaka la mituka, mitutu kana akalo dia ntshɔ lo nsanganya. L’ahole amɔtshi mutuka, mututu kana dikalo aya mɛtɛ ohomba efula l’esambishelo. Laasɔ, dihomɔ sɔ pombaka mongaka pudipudi ndo pombaka nɔngɔsɔmaka dimɛna. Mvudu yaso, mituka aso, mitutu ndo akalo aso pombaka mɛnya dia tekɔ l’atei w’ekambi wa Jehowa wa pudipudi ndo w’ekila. Ngasɔ mbahomba monga ndo tapa diaso di’esambishelo ndo Bible kaso.

¹² Ɔlɔtɔ aso ndo ɛnamelo kaso pombaka mbɔtɔnɛ l’atɔndɔ wa Nzambi. Ekɔ wolo dia sho ntshɔ dia tɛnana l’ɔnɛnɛ ɔmɔtshi naka takalɔtshi kɔlɔ kana lo yoho y’epakapaka. Sho pombaka ndeka mbidja yimba lo dikambo sɔ etena keso enyimpala wa Jehowa l’olimu w’esambishelo kana lo lɔyɛnga! Ɛnamelo ndo ahɔndɔ aso koka monga la shɛngiya lo woho wakoka anto akina mbɔsa ɔtɛmwɛlɔ wa Jehowa. Keema dimɛna mɛtɛ ndɔta lo yoho yaha la wɛdimo kana yanyangiya anto akina. (Mika 6:8; 1 Kɔr. 10:31-33; 1 Tim. 2:9, 10) Diakɔ diele, etena kayalɔngɔsɔlaso dia ntomba l’esambishelo kana dia ntshɔ lo nsanganya ya l’etshumanelo, ya l’otshimbedi kana lo nsanganya nkina, hatohombe mbohɛ kɛnɛ kata Afundelo lo dikambo dia pudipudi ka lo demba ndo di’ɛnamelo ka dimɛna. Sho nangaka mbisha Jehowa kɛnɛmɔ ndo mbotombolaka nshi tshɛ.

¹³ Woho akɔ waamɛ mbahombaso nsala etena kembolaso mbalasa kalɔmbɔla olimu aso l’andja w’otondo kana filialɛ kɛmɔtshi k’Ɛmɛnyi wa Jehowa. Tatohɛke dia lokombo Bɛtɛlɛ nembetshiyaka “Luudu la Nzambi.” Ɔnkɔnɛ, ɔlɔtɔ ndo lɔkɛwɔ laso pombaka monga oko etena katshɔso lo nsanganya lo Mbalasa ka Diolelo.

¹⁴ Kaanga etena kakɔkɔlaso demba, sho pombaka mbidja yimba l’ɔlɔtɔ ndo l’ɛnamelo kaso. Sho koka ndjambola ɔnɛ: ‘Onde layoka nsɔnyi nsambisha lo tshakitudi l’ɔtɛ w’ahɔndɔ wɔlɔtshimi?’

TƆKƐNYƆ NDO ƆKƆKWƐLƆ WA DEMBA WA DIMƐNA

¹⁵ Momuya ndo nkɛnya yema ekɔ ohomba dia monga la wɛdimo ndo la demba dia dimɛna. Mbala kɛmɔtshi Yeso akatɛ ambeki ande dia vɔ ntshɔ lo dihole dia diɛta dia vɔ ‘tomuya yema.’ (Makɔ 6:31) Diomuyelo ndo tɔkɛnyɔ t’amɛna kimanyiyaka dia sho nkɔkɔla demba dimɛna. Dui sɔ koka tokeketsha dia sho ntetemala l’olimu aso wa lushi la lushi.

¹⁶ Lam’ele weho wa tɔkɛnyɔ waya efula ɛlɔ kɛnɛ, Akristo pombaka mbeya nsɔna ndo nkɛnɛmɔla lomba l’oma le Nzambi etena kakɛnyawɔ. Kaanga mbele tɔkɛnyɔ tekɔ ohomba, tɔ bu dui dioleki ohomba lo lɔsɛnɔ. Vɔ tɔhɛmɔlaka dia “lo nshi y’ekomelo,” anto wayonga “anangi w’ɛngɛnɔngɛnɔ lo dihole dia monga anangi wa Nzambi.” (2 Tim. 3:1, 4) Efula k’awui wɔsawɔ ɛlɔ kɛnɛ oko tɔkɛnyɔ keema dimɛna le wanɛ walanga ndjela ɛlɛmbɛ wa Jehowa wosembwe.

¹⁷ Akristo wa ntondo wakahombe ntona mbekelo ya kɔlɔ y’anto wakasɛnaka la wɔ wakayangaka paka ɛngɛnɔngɛnɔ. L’ahole w’ase Rɔmɔ wa tɔkɛnyɔ, amendji wakangɛnangɛnaka etena kakawɛnaka woho wakasowaka anto akina. Awui wa ngala, otshulwelo wa dikila, ndo awui wa mindo wa dieyanelo mbakalekaka salema lo tɔkɛnyɔ takendaka anto efula, koko Akristo wa ntondo wakatonaka awui asɔ. Ɛlɔ kɛnɛ, efula ka tɔkɛnyɔ ta l’andja ɔnɛ tekɔ la weho w’awui wa ngasɔ ndo tɔ memulaka nsaki ya kɔlɔ le anto. Diakɔ diele, sho pombaka ‘mendaka dimɛna’ woho wakɛndakɛndaso ndo ntona weho tshɛ wa tɔkɛnyɔ ta kɔlɔ. (Ɛf. 5:15, 16; Os. 11:5) Ndo oyadi kaanga kɛnyɔ mɔtshi bu kɔlɔ, mbala efula awui wakoka mbeta lɛnɛ asalemayɔ koka monga waale efula.​—1 Pe. 4:1-4.

¹⁸ Ekɔ weho wa tɔkɛnyɔ tɔmɔtshi tele amɛna takoka Akristo nkɛnya. Anto efula kondjaka wahɔ etena kayelawɔ alako wa l’Afundelo ndo tokanyi tele la wɛdimo takoka tanema l’ekanda aso.

¹⁹ Tena dimɔtshi, nkumbo mɔtshi mbeyaka mbelamɛ laka osekawɔ ɔmɔtshi l’Okristo dia tetsha yema ya wenya kaamɛ. Kana anangɛso ndo akadiyɛso mbeyaka mbelamɛ lo fɛtɛ ka diwala kana lo woho okina wa fɛtɛ. (Jni. 2:2) Lo waaso asɔ, wanɛ weta anto vɔamɛ ndjaokaka dia vɔ mbahomba mɛmba ɔkɛndɛ wa kɛnɛ keta. Mbokɛmaka hwe dia, pombaka monga la yewo y’efula etena kelamɛ anto efula. Ɔngɛnɔngɛnɔ wonga lo fɛtɛ shɔ ambokonyaka anto amɔtshi dia ntamba elelo wendana la lɔkɛwɔ la dimɛna l’Okristo, lo ndɛ ndo lo nnɔ wanu lo yoho ya tshambandeko polo lo nsala awui akina wa kɔlɔ efula. Lo mbidja yimba l’awui asɔ, Akristo wele la shɛnɔdi wakɛnyi ohomba wa nkitshakitsha lofulo l’anto lelɛwɔ ndo nsala diaha fɛtɛ shɔ mbiviya amboleka. Naka wayosha anto wanu, kete pombaka nkamba la wɔ la wɛdimo. (Flpɛ. 4:5) Naka welo efula wayodjama dia nɔngɔsɔla tena diasangana Akristo sɔ lo yoho ya dimɛna ndo yakeketsha lo nyuma, kete aha mbo ya ndɛ la wanu mbayonga diangɔ dioleki ohomba.

²⁰ Ekɔ mɛtɛ dimɛna nongola anto. (1 Pe. 4:9) Etena kelɛso Akristo akina lakaso dia ndjɔlɛ yangɔ, dia ndjɔkɔkɔla demba kana dia ndjetsha wenya kaamɛ la wɔ, hatohombe mbohɛ wanɛ wakoka monga lo dihombo. (Luka 14:12-14) Naka wamboteta lo waaso wa ngasɔ, kete dionga diaso pombaka mbɔtɔnɛ la dako diele lo Makɔ 12:31. Mongaka nshi tshɛ dimɛna dia mɛnya lowando lo ɔlɔlɔ watosalɛ anto akina.

²¹ Akristo ngɛnangɛnaka weshasha w’efula w’oma le Nzambi ndo vɔ mbeyaka dia vɔ nkoka “ndɛ, nnɔ ndo ngɛnangɛna l’ɔtɛ wa olimu [awɔ] tshɛ wa wolo.” (Ond. 3:12, 13) Etena ‘kasalaso akambo tshɛ dia lotombo la Nzambi,’ oyadi wanɛ walongola ndo wanɛ walongolawɔ wayohɔka fɛtɛ shɔ l’ɔngɛnɔngɛnɔ lo woho wakatakeketshama lo nyuma.

AKAMBO WASALEMA LA KALASA

²² Ana w’Ɛmɛnyi wa Jehowa kondjaka wahɔ oma lo wetshelo w’ohomba walongolawɔ la kalasa. Etena kɔtɔwɔ kalasa, vɔ salaka la wolo dia mbeya mbadia ndo mfunda dimɛna. Awui amɔtshi wetshawɔ la kalasa koka monga ohomba efula le akɛnda etena kawesawɔ eyango wa lo nyuma. Lo ɛnɔnyi wɔtɔwɔ kalasa, vɔ pombaka nsala la wolo dia ‘mbohɔka Otungi awɔ wa Woke’ lo mbetshaka awui wa lo nyuma lo dihole dia ntondo.​—Ond. 12:1.

²³ Naka wɛ ekɔ Okristo wa dikɛnda wakɔɔtɔ kalasa, kete enda dimɛna diaha mbɔtɔ lɔngɛnyi lele bu ohomba l’akɛnda wa l’andja ɔnɛ. (2 Tim. 3:1, 2) Lam’ele Jehowa koshaka ekokelo kahombama, ekɔ akambo efula wakokayɛ nsala dia mbewɔ tɔsɛngiya t’andja ɔnɛ. (Os. 23:4; 91:1, 2) Ɔnkɔnɛ, kondja wahɔ oma lo toho tatokokɛ Jehowa, ko kɛsɔ ayonga ekokelo le yɛ.​—Os. 23:5.

²⁴ Dia vɔ kakitɔna l’andja ɔnɛ nshi yɔtɔwɔ kalasa, akɛnda efula wele Ɛmɛnyi wa Jehowa sɔnaka diaha ndjasha l’awui wasalema l’ɔkɔngɔ wa wenya wa kalasa. Mbeyaka monga wolo dia asekayɛ wa la kalasa ndo embetsha ayɛ nshihodia dikambo sɔ. Koko, ngɛnyangɛnya Nzambi mboleki ohomba. Kɛsɔ nɔmbaka dia wɛ nɔmbɔma la nkum’otema kayɛ kambetshama oma lo Bible ndo ndjashikikɛ diaha ndjatambiya lo tɔkɛnyɔ ta l’andja ɔnɛ ta shɛmanedi kana tɛnya ngandji k’otamanya ka wodja. (Ngal. 5:19, 26) Lo pokamɛka alako w’oma l’Afundelo w’ambutshi anyu w’Akristo ndo lo nkondja wahɔ oma lo lɔngɛnyi la dimɛna la l’etshumanelo, nyu akɛnda kokaka ndjela atɔndɔ wa Jehowa wosembwe.

OLIMU WA L’EMUNYI NDO LƆNGƐNYI

²⁵ Lo ndjela Afundelo, ewandji wa nkumbo mbele l’ɔkɛndɛ wa kotshaka ehomba wa nkumbo yawɔ. (1 Tim. 5:8) Koko oko wewɔ ekambi, vɔ mbeyaka di’olimu awɔ wa l’emunyi pombaka mbeta l’ɔkɔngɔ w’oweso wa wahɔ wa Diolelo. (Mat. 6:33; Rɔmɔ 11:13) Naka vɔ mamemaka Nzambi ndo ngɛnangɛnaka la diangɔ dia ndɛ ndo l’ahɔndɔ, kete vɔ wayewɔka ekiyanu ndo tolonga t’oma lo yoho ya lɔsɛnɔ ya ngandji ka lomombo la l’emunyi.​—1 Tim. 6:6-10.

²⁶ Akristo tshɛ wakayakimɔ le Nzambi wakamba olimu wa l’emunyi pombaka mbohɔka atɔndɔ wa l’Afundelo. Ndjakotshɛ ehomba aso la losembwe tshɛ, nembetshiyaka dia sho mbewɔ dia ndjasha lo ditshelo diɔnyɔla ɛlɛmbɛ wa Nzambi kana ɛlɛmbɛ wa wodja. (Rɔmɔ 13:1, 2; 1 Kɔr. 6:9, 10) Sho mbohɔka waale waya oma lo lɔngɛnyi la kɔlɔ. Oko weso asɔlayi wa Kristo, sho tonaka ndjatambiya l’awui w’okanda wahɔtɔnɛ l’ɛlɛmbɛ wa Nzambi, wɔnyɔla lomangemange laso l’Okristo kana wadja lonyuma laso lo waale. (Isa. 2:4; 2 Tim. 2:4) Ndo sho hatonge la diɔtɔnganelo l’otunyi w’ɔtɛmwɛlɔ wa Nzambi, mbuta ate “Babilɔna ka Woke.”​—Ɛny. 18:2, 4; 2 Kɔr. 6:14-17.

²⁷ Naka sho ndjelaka ɛlɛmbɛ wosembwe wa Nzambi, kete hatotokamba la lɔngɛnyi laso la teokrasi dia shoamɛ nkondja wahɔ kana ntɔla okanda aso otsha la ntondo. Oyango wasanganaso l’anto akina lo nsanganya y’Akristo, nsanganya ya weke, ele paka dia ntɛmɔla Jehowa. Tekɔ lo ndeshama lo mɛsa ande wa lo nyuma ndo tekɔ lo ‘keketshana.’ (Rɔmɔ 1:11, 12; Hɛb. 10:24, 25) Sho pombaka mbɔtɔka lo nsanganya shɔ paka dia awui wa lo nyuma ato.

TOLAME KAAMƐ K’OKRISTO

²⁸ Ɛlɛmbɛ wosembwe wa Jehowa wakandasha ekambi ande nɔmbaka nto dia vɔ “nkokɛ kaamɛ ka lo nyuma lo dimama dia wɔladi.” (Ɛf. 4:1-3) Lo dihole dia nyanga dia ndjangɛnyangɛnya vɔamɛ, onto l’onto nyangaka dia salɛ anto akina ɔlɔlɔ. (1 Tɛs. 5:15) Aha la taamu, yimba shɔ mbɛnayɛ l’etshumanelo kanyu. Oyadi lokoho laso la demba, wodja aso, dihole diele la so lo tshunda di’anto, ekondjelo kaso kana kalasa yakatɔtɔ, sho tshɛ nɔmbɔmaka l’ɛlɛmbɛ wosembwe wa woho akɔ waamɛ. Kaanga anto wa l’andja mɛnaka dikambo sɔ diatshikitanya ekambi wa Jehowa l’anto akina.​—1 Pe. 2:12.

²⁹ Dia ndeka mbidja dikako vɔlɛ l’ohomba wa kaamɛ, ɔpɔstɔlɔ Pɔɔlɔ akafunde ate: “Demba diekɔ 1 ndo nyuma kekɔ 1 oko wakanyelamɛ lo elongamelo 1 ka leeta lanyu; Nkumadiɔndjɔ 1, mbetawɔ 1, batisimu 1, Nzambi 1 lele She tshɛ, nde lele laadiko dia tshɛ oma lo tshɛ ndo lo tshɛ.” (Ɛf. 4:4-6) Kɛsɔ mɛtɛ tɔlɔmbaka dia sho monga kaamɛ lo eokelo ka wetshelo w’etatelo wa lo Bible ndo lo awui wa lotshimola dia sho mɛnya ɔnɛ sho mbeyaka lowandji la Jehowa laheme tshɛ. Lo mɛtɛ, Jehowa akasha ekambi ande ɔtɛkɛta wa pudipudi w’akambo wa mɛtɛ, waakimanyiya dia vɔ nkamba dihɛka lo dihɛka.​—Zɛf. 3:9.

³⁰ Kaamɛ ndo wɔladi wele l’etshumanelo k’Akristo wekɔ kiɔkɔ y’ekeketshelo le anto tshɛ watɛmɔla Jehowa. Tekɔ lo mɛna okotshamelo wa daka dia Jehowa di’ɔnɛ: “Dimi layowakitsha kaamɛ, oko ɛkɔkɔ lo lokoto.” (Mika 2:12) Sho pombaka nkokɛ kaamɛ kaso lo ndjelaka ɛlɛmbɛ wosembwe wa Jehowa.

³¹ Ɔngɛnɔngɛnɔ le wanɛ waketawɔma l’etshumanelo ka pudipudi ka Jehowa! Mbelamɛ lo lokombo la Jehowa ndeka kɛnɛ tshɛ kakokaso ndjahombia. Tolame diɔtɔnganelo dia nɛmɔ diasaso la Jehowa ndo tosale la wolo dia ndjelaka ɛlɛmbɛ ande wosembwe ndo tokeketsha anto akina dia vɔ la wɔ nsala dui sɔ.​—2 Kɔr. 3:18.