Ɔkɛtshanyelo w’ekomelo la wanɛ walanga batizama

Mbala efula, anto batizamaka lo nsanganya ya weke y’Ɛmɛnyi wa Jehowa. L’ekomelo ka sawo dia batisimu, ɔtɛkɛtshi ayɔlɔmba wanɛ walanga batizama dia memala ndo dia nkadimola ambola ahende wayela anɛ la dui dia wolo:

1. Onde wɛ akayatshumoya oma lo pɛkato yayɛ, akayakimɔ le Jehowa ndo aketawɔ panda kasha Jehowa lo tshimbo ya Yeso Kristo?

2. Onde wɛ ambomana mfundo ɔnɛ batisimu kayɛ mɛnyaka dia wɛ aya Ɔmɛnyi wa Jehowa ndo aya l’okongamelo wa Jehowa?

Nkadimola ɔnɛ eelo lo ambola anɛ mbele “wotelo wa lo sɛkɛ” wa mbetawɔ kele la wanɛ walanga batizama l’oshinga w’etshungwelo, ndo djembetelo yɛnya dia wamboyakimɔ la tshondo le Jehowa. (Rɔmɔ 10:9, 10) Wanɛ walanga batizama pombaka takanyi yimba ndo talɔmbi ntondo lo dikambo dia ambola asɔ dia vɔ ndjokadimola lo ndjela dietawɔ diawɔ hita.

Onde wɛ amboyakimɔka wɛmɛ le Jehowa lo dɔmbɛlɔ, lo mbolaka dia mbɔtɛmɔlaka paka ndamɛ oto ndo lo nsala dia lolango lande monga dui dioleki tshɛ ohomba lo lɔsɛnɔ layɛ?

Onde kakianɛ wɛ amboshikikɛ dimɛna dia wɛ pombaka batizama aha la ntshimbatshimba?

Naa ɔlɔtɔ wakoka lo batisimu? (1 Tim. 2:9, 10; Jni. 15:19; Flpɛ. 1:10)

Sho pombaka ndɔta ɔlɔtɔ wele la “wɛdimo ndo la yimba y’ɔlɔlɔ” dia mɛnya dia sho tekɔ lo “mamema Nzambi.” Ɔnkɔnɛ, wanɛ wayobatizama hawohombe ndɔta ahɔndɔ wɔkawɔ ashi wasanga demba kana ahɔndɔ wele la efundelo w’ase andja ɔnɛ kana la waa slɔga y’ase okanda. Vɔ pombaka ndɔta ahɔndɔ w’amɛna, wa pudipudi ndo wakoka lo ndjela dihole diatanemawɔ.

Dionga diakɔna diahomba onto monga la diɔ etena kabatizamande? (Luka 3:21, 22)

Batisimu ka Yeso ekɔ ɛnyɛlɔ ka batisimu k’Akristo ɛlɔ kɛnɛ. Nde akeyaka dia batisimu ekɔ nna di’ohomba efula ndo kɛsɔ akɛnama lo dionga ndo lo etsha ande. Ɔnkɔnɛ, dihole dia batisimu hadiohombe monga dihole dia nsala tɔsɛkɛsɛkɛ, tɔkɛnyɔ, dia nsala osale, kana weho ekina w’awui wakoka nanya kɛnɛmɔ k’efula kele la diaaso sɔ. Okristo w’oyoyo hahombe ngɛnangɛna lo yoho ya kɔlɔ yele oko onto lambodja otshumba ɔmɔtshi wa woke. Kaanga mbele batisimu ekɔ diaaso di’ɔngɛnɔngɛnɔ, ɔngɛnɔngɛnɔ ɔsɔ pombaka mɛnyama lo yoho ya kɛnɛmɔ.

Ngande wele sanganaka mbala la mbala kaamɛ l’etshumanelo ayokokimanyiya dia nkotsha ndjakimɔ kayɛ le Jehowa?

L’ɔkɔngɔ wa batisimu kayɛ, lande na kele ayonga ohomba wɛ ntetemala monga la ekongelo ka dimɛna ka wekelo w’onto ndamɛ ndo sambishaka mbala la mbala?

ALAKO LE DIKUMANYI DIA L’ETSHUMANELO

Etena kewoya opandjudi wahatabatizama dia nde nangaka batizama, pombaka mbokeketsha dia nde mvusola la yambalo tshɛ “Ambola wendana la wanɛ walanga batizama,” watanema lo lɛkɛ 185-207 la dibuku nɛ. Nde pombaka nkotola yambalo yande lo “Diewoyelo le opandjudi wahatabatizama,” diotate lo lɛkɛ 182, dialembetshiya woho wakokande nɔngɔsɔla ɛkɛtshanyelo la dikumanyi. Oko wotamidiɔ lɛkɔ, onto lalanga batizama mbeyaka nkamba la nɔtɛ yande yakandafundji lo dikatshi dikina ndo mbeyaka mbifola dibuku diande wonya wa ɛkɛtshanyelo. Koko, keema ohomba w’onto ɔmɔtshi mvusola l’onto lalanga batizama ambola akɔ la ntondo ka nde mpomana la dikumanyi.

Ɔnɛ tshɛ lalanga batizama pombaka mbewoya ɔnɔmbɔdi w’olui wa dikumanyi. L’ɔkɔngɔ w’onto layanga batizama nkondja etena ka mvusola “Ambola wendana la wanɛ walanga batizama,” ɔnɔmbɔdi w’olui wa dikumanyi ayombola onto akɔ kana nde akayakimɔ le Jehowa lo dɔmbɛlɔ dia nsala lolango lande. Naka onto akayakimɔ, ɔnɔmbɔdi w’olui wa dikumanyi ayɔsa tɛdikɔ dia dikumanyi dihende nkɛtshanya la onto akɔ “Ambola wendana la wanɛ walanga batizama”. Dikumanyi diotshikitanyi pombaka sɔnama dia nkɛtshanya la nde tenyi diakɔ dihende. Keema ohomba nkonga dia paka etena kewoyawɔ datɛ dia losanganya lɔmɔtshi la woke ko ndjosala ɛkɛtshanyelo ɛsɔ.

Tena efula, tenyi diakɔ pende koka sɛdingɔma mbala hiende lo edja ka wonya a tango oko ɔtɔi lo etenyi la etenyi, koko ndooko kɔlɔ ndekanya yema naka ekɔ ohomba. Etenyi tshɛ pombaka ntatɛ ndo komiyama la dɔmbɛlɔ. Onto lalanga batizama kana dikumanyi hawohombe mbeta la ambola lowango lowango etena kasɛdingɔmawɔ. Dikumanyi diambɔsɔnama dia nsala ɔkɛtshanyelo ɔsɔ pombaka mbetɛ dui sɔ lo dihole dia ntondo l’ekongelo kawɔ.

Mbala efula ndeka dimɛna mvusola ambola la onto l’onto lalanga batizama, koko aha lo olui. Etena kasalawɔ dia onto lalanga batizama nkadimola lo dimbola tshɛ, dikumanyi wayoshikikɛ woke woke wa eokelo kande ndo kɛsɔ ayonya taamu tshɛ dia mbeya kana nde koka batizama. Ndo nto, onto layanga dia batizama koka ndeka ntɛkɛta aha l’okakatanu naka nde ekɔ ndamɛ. Koka nkɛtshanya la wadi la omi mbala ɔtɔi.

Naka onto lalanga batizama ekɔ kadiyɛso, kete ɛkɛtshanyelo pombaka salema lo dihole diakoka anto akina mbowaɛnaka koko aha vɔ mboka kɛnɛ katawɔ. Naka ekɔ ohomba dia ekumanyi ntshɔ l’onto okina, kete nde pombaka ntshɔ l’ekumanyi kɛmɔtshi kana okambi wakimanyiya, lo ndjela etenyi kasɛdingolawɔ, oko wɛnyamidiɔ l’odingɔ wayela.

Lo tshumanelo diele bu la dikumanyi efula, ekambi wakimanyiya wele l’akoka, wele l’ekanelo ka yimba ka dimɛna ndo la shɛnɔdi mbeyaka nsɛdingola la onto l’onto ambola wa batisimu wele lo “Etenyi 1: Waetawɔ w’Okristo.” Paka dikumanyi mbahomba nsɛdingola “Etenyi 2: Lɔsɛnɔ l’Okristo.” Naka etshumanelo bu la anangɛso efula wakotsha kɛnɛ kalɔmbama, kete vɔ pombaka mbutɛ omendji w’otshimbedi dia nde nshikikɛ kana etshumanelo kele suke koka mbakimanyiya.

Naka onto lalanga batizama eke dikɛnda, kete ombutshi (kana ambutshi) ande wele ambetawudi pombaka monga laawɔ lo tenyi di’ɔsɛdingwelo. Naka hakoke dia ombutshi (kana ambutshi) ande monga laawɔ, kete dikumanyi pende (kana ekumanyi l’okambi wakimanyiya, ndjelanaka la etenyi kayɔsɛdingɔma) pombaka nsɛdingola la nde tenyi diakɔ tshɛ.

Dikumanyi pombaka nshikikɛ dia kana onto lahomba batizama aya la eokelo kakoka ka wetshelo w’etatelo wa lo Bible. Ndo nto vɔ pombaka nshikikɛ dia kana nde mbɔsaka akambo wa mɛtɛ la nɛmɔ efula ndo nɛmiyaka okongamelo wa Jehowa lo yoho yahombama. Naka onto akɔ hashihodia wetshelo w’etatelo wa lo Bible, kete dikumanyi wayɔsa tɛdikɔ ta nde nkondja ekimanyielo kahombama dia nkotsha kɛnɛ kalɔmbama ko nde ndjobatizama l’ɔkɔngɔ. Anto akina mbeyaka monga l’ohomba wa mbatshikɛ etena ka vɔ nyomoleka mbɔsa olimu w’esambishelo la nɛmɔ kana ka nkitanyiya tɛdikɔ ta l’okongamelo. Dikumanyi pombaka mbeya nkahanya ambola lo wonya wa ntango oko ɔtɔi lo ɔkɛtshanyelo tshɛ wele lo etenyi la etenyi dia mbeya nshikikɛ kana onto akɔ aya suke dia batizama. Kaanga mbele ambola amɔtshi mbeyaka mbɔsa etena k’otale ko akina ka tshitshɛ, pombaka mvusola ambola tshɛ.

Dikumanyi diakalongola ɔkɛndɛ wa nkɛtshanya ambola la onto lalanga batizama wayosangana l’ɔkɔngɔ wa etenyi ka hende dia mbɔsa yɛdikɔ ya kana koka mbetawɔ di’onto akɔ batizama kana bu. Dikumanyi hawohombe mbohɛ akambo wakete lo lɔsɛnɔ l’onto, akoka ande ndo awui akina wendana l’onto tshɛ. Sho ndjashaka le wanɛ wambokadimola etema awɔ otsha le Jehowa ndo wamboshihodia wetshelo w’etatelo wa lo Bible. Oma l’ekimanyielo kayɛ ka la ngandji, wanɛ walanga batizama wayoyalɔngɔsɔla dimɛna dia nkotsha ɔkɛndɛ awɔ w’ohomba w’ekambi wa lokumu l’ɔlɔlɔ.

Oma laasɔ, ekumanyi ɔtɔi kana dikumanyi diakɔ tshɛ dia l’atei wa wanɛ wakalongola ɔkɛndɛ pombaka mɛnana la onto akɔ ko mbotɛ dia kana nde kotshaka kɛnɛ kalɔmbama dia batizama kana bu. Naka onto akɔ kotshaka kɛnɛ kalɔmbama, kete dikumanyi pombaka mvusola la nde “Ɔkɛtshanyelo w’ekomelo la wanɛ walanga batizama” watanema lo lɛkɛ 206-207. Naka onto lalanga batizama atashidiya mbeka abuku anɛ: Bible tetsha ndo Ntshikala lo ngandji ka Nzambi, kete dikumanyi pombaka mbokeketsha dia nde nsala dikambo sɔ l’ɔkɔngɔ wa batisimu. Nyewoya ɔnɛ layanga batizama dia datɛ diande dia batisimu diayofundama lo Fishi k’olimu w’opandjudi wa lo etshumanelo. Nyowohole dia dikumanyi mbɔsaka awui w’oma lo fishi kɛsɔ dia nkimanyiya okongamelo dia mbeya woho wakambema elimu wa lo nyuma w’Ɛmɛnyi wa Jehowa wa l’andja w’otondo ndo dia opandjudi ndjasha l’awui wa lo nyuma ndo nongola ekimanyielo ka lo nyuma. Laadiko dia laasɔ, dikumanyi koka mbohola apandjudi w’eyoyo dia sho kambaka l’awui tshɛ wendana l’onto ndamɛ lo ndjela Ɛlɛmbɛ wendana l’awui wa sheke w’Ɛmɛnyi wa Jehowa l’andja w’otondo, watanema lo jw.org. Ɔkɛtshanyelo ɔsɔ pombaka mbɔsa paka minitɛ dikumi kana l’ɛse.

Ɔnɔnyi ɔtɔi l’ɔkɔngɔ w’opandjudi nongola batisimu, dikumanyi pende pombaka nsangana kaamɛ la nde dia mbosha ekeketshelo ndo mbokimanyiya la alako. Ekumanyi ɔtɔi l’atei wa dikumanyi sɔ pombaka monga omendji w’olui wende. Naka onto akɔ eke dikɛnda, kete ayonga dimɛna dia ombutshi (kana ambutshi) ande wele ambetawudi monga laawɔ. Ɔkɛtshanyelo ɔsɔ pombaka monga wa dimɛna ndo wakeketsha. Dikumanyi wayɔkɛtshanya la nde dikambo diendana la ohamelo ande wa lo nyuma ndo mbosha alako w’eshika wendana la woho wakokande ntetemala nama mbekelo yande y’amɛna yendana la wekelo w’onto ndamɛ, wadielo wa Bible wa lushi la lushi, ɔtɛmwɛlɔ wa lo nkumbo wa lomingu la lomingu, wɔtwɛlɔ wa nsanganya ndo woshelo wa kɔmatɛrɛ ndo olimu w’esambishelo wasalema lomingu tshɛ. (Ɛf. 5:15, 16) Naka nde atashidiya abuku anɛ: Bible tetsha ndo Ntshikala lo ngandji ka Nzambi, kete dikumanyi pombaka ndjakongɛ dia onto ɔmɔtshi mbokimanyiya dia nsala dikambo sɔ. Dikumanyi pombaka mbokeketsha la waasaso ndo la ngandji tshɛ. Mbala efula vɔ pombaka mbosha alako wendana la dikambo ɔtɔi kana ahende kete ambokoka.