Apandisɛ
Diewoyelo le ambutshi wele Akristo:
Oko ambutshi, nsaki kanyu ele dia nkimanyiya ananyu wa ngandji dia vɔ mboka Jehowa ngandji ndo vɔ ndjakimɔ vɔamɛ le nde. Kakɔna kakokanyu nsala dia mbakimanyiya dia vɔ ndjalɔngɔsɔla dia batizama? Polo lo yɛdikɔ yakɔna yayowonga suke dia ntakola ena k’ohomba kɛsɔ?
Yeso akatɛ ambeki ande ate: “Nyetɛ anto wa lo wedja tshɛ ambeki, nyaabatize.” (Mat. 28:19) Lo ndjela dui sɔ, dui dia ntondo dialɔmbama di’onto batizama ele nde pombaka monga ombeki, mbuta ate aha tsho onto lashihodia ndo letawɔ wetshelo wa Kristo, koko onto layela ndo wetshelo akɔ dimɛna dimɛna. Ɔsɔ ekɔ dui diakoka kaanga ana weke akɛnda nsala.
Nyosha ananyu ɛnyɛlɔ ka dimɛna ndo nyakɔkɔmiyake wetshelo wa Jehowa. (Eoh. 6:6-9) Dui sɔ mendanaka ndo la nkamba la awui wele lo dibuku Kakɔna kakoka Bible tetsha? ndo Woho wa ntshikala lo ngandji ka Nzambi dia mbowaetsha wetshelo w’etatelo wa lo Bible, ndo mbalɔngɔsɔla dia vɔ kanaka yimba ndo nsɛna lo ndjela atɔndɔ wa lo Bible. Nyokimanyiya ananyu dia vɔ monga l’akoka wa nembetshiya dietawɔ diawɔ l’ɛtɛkɛta awɔ hita. (1 Pe. 3:15) Ewo ndo ekeketshelo kakondjawɔ oma le nyu ndo oma lo wekelo awɔ w’onto ndamɛ, oma lo ɔtɛmwɛlɔ wa lo nkumbo, nsanganya ya l’etshumanelo ndo oma lo lɔngɛnyi la dimɛna, ayowakimanyiya dia vɔ mpama polo lo batisimu ndo l’ɔkɔngɔ wa batisimu. Nyaakimanyiya dia vɔ ndjadjɛ eyango wa lo nyuma.
Tokedi 20:11 mbutaka ɔnɛ: “Kaanga ɔna mbeyamaka oma lo etsha ande, dia kana dionga diande diekɔ pudipudi ndo dimɛna.” Naa awui amɔtshi wayɛnya dia ɔna, oyadi pami kana womoto aya ombeki wa Yeso Kristo ndo ambokoka batizama?
Ɔna latahame dia batizama pombaka nkitanyiya ambutshi ande (ombutshi). (Ets. 5:29; Kɔl. 3:20) Etena kaki Yeso l’ɛnɔnyi 12, Bible mbutaka lo dikambo diande ɔnɛ: “Nde akakitanyiyaka [ambutshi ande].” (Luka 2:51) Eelo, aha nongamɛ dia ɔnayɛ monga kokele. Koko ɔna lakombola nongola batisimu pombaka nsala la wolo dia ndjela ɛnyɛlɔ ka Yeso ndo mbeyama oma l’okitanyiya ande otsha le ambutshi ande.
Nde ayɛnya nto dia nde ndjashaka lo wekelo w’akambo wa mɛtɛ wa lo Bible. (Luka 2:46) Onde ɔnayɛ kombolaka mbɔtɔ lo nsanganya ndo mbishaka kɔmatɛrɛ? (Os. 122:1) Onde nde ekɔ la nsaki ka mbadiaka Bible lushi la lushi ndo salaka wekelo w’onto ndamɛ?—Mat. 4:4.
Ɔna latahame otsha lo batisimu mbidjaka welo dia mbetsha wahɔ wa Diolelo lo dihole dia ntondo. (Mat. 6:33) Nde mbeyaka ɔkɛndɛ ande wa mbitɛ anto akina dietawɔ diande. Nde ndjashaka lo toho totshikitanyi t’esambishelo ndo nde hoke nsɔnyi dia mbutɛ embetsha ndo asekande wa la kalasa dia nde ekɔ Ɔmɛnyi wa Jehowa. Nde mbɔsaka ɛkɛndɛ wawoshawɔ lo losanganya la Lɔsɛnɔ ndo olimu la nɛmɔ efula.
Nde salaka nto la wolo dia namaka lɔkɛwɔ la pudipudi lo mbewɔ lɔngɛnyi la kɔlɔ. (Tok. 13:20; 1 Kɔr. 15:33) Kɛsɔ ayɛnama oma lo mishiki, filmɛ, dikongelo dia lo televiziɔ, tɔkɛnyɔ ta lo vidɛo ndo woho wakambande l’Ɛtɛrnɛtɛ.
Ana efula mbetawɔka welo wa l’otema ɔtɔi wadja ambutshi awɔ, lo mbetawɔ akambo wa mɛtɛ ndo lo nkotsha kɛnɛ kalɔmbama dia nongola batisimu etena kekewɔ akɛnda. Jehowa anyɔtshɔkɔlɛ lo woho wakimanyiyanyu ananyu dia vɔ nkotsha dui di’ohomba sɔ lo diɔtɔnganelo dia lam’asawɔ la Jehowa.
Diewoyelo le opandjudi wahatabatizama:
Nkamba lo etshumanelo oko opandjudi wahatabatizama, ekɔ diɛsɛ dia dimɛna. Wɛ kokaka mandɔma lo menda ohamelo wa lo nyuma wamboyosala. Wɛ ambokondja ewo ka mɛtɛ ka Nzambi lo tshimbo ya wekelo w’Ɔtɛkɛta ande ndo aya la mbetawɔ lo alaka ande.—Jni. 17:3; Hɛb. 11:6.
Ondo la ntondo ka wɛ ntatɛ mbeka l’Ɛmɛnyi wa Jehowa, wɛ aki la diɔtɔnganelo l’ɔtɛmwɛlɔ okina kana komonga ndooko la diɔtɔnganelo l’ɔtɛmwɛlɔ tshɛ. Kana ondo wɛ akasalaka olimu ɔmɔtshi wahɔtɔnɛ la atɔndɔ wa lo Bible. Koko kakianɛ wɛ ambɛnya mbetawɔ kayɛ lo ndjatshumoya, lo monga la lonyangu l’efula l’ɔtɛ w’akambo wa kɔlɔ wakayasalaka ntondo ndo lo nkadimola otema, mbuta ate ntona akambo wa kɔlɔ wakayasalaka ndo amboyashikikɛ dia nsala kɛnɛ kele ɔlɔlɔ lo washo wa Nzambi.—Ets. 3:19.
Lo wedi okina, ondo wɛ akeye efundelo w’ekila, “oma ko kiɛndakɛnda yayɛ.” Ndo wɛ akayalame diaha monga la lɔkɛwɔ lahɔtɔnɛ l’Akristo ndo diaha nsala pɛkato ya weke. (2 Tim. 3:15) Wɛ akeke dia nshika ntanga la ntondo ka tɔsɛngiya t’oma le asekayɛ ndo oma lo awui akina wakonya onto lo nsala kɛnɛ kele kɔlɔ lo washo wa Jehowa. Wɛ akɛnya mbetawɔ kayɛ lo nkukutɛ ɔtɛmwɛlɔ wa mɛtɛ ndo lo mbewoya anto akina dietawɔ diayɛ. Wɛ akeke woho wa nkamba olimu w’Okristo. Kakianɛ wɛmɛ ambɔsa yɛdikɔ ya kambɛ Jehowa oko opandjudi wahatabatizama.
Oyadi wɛ aketshama mboka ya Jehowa aya opalanga kana wɛ akeke mboka ya Jehowa oma ko kiɛndakɛnda yayɛ, kakianɛ wɛ oyanga ntakola wanya akina ahende lo ohamelo ayɛ wa lo nyuma, wanya akɔ ko: Ndjakimɔ ndo batisimu. Dia wɛ ndjakimɔ le Jehowa, wɛ pombaka ndjasukanya la nde lo dɔmbɛlɔ ko mbotɛ yɛdikɔ yamboyɔsa wɛmɛ dia mbomamemaka paka ndamɛ oto pondjo pondjo. (Mat. 16:24) Dia mɛnya dia wɛ amboyakimɔ, wɛ pombaka batizama lo ashi. (Mat. 28:19, 20) Oma lo ndjakimɔ ndo lo batisimu kayɛ, wɛ komaka okambi wa Jehowa Nzambi wambolowɔma. Ɔsɔ mɛtɛ ekɔ diɛsɛ dia diambo efula!
Koko oko wakayeke lo wekelo ayɛ wa Bible, wɛ ayohomana l’ekakatanu efula. Ohɔ dia yema tshitshɛ l’ɔkɔngɔ wa batisimu kande, “nyuma kakalɔmbɔla Yeso otsha l’oswe dia Diabolo toohemba.” (Mat. 4:1) L’ɔkɔngɔ wa batisimu kayɛ oko ombeki wa Kristo, wɛ koka nongamɛ ehemba ekina. (Jni. 15:20) Vɔ wayoya lo toho totshikitanyi. Wɛ mbeyaka ndɔshama oma le nkumbo kayɛ. (Mat. 10:36) Wɛ mbeyaka sɔkama oma le asekayɛ wa la kalasa, wa l’olimu ndo oma le angɛnyi ayɛ w’edjedja. Koko ohɔka nshi tshɛ ɛtɛkɛta wa Yeso wele lo Makɔ 10:29, 30 wata ɔnɛ: “Lo mɛtɛ kanyotɛmi nte, ndooko onto lakatshike luudu kana anango kana akadiyɛnde kana nyango kana she kana ana kana dikambɔ l’ɔtɛ ami ndo l’ɔtɛ wa lokumu l’ɔlɔlɔ, lahatokondja mvudu, anango, akadiyɛnde, nyango, ana ndo dikambɔ mbala 100 l’etena kɛnɛ kaamɛ l’ɛhɛnyɔhɛnyɔ ko lo dikongɛ di’akambo diayaye lɔsɛnɔ la pondjo.” Ɔnkɔnɛ tetemala nsala la wolo dia tshikalaka suke la Jehowa ndo dia nsɛna lo yoho yɔtɔnɛ l’ɛlɛmbɛ ande wosembwe.
Naka wɛ olanga batizama, kete ewoya ɔnɔmbɔdi w’olui wa dikumanyi. Dikumanyi wayɔkɛtshanya la yɛ ambola wayela diewoyelo nɛ dia nshikikɛ kana wɛ ambokotsha kɛnɛ kalɔmbama dia batizama. Wɛ mbeyaka ntatɛ la mvusola ambola akɔ wɛmɛ lo ekongelo kayɛ ka wekelo w’onto ndamɛ wa mbala la mbala.
Lam’alɔngɔsɔlayɛ ɛkɛtshanyelo ɛnɛ, tshungola etena ka kakana yimba lo avɛsa w’oma l’Afundelo wofundjiwɔ lɔkɔ. Wɛ mbeyaka mɛna ɔlɔlɔ mfunda nɔtɛ yayɛ hita lo dibuku nɛ ndo lo akatshi akina. Wɛ mbeyaka nkamba la nɔtɛ shɔ ndo mbifola dibuku nɛ etena kakɛtshanyayɛ la dikumanyi. Naka wɛ ekɔ la okakatanu dia nshihodia ambola amɔtshi, kete tengengake dia nyanga ekimanyielo oma le onto leka la yɛ Bible kana oma le dikumanyi.
Lo ɛkɛtshanyelo wayoyosala la dikumanyi, toyangake dia mbisha ekadimwelo w’etale kana wa lokandjakandja lo ambola. Mbala efula, ayoleka dimɛna wɛ mbisha okadimwelo wa mondo ndo wasembɔ tɔɔ lo dikambo lo ɛtɛkɛta ayɛ hita. Lo ambola efula, ayonga nto ohomba dia mbisha divɛsa ɔtɔi kana avɛsa ahende wa lo Bible wɛnya kanyi ya l’Afundelo yele lo okadimwelo ayɛ.
Naka wɛ atonge la ewo kahombama ka wetshelo w’etatelo wa lo Bible, kete dikumanyi wayosala woho wa wɛ nkondja ekimanyielo ka wɛ monga la akoka wa mɛnya lo ɛtɛkɛta ayɛ hita dia wɛ oshihodia Afundelo dimɛna ndo ayoyokotsha kɛnɛ kalɔmbama dia ndjobatizama l’ɔkɔngɔ.
[Diewoyelo le dikumanyi dia l’etshumanelo: Alako wendana la woho wa nkɛtshanya la wanɛ walanga batizama tanemaka lo lɛkɛ 208-212.]