ETENYI 3
Lonyangu—Etena kongaso la dikambo dia ‘nyangɛ onto okina’
“Kadiyɛso kɛmɔtshi ka l’etshumanelo keemi, akamamatanyɛ ɔnɛ lakave akuta ande. Anto akina wa l’etshumanelo wakeye dikambo sɔ, ko wakatatɛ mbeta lo wedi ande. L’ɔkɔngɔ w’etena kɛmɔtshi, kadiyɛso kakɔ akayombutɛ ɔnɛ nde akayeya diaha dimi mbakave. Kaanga mbakandanɔmbɛ edimanyielo, lakɔshi yɛdikɔ ɔnɛ hambodimanyiyaki pondjo lo menda kɛnɛ kakandasalɛ.”—Linda.
ONDE ndo wɛ mbayaoka oko Linda, lakanyange efula l’ɔtɛ wa kɛnɛ kakoosalɛ osekande ombetawudi? Lonyangu ko, anto amɔ wakanyange efula l’ɔtɛ wa ditshelo di’anto akina polo ndo mbetawɔ dia dui sɔ monga la shɛngiya l’akambo awɔ wa lo nyuma. Onde ngasɔ mbediɔ ndo lo dikambo diayɛ?
Onde onto ɔmɔtshi koka “tokakitola oma lo ngandji ka Nzambi”?
Lo mɛtɛ, sho mbeyaka mɛna wolo dimanyiya osekaso ombetawudi lambotosalɛ kɔlɔ. Laadiko dia laasɔ, Akristo pombaka mbokana ngandji lam’asawɔ. (Joani 13:34, 35) Naka osekaso ombetawudi mbakatosalɛ kɔlɔ, kete lonyangu ndo kandji koka ndeka monga efula.—Osambu 55:12.
Koko, Bible mɛnyaka dia lo tena dimɔtshi, Akristo koka ‘nyangiyana’ lam’asawɔ. (Kɔlɔsayi 3:13) Kaanga mbediɔ ngasɔ, naka dui dia ngasɔ diambokokomɛ, wɛ koka monga la yema y’okakatanu dia dikandola. Onde ekɔ dui dimɔ diakoka tokimanyiya? Tɔsɛdingole atɔndɔ asato wa l’Afundelo:
Shɛso lele l’olongo mbeyaka dikambo tshɛ. Jehowa mɛnaka kɛnɛ tshɛ kasalema, mbidja ndo awui wa wɛngiya watokomɛ ndo etombelo wa kɔlɔ woonga la wɔ. (Hɛbɛru 4:13) Diakɔ diele, Jehowa nyangaka etena kɛnande tasowa. (Isaya 63:9) Nde hetawɔki pondjo dia “asui kana lɔkɔnyɔ,” dui dikina, kana okambi ande okina tokakitola “oma lo ngandji ka Nzambi.” (Rɔmɔ 8:35, 38, 39) Shi sho tshutshuyamaka dia nsala woho akɔ waamɛ, mbuta ate aha mbetawɔ dia dui dimɔtshi kana onto ɔmɔtshi tokakitola la Jehowa?
Dimanyiya halembetshiya ndjiha washo lo dui diakɔ. Etena kadimanyiyaso wanɛ wotosale kɔlɔ, dui sɔ halembetshiya diɔsa oko kiambokambo y’anyanya, mbisha tɛkɛ nɛndɛ kana minya washo oma lo kɔlɔ kotosalewɔ. Tohɔ dia, Jehowa hetawɔ pondjo pɛkato, koko nde todimanyiyaka yɔ naka nde ekɔ l’ɔkɔkɔ w’oshika wa nsala dui sɔ. (Osambu 103:12, 13; Habakuka 1:13) Etena katokeketshande dia dimanyiya anto akina, Jehowa tɔlɔmbaka dia sho mbookoya. Nde ‘hatolamaka kumbɛkumbɛ pondjo.’—Osambu 103:9; Mateo 6:14.
Sho kondjaka wahɔ lo ntona dia namanɛ tokumbɛkumbɛ. Lo ngande? Ohokana yimba la dui nɛ. Wɛ ambɔtɔngɔna dive diele la kilɔ ondo ngana tsho, ko wɛ ambodieda l’olongo la lonya ɔtɔi. Ondo wɛ honga l’okakatanu wa memɛ dive diakɔ l’edja ka minitɛ ngana tsho. Ko onde wɛ koka nsala dikambo sɔ l’edja k’etena k’otale? L’edja ka ngande kakokayɛ memɛ dive diakɔ—onde l’edja ka minitɛ mɔtshi? wonya a tango? kana edja efula? Aha la taamu, naka wɛ memɛ edja, kete lonya layɛ layɔla yɔɔ! Lo mɛtɛ, wotsho wa dive sɔ hawototshikitana. Koko lo yɛdikɔ yataleke minitɛ mbeta, mbataleke wotsho nyɔngɔmɛ. Woho akɔ waamɛ mbediɔ lo kɛnɛ kendana la tokumbɛkumbɛ. Edja katataleke nama tokumbɛkumbɛ kaanga t’awui wa totshitshɛ, mbatataleke ndjasalɛ kɔlɔ. Diakɔ diele, Jehowa tokeketshaka diaha namanɛ tokumbɛkumbɛ. Mbokɛmaka hwe dia, ntshika dia namanɛ tokumbɛkumbɛ ekɔ dia wahɔ aso hita.—Tukedi 11:17.
Sho kondjaka wahɔ lo ntona dia namanɛ tokumbɛkumbɛ
“Lakokaka oko Jehowa ndamɛ mbakatɛkɛtaka la mi”
Kakɔna kakakimanyiya Linda di’aha nama tokumbɛkumbɛ l’ɔtɛ wa kɛnɛ kakoosalɛ osekande ombetawudi? Awui efula wakookimanyiya, ɛnyɛlɔ nde akakane yimba la ɛkɔkɔ wa l’Afundelo watotshutshuya dia dimanyiyana. (Osambu 130:3, 4) Linda akatshutshuyama dia mbeya ɔnɛ naka sho dimanyiya anto munga yatosalɛwɔ, kete Jehowa ayotodimanyiya ndo sho lawɔ. (Ɛfɛsɔ 4:32–5:2) Lo kɛnɛ kendana la woho wakonge tokanyi tɔsɔ la shɛngiya le nde, nde mbutaka ɔnɛ: “Lakokaka oko Jehowa ndamɛ mbakatɛkɛtaka la mi.”
L’ɔkɔngɔ diko, Linda akayotshika dia namanɛ tokumbɛkumbɛ. Nde akadimanyiya kadiyɛso kakɔ l’otema ɔtɔi ndo ɛlɔ kɛnɛ, vɔ ahende waya angɛnyi wa ma ma. Linda akayɔsa yɛdikɔ ya ntetemala kambɛ Jehowa olimu. Onga l’eshikikelo ɔnɛ Jehowa nangaka kokimanyiya dia wɛ nsala woho akɔ waamɛ.