Alembe waki Jehowa wa wolo

Bɛnɛ-Hadada, nkumekanga ka Suriya akatetemala ndɔsha Isariyɛlɛ. Koko mbala tshɛ, omvutshi Elisha akahɛmɔlaka nkumekanga k’Isariyɛlɛ, diakɔ diele nde akanya demba. Bɛnɛ-Hadada akɔshi yɛdikɔ ya munda Elisha la wolo. Nde akeye dia Elisha aki lo osomba wa Dɔtana, diakɔ diele nde akatome alembe w’ase Suriya lɛkɔ dia towonda.

Ase Suriya wakakome la Dɔtana l’otsho. La wedi a pindju, okambi waki Elisha akatombe l’andja ko akɛnyi dia osomba wakadingami l’olui a woke w’alembe. Nde akandama la wɔma ndo akate la dui dia wolo ate: ‘Elisha, ahombaso nsala?’ Elisha akokadimola ate: ‘Wanɛ wele kaamɛ la so ndeka wanɛ wele kaamɛ la wɔ efula.’ L’etena kɛsɔ, Jehowa akasale dia okambi waki Elisha mɛna dia akona tshɛ wa l’omamu w’osomba wakalole la mfalasa ndo la pusupusu ya ta ya dja.

Etena kakayange asɔlayi w’ase Suriya munda Elisha, nde akalɔmbɛ ate: ‘Jehowa le, lam’alangɛ etɛwɔ totshungu.’ Mbala kakɔ ɔtɔi, asɔlayi kombeya dihole diakiwɔ kaanga mbakawɛnaka. Elisha akatɛ asɔlayi ate: ‘Nyekɔ lo osomba wa kɔlɔ. Nyondjele, ko layonyɔtɔla le onto latanyayange.’ Vɔ wakatayelaka Elisha lo mboka k’otsha la Samariya lɛnɛ akadjasɛka nkumekanga k’Isariyɛlɛ.

Paka l’ɔkɔngɔ mbakayeyaka ase Suriya lɛnɛ akiwɔ. Nkumekanga k’Isariyɛlɛ akambola Elisha ate: ‘Ndjake anto anɛ?’ Onde Elisha akakambe la diaaso sɔ dia nshidiya l’anto wakatawoyangaka dia mbosalɛ kɔlɔ? Ndooko. Elisha akawotɛ ate: ‘Towadiakake. Shawɔ diangɔ dia ndɛ ndo tshikawɔ watshu.’ Ko nkumekanga akaasalɛ dambo dia woke efula ndo akaakimɔ.