Elisha akɛnyi pusupusu ya dja—Onde ndo wɛ?

Ase Suriya wakatshanya omvutshi waki Nzambi Elisha ndo wakayelana la nde polo suke l’osomba wa Datana. Nkumekanga k’ase Suriya akatome nyemba nyemba y’alembe la falasa, la pusupusu ndo l’ambahemi ayɔ l’otsho dia vɔ todinga osomba wa Datana. Dia tokoma la pindju, alembe ande wakashile nyinga osomba w’otondo.​—2 Khum. 6:13, 14.

Etena kakatombe okambi waki Elisha l’andja ndo kakandɛnyi alembe, nde akafɔnya dia wayanga munda omvutshi Elisha. Nde akate la wɔma ate: “Yee! Khumemi, kayututsha na?” Elisha akookadimola ate: “Tukaki woma, ne dia wane weli la su, ndeka waku weli la wo efula.” Oma laasɔ, omvutshi akalɔmbɛ ate: “[Jehowa] li, lambukosengasenga nti: Udihuli ashu w’ukambi dia ndi mena.” Ɔkɔndɔ mbutaka ɔnɛ: “[Jehowa] akadihula ashu w’olongo ako, ku ashu andi wakadiho. Enyi ku ukungu wambulula too la falasa la pusupusu ya dja l’utshimba wa Elisha.” (2 Khum. 6:15-17) Wetshelo akɔna wakokaso nkondja oma l’ɔkɔndɔ ɔsɔ ndo ekina wa lo lɔsɛnɔ laki Elisha?

Elisha komboka alembe w’ase Suriya wɔɔma nɛ dia nde akayaɛkɛka le Jehowa ndo akɛnaka ekokelo kaki Nzambi. Kaanga mbahatalongamɛ ahindo ɛlɔ kɛnɛ, tekɔ lo mɛna dia Jehowa kokɛka ekambi ande lo tshɛ kawɔ. Lo yoho mɔtshi, sho lawɔ ningama la mponda ndo la pusupusu ya dja. Naka sho ‘mbaɛnaka’ la washo aso wa mbetawɔ ndo ndjaɛkɛka le Nzambi, kete ‘tayodjasɛka lo wɔladi’ ndo tayokondjaka ɛtshɔkɔ wa Jehowa. (Osam. 4:8) Nyɛsɔ tɔsɛdingole wahɔ wakokaso nkondja oma lo ɛkɔndɔ ekina wa lo lɔsɛnɔ laki Elisha.

ELISHA AMBOTATƐ NKAMBƐ ELIDJA

Lo diaaso dimɔtshi etena kakakambaka Elisha ekambɔ, omvutshi Elidja akasukana la nde ndo akɔɔlɔtsha okutu ande w’omvutshi. Elisha akeyaka kɛnɛ kakalembetshiyaka tshelo shɔ. Nde akasale dambo dia ndakana l’ambutshi ande ko akaatshike dia tokamba kaamɛ la Elidja. (1 Khum. 19:16, 19-21) Lam’ele Elisha aki suke dia kambɛ Nzambi lo ndjela akoka ande, nde akayokomaka ehomɔ kaki Jehowa ndo nde akayokamba oko omvutshi lo dihole dia Elidja.

Elisha akakambɛ Elidja ondo ɛnɔnyi esamalo w’etondo. L’etena kɛsɔ tshɛ, ‘Elisha akɛmbɛka Elidja ashi l’anya.’ (2 Khum. 3:11) Lo nshi shɔ, anto waki la mbekelo ka ndɛka diangɔ l’anya, nɛ dia vɔ komonga la nsɔmɔ, tokuwa kana diangɔ dikina dialɛwɔ la diɔ. L’ɔkɔngɔ w’olelo, okambi akatɛka ashi l’anya wa nkumɛnde dia nde nsola anya. L’atei w’elimu wakakambaka Elisha mbaki ndo elimu wa la ngelo. Koko kanga mbakidiɔ ngasɔ, nde akɔsaka woho wakinde okambi waki Elidja la nɛmɔ di’efula.

Ɛlɔ kɛnɛ, Akristo efula wekɔ lo ndjasha lo toho totshikitanyi t’olimu wa lo tena tshɛ. Lo nsala ngasɔ, vɔ tshutshuyamaka oma lo mbetawɔ ndo oma lo nsaki kele la wɔ ka ndjasha la wolo awɔ tshɛ l’olimu wa Jehowa. Elimu ɛmɔtshi nɔmbaka dia vɔ ntshika ngelo yawɔ, ɛnyɛlɔ lo Bɛtɛlɛ, lo wokelo wa Mbalasa ya Diolelo ndo l’elimu ekina, mbuta ate elimu wahɔshi anto efula la nɛmɔ. Ndooko Okristo wahomba mfɔnya di’elimu ɛsɔ bu ohomba kana wekɔ anyanya nɛ dia Jehowa mbaɔsaka la nɛmɔ di’efula.​—Hɛb. 6:10.

ELISHA AKI LA KƆLAMELO LO OLIMU ANDE

La ntondo ka Nzambi ‘mɛmba Elidja lo loowa lo tshimbo ya ponganɛndji’ nde akawotɛ dia nde mumɔ oma la Ngilingala ko ntshɔ otsha la Bɛtɛlɛ. Elidja akatɛ Elisha diaha nde ntshɔ la nde, koko Elisha akawotɛ ate: “Dimi halûkutshika.” Etena kakawatatshɔka, Elidja akatɛ Elisha mbala hiende y’etondo dia nde ntshikala. (2 Khum. 2:1-6) Diokanelo diaki lam’asa Elisha la Elidja aki oko nɛ diaki lam’asa Ruta la Naɔmi. (Ruta 1:8, 16, 17) Lande na? Nɛ dia Elisha akangɛnangɛnaka diɛsɛ diakawosha Nzambi dia nde tasambishaka kaamɛ la Elidja.

Elisha mɛtɛ akatotshikɛ ɛnyɛlɔ k’oshika. Naka tambolongola waɛsɛ amɔtshi l’okongamelo waki Jehowa, kete tayowaɔsa la nɛmɔ di’efula naka sho mbohɔka ɔnɛ Jehowa mbakambɛso olimu. Ndooko diɛsɛ dioleki sɔ.​—Osam. 65:4; 84:10.

“ONOMBE KENE KAHUMBAMI NKUTSHELA”

Etena kakawatatshɔka, Elidja akatɛ Elisha ate: “Onombe kene kahumbami nkutshela ntundu dimi latosama uma le ye.” Elisha aketsha wahɔ wa lo nyuma lo dihole dia ntondo oko wakasale Sɔlɔmɔna ɛnɔnyi efula la ntondo kande. Nde akalɔmbɛ Elisha dia mbotshikɛ ‘tenyi pende dia nyuma kaki la nde.’ (1 Khum. 3:5, 9; 2 Khum. 2:9) L’Isariyɛlɛ, ɔna pami l’enondo akalongolaka diangɔ di’okitɔ tenyi pende. (Euh. 21:15-17) Ɔnkɔnɛ, Elisha akalɔmbɛ Elidja dia nde monga okitɔ ande wa lo nyuma. Mbokɛmaka dia Elisha akakombolaka dia monga la woho wa dihonga diaki la Elidja laki la ‘nsaki k’efula ka nkambɛ Jehowa.’​—1 Khum. 19:13, 14.

Kakɔna kakakadimola Elidja lo kɛnɛ kakɔlɔmbɛ okambi ande? Nde akawotɛ ate: “We ambonomba engo keli wulu. Keli naka we ayumenda lam’ayumosama uma la le ye, dikambo so diayutshama. Keli naka kema, dio hadiutshama.” (2 Khum. 2:10) Mɛnamaka dia ekadimwelo waki Elidja waki la elembetshiyelo ehende. Olembetshiyelo wa ntondo mɛnyaka dia paka Nzambi mbakakoke nshikikɛ dia kana Elisha akakoke nongola kɛnɛ kakandalɔmbɛ. Olembetshiyelo wa hende ele, dia Elisha nongola nyuma kɛsɔ, nde akahombe ntshikala kaamɛ la Elidja polo lo nyɔi.

KƐNƐ KAKƐNYI ELISHA

Kakɔna kakasale Nzambi etena kakalɔmbɛ Elisha nyuma kaki Elidja? Bible mbutaka ɔnɛ: “Lam’akawatatshokaka watasawula, wenyi ku pusupusu ka dja la falasa ya dja yambâkakitula. Ku Elidja akambela lu punganendji utsha l’ulungu. Elisha akenyi dikambu diako.”a Ɔsɔ aki okadimwelo waki Jehowa lo kɛnɛ kakalɔmbaka Elisha. Elisha akɛnyi wambonya Elidja oma lalende, wambowosha nyuma kaki Elidja kakandalɔmbɛ ndo ambokoma okitɔ w’omvutshi Elidja.​—2 Khum. 2:11-14.

Elisha akalɔtɛ okutu ande w’omvutshi wakootshikɛ Elidja. Okutu ɔsɔ mbakatatɛ mbeeyanya oko omvutshi waki Nzambi. Ɔsɔnamelo ande wakɛnama lo sɛkɛ etena kakandahembola ɔkɛdi wa Jɔrdana l’ahende.

Elisha akambe efula etena kakandɛnyi Elidja ambɔsama lo loowa. Ndo nto, laasɔ ko ndooko onto lambɛnaka mponda ndo pusupusu ka dja. Awui asɔ wakashikikɛ dia Jehowa ambokadimola lo kɛnɛ kakalɔmbɛ Elisha. Eelo mɛtɛ hatɛnyi mponda kana pusupusu ka dja etena kakadimola Nzambi alɔmbɛlɔ aso. Koko sho koka nshihodia dia Nzambi ambokamba la wolo ande dia toshikikɛ dia lolango lande lambosalema. Ndo nto, etena kɛnaso woho watshɔkɔla Jehowa etenyi ka la nkɛtɛ k’okongamelo ande, kɛsɔ ‘mɛnyaka’ woho wakamba pusupusu kande ka l’olongo olimu.​—Ezek. 10:9-13.

Elisha akahomana l’awui efula lo lɔsɛnɔ lande wakooshikikɛ dia Jehowa ekɔ la wolo wahadjama anya. Ɔnkɔnɛ, nyuma kaki Jehowa kakakimanyiya omvutshi ɔsɔ dia nde nsala ahindo 16, ndeka wanɛ wakasale Elidja ndodia l’ahende.b Mbala ka hende kakɛnyi Elisha mponda ndo pusupusu ya dja aki etena ka paa la Datana oko wɛnyamidiɔ lo mbɔtwɛlɔ ka sawo nɛ.

ELISHA AKAYAƐKƐ LE JEHOWA

Kaanga mbakandadingama l’atunyi la Dɔtana, Elisha komboka wɔma. Lande na? Nɛ dia nde aki la mbetawɔ ka wolo le Jehowa. Sho lawɔ pombaka monga la mbetawɔ ka ngasɔ. Ɔnkɔnɛ, nyɛsɔ tɔlɔmbake Nzambi nyuma ka nde k’ekila dia sho monga la mbetawɔ ndo la waonga akina w’olowa wa nyuma.​—Luka 11:13; Ngal. 5:22, 23.

Kɛnɛ kakasalema la Dɔtana kakasha nto Elisha ɔkɔkɔ wa nde ndjaɛkɛ le Jehowa ndo lo ekokelo k’alembe ande wahɛnama. Elisha akeyaka dia Nzambi akatome andjelo ande dia vɔ ndjodinga osomba ndo wanɛ tshɛ wakadjasɛka lɔkɔ. Lo mbetɛ atunyi totshungu, Nzambi akakokɛ Elisha nde l’okambi ande lo yoho ya dihindo. (2 Khum. 6:17-23) L’etena ka paa kɛsɔ ndo lo tena dikina dia wolo, Elisha aki la mbetawɔ ndo akayaɛkɛ tshɛ le Jehowa.

L’ɛnyɛlɔ kaki Elisha, sho lawɔ pombaka ndjaɛkɛ le Jehowa Nzambi. (Tuk. 3:5, 6) Naka sho nsala ngasɔ, kete ‘Nzambi ayotoka kɛtshi ndo ayotɔtshɔkɔla.’ (Osam. 67:1) Eelo mɛtɛ hatotodingama la mponda ndo la pusupusu ya dja lo yoho ya mɛtɛ mɛtɛ. Koko lo “mfɔnu ka woke” kayaye, Jehowa ayokokɛ nkumbo kaso ka l’andja wotondo lo tshɛ katɔ. (Mat. 24:21; Ɛny. 7:9, 14) Ɔnkɔnɛ, nyɛsɔ tohɔke nshi tshɛ dia “[Nzambi] keli eshamelu kasu.”​—Osam. 62:8.